Jean 11

Owa aLazare

1Gômabaka mômôgôô, inedi Lazare. Amaaga na beeaga. Amadigaa gô mbôkane étetu mbe Béthanie. Te mbôkane émadigaa anayeedi Marie na Marthe. 2(Marie te môgetone amasôga makôdô maJésus na môyombo na amamakôbôa na tsôgéyé yédi. Môbeene Lazare, te ndôme edi.) 3Marie na Marthe amakudéga ôgi na gôndé Jésus mbe: Kumu, weeoo abeea beeaga. 4Vamookô Jésus ôgie ône amanigôa aneengi edi mbe: Beeagane éndé na Lazare, kaka éowa. Abeea nane te mbe Nzambé angakumédu gôngeenanô ngudi yedi. Muana ANzambé angakumédu gô éangô.

5Jésus amaba n’evamba na Marthe na Marie na Lazare. 6Vamookô Jésus mbe Lazare te beeagane, amoomba édigaa pitsi dibaé gômabakangô. 7Vane amavovo n’aneengi edi mbe: Okani. Tônikéni na gô Judée. 8Aneengie amavovo n’edi mbe: Môékédi, ôsabômu mbe madeo vasidinga gamabakewe mbe ôyôhu n’Ajuif na mataé. ?Yôénda mbe ôomba te énika na gône-a? 9Jésus amanigôa ahngô mbe: Gô môsaa ôvo gôndéké nzima amaweda na maweda mabaé. Okô môma akénga, ômandee ôgébaka, asangapônga gôenangô gévedege gétanéda tsengene. 10Ivô ône akénga na pitsi apônga gôsaba angô na gévede. 11Jésus n’enigôa nane, amavovo n’aneengi edi mbe: Wene éasô n’anyô Lazare eeboga vio. Me nakea nakémôtimôa. 12Aneengie amavovo mbe: Kumu, ôkô mbe andé gô vio, tambô adôngi. 13Tambô viovie vimavovo Jésus te ôwa aLazare. Na aneengie amamenya mbe te viovie viebogu kuku yetso. 14Vane Jésus amasupua na vede mbe: Lazare awéyi. 15Vasidenganô wa n’anyô vabeeki Lazare, môtémami ôena gényônga gôndé anye, na éne éngeenanye. Anyedô, nôsangadôtsuma me paga. Okani na vandé angô. 16Vane Thomas ône atetu mbe Evasa, amavovo n’aneengie n’edi mbe: Te nane, ôkani. Tôkeyôhu kukepo na môékédine wasô.

Jésus te gékundugéô sasô n’anyô na monyoe wasô n’anyô

17Vamabuéa Jésus amookô mbe Lazare amagunyu. Aka pitsi dinayi gô ngii. 18Béthanie na Jérusalem vasitongonéké. 19Ajuif asi Judée ayekani amakea gôémogeda Marthe na Marie gô ebaô gôwéyiô ahngô muanayaô.

20Vamookô Marthe mbe Jésus atsigi, amakea gôémôwanyeda. Géé Marie amasanéa digaa gô eba. 21Marthe amasemba Jésus mbe: Ah Kumu, mbe ômadenganôkô éva, ndômé ami mbe asiwa. 22Eébéyée nane, tsabômu mbe Nzambé angagôaabéa gô éne émahduka éwe. 23Jésus amavovo na Marthe mbe: Ndômé éoo angakunduga. 24Marthe amasinga mbe: Ii, na gô pie. Tsabômu mbe angatimôga g’ôwa gô ndéône éamôyusumédu éngakunduga oma muetso.

25Jésus amamôpandôéda mbe: Me te gékundugéô sanyô. Me te monyoe wanyô. One eetsa me môtémedi wetso angaba na monyo buéyé mbe awéyi. 26One adôngani na eetsa me môtémedi gébé na paga asangatsiga gô tsenge éowa. ?Oôkiô gavovi me-a? 27Marthe amaabéa mbe: Ii, Kumu nookiô. Me tsatsuma éwe paga. Ewe te Christ, ône eenéôkô n’oma muetso mbe angaviga na gô tsengene. Ewe te Muana ANzambé.

Jésus amadéa

28Vamamanangô évovo nane, Marthe amakea gôébambéa muanayeedi, Marie. Amavovo n’edi tsôvisôvi mbe: Môékédi avigi. Agôbambéa. 29Vamookô Marie nane, tsina na tsina amakea pita na gôndé Jésus. 30Amadenga Jésus te madeo asitsiga na gô mbôka. Te agébaka v’etumba vamawanyedu angô na Marthe. 31Ajuif ane amabaka gô eba gôémogeda ane awéyiôni, ameena Marie atimôga na akea pita, amamôaanda. Ajuif amamenya mbe akea na gô ngii gôédéa.

