Lukasi 6
6
Jesusi ne yoFumu ghoSabata
(Mat 12:1–8; Mark 2:23–28)
1Parumweya mudiyuwa dyoSabata, ko kutjinaghana Jesusi nawakathishongero wendi mumapya. Hakathishongero wendi, ha tjorire mbeya no ha fenyine ha tafune. 2Hamweya hopa Wafarasayi, ha ningire eshi: “Nye muna kutendera yinu eyi ha dhira kufundhwera muSabata eshi, ha yi tende?”
3Jesusi gha wa huthire eshi: “Mbadi mwa toya panganyi, eyi gha tendire Davita apa gha fire ndhara ye, nawa ha karire nendi ndi? 4Ghengenine mundhugho dhaNyambi no gha tumburire ghuroto ghomuyambo gha dye, ho gha tapire karo kwawa ha karire nendi. Ene noyofotji temba oyu ha fundhwerire kudya ghuroto ghu, shimengwa hapristeri pithawo.”
5Ho gha wa tongwerire shime eshi: “Mwanamunu ne yoFumu ghoSabata.”
Murume ghokughara dyoko
(Mat 12:9–14; Mark 3:1–6)
6MuSabata ghumweya, gha yendire karo musinagoge gha ka honge hanu. Musinagoge mo, mwa karire murume ghokughara dyoko dyorudyo. 7Hakamarukwaro naWafarasayi, ha mu konekire Jesusi eshi, ngwa n̂anyi gherukithe ghumweya mudiyuwa dyoSabata, ha kone kumuheta. 8Ene ye gha dimukire yighayara yawo, no gha ningire kwamurume ghokughara dyoko eshi: “Wiye, no wimane mukatji kawo.” Naye gheyire no ghemanine mukatji kawo. 9Jesusi gha ningire kukwawo eshi: “Kwipura na kumwipura eshi: Munu ne kukona kutenda ghuhunga muSabata ndi, endi kutenda ghuyi, kuparitha, endi kupagha?” 10Apa gha manine kuwarondonona wahe, gha ningire kwamurume eshi: “Ghonyonone dyoko dyoye.” Naye gha yi tendire no dyoko dyendi dyerukire.
11Ko kuyoghotera wahe no ha patire thikuma gho ha ghambathanine eshi, ngepi di sha mu tende Jesusi.
Jesusi ghana kutorora hapostoli dikumi nohawadi
(Mat 10:1–4; Mark 3:13–19)
12Mumayuwa ghogho, gha dhinine Jesusi kudirundu, gha ka rapere ghuthiku ghohughe kwaNyambi. 13Apa dya vire diyuwa, ghethire hakathishongero wendi no gha torire mumwawo dikumi nohawadi, awa gha tire eshi hapostoli. 14Pa karire Simoni, oyu gha tire eshi Petrusi, naminendi Andreyasi, Jakobusi naJohannesi, Filipusi naBartolomeghusi, 15Mateghusi naTomasi, Jakobusi ghomwana Alfeghusi, naSimoni oyu ha tire eshi mununeki, 16naJudasi ghomwana Jakobusi, naJudas Iskariyoti oyu gha karire munyathi.
Yitenda yoyiwa kwakehe munu
(Mat 4:23–25; Mark 3:7–12)
17Munyima ko kushuruka nawo kudirundu, no ha kemanine padyango dyokudyatama, apa dya karire dikuta dyawakathishongero wendi, nombunga dhomuJudeya yomuhe, nawakaJerusalema, nawakamukunda waTirusi naSidoni, mwa shwaghire hanu hohengi. 18Awa heyire kukumutegherera no kumerukitho ghoyikorwa yawo. Nawa ha nyandire kumipepo dhodhimango, nawo ha pwire kwirukitha. 19Hanu wahe ha yerekire eshi ha mu kundame, yoyishi ngcamu dha tundire mumwendi ho gherukithire waheya.
Fiyaghudhi noyinyanda
(Mat 5:1–12)
20Ko kukambura Jesusi meho ghendi pawakathishongero wendi ghuninga eshi:
“Mwakaruvigha mwe mwahepwe,
yoyishi wenu ghutungi waNyambi.
21Mwakaruvigha mwe muna kufa ndhara,
yoyishi mbo mu nekuta.
Mwakaruvigha mwe muna kudira,
yoyishi mbo muna heka‐heka.
22Mwakaruvigha mwe ngeshi ha mu dhimbi hanu
no ngeshi mbadi hana kumudimuka no kumuswahura
no kundhanya mena ghenu yira thinu
thothimango muDina dyaMwanamunu.
23Mu shamberere mudiyuwa di
no mu shambe kuyiyumbaghuka
yoyishi ndjambi dhenu ne dhikuru mudiwiru.
Hakerekandongo wawo kemo dya tendangire roruhe nawaporofeta.
24Ene mu tokote mwatungi,
yoyishi mwa yongaritha yipara yenu yoyiwa.
25Yitokota yina taterera mwakakwikuta,
yoyishi mbo muna fu ndhara.
Mu tokote mwakakuheka‐heka,
yoyishi mbo muna kudhekera no kudira.
26Mu tokote mwe hana kukugha hanu,
yoyishi hakerekandongo wawo,
dya tendire kwawaporofeta hombango.”
