Lukasi 8
8
Hakamadi wa ha karerire Jesusi
1Mumayuwa ghokuranda ko, gha tjinaghanine Jesusi ditunga no gha yendire tunda mbara yenda dighumbo no kumweya. Kokuheya gha yaghurire no gha yuvithire mbudhi dhodhiwa dhoghufuma waNyambi.
2Hadikumi nohawadi ha karire nendi, nawambuyama hamweya awa gha shwaghithire mipepo dhodhimango mumwawo no kuwerukitha kuyikorwa yawo. Pa karire Maria, oyu ha dimukire eshi Magdalena noyu ha shwaghire hashatani kwoko nohawadi mumwendi 3naJohanna ghomuna Gusa, ghothimbi shokuru waHerodesi, naSusana nawamweya hohengi. Hakamadi wa, kumahimeno ghawo hathinda ha karerire Jesusi nawadikumi nohawadi.
Maghanekero ghamukakukuna
(Mat 13:1–9; Mark 4:1–9)
4Mumaghumbo kumaghumbo ha poposhire hanu kwaJesusi, no apa dha kukongwedhire mbunga pofotji, ko kuwatongwera kwendi maghanekero eshi:
5“Mukuni gha shwaghire gha ka kune mbuto dhendi. Shime gha karera mukukuna, ko kumuwera dhimweya mundhira, ha dhi djata‐djata no yinyunyi ya dhi komongorire. 6Dhimweya ha dhi wera pamambarawe, apa dha menine, ko kukukutera podigho popo. Yoyishi dha pirire wiyu. 7Dhimweya dha wererira mumakona no makona gha kurire pofotji nadho no gha dhi ngambwerire. 8No dhimweya dha wererire mughuyeghave. Dha menine no dha retire mukesho ghowingi.”
Apa gha manine kughamba kemo, ko kukugherera kwendi eshi: “Oyu ghokukona kuyuva gha tegherere!”
Mahimeno ghokumaghanekero
(Mat 13:10–17; Mark 4:10–12)
9Hakathishongero wendi ha mwipurire eshi nye gha ninga maghanekero gha. 10Aye gha huthire eshi: “Kukwenu ya pwa kutapa eshi mu dimuke yithithatero yoghufumu waNyambi. Kwawamweya ne yi kare mumaghanekero.
Ha kenge, ene mbadi hana kumona.
Ha yuve, ene mbadi hana kutjwathana!
Jesusi ghana kutjwathanitha maghanekero ghamukakukuna
(Mat 13:18–23; Mark 4:13–20)
11“Maghanekero gha ne gha ninga ngeno: Mbuto ne n̂ando dhaNyambi. 12Edhi dhokuwera mundhira, dhina kutamba kwawanu wa hana kuyuva n̂ando, munyima ghana kwiya shatani no kudhitunditha mumitjima dhawo eshi maghana sha kume kumatawero no maghana sha pwe kughamwena. 13Dhokuwera pamawe ghomayarara, dhina kutamba kwawakakutambura n̂ando ghushamberera pakudhiyuva, ene mbadi dhina kuwana midhi. Matawero ghawo ne ghamayuwa ghomapu. Kapupi kamanana ngeshi kukara mumayerekero, kare nga tovoha. 14Mbuto dhokuwera mumakona dha tamba kwawakakudhiyuva, ene payikudhekera no paghushwi ghoyipara, dhina kungambwathana no mbadi dhina kureta mbuto. 15Dhokuwera mughuyeghave dhina kutamba kwawakakudhiyuva nomitjima mwene no kudhikunga no pakudhikwata thiwana dhina kureta mbuyo.
Maghanekero ghomunyenge
(Mark 4:21–25)
16“Mbadiko yu ghokumuneka munyenge no kughufika nothinu ngambi kughupaka munahadidi. Ghuhunga ne gha ghu pake pathikora eshi hanu wa hana kwingena mo, ha mone thishe.
17“Yoyishi mbadiko thoghudhindo ethi mbo thi dhira kuhokoka, no thokuhoreka temba ethi mba dhira kudimuka no kushwagha kumwendhenge.
