Jean 14

Jésus te nzéane étsiga môma na gôndé Téta Nzambé

1Jésus amavovo n’angeengi edi mbe: Nômbiaba na mikebanganô gô mitéma mianyô. Itsani Nzambé mitéma mianyô. Vane itsani na me miangô. 2Gô eba aTéta gôndéké édigaa éyekani. Me nakea gôénôkônzéa tungu. Mbe gôsaba nane, mbe tsinôbeenda nane. 3Vangakea me na vangakônzéa me anye tungu nanganika. Nanganôbongo gômbe gôngaba me, n’anye dôta nôngaba wangô. 4Anye nôsabômu gôkea me na nôsabômu nzéane étsiga môma na gôkea me. 5Thomas amavovo na Jésus mbe: ?Ivô Kumu, we gémenye gôkea éwe tambô na nzéane tôngamimenya nayee? 6Jésus amapandôéda ahngô mbe: Me te nzéane éanyô. Me te kumu amabégô metso mapie. Me te monyoe wanyô. Gôsaba nyene nzéa éôta môma na gôndé Téta, buétsé te vandé me. 7Okô anye nôsibômu me, nôsabômu dôta te na Téta. N’anyedô nôsamôbômu, nômani émôena.

8Philippe amavovo na Jésus mbe: Kumu, tubéda we gandé Téta Nzambé na vane tôsangadôbuta sene sôma. 9Jésus amanigôa angô mbe: G’eedigéa me n’anye, vadingi. ?Ewe Philippe madeo ôsimenya me-a? One ameena me, ameena na Téta. ?Nayee ôôngôa éénda me mbe tubéda we gandé Téta Nzambé? 10Tambô ôgétsumaka paga gôénda me mbe me nandé môvo na Téta. Na Téta dôta andé môvo n’ami. Metso mavovo me n’anye muetso, kaka mamemuene. Téta, ône andé môvo n’ami, adugéda te mane manyôngéô angô. 11Nômbiatsuma me paga vavovo me mbe me nandé môvo na Téta. Na Téta dôta andé môvo n’ami. Okô anye nôsoongôa étsika pagaye yanyô gô mane mavovo me, tambô tsikani pagaye yanyô gô mane mamisôba mayanza me. 12Me nanôbeenda na gô pie mbe, ône eetsa me môtémedi wetso, angeenda mane mamisôba meenda me. Angeenda na mavo mabégô mangootéa mane mami na ngudi gôkea me na gôndé Téta. 13Ene édukanye me gôéénda, me nangeenda gômbe Téta angakumédu gô ina aMuanedi. 14Okô anye nôduki ébégô gô inami, me nangeenda éangô.

Jésus amavanga gôékudégéa oma Gédidi SaNzambé

15Okô nônyôngéyiô me, nôngeenda te éne étôma me anye. 16Nangaduka Téta gôénôtôméa muene môwedi asanganôtôga gôndé anye. Môwedine ône te Gédidi gétsutsuéda mabégô mapie maNzambé. 17Asi tsengene asangagédiia gôébégô asaba na ngudi yegéena na asangoongôa égémenya. Géé anye, nôngagémenya gôébégô sangô, Gédidi gétsutsuéda mabégô mapie géngaba n’anyô na géngadigaa gô mitéma mianyô.

18Me tsanganôtsika tsani. Nangoomba éviga na gôndé anye. 19Eva na gô vipesu viandéô asi tsengene asangadôena me. Géé anye, nôngeena me. Gôndé me na monyo, tambô n’anye dôta nôngaba na monyo. 20Gô nyaa ôvigani ône, anye nônganigôgéô mbe me Jésus nandé gôndé Téta. Na anye nôndé gôndé me. Me dôta nandé gôndé anye.

21Okô môma atanganéda mane mamatôma me, na amagobeda, vane namenya mbe môma nône anyôngéô me na avamba n’ami. Vanyôngéô angô me, anganyônganéô dôta na Téta. Na me nangamônyôngéô te mônongovo. Na nangatsutsuga te gôndé angô. 22Môneengi môvo inedi Jude, (kaka Judas Iscariote) ameevôa Jésus mbe: ?Kumu ékegea nayee? éne évovi éwe mbe: Nangatsutsuga te vandé anye, kaka vandé asi tsengene. 23Jésus amanigôa mbe: Okô môma anyôngéyiô me angagobeda éne évovo me. Téta angamônyôngéô. Vane wa na Téta tôngaviga na gôndé angô gôédigaa gô môtémedi. 24Mômane asaba n’evamba n’ami na asanyôngéô me, asangamenya égobeda éne évovo me. Ene éôkô anye me navovo ésabandôa na memuene, éviga te gôndé Téta, ône amatôma me.

25Nanônigôa mabégô mema te gôgébaka me n’anyô. 26Môwedine wanyô te Gédidi SaNzambé, géngatôméô anye na Téta géngaviagana me. Génganôéékéda na génganôbangôéda metso mameekéda me anye.

27Me nakeyi. Ene étsikéa me anye te gétabé sami mbe géngaba gô mitéma mianyô mbe nôngaba na mitéma mimasumani. Géne sami gétsikéa me anye gésagono na géne satsenge nedué. Nombiaba na mikebanganô gô mitéma mianyô. 28Nômani éôkô éne émavovo me n’anye mbe me nakeyi, ivô nangoomba éviga na gôndé anye. Anye mbe nômanyôngéô me na gô pie, anye mbe nômatsôkéa na gényônga setso vookô anye mbe Jésus akea na gôndé Téta, gôébégô ngudi ya Téta diôtéa dine yami. 29Me nanôévédi mabégô mema, mangô madeo masibuéa te mbe vangeenanye mangô mabuéa, kabaga anye nômatsuma paga. 30Tsangadôvovo mayekani n’anye. Tsesune, ône atôma tsinane avigi. Otômue wedi ôsatôma me. 31Eébéyée nane, buedi mbe asi tsinane muetso eena ganyôngéô me Téta gôgobeda me éne ématômu me na Téta. Timôgani. Tônôtôgéni éva.

Currently Selected:

Jean 14: TSV

Highlight

Copy