Mateghusi 16
16
Hafarasayi hana kukumbera karo thidimukitho
(Mark 8:11–13; Luk 12:54–56; Mat 12:38–42)
1Hafarasayi naWasadusayi heyire kwaJesusi ha mu yereke. Ha mwipurire eshi, gha wa neghedhe thidimukitho thothitetu thomudiwiru.
2Ene ye gha wa huthire eshi: “Parunguro mwa ninganga eshi, kuwiru ne kuna pendhighana, yoyishi kuna kihera. 3Pamathiku-thiku ha mu ningi karo eshi, mupepo ghodyarero ne ghuna kwipa, yoyishi kuna vindighera. Amwe ne mwa dimuka kupathurura mupepo ghomuwiru, ene yidimukitho yoyivaka ne kadi ya kudimuka kuyakunutha. 4Mwadiko dyodimango mwe no mwayipeghuhi, amwe muna kushana thitetukitho ne, mbadi mbo ha thi mu pa no kamanana temba, shimengwa thitetukitho thaJona.”
Ko kuwathigha kwendi popo gha ka yende.
Muhaha waWafarasayi naWasadusayi
(Mark 8:14–21)
5Hakathishongero wendi ha tjinaghanine pathambo, ene ha vuramine n̂uta dhawo. 6Yo gha wa ningerire Jesusi eshi: “Mu koneke kumuhaha waWafarasayi no waWasadusayi.”
7Awo ha ghambathana eshi: “Yoyi tuna dhiri kushimba n̂uta.”
8Jesusi gha dimukire eyi hana kughamba, no gha ningire kukwawo eshi: “Mwakamatawero ghomambiru! Nye muna kukuyodhonganena eshi muna piri n̂uta? 9Mbadi muna kuyitjwathana shime no kuvuruka temba kumaghuroto kwoko kwawanu mayovi kwoko. No yikote yingatji mwa yarithire yigonyo‐gonyo? 10Ngambi maghuroto kwoko nomawadi kumayovi mane, tu ngatji tukote mwa yarithire? 11Ngepi keho muna kudhira kuyuva ne, Ame ne mbadi na ghamba kun̂uta dhenu? Ame ne kuninga na ningi eshi: ‘Mu koneke kumuhaha waWafarasayi naWasadusayi.’ ”
12Munyima po ha tjwathanenine eshi, mbadi ghana kuninga kukukoneka muhaha vene, ene kuyihonga yaWafarasayi no yaWasadusayi.
Manongweneno ghaPetrusi
(Mark 8:27–30; Luk 9:18–21)
13Apa gha kumine Jesusi muthiko thaSesareya‐Filipi, ghepurire hakathishongero wendi eshi: “Ngepi di hana kuninga hanu eshi: Mwanamunu ne nane dye?”
14Ko kuhutha wo eshi: “Hamweya kuna kuninga eshi Johannesi ghoMukadiyoghero, hamweya eshi Eliya, hamweya eshi Jeremiya endi ghumweya ghopawaporofeta.”
15Ko kuwepura Jesusi eshi: “Amwe ne ngepi di muna kuninga, ngo Yame dye?”
16Ha mu hutha Simon Petrusi eshi: “Yowe Kristusi ghoMwana Nyambi ghoMuyumi.”
17Jesusi gha mu tongwerire eshi: “Ghomukafiyaghudhi we Simoni ghomwana Jona. Yoyishi kadi hanu hana yi kuhokwera, ene Tate ghomudiwiru. 18Na kukutongwera eshi: Yowe Petrusi, no padimuwe di mbo na tendi po ngirshe dhange nomangcamu ghawakamwishi mbadi mbo gha kona kudhiwitha. 19Mbo na kupa matjapi ghoghufumu ghodiwiru. No ethi mbo ghanga pamuve mbo thina pu kughanga mudiwiru, ethi mbo shutura pamuve mbo thina pu kushutura mudiwiru.”
20Munyima gha shingire Jesusi hakathishongero wendi eshi, mbadi ha kona kutongora kwaghumweya eshi ye ne Kristusi.
Jesusi ghana kuyuvitha rokutanga yifa yendi no muvumbukero
(Mark 8:31–33; Luk 9:22)
21Kutunda pa, ha dimukitha Jesusi hakathishongero wendi thiwana eshi gha kone kuyenda kuJerusalema, no mbo ghana ka nyanda kwawamayami no kwawapristeri hohakuru no kwawakamarukwaro. Mbo hana mu pagha no mudiyuwa dyoghuhatu mbo ghana vumbuka mwawafu.
22Ko kumuthighurura Petrusi pambadi no gha tangire kumukoghaghura eshi: “Ngo gha kone Nyambi kuyishinga, Hekudyange! Ngo mbadi ya kona kukuhokokera.”
23Ene Jesusi gha pirukire kwaPetrusi no gha mu tongwerire eshi: “Shwaghe kughutho wange, Shatani! Kurunga ghuna kunirungerera we. Yoyishi mbadi wa ghayara yi gha hima Nyambi, shimengwa yi ha hima hanu.”
Mukukutha Jesusi
(Mark 8:34—9:1; Luk 9:23–27)
24Ko kuninga Jesusi kwawathishongero wendi eshi: “Ngeshi ghumweya ghana haka kunikutha, gha kufupipithe thinda, no gha shimbe thikurushe thendi gha ni kuthe. 25Yoyishi oyu ghokuhaka kukunga moyo wendi, ghuna kumuyongara. Ene yu ghokuyongaritha moyo wendi papange, mbo ghana ghu wana. 26Yinye sho yi mu ghamwene munu ngambi ha witha kaye kokahe, ene moyo wendi ne ghana yongaritha, ngambi thinye sho gha tape munu kukutjindjitha moyo wendi? 27Yoyishi Mwanamunu, ghana kuyenda no kwiya mughufumu waWihe nawaengeli wendi. Munyima po mbo na gha ruwera kehe yu popayitenda yendi. 28Yashemwa na kumutongwera: Padi hamweya wa ha nemana pano, awa mbo ha dhira kufa oku mbadi hana mono Mwanamunu, ku ghana kwiya mughufumu wendi.”
Currently Selected:
Mateghusi 16: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
