Mateghusi 15
15
Yithimwetwedha yawakuru hopakare
(Mark 7:1–13)
1Mumayuwa gha, ko kwiya hakamarukwaro naWafarasayi homuJerusalema kwaJesusi na ha mwipure eshi: 2“Pashanye hana kunyatheranga hakathishongero woye thitjo thawatukuru? Yoyishi apa hana dyanga wo, mbadi hana yoghanga manyara ghawo.”
3Jesusi gha huthire eshi: “Nye muna kunyathera mwe muragho waNyambi, pamurandu ghothitjo thenu? 4Nyambi gha ghamba eshi: ‘Fumaneke wiho nanyoko’ no karo: ‘Oyu ghokughamba dishamu kwawihe nokwanyina, shemwa gha pwe kupagha.’ 5Ene mwe mwa rikanyitha eshi: ‘Ngeshi ghumweya ha ghamba kwawihe ngambi kwanyina eshi: Maghamweno gha mwa ningire eshi mu wane kukwange, na gha tendi muyambo ghokwaNyambi. 6Po gha dhirera kurikanyitha thirughana thawihe.’ Kemo mwa yevura ngcamu dhon̂ando dhaNyambi, pamurandu ghoyithimwetwedha yenu. 7Mwakadifurumeko! Muporofeta Jesaya gha mu tongwerire thiwana ghuninga eshi:
8‘Diko di dya ni fumaneka nomiromo,
mitjima dhawo ne dha yakunuka kukwange.
9Mbadiko yi sho yi ghamwene pakunikarera Me
kuyihongaghuritha yawanu,
ngeshi ku mbadiko miragho dhaNyambi.’ ”
Ethi tha tenda munu ghuyi
(Mark 7:14–23)
10Hetha kwendi mbunga popepi no kudhitongwera eshi: “Mu tegherere no mu yuve thiwana! 11Kadi thokwingena mukanwa tha tenda munu ghuyi, ene thokushwagha mukanwa tho tha tenda munu ghuyi.”
12Munyima ha mu henyena hakathishongero wendi pepi no ha ningire eshi: “Ghuna dimuka eshi Hafarasayi ne hana tokota kuyighamba yoye ndi?”
13Ko kuwahutha Jesusi eshi: “Kehe thitondo ethi gha dhirire kutapeka Tate ghomudiwiru, mbo thina pu kudhura. 14Mu wa thighe ngenyu, awo ne hakamiti wawakunga. No ngeshi mukunga ha koko mukunga muyendhendi, hana kuwera wahe mudikwina.”
15Ko kuninga Petrusi kukwendi eshi: “Tu pathwerere ne dighanekero di.”
16Ha wa hutha Jesusi eshi: “Namwe karo mbadi muna kuyitjwathana ndi. 17Mbadi muna kuyitjtwathana eshi, yoyihe yokwingenena mukanwa ne yina kuyenda mudira, ndani po yi ka shwagha muyirama ndi? 18Ene yi yina kushwagha mukanwa, kumutjima yina kutunda. Eyi ne yoyinu ya yipitha munu. 19Yoyishi kumutjima, kwa tunda yinu yoyimango. Yira kukupagha, kutjora ghurugho, rungu, widhi, kughamba mbango noyighamba yoyimango. 20Eyi ne yoyinu ya tenda munu ghuyi. Ene kudya nonyara dhodidhiro, mbadi ya yipitha munu.”
Mukamadi ghomuKanaghani
(Mark 7:24–30)
21Ko kutunda po Jesusi gha yende gha dhiruke kuyiko yaTirusi naSidoni. 22Munyima mukamadi ghomuKanaghani oyu gha tungire muthiko thi, gha mu turukerire pawangu gheye kukwendi. Ha kugherera kwendi rwingi eshi: “Ghu ni fere n̂eke Fumu, Mwana Davita! Mwanange ghomukamadi, kunyandeka ghana kumunyandeka shatani, noghuyi yi di.”
23Ene Jesusi mbadi gha mu huthire. Ko kumuhenyena hakathishongero wendi ha mu kumbere eshi: “Mu tongwere gha shwaghe po, yoyishi kuna kutuyoghoterera.”
24Jesusi gha huthire eshi: “Ame ne ha ni tuma kundjwi dhokuyongara dhodiko dyaIsragheli vene.”
25Ene mukamadi gha tongamenine kughutho wendi ghuninga eshi: “Fumu, ghu ni ghamwene!”
26Aye gha mu tongwerire eshi: “Kadi ghuhunga kutumbura yidya yawanuke no kuyimwaghera kutumbwaghana.”
27Mukamadi gha ningire eshi: “Yashemwa Fumu. Ene tumbwaghana nato, tuna dyanga ghufefere ghokukukumuka kuthidyero thahekudyawo.”
28Jesusi gha mu huthire eshi: “Mukamadi, matawero ghoye ne makuru no yihima yoye ne yina kupwa kuyaritha.” Kutunda pakapupi popo, ko kwiruka mukamadighana.
Jesusi ghana kwirukitha hakakukorwa hohengi
29Munyima Jesusi gha tundire po gha yende kudikuruviya dyaGenesareti. Ha dhini kudirundu gha ka hungumane ko. 30Popo ko kwiya mbunga dhawanu kukwendi nawayinhwere, hakunga, yipurupuru, nawakakutjoka nawamweya hohengi no ha wa turire kughutho wendi. Naye gha werukithire, 31kate kutetuka mbunga pakumona eshi, yipuru‐puru kughamba yina kughamba, hakakutjoka ndjewa‐ndjewa hadi, hayinhwere kuyenda hana kuyenda nawakunga kuna kumona. Nawo ha kughire Nyambi waIsragheli.
Mavurithero ghoghuwadi ghomaghuroto
(Mark 8:1–10)
32Hetha Jesusi hakathishongero wendi pepi no gha wa tongwerire eshi: “Na wa fera n̂eke thikuma hanu wa, yoyishi rure romayuwa mahatu hana kara kukwange no hana piri ethi sho ha dye. No mbadi na haka kuwahutha kumaghumbo nothidya temba, yoyishi ngwa pamweya hana kufera pakatji.”
33Hakathishongero wendi ha mu tongwerire eshi: “Kupi sho tu wane ghuroto muno mumamboreya, ghokurikanya kutapera wingi wawanu wa eshi ha dye?”
34Ha wepura kwendi eshi: “Mangatji maghuroto mu di nagho?”
Awo ha huthire eshi: “Kwoko nomawadi no tuthi.”
35Ko kuninga kwendi eshi hanu ha hungumane pamuve. 36Munyima gha tumburire maghuroto kwoko nomawadi no thi, ha tumera Nyambi. Munyima ha yondaghura ghuroto no kughutapa kwawakathishongero wendi, awo ne ha ghu tapera hanu. 37Waheya ha dire no ha rikanyine. Ko kukongwedha kwawo yigonyo‐gonyo no ha yarithire yikote kwoko noyiwadi. 38Pa karire harume mayovi mane wa ha dire, kupandhako hakamadi nawanuke wo ha dhirire kutara.
39Munyima gha tumine hanu kumaghumbo, no gha yendire gha perame muwato gha tuturuke kuMagadani.
Currently Selected:
Mateghusi 15: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