32Vamakea Marie amadenga Jésus v’etumba. Amagudama na va makôdô medi na amavovo n’edi mbe: Ah Kumu, éwe mbe ômadenganôkô éva, ndômé éami mbe asiwa. 33Jésus ameena Marie adéa na Ajuif amaviga n’edi te ahdéa. Môtéma aJésus ômeena panda na ômadita. 34Ameevôa omee ane mbe: ?Nômôgunyi gôni? Ajuif amaabéa angô mbe: Kumu, viga ôviena. 35Jésus amadéa. 36Ajuif amavovo anguene mbe: Aanakani gamanyôngéô Jésus môwéne ône. 37Avo va gatse aô amamôtsundéda mbe: Angô amapôéda miso mamôsi pogu ?nayee amasinga Lazare mbe awa-a?

Lazare amakunduga g’ôwa

38Môtéma aJésus omeena panda na ômadita vamakeangô na gô ngii. Ngiine te édukue éamôdungutu émakukégu n’etaé évôni v’ombee. 39Jésus amatôma omee ane mbe: Kôngégani étaé. Vane Marthe, kadine éone awéyini, amasémana na amavovo mbe: Aé Kumu, g’egunyéô angô gôka pitsi dinayi. Aka na mbônga. 40Jésus amavovo n’edi mbe: Me tsigômanaka égôbeenda mbe ?ôkô ôsitsuma ngudi yami paga ôngeena ôndômba aNzambé ôsutuméa? 41Etaé émakôngégu. Jésus amabôkaméa na g’ôba gôévovo na Nzambé mbe: Téta, nagôkuméda gôôkéyiô éwe me. 42Gôndé memuene tsabômu mbe ôndé gôéaabéa me kuka yetso. Ivô n’atsatsee navovo n’ewe te gôndé omeaa aseti me adua, kabaga atsuma paga mbe tsitômu n’ewe. 43Vamamanangô évovo nane amaadôngana mbe: Lazare, kusa gône. 44One amawani amakusa gô ngii. Makôdô medi na mogo medi mamadipô na mikanda. Osôe ômeebedu na môkandee ômakatôkô môtsée. Jésus amatôma omee mbe: Tsôbôani angô. Tsikani angô akea.

Gépangô gémavangô gôéyôha Jésus

(Bono na Matt. 26:1–5, Marc 14:1–2, Luc 22:1–2)

45Gô géômbé sAjuif gémaviga gôémôgeda Marie, ayekani ameena éné émeenda Jésus. Amamôétsa mitéma miaô. 46Ivô avo Ajuif amakea gôénigôa Apharisien éne émeenda Jésus. 47Apharisien na tsesuye yadeekedi adigondoku amadigaa gô kundu éaô épôni gôévanga gépangô. Amavovo anguene mbe: ?Tôéndani nayee na mômôgôô nône? Angô aseendô gôéyanza mabégô manyônganéôni masoongôa môma ésupua. 48Okô tômôtsika gémôanza, muetso angamôétsa mitémamie gôékea géômbé gévo n’edi. Vane atômie wasô n’anyô asi Rome, angaviga gôépanzéda eba asô n’anyô aNzambé. Na ahngabunza éongo éasô n’anyô éetso, te gôndé mômôgôô nône. 49Môvo va gatse aô, inedi Caïphe, ameetsô ényangee gô gémage géne gôétôma adeekedie muetso adigondoku. Amasemba akedi mbe: Anye nôsamenya. 50Nôsookô gakegea ébégô édué. Enyepa mbe môma môvo awa gôndé wa n’anyô muetso, kabaga tsengene éasô nyetso ébunganédu gôndé angô. ?Nôôkiôa? 51Tambô asivové nane gô ngudi yamiene. Gômaba angô pene adeekedi adigodoku gémage géne, amapandôéda étasa éaNzambé g’ôwee ôngawa Jésus gôndé Ajuif muetso. 52Ivô kaka mbe Jésus angawa gôndé Ajuif atévo, te na gôndé asi mbumu éaNzambé muetso gô tsengeye yetso mbe ahngakôkégu évambevo g’ôtô ôvo. 53Bandôa nyoone atômie aAjuif amavangana gôéyôha Jésus. 54T’ebandô Jésus asinangédô v’ekanga vandé pingô yaAjuif. Amakea na gô mbôka étetu mbe Ephraïm ébambana na tsenge émagasani. Amadigaa wangô, angô n’aneengi edi.

55Suetine éaPâque étsôkéa Ajuif émabaka éka gôpégôpé. Oma ayekani amaviga gô tsengene nyetso na gô Jérusalem gô gésôga segôgéda yôtôye yaô, Pâque madeo ésibandôu. 56Ahmabuta Jésus na ameevôana anguene na anguene gô eba aNzambé mbe: ?Nôtasa nayee? ?One eendô mbe Jésus angeenanô gô suetine-a? ?Vo asangeenanô? 57Tsesuye yadeekedi adigondoku n’Apharisien ameetsa ôtômu mbe: One asabômu gétunguge géndé Jésus, avigé avibeenda we, tômôtsôpéda.

Currently Selected:

Jean 11: TSV

Highlight

Copy