Lukasi 23
23
Jesusi kughutho waPilatusi
(Mat 27:1–2, 11–14; Mark 15:1–5; Joh 18:28–38)
1Munyima ko kwimana mbongarero dhodhiheya dhi tware Jesusi kwaPilatusi. 2Ko kutanga kwawo kwawo kumurundera eshi: “Tuna yi wana, munu yu yo ghana kupemukitha diko dyetu. Aye gha shinga hanu eshi kadi wa kuketa kwamuraghuri, no gha kutoya eshi yoKristusi ghofumu.”
3Ha mwipura Pilatusi eshi: “Yowe fumu waWajuda ndi?” Jesusi gha mu huthire eshi: “Ghothinda ghuna kuyighamba.”
4Po gha ghamberire Pilatusi kwawapristeri hohakuru no kumbunga eshi: “Mbadi na kuwana murandu mwamurume yu.”
5Awo handadhokire no ha ningire eshi: “Ghana mana kukoshakosha diko dyodiheya dyomuJudeya noyihonga yendi. Gha tangerera kuGalileya kate kuna kuma kuno.”
Jesusi kughutho waHerodesi
6Apa gha yuvire Pilatusi yaGalileya, ghepurire eshi, murume yu ne mukaGalileya ndi. 7Pakuyimona kemo eshi mumukunda waHerodesi gha tunda, ko kumutuma kwendi kwaHerodesi, oyu gha karire mumayuwa gha muJerusalema. 8Apa gha mu monine Herodesi Jesusi, gha shambererire thikuma, yoyi gha karire thivaka thothire nomahimeno ghokumumona, pakuyuvanga yingi yokukwendi. No gha kuruperire eshi gha tende ko thitetukitho gha thi mone. 9Ko kutanga Herodesi kumwipudhura mepwero ghomengi, ene Jesusi mbadi gha mu huthire non̂umbu temba. 10Popo, hapristeri hohakuru nawakamarukwaro kokumwiman̂anyena ha mu pe murandu. 11Herodesi nawamashurundate wendi, ha mu pethire thikuma no kumushamuna. Ha mu shupeka kwendi thivata thothiwa no kumusherera, ndani ghana kumutuma kwaPilatusi. 12Mudiyuwa di ha karire ghushere haHerodesi naPilatusi. Yoyishi pakutanga ne ha kudhimbire.
Pilatusi ghana kutapa Jesusi eshi ha mu pamarere
(Mat 27:15–26; Mark 15:6–15; Joh 18:39—19:16)
13Munyima dhokenge yo, ko kukongwedha Pilatusi hapristeri hohakuru nawatapi muragho nawanu wahe pofotjie. 14Ho gha ningire kukwawo eshi: “Oyu munu, muna mu reta kukwange yira mukakudhongera diko. Apa no, na shana murandu mwamunu yu kughutho wenu. Ene mbadi na wana thimuhetitha thendi thomumwenu. 15NaHerodesi naye temba, yoyishi ghana ka mu hutha karo kukwetu. Mbadiko thi gha tenda thokumukokerera kukufa. 16Na kumutapa mu mu mwashure, ho ni mu thighe.” 17Karo gha karire mahimeno ghaPilatusi ghokuwashutwera mukan̂otwa, mudifeste dyoPaska.
18Ene mbunga dhodhihe dha kushomononine eshi: “Kadi murume gho yira yu: Shwaghe papendi! Tu shutwere Barabasi!” 19Barabasi, gha karire mudorongo, pamurandu ghoyishatadhana yomumbara, no yoghupaghi.
20Yoyi Pilatusi gha shanine kushutura Jesusi, yo ghaghamberire karo nawo. 21Awo ne handadhokire eshi: “Ghu mu pamare kuthikurushe, ghu mu pamare kuthikurushe!”
22Paruhatu ha wepura Pilatusi eshi: “Yinye ne gha tenda yu murume? Mbadi na wana thinu thokupaghitha muhunga yu. Yodigho, na kumutapa ha mu mwashure, ho ni mu thighe!”
23Awo ne ha kon̂otwedhire thikuma wandadhoka noghuhima eshi, ha mu pamarere Jesusi. Pakwandadhoka kwawo, po ha witherire yoyihe. 24Pilatusi ha ghamba eshi, yi kare thika di hana himi. 25Kokushutura kwendi murume oyu gha karire noyishatana yoghupaghi, thika di ha himine. Na Jesusi gha mu tapire naye kumahimeno ghawo.
Kuna kumupamarera Jesusi
(Mat 27:31–44; Mark 15:21–32; Joh 19:17–27)
26Oku shime ha karera mundhira dhokumutwara kumapamarero ko kupitura kwawo Simoni ghomukaSirene oyu gha ka shwaghererire kununda dhombara. Naye ha mu kambekire thikurushe gha shimbe munyima dhaJesusi.
