Mateghusi 12
12
Jesusi ne yoFumu ghoSabata
(Mark 2:23–28; Luk 6:1–5)
1Mumayuwa ghogho, gha tjinaghanine Jesusi mumapya mudiyuwa dyoSabata. Hakathishongero wendi ha fire ndhara, no ha tjorire mbeya ha fenye ha tafune. 2Apa ha yi monine Hafarasayi ha mu tongwerire eshi: “Ngo mone kuya! Hakathishongero ghoye, kuna kutenda thinu thokudhira kukona kutenda muSabata.”
3Aye ne gha wa huthire eshi: “Mbadi mwa toya panganyi eyi gha tendire Davita nawaguva wendi apa ha fire ndhara? 4Ghengenine mundhugho dhaNyambi no gha dire ghuroto ghomuyambo nawaguva wendi, ghokudhira kukona kudya wo shimengwa hapristeri. 5Ngambi mbadi mwa toya mumuragho eshi, hapristeri ne ha tendire thirughana muSabata mutembeli ndi? Ha reghire ne muragho ghoSabata, ene mbadi ha karire nomurandu.
6“Na kumutongwera eshi: Apa no ne po gha di mukakupiterera tembeli. 7Ngo muna tjwathana eshi nye ya ninga: ‘Ame ne na hima thin̂eke, kadi muyambo,’ ngo mbadi mwa tetera ndhango hakakupira murandu. 8Mwanamunu ne yothindashaSabata.”
Murume ghokughara dyoko
(Mark 3:1–6; Luk 6:6–11)
9Kutunda po Jesusi gha yendire shime, kate ka kuma musinagoge. 10Momo mo gha karire murume ghokughara dyoko. Ko kumukumbera kwawo eshi: “Ku kona kwirukitha munu mudiyuwa dyoSabata ndi?” Yighayara yawo ne ha himine kumuheta.
11Aye gha wa tongwerire eshi: “Yidye ghopapenu yu gha kara nondjwi ho gha were mudikwina mudiyuwa dyoSabata no kadi wa kumushwaghithamo pawanguwangu. 12Ngepi keho di gha piterera munu ndjwi? Podigho gha kona munu kurughana muSabata yoyihunga.”
13Ko kuninga kwendi kwamurume eshi: “Ghonyonone dyoko dyoye.” Naye ha yi tendi, no dyoko dyendi dya karire ndjewandjewa kupiterera dimweya.
14Munyima ha shwaghire Hafarasayi, no ha tendire dighano dyokumupagha Jesusi.
Jesusi ne mukakukarera Nyambi
15Apa gha yi yuvire Jesusi, ko kutunda‐po kwendi. Hanu hohengi ha mu kuthire, no gha werukithire waheya. 16No gha wa shingire thikuma eshi ha mu yukitha. 17Kemo sho yirikanye eyi gha ghambire muporofeta Jesaya eshi:
18“Mu mone, oyu ne yomupikange, oyu na tororire,
muhakwa wange yu na menya menyena.
Mupepo wange na kughutura papendi.
No mbo ghana yuvitha kumako ghuhunga waNyambi
19mbadi mbo gha tenda marwanamvo,
nomuyaya temba no mbadiko yu mbo gha yuva diywi dyendi pambabdhanga.
20Kambu kokutifuka mbadi mbo gha tjora,
no karetha komunyenge mbadi mbo gha ka dhimitha,
kate mbo gha rikanyithe ghuhunga waNyambi,
21no papendi mbo gha paka mako ghomahe makurupero ghawo.”
Jesusi naShadipinyi
(Mark 3:20–30; Luk 11:14–23; 12:10)
22Ko kureta kwawo kwaJesusi murume oyu gha karire nashatani. Murume yu gha karire mukunga nothipuru-puru. Jesusi gha mwirukithire, kate gha konine kughamba no kumona. 23No mbunga dha tetukire thikuma no dha ningire eshi: “Aye ngwa kadi mwana Davita yu ndi?”
24Hafarasayi ha yi yuvire no ha ningire eshi: “Aye ghana kushwaghitha hashatana, pamaghamweno ghaShadipinyi vene, nduna wawashatani.”
25Jesusi gha dimukire yi hana kughayara, no gha wa tongwerire eshi: “Kehe ghufumu ghokukuyakunuka, mbo ghuna dhongonoka. No kehe mbara ngambi ndhugho eyi mbo yi kuyakunuka, kadi ya kurara po. 26No ngeshi Shatani ha tjidha Shatani muyendhendi, kukara makuyakunukero ghendi thinda. Ngepi keho sho ghu tanare ghutungi wendi? 27No ngeshi Me kuna kushwaghitha hashatani nomaghamweno ghaShadipunyi, no nye keho hana kuyitenda hakathishongero wenu. Yodigho, hakathishongero wenu, hana kuyinegha eshi mwerwa mwe.
28“Ene ngeshi Me kuna kushwaghitha hashatani paMupepo waNyambi, mu dimuke eshi ghufumu Nyambi weya kukwenu.
