Lukasi 7
7
Merukitho ghamupika nyami
(Mat 8:5–13; Joh 4:43–54)
1Apa gha manine kuyuvitha Jesusi man̂ando ghendi kumbunga, ko kuyenda kwendi kuKafarnaghumu. 2Nyami, gha karire namupikendi yu gha kuruperire. Mupika yu gha korwire no gha shanine kufa. 3Nyami gha yuvire yaJesusi no gha tumine manduna ghawaJuda kukwendi, ha mu kumbere eshi gheye na gherukithe mupikendi. 4Pakukuma hamanduna kwaJesusi, ha mu kandererire eshi: “Kukwendi ne yarikanya eshi ghu yi mu tendere. 5Yoyishi gha haka diko dyetu no gha tu tenderire masinagoge kumahimeno ghendi.”
6Kutunda po ha yendi Jesusi pofotji nawo. Kughutho ghokukokera Jesusi kundhugho, kokutuma nyami hayendhendi ha mu tongwere eshi: “Fumu wa kutwamitha, yoyishi ame ne mbadi na fumana eshi owe ne wingene mundhugho dhange. 7Yo na dhiri kukufumaneka nothinda kuyenda kukoye. Ghambe n̂ando vene, namupikange ghana kwiruka. 8Ame nothinda na kara no katutughuru ghokwishi dhomuragho, no na kara nawashurundate kwishi dhange. Oyu na kutongwera eshi: ‘Yende!’ naye ghana kuyenda; no kwaghumweya eshi: ‘Wiye!’ naye ghana kwiya. Kwamupikange na kuninga eshi: ‘Tende thi!’ naye ghana kuthitenda.”
9Apa gha yi yuvire yi Jesusi, gha tetukire. Ha thetuka kwendi kwawanu wa ha mu kuthire munyima no gha ningire eshi: “Kutongwera na kumutongwera mwe eshi: No muIsragheli temba mbadi na monine munu ghomatawero yira yu.”
10Apa ha hukire hayitumi kudighumbo, ka mu wana mupika ne ndjewa‐ndjewa vene gha neruka.
Matumweno ghamwana mudidhi ghokatughuru muNaghini
11Kapupi kamanana pakumana yi, ko kuyenda Jesusi kudighumbo dyodina Naghini. 12Hakathishongero wendi nombunga dhodhihe dhawanu dha yendire pofotji nendi. Apa gha kumine pepi nodikorogho dyodighumbo, ha mono kwendi mufu hana kushwaghitha eshi ha ka mu vumbeke. 13Aye ne yombedi‐n̂omba wamudidhi. Thingi thawo hakadighumbo di ha yendire pofotji nendi. Apa gha mu monine Fumu gha mu dhekerire n̂eke thikuma no gha ningire kukwendi eshi: “Wa dira!”
14Ko kuhenya kwendi gha kwate kuthirongo. Hakakushimba hemanine, ho gha ningire Ye eshi: “Mungaghu, kuna kukutongwera eshi, tumuke!” 15Ko kukotoka mufu no gha tangire kughamba. Jesusi, ha mu neghedha kwanyina.
16Waheya ha tutukwire no ha kughire Nyambi ghuninga eshi: “Muporofeta ghomukuru ghana kuhokora pakatji ketu, naNyambi ghana thetuka diko dyendi.”
17Thihokoka thi, tha pupanine muJudeya yomuhe nomuyiko yoyiheya yomumukunda ghu.
Jesusi nomepwero ghaJohannesi ghoMukadiyoghero
(Mat 11:2–19)
18Hakathishongero waJohannesi, ha mu reterire yinu yoyiheya yi ha yi mu tongwere. Ko kwitha kwendi hawadi, 19no gha wa tumine kwaFumu ha kepure eshi: “Yowe yu wa yuka eshi mbo ghu neya, endi tu taterere ghumweya?”
20Pakukuma wa harume kwaJesusi, ha ghambire eshi: “Johannesi ghoMukadiyoghero ghana tu tumu na tu kwipure eshi: ‘Yowe yu wa yuka eshi mbo ghu neya, endi tu taterere ghumweya?’ ”
21Shime ha karera kenge yo ko kwirukitha Jesusi hakakukorwa hohengi popo, kuyikorwa yawo no kushwaghitha mipepo dhodhimango no kumonitha hakunga hohengi. 22Ha tongwera kwendi hakamushongwe eshi: “Mu yende mu ka mu tongwere Johannesi eyi muna mono no yi muna yuvu: Hakunga kumona hana kumona karo, hayi nhwere kuyenda hana kuyenda, hakayin̂ondwe ha neruka, hayipurupuru kuyuva hana kuyuva, hafu kuna kuvumbuka, hahepwe kuna kuwayuvitha mbudhi dhodhiwa. 23Ene mukaruvigha oyu ghana kudhira kutamangera muMwange.”
