Jean 12

Marie amasôga môyombo gô makôdô maJésus

(Bono na Matt. 26:6–13, Marc 14:3–9)

1Gômasanéa pitsi môtôba na gô suetine éaPâque. Jésus amakea na gô Béthanie. Te mbôkane émadigaa Lazare, ône amakunduu na Jésus g’ôwa. 2Wangô amadigaa va tabudé gôéaa môyakôe ômayanzéô angô na Marthe. Lazare amabaka n’ane amaaka na Jésus va tabudé. 3Marie amaviga na mbuti éamôyombo ôtétu mbe nard ôndé ôsunu ôvôni. Ameetéa angô gô makôdô maJésus. Na amamakôbôa na tsôgéye yedi. Ebee wetso ômaba mbônga éamôsôba éamôyomboe ône. 4Môneengi môvo aJésus inedi Judas Iscariote, te ône angakaba Jésus, amasemba môgeto nône mbe: 5?Môyomboe ôsisômbéduku ôsunu ôvôni nayee? Dodeye dine dikiaka dikéétsô misuga. 6Asivove nane gô ngeba dimeenangô misuga. Amavovo nane te gômabakangô môkenene agébémbége sadode. Gôndé angô muisui ameesua éne émakuyu gô sangô. 7Jésus amasungéa môgeto nône mbe: Tsikani angô. Nabaké na môyomboe ône ngu na vangagunyu me gô ngii. 8Misugamie mindéké n’anyô pitsi yetso. Ivô me tsangaba n’anyô pitsi yetso. Ivô me tsangaba n’anyô pitsi yetso.

Oma amavangéa Lazare gépangô

9Géômbé gévôni sAjuif amookô mbe: Jésus aka gô Béthanie. Amaviga gôémôena ivô kaka gôndé Jésus môtévo. Te na gôéena Lazare gômookô ahngô mbe Jésus amamôkundua g’ôwa. 10Tsesuye yadeekedi adigonduku amavanga gépangô gôéyôhéda dôta Lazare. 11Ahmeenda nane gôébégô Ajuif ayekani amanôtôga vandé tsesuye yaô na ameetsa Jésus mitéma miaô gôébégô éaLazare.

Jésus amakea na gô Jérusalem

(Bono na Matt. 21:1–11, Marc 11:1–11, Luc 19:28–40)

12Ovo inyaa ône, géômbé gévôni sane amaviga gôétsôkéa suetine éaPâque amookô mbe Jésus atsigi gô Jérusalem. 13Amakitsa dada yeekadi gamabaka gésima saô seneegeda môma. Amakea na yangô gôéwanyeda Jésus na émbô mbe: Tôneegedéni Nzambé. Te mbe mate maNzambé mabaké gôndé môtômine avigi gô ina aKumu. Te mbe mate maNzambé mabaké gôndé ône avigi gôétôma éongo éaIsraël. 14Jésus amabongo nyama ééndô mbe âne na étsua môma. Na amadigaa gô yangô. Te gatôtanga gô Matendeo MaNzambé mbe:

15Nômbieena gomo anye asi môsenge aSion

Bononi Kumu anyô avigi na gôndé anye.

Andé digaa gô môpaga anyama ééndô mbe âne.

16Aneengi aJésus amatsapéô gôsinigôgéô ahngô mane mamabuéani. Ivô gô ndéône émanika Jésus na g’ôba, ahmabangôa éne émanigôa Matendeo MaNambé gôndé Jésus na amabangôa dôta na éne émeendéa ahngô Jésus nyoone.

17Muetso ane amadenganô vamabambéa Jésus Lazare gô ngii gôémôkundua, ahmanigôa akaô mane mameenahngô. 18T’ebandô géômbé gévôni gémakea gôéwanyéda Jésus vamatsigangô gô Jérusalem. Ahsibômu mbe, ôdôô te ône amatubéda gémbégéa gévôni sangudi yaNzambé gôékundua Lazare g’ôwa. 19Apharisien amavovo anguene n’anguene mbe: Aanakani gasingéô angô n’oma muetso. Wa n’anyô tôtsayi géôngôé émôénda ébégô.

Agrec amanyôngéô éena Jésus

20Gôndé ane amaviga na gô Jérusalem gôéneegeda Nzambé na gôétsôkéa suetine, gômadenganô n’avo asi éongo éaGrec. 21Amaviga na gôndé Philippe môsi Bethsaîda mbôkane éndé gô Galilée. Amavovo n’edi mbe: Waé, we tônyôngéô éena Jésus. 22Philippe amakea gôébeenda André. Vane ahngô muetso abaé amakea gôénigôa Jésus. 23Jésus amasupua ahngô mbe: Ndéône ébuéyi gôndé me Muana Amôma gôéétsô ôkumakee wetso. 24Me nanôbeenda na gô pie mbe éso éapôtô, ôkenea éangô gégaabô gô toto éngabaka môbô te éso évo. Ivô ôkô égaabiô gô toto éngaboo na éngakanda gôébôta pingô yamiso. 25One anyôngéô ékenea monyoe wedi gôédômbéa n’angô, angaôdimbanéda. Géé ône avinga monyoe ôdigaa n’edi gô tsengene angaôkenea môbô na môbô. 26One anyôngéô éyanzéa me, akéé n’ami nzéepo. Na tungune éngaba me te éne éngaba môyanzine. Téta agobeda ône ayanzéa me.