29“Ngepi ghokukona ghumweya kutjora ndhugho dhamukangcamu no kwidhamo ghugavo wendi, oku mbadi ghana ghanga tango mukangcamu yu? Ndani po gha kumonawera ndhugho dhendi.
30“Oyu ghokudhira kukupakerera nange, gha ni dhimba. No yu ghokudhira kukongwedha ndwji pofotji nange, ghana kudhiharan̂anya.
31“Yo na kumutongwera eshi: Kehe murandu nomushedho, kukona hanu kuyithigherera. Ene dishamu dyokwaMupepo ghoKupongoka, kadi wa kukona kuthigherera. 32Ngeshi ha ghamba ghumweya thothiyi kwaMwanamunu, kukona kuthimuthigherera. Ene ngeshi ha shinyi ghumweya kwaMupepo ghoKupongoka, kadi wa kukona kumuthigherera mumoyo ghuno, ngambi mumoyo ghokughutho.
Thitondo kuthidimukera kumbuyo dhatho
(Luk 6:43–45; Mat 7:16–27)
33“Ngeshi ha mu ningi eshi thitondo ne thiwa, mu ninge karo mbuyo dhatho eshi dhiwa. Ene ngeshi ha mu ningi eshi thimango, mu ninge karo mbuyo dhatho eshi dhimango. Thitondo ne kuthidimukera kumbuyo dhatho.
34“Mwayiyoka mwe! Ngepi ghokuninga eshi amwe ne mwayi, mu ka ghambe yoyihunga. Yoyishi eyi ya yara mumutjima, yo kana kushwaghitha kanwa. 35Munu ghomuwa, ghana kushwaghitha kamwagha‐mwaghe koghuhunga ghoyinu yomumutjima wendi. Muyi ghana kushwaghitha ghuyi ghoghuhe ghomumutjima wendi.
36“Eyi ne yo na kumutongwera: Kehe n̂ando dhokadyawathi edhi hana kughamba hanu, dho mbo dhi shwaghitha yawo mudiyuwa dyondhango. 37Yoyishi kuman̂ando ghoye agha ghuna kuthimbekera ko mbo ha kushuturitha ngambi kukutetera.”
Thidimukitho thaJona
(Mark 8:11–12; Luk 11:29–32)
38Hakamarukwaro hamweya naWafarasayi ha ningire kukwendi eshi: “Muhongi tuna haka kumona thitetukitho thoye.”
39Aye ha wa hutha eshi: “Diko dyodiyi no dyokupeghuha, dya shana thidimukitho, ene mbadi mbo ha thi wana, shimengwa thidimukitho thamuporofeta Jona. 40Thikakenge di gha karire Jona mayuwa mahatu nomithiku dhihatu mudira dyothi ghomukuru, kemo dyo mbo gha kara Mwanamunu mayuwa mahatu nomithiku dhihatu mumuve. 41Hakaninive mbo ha nemana mudiyuwa dyondhango pofotji nawakan̂anyi‐n̂anyi, ene wo mbo ha neman̂anya pakukunongwenena. Yoyishi wo ha pirukerire roruhe payiyaghura yaJona. Ene pano gha nemana yu gha piterera Jona! 42Fumukadhi ghomuGhucuma, mbo gha nemana mundhango pofotjie nawakadyarero no mbo ghana wa nongwenena. Aye gha tundire muyiyeghekamuto yokaye, na gha tegherere kughunyanyami waSalomo. Apa no ne po gha di mukakupiterera Salomo!
Mahukero ghomupepo ghoghumango
(Luk 11:24–26)
43“Pakushwagha mupepo ghoghumango mwamunu, ghuna kuyendaghura mungungu no ghuna kushana maturumuthero. Ene ngeshi mbadi ghuna kuwana maturumuthero, 44ghuna kuninga eshi: ‘Kuna kuhuka kundhugho dhange oku na tundire.’ Ghuna ka huka no kuwana ndhugho mukunguru, no yoyiheya yina rogho. 45Ko kuhuka ghu ka rete mipepo dhodhimango kupiterera ye mughuyi, dhina kudhiruka pofotjie dhi ka tunge momo. Paghuhura munu ghokengeyo, ghuyi wendi wa piterera ghokutanga. Kemo dyo yi kara kwawanu hopashadyarere, hohayi.”
Hapa Jesusi
(Mark 3:31–35; Luk 8:19–21)
46Oku shime ha ghambaghura nawanu, hemanine panunda nyina nawakurwendi, nawo ha hakire kughamba nendi.
47Ko kumutongwera ghumweya eshi: “Nyoko nawakuroye panunda hadi, no hana shana kughamba noye.”
48Aye ko kuhutha koyu gha yi mu tongwerire eshi: “Yidye nawe no hadye hakurwange?” 49Ko kunegha nyara dhendi kwawakathishongero wendi ghuninga eshi: 50“Oyu ne yonawe nawakurwange! Yoyishi yomuheya ghokutenda mahimeno ghaTate ghomudiwiru, oyu ne yomukurwange no n̂amba dhange no nawe.”
Currently Selected:
Mateghusi 12: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