24Munyima dhokuhuka hayitumi yaJohannesi, ko kutongwera Jesusi mbunga yokuhata kwaJohannesi eshi: “Nye yi nga mu yenderanga mumamboreya, kukumona nye? Kukambu kokupunga‐punga ndi? 25Kadi kemo? Ene nye nga mu yenderanga mu ka mone? Murume ghokuvata yitere yodifuno ndi? I, i mu mone, oyu ghokuvata yitere yoyiwa no kupara mughunu mwene, mumarombe gha kara. 26Endi nye mwa yenderire eshi mu ka mone? Muporofeta ndi? Yashemwa na kumutongwera, oyu ne gha piterera muporofeta! 27Oyu ne ya tjangerire eshi:
‘Mone, na kutuma mukamushongwe
wange kughutho ghoye,
aye ne yo mbo gha roghitha
ndhira dhomwiyero ghoye.’
28“Yo na kumutongwera eshi: Mbadipo pawakapamuve hokupitera Johannesi. Ene kambututu komughufumu waNyambi, kakuru kupitherera ye.”
29Pakuyuva ko hanu wahe nawaketethi, ha mu tegherire no ha kuneghire kumahimeno ghaNyambi eshi ha pwe kuyogha mudiyoghero dyaJohannesi. 30Ene Hafarasayi nawakamuragho ha mwaghire mahimeno ghaNyambi no karo eshi mbadi sha pwe kuyogha kwaJohannesi.
31Fumu gha ningire eshi: “No nye mbo ni rikanyitha diko dyawanu wa? Yira nye ha pitura? 32Awo ne ha pitura yira hanuke awa hana hungumana pambandha ghukwitha eshi:
‘Tuna mushikera pakashigho,
ene mbadi muna kini.
Tuna mwimbera dimbo dyothidiro,
ene mbadi muna diri.’
33“Yoyi Johannesi ghoMukadiyoghero mbadi gha dire ghuroto no kunwa vinyu temba, amwe ne ho muna kuninga eshi: ‘Aye gha kara nashatani!’ 34Mwanamunu gheyire no ghana kudya no kunwa, amwe ne ho muna kuninga eshi: ‘Mu mone, mukadikarapashi no thinwi thovinyu. Muhakwa wawaketethi nawayiharuri.’ 35Ene ghunyanyami waNyambi wa hokoka muyitawa ya wa hana kughukwata.”
Jesusi kwa Simoni ghoMufarasayi
36Ghumweya ghopaWafarasayi, gha mwithire eshi na gha dye kukwendi. Hengena mundhugho dhaMufarasayi no gha hungumanine kuthidyero.
37Mukamadi ghumweya ghomudighumbo di ghothiharuri, gha yuvire eshi Ye ne mundhugho dhaMufarasayi gha di kuthidyero. Ko kudhamuna kwendi kawero nothende, 38no gha yendire gha ka kunyumane kumapadhi ghaJesusi ghudira, kate ghotire mapadhi ghendi kumahodhi ghamukamadi. Munyima ko kukuyura mapadhi nohuki dhendi no gha gha ncumitire ha gha gha wetha kwendi nothende.
39Apa gha yi monine Mufarasayi yu gha mu raghire gha kwipurire thinda eshi: “Ngeshi ngo muporofeta Ye ne, ngo ghana yi dimuka eshi yidye no mukamadi munye yu ghana mu kundama, yoyishi thiharuri yu.”
40Ene Jesusi gha ghambire nendi no gha ningire eshi: “Simoni, na kara nothinu thokukutongwera.”
41Ko kuhutha kwendi eshi: “Muruti, ghambe ngenyu.”
Ko kuninga Jesusi eshi: “Hanu hawadi ha karire mumurandu kwamuyadhimi ghomanyinga. Ghumweya gha yadhimine marandi mathere kwoko na ghumweya makumi kwoko. 42Ene yoyi ha pirire yokuruwera, ko kudhimitha kwendi mirandu dhawahe hawadi. Yidye ghopapawo oyu sho gha mu hake kupiterera?”
43Simoni gha huthire eshi: “Ame ne na kuninga eshi yoyu ghana thigherera manyinga ghomengi.”
44“Mahuthero ghoye ne mahunga thiwana,” ame waJesusi. Ko kupiruka kwendi kwamukamadi no gha tongwerire shime Simoni eshi: “Ghuna mu mono yu mukamadi ndi? Ame ne mundhugho dhoye ni neya, ene mbadi ghuna ni pa meyu ghokumapadhi ghange, aye ne ghana yuritha mapadhi Ghange nomahodhi ghendi no ghana gha kuyura nohuki dhendi. 45Kuncumita mbadi ghuna ni ncumita aye ne kutunda pa gha nengena muno, mbadi ghana huru kuncumita mapadhi Ghange. 46Mutwi wange mbadi ghuna ghu wetha nomaghadhi; aye ne ghana wetha mapadhi Ghange nothende. 47Yo na kukutongwera eshi, maharwero ghendi ghomengi ghana pu kuthigherera yoyishi ghana kara noruhakitho rorukuru, ene oyu hana thigherera ghumbiru, gha kara noruhakitho rorumbiru.”
48Ko kuninga Jesusi kwamukamadi eshi: “Maharwero ghoye ghana pu kuthigherera.”
49Ko kughambathana wa ha karire kuthidyero eshi: “Murume munye yu ghokukona kuthigherera maharwero thinda?”
50Jesusi gha ningire vene kwamukamadi eshi: “Matawero ghoye ghana kughamwena. Yende muthiraro.”
Currently Selected:
Lukasi 7: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