27Mbunga dhodhikuru dha mu kuthire Jesusi, no mumwawo mwa karire hakamadi wa ha mu tokoterire no ha mu direrire. 28Ene Jesusi gha wa thetukire no gha ningire kukwawo eshi: “Mwakamadi waJerusalema, mwa ni direra me, ene mu kudirere mwathinda nawanenu. 29Yoyishi mbo gha neya mayuwa agha mbo ha ninga eshi: ‘Dhikuru fiyaghudhi kwawambumi no kumara gha gha dhira kureta hana pakaye, no kukorera temba.’
30“Opo, po mbo ha ninga kumarundu eshi:
‘Mu tu mbandukere!’
no kuyimbandaghuru eshi:
‘Mu tu fike!’
31Yoyishi ngeshi ha yi tendi wo kuthitondo thothiyu, ngepi mbo yi kara kuthitondo thothikukutu?”
32Pa karire karo haringi‐ringi hawadi, awa ha pwire kupangwera pofotji naJesusi kukufa. 33Apa ha kumine padyango edi ha tire eshi dyango dyokateneghere, ko kumupamarera Ye, nawaringiringi hawadi. Yofotji kurudyo rwendi no ghumweya kurumoho rwendi. 34Ko kuninga Jesusi: “Tate, ghu wa thigherere, yoyi mbadi hana dimuka eshi nye hana kutenda!” Munyima ha kutaperire yivata yendi hokere po hanga. 35Mbunga dhodhihe dhemanine po no kuyirondonona. Hapanguri wawo, ha mu kumadhekire ghuninga eshi: “Hamweya ghana ghamwenanga. Gha kughamwene ne thinda, ngeshi yoKristusi oyu gha pwire kutorora kwaNyambi.”
36Hamashurundate nawo ha pokanine kughutho no ha mu shererire. Ko kumunwitha kwawo vinyu ghomasheshe, 37no ha ningire eshi: “Ngeshi yowe fumu waWajuda, kughamwene ghothinda.”
38Pa karire karo yitjanga peghuru dhendi eshi: “Oyu ne yofumu waWajuda.”
39Yofotji ghopawaringi‐ringi oyu hambire po naye, gha mu shamunine ghuninga eshi: “Kadi yowe Kristusi ndi? Kughamwene ghothinda natwe.”
40Ghumweya gha mu shingire eshi: “Mbadi wa yapa Nyambi ndi, ngambi kenge ghuna kara muyipangwera yofotji nendi? 41Kukwetu ne ghuhunga, yoyi tuna wana mahumbero ghoyitenda yetu. Aye yu ne mbadi gha tenda thothiyi nokamanana temba.” 42Munyima gha ningire kwaJesusi eshi: “Ghu ka ni vuruke ko apa sho ka kume mughufumu ghoye.”
43Jesusi gha mu huthire eshi: “Kemo, yashemwa na kukutongwera eshi: Dyarero sho ka kare nange muParadishi.”
Kuna kufa Jesusi
(Mat 27:45–56; Mark 15:33–41; Joh 19:28–30)
44Pakukuma yira kumutwekatji, ko kukara makokore muditunga dyodiheya, kate kunako dhothitengeyuwa. 45Yoyishi dya vindigherire diyuwa. Dihina dyongonda dhotembeli, dya yatukire mukatji. 46Ko kukugherera Jesusi thikuma eshi: “Tate, munyara dhoye na kutapa mudhimu wange.” Munyima dhoman̂ando gha, ko kuhurangedha mun̂u wendi.
47Apa gha yi monine nduna, ha kughu kwendi Nyambi no gha ningire eshi: “Shemwa murume yu ne gha pira murandu.”
48Hanu waheya awa ha konganine kukunakenga no kumona eyi ya hokokire po, ha huka‐hukire kumaghumbo ghawo noghuguva. 49No hahakwa Jesusi wahe pofotji nawakamadi hokuGalileya awa ha mu kuthire, hemanine kokayenda kamanana. Nawo karo ha monine yinu yoyiheya yi.
Kuna kumuvumbeka Jesusi
(Mat 27:57–61; Mark 15:42–47; Joh 19:38–42)
50Gha karire po murume ghumweya ghodina dyoJosefu oyu gha tundire mudighumbo dyaWajuda muArimateya.
51Gha karire munongo nomuhunga, no gha tatererire mwiyero ghoghufumu waNyambi. Ngambi kenge gha karire mukamuragho, mbadi gha kunungire nawo eshi gha tawe kuyinu yonyara‐nyara. 52Aye gha yendire kwaPilatusi, gha ka kumbere mwimba wa Jesusi. 53Apa gha manine kuwambura kuthikurushe, ko kughudhinga nomahina ghomakenu, ho gha ghu vumbekire mumbira dhomawe, edhi ha tjokire, omu ha dhirire kuvumbeka panganyi ghumweya. 54Diyuwa di ne muGhukwoko, oku dina kukokera diyuwa dyoSabata.
55Hakamadi wa ha tundire naJesusi kuGalileya, nawo ha yendire pofotji kumbira, ha ka mone eshi ngepi di hana ka horeka mwimba wendi. 56Munyima ha hukire kukwawo, ha ka kurongerere maghadhi ghothiwe mwene nomunde. MuSabata ha turumuthire thika di wa karire po muragho.
Currently Selected:
Lukasi 23: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