Jésus ameevéda ôwee wedi

27Jésus amavovo mbe: Môtémami ôdita te ditaga. ?Nangeenda nayee? ?Nangoongôa éénda mbe: Téta yuua me gô éne éka gô buéaga-a? Ka me, namaviga te gô éne. Namaviga te gôéengéa gô ndéô nedue éamaguga na gôéôta gô mangô. 28Ah Téta mbe inee éoo éneegedu. Ogie ômookanô ôvovo g’ôba mbe: Namamana éétsa inee éami géneega sondômbee wetso. Na éngoomba ékumédu.

29Géômbége gémabaka wangô gémookô ôgie ôvovoni. Avo amanigôa mbe: Nôôkiô, te môdumu ôkungani. Avo dôta amavovo mbe: Te môsi g’ôba amavigédu na Nzambé gôévovo n’edi. 30Vane Jésus amapandôéda ahngô mbe: Ogie ômookanôni, kaka gôndé me, ivô te gôndé anye. 31Ndéône éetsundéda asi tsengene ébuéyi. Ndéône éepatsa kumu atsenge nedué ébuéyi. 32Jésus angô mbe: Ivô me, vangatômbu me na va gatse atsina n’oba, nangaweseda oma na gôndé memuene. 33Gô mavoviame mane, Jésus amapandôéda omee mônongoe owa ôngawa angô. 34Oma amamôsugéga mbe: Tômookô gô miganda mimatsikéô we mbe, Christ ône angatômu na Nzambé asangawa. ?Ewe voo ôénda mbe Muana Amôma angatômbu va gatse atsina n’oba nayee? ?Muana Amôma indaa? 35Jésus amanigôa ahngô mbe: Gô vipesu viandéô, gévedege gégébaka gôndé anye. Nangakani gô sangô, gégébaka gôénôtanéda nzéa, kabaga évitsie étsôpa anye. One ananga gô tsina evitsi asamenya gôkeangô. 36Itsani mitéma mianyô na gô gévedege sami, nôgébaka na sangô. Na vane nôngaba asi gévede.

Ajuif amatsuma Jésus paga

N’emana évovo nane, Jésus amakea gôésomo gôdagôda n’omeaa. 37Buéyé gameenda Jésus mabégô mayekani mamisôba mangudi yaNzambé mamatsapéô oma, ahngô asimookéô. 38Mane mamabeenda Esaïe, môpandôédi amatasa maNzambé mameenanô. Amatenda mbe:

?Kumu, ône amookô meekédu masô indaa?

?Ngudi yakumu dimatubédu ndaa?

39Oma asiôngôé énôtôga gô paga yaô. Te gamatenda Esaïe mbe:

40Nzambé ameeméda oma miso maô,

Kabaga miso maô meenéa,

Na kabaga mitéma miaô minigôgéô,

Na kabaga akoa matasa maô gôéneegeda me

Mbe nadôngéda ahngô.

41Esaïe amapandôéda mabégôme mane te gômeenangô ôbébayi ôtubéda ôndômbee aNzambé na amanyôngéô émôkuméda.

42Buéyé nane, peeye yAjuif ayekani asitsumé Jésus paga. Ivô asiôngôé émema mbe: Tôsatsuma Jésus paga, kabaga apatsô na Apharisien gô eba agéwanyéô. 43Amootéa ényôngéô ékumédu n’oma na asinyôngéô ékumédu na Nzambé.

Ogi aJésus ôtsundéda oma

44Jésus amanigôa mbe: One eetsa me môtémedi wetso, asiitsa gôndé memuene môtévo. Eetsi te na gôndé ône amatôma me. 45One eena me, eena dôta na ône amatôma me. 46Me namaviga na gô tsengene gôéba gévede sanyô, gômbe muetso eetsa me mitémamie gébé na paga, asangadôdigaa gô évitsi. 47Ane ookô mane mavovo me, na asagobeda mangô, kaka me nangamôesédani. Me tsivigé gôéeséda asi tsengene. Namaviga te gôéyuua ahngô gô môtsundu. 48One akékôa me na mavovia mami, te mangô mangamôesédani. Meekédume mami mangeetsa môma ôési gô nyaa amôyusumédi. 49Menyani mbe me tsavovo gô ényangee éamemuene. Te Téta, ône amatôma me ameetsa me mabégôme mavovo me na meekéda me anye. 50Me tsabômu mbe mane matôma Téta te mangô meetsa môma monyo amôbô na môbô. Te geendi me mbe: Mane mavovo me, namavovo te gatévédu me na Téta.

Currently Selected:

Jean 12: TSV

Highlight

Copy