Ruhakitho rokwawan̂ore
(Mat 5:38–48; 7:12a)
27“Ene na kughamba kukwenu mwakakutegherera kukwange eshi: Mu hake han̂ore dhenu, no mu tende ghunongo kwawakakumudhimba. 28Mu kandadheke hakakumukuta no mu raperere hakakumunyandeka. 29Ngeshi ha kupumura ghumweya paditama, mu pirwere karo dimweya. Noyu ghana tumbura thivata thoye thopeghuru, wa mu shweneka karo thokwishi. 30Kehe yu ghana kukukumbera thinu, mu pe vene; no wa hutha thinu thoye, ngeshi ghana thi tumbura ghumweya. 31Mu ghamwene hamweya, thika di mwa hima kukughamwena mwathinda.
32“No ngeshi ha mu haka awa ha mu haka keho, matumero munye sho mu wane po? Yoyishi hayiharuri, ha haka nawo awa ha wa haka. 33Karo ngeshi ha mu tendi ghunongo kwawa ha mu tendera ghunongo, matumero munye sho mu wane po? Hayiharuri, kemo ha tendanga nawo. 34No gheshi ha mu yadhima manyinga kwawa mwa kurupera eshi mbana gha hutha ne, thinu munye mbo mu wana po? Hayiharuri nawo ha yadhimanga kwawayiharuri eshi, mba yi wa huthere thika di ha yi wanine. 35Eyi ne kadi kemo, mu hake han̂ore dhenu no mu wa yadhime mu kudhira kuyimuhuthera, ndani po mbo yi vura yiruwera yenu. Ho mbo mu kare hana Shokuru yoyishi ye ne munongo kwawakakupira matumero no kwawaringiringi. 36Mu kare nothin̂eke, thika di gha kara Wihenu nothin̂eke.
Mwa kutetera ndhango
(Mat 7:1–5)
37“Mwa tenda ndhango,
namwe ngo mbadi mba mu tendera ndhango.
Mwa kutetera ndhango,
namwe ngo mbadi mbo ha mu terera ndhango.
Mu thigherere,
namwe mbana mu thigherera.
38Mu tape, namwe mbana yimu pa.
Nothiyedhekeritho thothiwa thokurikanya,
mbana thi pu pa.
Yoyishi thiyedhekeritho thi muna kuyedhekeritha mwe,
namwe tho mbo ha mu yedhekeritha.”
39Ha ghamba karo kukwawo mumaghanekero eshi: “Mukunga ne kukona kukoka mukunga muyendhendi ndi? Kadi wa kuwera mughuwadi wawo mudikwina ndi? 40Thihongwana, mbadi gha kona kukurikanya nathihongwa thendi.
41“Nye ghuna kumonena kapara komudiho dyamuyendhoye, ene mutambo ghomudiho dyoye mbadi ghuna kughudimuka. 42Owe ghuna kudhira kumona mutambo ghomudiho dyoye, ngepi di sho ninge kwamuyendhoye eshi: ‘Mundenge, wiye ni kutundithe kapara komudiho dyoye’? Ghomukadifurumeko! Shwaghithe tango pakutanga mutambo ghomudiho dyoye, ndani po sho kone kumona thiwana pakushwaghitha kapara komudiho dyamuyendhoye.
Thitondo kuthidimukera kumbuyo dhatho
(Mat 7:17–20; 12:34b–35)
43“Kadi thitondo thothiwa thokwima mbuyo dhodhimango. No thitondo thothimango temba mbadi tha kona kwima mbuyo dhodhiwa. 44Kehe thitondo hana kuthidimukera kumbuyo dhatho. Kuyitondo yoghuthu, mbadi gha kona munu kukokora ko n̂uyu. No kuyipumbu yomakona mbadi gha kona kutjora ko mandjembere. 45Munu ghomuhunga ghana kuhokora mumutjima wendi ghushwi ghoyinu yoyihunga. No mumango ghana kuhokora mumutjima wendi ghushwi ghoyinu yoyimango. Yoyishi, eyi ya yara mumutjima wendi, ghana kuyishwaghitha kanwa.
Tushemandhugho tuwadi
(Mat 7:24–27)
46“No yinye muna kunitoyera me eshi: ‘Hekudyange, Hekudyange,’ ene mbadi muna kutenda eyi na kughamba? 47Kehe yu ghokwiya kukwange no kutegherera kuman̂ando ghange no kughatenda, na kona kumutjwathanitha eshi, thika dye gha pitura ye. 48Aye gha pitura yira munu ghokushokeka ndhugho edhi gha thimine mughudhungi no kudhishokekera pamawe. Apa gheyire mashandjiva no kupoposhera kundhugho, mbadi dha konine kuwa, yoyishi dha tanarire kushokeka. 49Ene yu ghokutegherera no mbadi ghana kutenda thika di na ghamba Me, gha pitura yira munu ghokushokeka ndhugho dhokupira kashemandhugho. Pakwiya mashandjiva gha kurambure kundhugho, ko kumbandaghukera ndugho pawangu-wangu, no mambandaghukero ghadho, gha kara makuru thikuma.”
Currently Selected:
Lukasi 6: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
