Jean 15

Jésus te môkuba apie agéétété

1Me te môkuba apie agéétété gétetu mbe ôvigne. Téta Nzambé te Kumu agéététége. 2Mitabémie mietso miami mine misabôta miônda, Kumu amiwanga. Na mitabémie mietso mibôta miônda akeeda miangô gômbe mingabôta miônda ga kaka miagétabé. 3Gakeedu géétété mitabémie mibévani, mônongovo anye nômakeedu na mane mameekéda me anye gôénônôtôa mane mabévani. 4Bakani môvo n’ami na me nangaba môvo n’anyô. Mônongovo gandé môtabé agéétété mbe ôsaba gô môkuba agéétété mbe ôsabôta miônda. Mônongovo gandé anye dôta mbe nôsaba môvo n’ami mbe nôsangoongôa éénda mane manyôngéô me.

5Me te môkuba agéétété. Anye te mitabé. Muetso andé môvo n’ami na me nandé môvo n’ahngô abôta miônda miyekani. Me gébé n’anyô nôsoongôa éénda ta n’ebégô évo. 6Okô môma asaba môvo n’ami angagunyu gô mbadi mônongovo gamôtabé ômapakôuni. Môtabée ône ôngagasa. Oma adingôa mitabé migaséduni na amigunya gô soto gôémiyôéda. 7Okô nôndé môvo n’ami, na mabégô mami mandé gô mitéma mianyô, dukani éne ényôngéô anye, n’anye nôngeetsô éangô. 8Okô anye nôbôti miônda miyekani miangô te ésimee éamisôba, nôngamenyanganô mbe aneengi aJésus. Na Téta Nzambé angakumédu. 9Me nanyôngéô anye mônongovo ganyônganéô me na Téta. Nômbianôtôga gô évambee éndé anye n’ami. 10Okô anye nôénda mane manôtôma me, nôndéké évambevo n’ami. Mônongovo gameenda me mane mamatôma Téta, na me nandé évambevo n’edi.

11Me nanôbeendi mabégô mema gômbe ékasôgee éami éngaba gôndé anye na gényônga sanyô géngaba gésaba n’okana. 12Nôeni éne énôtôma me. Nyônganéôni anyene n’anyene mônongovo gamanyôngéô me anye. 13Enyônganéô éôtéa metso, te mbe môma eetsee monyoe wedi gôéwa gôndé môkedi. 14Anye te wee yami yamôtéma ôkô nôéndi éne énôtôma me. 15Me tsoongôa énôénda mbe ayanzi ami gôébégô môyanzine asamenya éne éndé na kooko edi. Nanôteta mbe wee yami yamôtéma gôébégô namani énômenyeda metso mamatubédu me na Téta Nzambé. 16Kaka anye nômasevoa me. Ivô me namanôsevoa na namanôtôma gôékea gôéyanza. Gabôta géétété miônda miedi miamisôba, mônongovo miônda mianyô miamisôba te gôéénda mane manyôngéô me. Na mane mangeendanye mangaba madingani. Vane Téta Nzambé anganôétsa éne édukanye gô inami. 17Môtômee ôtsikéa me anye te mbe: Nyônganéôni anyene n’anyene.

Asi tsengene amavinga Jésus na omedi

18Okô asi tsengene avinga anye, menyani mbe amapanga évinga me. 19Anye mbe nôndé n’evamba na tsengene, asi tsengene mbe asanganôvinga gôndé anye géengi gévo n’ahngô. Géé anye nômasevou n’ami, namanôtatôa gôndé asi tsengene, nôsabadô gééngi gévo n’ahngô. T’ebandô anôvinga. 20Bangôani éne émanigôa me anye mbe gôsaba môyanzi ootéa kumu edi. Okô mbe oma akuana me, angakuana te n’anye muetso. Okô mbe oma amagobeda meekédu mami, angagobeda te na mane manyô. 21Metso mangeenda oma anye, anôénda mangô gôébégô nôndé omami. Gôébégô ahngô asamenya éneegeda ône amatôma me. 22Mbe tsivigéké gôénigôa oma mabégô mapie, ahngô mbe asangaba n’oési gô mane maô mabévani. Ivô ahngô ameekédu na asaba na mitayi gô mane mabévani meenda ahngô. 23Okô môma avinga me, avinga te na Téta Nzambé. 24Mbe tsitubédéké gôndé asi tsengene mayanza mavôni masienanô na mbeego ahngô mbe asaba n’oési gô mane maô mabévani. Ivô ahngô ameena mane mamayanza me mamisôba, na ahngô avinga wa na Téta Nzambé muetso. 25Gôéndahngô me nane, éne ématendu gô Matendeo MaNzambé mandé n’ahngô éenanô. Ematendu mbe: Me namavingô te bobo gééndé ébégô.

26Môwedine wanyô angaviga. Angô te gédidi gépandôéda mabégô mapie mandé na Nzambé. Gédidige géne géviga g’ôba gôndé Téta. Nangagétôma na gôndé anye gô ina aTéta. Sangô te mbangine yami. 27N’anye dôta te mbangiye yami gôébégô bandôa v’ebandô nômabaka vavo n’ami.

Currently Selected:

Jean 15: TSV

Highlight

Copy