Mateghusi 13
13
Maghanekero ghamukakukuna
(Mark 4:1–9; Luk 8:4–8)
1Mudiyuwa dyodyo, gha shwaghire Jesusi mundhugho, no gha yendire kudikuruviya gha ka hungumane. 2Mbunga dhodhikuru dha mu pokanenine dhi mu pongere, kate gha peramine muwato gha ka hungumane. Ene hanu wahe hemanine kurungengera. Ko kuwathimwetwedhera kwendi maghanekero ghomengi no gha ningire eshi;
3“Mukuni, gha yendire diyuwa dimweya gha ka kune. Oku shime ha yendi kukukuna, ko kumuwa mbuto dhimweya mundhira. 4Yinyunyi yeyire no ya dhi komongorire. 5Dhimweya dha wererire pamawe ghomayarara, apa wa dhirire kukara muve ghowingi. Ho dha menine wangu yoyishi muve ne mbadi wa karire ghudhungi. 6Apa dya sheghenyenine po diyuwa dha kwayukire no yoyi dha pirire midhi, ho dha kukuterire. 7Dhimweya dha wererire mumakona. Makona gha dhi ngambwerire no gha dhi fikire. 8Mbuto dhimweya dha wererire mughuyeghave no dha shimbire magavo mwene. Digavo dimweya manona dithere, dimweya manona makumi kwoko nodyofotji, no dimweya manona makumi mahatu.
9“Oyu gha kara nomatwi gha tegherere!”
Mahimeno ghomaghanekero
(Mark 4:10–12; Luk 8:9–10)
10Hakathishongero heyire kukwendi no ha mwipurire eshi: “Nye ghuna kutenderanga mumaghanekero, ngeshi pakughambaghura nawanu we?”
11Aye gha wa huthire eshi: “Kukwenu ha yi mupa eshi mu dimuke thithithatero thoghufumu ghodiwiru. Kukwawo ne mbadi ha yi wa pa. 12Yoyishi yu gha wana, mbo hana mu vurithera ko. No yu gha pira, mbo hana mu tepwera ko kamanana. 13Payinu yino, po na kughamberanga nawo mumaghanekero. Yoyishi kukenga, ene mbadi hana kumona. No kuyuva hana kuyuva, ene mbadi hana kutegherera no kutjwathana temba. 14Ku kwawo mbo yina hokoka yipumba yamuporofeta Jesaya eyi ya ninga eshi:
‘Amwe ne mbo muna yuvu yuve,
ene kadi ya kutjwathana,
no mbo muna ndjwanguruka mu kenge
ene kadi ya kumona.
15Yoyishi mitjima dhodiko dino, dha ndumangera:
awo ha thindamena matwi ghawo
no ha yandhera meho ghawo,
eshi ha dhire kukona kumona nomeho ghawo,
no kukona kuyuva temba nomatwi ghawo
nomitjima dhawo dhishi kono kutjwathana eshi ha piruke,
name temba ni dhire kuwerukitha.’
16“Ene meho ghenu mwe gha fiyaghudhi, kumona ghana kumona no matwi ghenu kuyuva ghama kuyuva. 17Shemwa na kumutongwera: Haporofeta hohengi nawakakutawa, awa ha hima kumona yi muna kumona. Ene mbadi ya kumona. No ha hima shemwa kuyuva eyi muna kuyuva, ene mbadi ha yi yuva.
Jesusi ghana kutjwathanitha maghanekero ghamukuni
(Mark 4:13–20; Luk 8:11–15)
18“Mu tegherere eshi ngepi ghana kuninga maghanekero ghamukuni yu: 19Shatani ghana kwiya kwakehe yu ghokuyuva n̂ando dhoghufumu waNyambi. Ene mbadi ghana kughutjwathana. Popo ye, ghana kutunditha mumutjima eyi ha kuna mo. Edhi ne dhodhi ha kunine mundhira. 20Murume yu gha kunine karo mbuto dhendi pamambarawe, oyu ne yoyu ghokuyuva n̂ando no kudhitambura ghushamberera. 21Ene dha pira mudhi mumwendi, no mbadi dhina kudhighama mumwendi. Ngeshi ha kwiya mapethero nomaghukukutu, ghana kuwa wanguwangu.
22“No dhi dhokukuna mughurugha, yoyu ghokuyuva n̂ando ene yikudhekera yomoyo no yiyedhaghura yoghutungi yina kumungambwera n̂ando, no mbo dhina piri mbuyo.
23“No dhi gha kunine mughuyeghave, yoyu ghokuyuva n̂ando no kudhitjwathana, dhina kwima mbuyo no kureta ghushuka mwene. Pamweya dithere, pamweya makumi kwoko nodyofotji, pamweya makumi mahatu.”
Maghanekero ghoghurugha ghomumbuto
24Ko kuwaghanekera karo maghanekero ghamweya eshi: “Ghufumu ghodiwiru, wa pitura yira munu ghokukuna mbuto mwene mudipya dyendi. 25Oku shime ha rare hanu, ko kwiya mukan̂ore dhendi, gha kune ghurugha mumbuto dhendi no gha tundire po gha ka yende. 26Apa dha kurire mbuto no kutanga kushema magavo, ghurugha nagho wa yangumukire. 27Hapika ndjimi heyire no ha mu tongwerire eshi: ‘Mukadikuto, mbadi wa kunine mbuto mwene mudipya dyoye ndi? Kupi ghuna tundu ghurugha?’ 28Aye gha wa huthire eshi: ‘Eyi ne yitenda yamukan̂ore.’ Hapika ha ningire kukwendi eshi: ‘Ghuna haka eshi tu ka ghudhure mo ndi?’ 29Kadi kemo dyo gha ningire, ngeshi ngo mu ka ghudhure mo, sho mu ka dhurerere nombuto. 30Mu thighe yi kure pofotji kate pamukesho. Pamukesho, mbo na tongwera hakakukesha eshi: ‘Mukongwedhe tango ghurugha no mu ghange pofotji ho mu ghu tumekere. Mbuto ne mu dhi tware kuthindandara.’ ”
Maghanekero ghodimbuto dyoghutata nomuhaha
(Mark 4:30–32; Luk 13:18–21)
31Ha wa tongwera karo maghanekero ghamweya eshi: “Ghufumu ghodiwiru, wa pitura karo yira munu ghokukuna dimbuto dyoghutata mudipya ndyendi. 32Dimbuto di, dimbiru thikuma pamarudhi ghombuto dhodhihe. Ene pakukura kwadyo, dina kupiterera yitapeka yoyihe yomudipya mughukuru, no dina kukara ditondo kate kutendera yinyunyi kumite dhadyo yitunguru.”