18“Mu koneke ne mwe mwakakutegherera, yoyishi yu gha wana mbana mu wedherera ko, noyu gha wana ho gha ghayara eshi gha wana, mbana yi mu tumbura.”
Hapa Jesusi
(Mat 12:46–50; Mark 3:31–35)
19Hanyina nawamina Jesusi heyire kukwendi. Ene paghukuru nowingi ghombunga dhawanu mbadi ha konine kukuma kukwendi. 20Ko kumutongwera ghumweya eshi: “Hanyoko nawaminoye waya ha nemana panunda no hana shana kughamba noye.”
21Jesusi gha ningire eshi: “Hanawe nawaminange ne awa hana kutegherera kun̂ando dhaNyambi no kudhitenda.”
Jesusi ghana kuporeritha dingundunga
(Mat 8:23–27; Mark 4:35–41)
22Mudiyuwa dimweya gha peramine Jesusi muwato nawakathishongero wendi, no gha wa tongwerire eshi: 23“Mu tu tjinaghane thambodiya dhodikuruviya.”
Nawo ko kutjinaghana, oku shime ha karera mukutjinaghana, ko kupothomokera Jesusi muturo. Ko kwiman̂anya dingundunga dyodikuru padikururviya nowato wa shanine kurowera gho ha karire mumaghukukutu. 24Gho ha ndandumukire kwaJesusi ghumupindutha eshi: “Muruti, Muruti, ko kurowera twe!”
Munyima gha pindukire no gha shingire dingundunga nomangumbi. 25Ko kutunda po kwayo, no kwa karire nyiki. Jesusi gha ningire kukwawo eshi: “Kupi ne matawero ghenu?”
Awo ne ha tutukwire no ha yapire no ha ghambathanine eshi: “Aka‐shadi, yidye Yu? Aye ne kurawera dingundunga nomangumbi, nayo yina kumuyuva!”
Merukitho ghamukamipepo dhodhimango
(Mat 8:28–34; Mark 5:1–20)
26Kutunda po ko kuvugha kwawo ha yende kuditunga dyawakaGadara, edi dya kuhatire pepi naGalileya. 27Apa gha thekerire, ko kumuhangana murume oyu gha shwaghire mudighumbo di. Aye ha mu nyikire hashatani, no gha karire thiheha mayuwa ghomahe, no mundhugho mbadi gha karire mo shimengwa mumambira. 28Apa gha monine Jesusi, gha kughererire no gha kuvamine kughutho wendi ghuninga eshi: “Nye sho tende nange we Jesusi, ghoMwana Nyambi, ghomukakupiterera? Na kukanderera eshi wa ni tjitjupitha!”
29Eyi gha yi ghamberire, yoyishi Jesusi, gha rawere mupepo ghoghumango gha shwaghe mwamururme yu. Oyu yoshatani yu gha mu ndhondherire. Ngambi kenge ha mu ghangangire kumoko no kumapadhi eshi gha ghombere, gha tjinaghurire mighodhi, nashatani gha mu twarire mukashekesheke.
30Ha mwipura Jesusi eshi: “Yowe dye dina dyoye?”
“Yame mbunga,” dyo gha huthire, yoyishi gha karire nawashatani hohengi mumwendi. 31Nawashatani ha kandererire Jesusi eshi gha wa twara kumashinyihero.
32Popo ko kukongosha katundhu koyinguru mumarundu. Munyima hashatani ha kumberire kwaJesusi eshi hengene muyinguru. 33Ko kuyiwatawedha kwendi, no hashatani ha shwaghire mwamurume yu no ha kengenine muyinguru. Katundhu kokahe ka ka shokomokire kudirundu no ka wererire mudikuruviya ho ka fire.
34Apa ha yi monine hakakuditha yinguru, kokutjira kwawo kudighumbo, ha ka yithimwetwedhe eyi ya hokokire no kumikunda dhimweya. 35Hanu ha yendire ko ha ka mone eyi yina hokoka. Munyima ha kumine kwaJesusi no ha wanine murume yu ha shwaghire hashatani mumwendi, oku ghana hungumana pamapadhi ghaJesusi. Gha kuyengire thiwana no ghana hukera mumaghano ghendi ghomahe. 36Awo ne ko kuyapa. Ene awa ha yi monine, ha wa tongwerire eshi ngepi di gha neruka mukamipepo dhodhimango. 37Munyima ko kumutongwera hakamukunda ghoghuhe waGadara Jesusi eshi, gha wa yakunuke yoyishi ha yapire thikuma. Ko kuperama kwendi muwato gha huke.