33Shime ha wa tongwera karo maghanekero ghano: “Ghufumu ghodiwiru wa pitura yira mukamadi ghokukosha mushungwa gha ghu haheke mukaronga kashokuru, kate wa kuhaherere.”
Yirughanitha yomaghanekero
(Mark 4:33–34)
34Yinu yoyiheya yi gha yi hongire Jesusi hanu mumaghanekero. Ngo mbadiko maghanekero ngo mbadi gha wa hongire. 35Kemo yirikanye, eyi gha ningire muporofeta eshi:
“Ame ne mbo na rughanitha nomaghanekero oku na kughamba.
Mbo na dimukitha yokunda kutunda kumatangero.”
Matjwathanithero ghomaghanekero ghoghurugha
36Kutunda po ko kuyakunuka Jesusi kwawanu, gha huke kukwawo. Hakathishongero wendi heyire kukwendi no ha ningire eshi: “Tuna kanderera ngo tu tjwathanithe ghurugha ghomudipya.”
37Jesusi gha huthire eshi: “Mukakukuna mbuto mwene ne, Mwanamunu. 38Dipya ne kaye. Mbuto mwene ne, hakaghufumu. Ghururgha ne, yoyimami yaMuyi. 39Mukan̂ore yu gha kunine ghurugha ne Shatani. Mukesho ne ghoghuhura ghokaye. Hakakukesha ne haengeli.
40“Thika di hana kukongwedha ghurugha pofotji no kughutumekera, kemo dyo mbo yi kara paghuhura ghokaye. 41Mwanamunu mbo ghana tumu haengeli wendi, awo ne mbana tjidha mughufumu wendi wahe wa ha pemukitha hamweya na wa shinyi homuragho, 42no mbo hana wa vukumena mudirara dyomudiro. Mo mbo ha ka dira nomakwetjurangayegho. 43No hanongo mbo hana hokoka kughutho waWihawo yira thishe thodiyuwa.
“Mukamatwi, gha tegherere.
Maghanekero ghomafupi
44“Ghufumu ghodiwiru, wa pitura karo yira ghushwi ghokuvumbeka mudipya. Ngeshi kughuwana ghumweya, ene mufiyaghudi dhendi ghana ka ghuritha yoyiheya yi gha wana no kughura dipya di.
45“Ghufumu ghodiwiru, wa pitura karo yira mughurithi yu ghana kushana dikwarara dyodiwa. 46Ngeshi ku ghana wana dikwarara mwene, ghana ka ghuritha yoyiheya yi gha wana, no kughuritha dikwarara di.
47“Shime karo, ghufumu ghodiwiru wa pitura yira dikwe dyokutegha mudikuruviya, no kuteghura mo thi dhomarudhi ghomahe. 48Apa dya yarire, ko kudikokera kwawo parukuma no kutorwera thi mwene muthicuma, dhodhiyi ne kudhimwagha. 49Kemo mbo yi kara paghuhura ghokaye. Haengeli mbana yendi no kutjikura hayi mwawanongo, 50no kuwamwaghera mudirara. Mo mbo ha ka dira nomakwetjurangayegho.
Ghushwi ghoghukurukuru no ghoghupya
51“Muna tjwathana yinu yoyiheya yi ndi?”
Ko kuhutha wo eshi: “Nhi.”
52Ko kuwatongwera kwendi eshi: “Kemo gha kara kehe mukamarukwaro oyu ghana kukuhonga yoghufumu ghodiwiru, gha pitura yira thindashandhugho oyu ghana kuhokora yopaghugavo wendi yoyipya no yoyikuru‐kuru.”
Jesusi kuna kumuhamura muNasareti
(Mark 6:1–6; Luk 4:16–30)
53Apa gha hurithire Jesusi maghanekero gha, ko kutunda po padyango di. 54Ko ka kuma kwendi mudighumbo di gha kurerire no gha hongire hanu musinagoge wawo, kate ha tetukire no ha ningire eshi: “Kupi gha wana ghunyanyami nongcamu dhokutenda yinu yoyikuru yino? 55Kadi mwana muyuwi yu ndi? Nyina ne kadi Maria, nawakurwendi ne kadi haJakobusi naJosefu, naSimoni naJudasi ndi? 56No han̂amba dhendi ne kadi wahe wa tudi nawo ndi? Kupi gha wana ne keho yinu yoyiheya yi?”
57Awo ne ha shwenine kumudimuka.
Jesusi gha wa tongwerire eshi: “Muporofeta ha mu dimuka kokuhe, shimengwa mu gha kurerire no mudiko dyendi.” 58Pamurandu ghokupira kwawo matawero, po gha dhirerire kutenda mo yitetukitho yoyingi.
Currently Selected:
Mateghusi 13: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