38Murume yu ha shwaghire hashatani mumwendi, gha kandererire ashi gha kare kwaJesusi. Ene Jesusi gha mu huthire ghuninga eshi: 39“Huke kudighumbo dyoye, no ka thimwetwedhe eyi ghana tendi Nyambi noye.” Naye gha hukire no gha thimwetwedherire dighumbo dyodiheya, eyi gha tendire Jesusi kukwendi.
Mukamadighana ghomwana Jayirusi. Mukamadi ghongongoro
(Mat 9:18–26; Mark 5:21–43)
40Apa gha ka hukire Jesusi kuthambo, ha mu tamburire hanu, yoyishi waheya ha mu tatererire. 41Kapupi kamanana ko kwiya kukwendi murume. Oyu ne yoJayirusi, mukamuragho ghosinagoge. Ha kuvama kwendi kumapadhi ghaJesusi no gha mu kumberire eshi, gheye kundhugho dhendi. 42Yoyishi mwanendi ghoyofotji gha shanine kufa. Mwanendi yu gha karire nomyaka dikumi nodhiwadi.
Mundhira dhokutamba ko, hanu ha kongoshire pofotji naJesusi. 43Mukatji mwa karire mukamadi oyu gha karire non̂ongoro myaka dikumi nodhiwadi. Ghugavo wendi ghoghuhe gha manine kutaghera kwawanganga, ene mbadiko yu gha konine kumwirukitha. 44Ho gha henyenine ko no gha kundamine kumukungo ghoyivata yendi, non̂ongoro yu gha korwire ko kumupwa podigho popo. 45Jesusi ghepurire eshi: “Yidye ghana ni kundama?”
Apa ha kudhindire hanu eshi kadi wodiwo, ha ningi Petrusi eshi: “Muruti, hanu ne hana kudhingumwetwedha no hana kukuthunda‐thundera kuKoye.”
46Ene Jesusi gha ningire eshi: “Ghana ni kundama ghumweya, yoyi na kuyuvu eshi dhina shwagha ngacmu dhange.”
47Pakumumona mukamadi no kukudimuka thinda eshi yodiye, ko kututuma kwendi no gha kuvamine kughutho wendi. Popo ko kumuthimwetwedhera kwendi kughutho wawanu eshi, nye yi ghana mu kundamena no ngepi di gha neruka wangu. 48Aye gha mu tongwerire eshi: “Mwanange, matawero ghoye ghana kughamwena. Yende muthiraro!”
49Oku shime gha karera mukughamba, ko kutunda ghumweya mudighumbo dyamukamuragho ghosinagoge na ghu mu tongwere eshi: “Mwanoye ne kare ngafu. Wa petha muruti nyara‐nyara.”
50Jesusi ne gha yi yuvire no gha mu tongwerire eshi: “Wa tokota. Tawe vene, no ghana kupwa kughamwena.”
51Apa gha ka kumine Jesusi kundhugho, mbadi gha tawedhire hamweya eshi hengene nendi mundhugho, shimengwa Petrusi naJakobusi naJohannesi nawiha nanyina mwanuke keho. 52Hanu waheya ha dirire no ha mu tokoterire. Jesusi gha wa huthire eshi: “Mwa dira, mbadi ghana fu, kurara ghana rara vene.”
53Awo ne ko kumuheka, yoyi ha dimukire shemwa eshi ghana fu. 54Ha mu kwata Jesusi panyara no gha kughererire eshi: “Mwanuke, pinduke!”
55Moyo wendi wa mu hukerire no gha pindukire popo vene. Ko kuwarawera Jesusi eshi ha mu pe thokudya. 56Hawihe nanyina ha tutukwire, ene Jesusi gha wa shingire eshi kadi ya kutongora kwaghumweya eyi yina hokoka.
Currently Selected:
Lukasi 8: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
