Jean 20

Ngiine émadenganô éka bobo

(Bono na Matt. 28:1–8, Marc 16:1–8, Luc 24:1–12)

1Pitsine éamapanga éatsono n’ongôngô na kué, Marie môsi Magdala amakea gôébuéa gô ngii. Ameena mbe étaé évôni émakukéguku ngiine éamôdungutu émakandanganédu na va kôgangô. 2Marie amakea pita gôédenga Simon Pierre na môvo môneengi, ône amootéa Jésus ényôngéô. Amanigôa ahngô mbe: Nadengi ngiine te bobo. Oma amani énôtôa nzumbine gô yangô. Tsamenya gôkeyi ahngô na yangô. 3Pierre na môkedi amakea na gô ngiine éamôdungutu. 4Muetso abaé amakea pita, ivô môvo môneengi amootéa Pierre pitaye na amapanga étsiga gô ngii. 5Amakotomo gôébono va gatse edukue éamôdungutu. Asiéngéé. Amadenga mikandamie miavembo mimadipô nzumbine mindé vumbaga va tsina. 6Simon Pierre amatsiga va ngimedi na ameengéa gô édukue. Angô dôta ameena mikanda miavembo mindé vumbaga va tsina. 7Ameena na mivo mikanda, te mine mimadipôkô môtsé aJésus. Miangô misibaké vavo na mine mimadipô gô ôtôe. Mimavutéguku yaô tungu. 8Vane môvo môneengi, ône amapanga étsiga va ngiine, ameengéa. Ameena na asitsumédô paga. 9(Emabaka te aneengie aJésus madeo asinigôgéô éne évovo Matendeo MaNzambé mbe: Jésus angakunduga g’ôwa.) 10Vane aneengie abaé ane, amanika na gô yeba yaô.

Jésus amatsutsuga vandé Marie môsi Magdala

(Bono na Matt. 28:9–10, Marc 16:9–11)

11Marie amatema va kôbangô angiine, amadéa. Amakotomo gôébono va gatse angiine éamôdungutu andé gôédéa. 12Ameena asi g’ôba abaé avigédiô na Nzambé amaata mikanda miavembô, andé digaa gômayaméduku ôtôe aJésus. Môvo amadigaa va tungune émabaka môtsé. Môvo dôta va tungune émabaka makôdôme. 13Asi g’ôba ameevôa Marie mbe: ?Môgeto noo, ôdéa ndé? Angô mbe: Me nadéa gômabongu ôtôe aKumu ami. Me tsamenya gôkeyi angô na nzumbine. 14N’emana énigôa asi g’ôba nane, Marie amagéngôga môtsée na ameena môma andé môtie va ngimedi. Môma nône te Jésus, ivô Marie asimenye mbe te angô. 15Jésus ameevôa Marie mbe: ?Môgeto noo ôdéa ndé? ?Obuta nde? Ivô Marie amamenya mbe môma nône te môkenene atsaga, na amavovo n’edi mbe: Okô mbe t’ewe ômôbongini, beenda me gômôvumbi éwe, mbe nakea nakemônikéa ébongo. 16Jésus amavovo n’edi mbe: Marie. Tsina na tsina amagéngôa na gôndé Jésus na amasémana g’ôgi edi aHebreu mbe: Rabbouni. (G’ôgi aGétsogo mbe: Môékédine wami na môtômine wami.) 17Jésus amamôdékéda mbe: Ombiabanda me ta me madeo tsibuéa na gôndé Téta. Tambô éwe kiaka, ôkenigôa ana aTétee n’ami mbe nakeyi na gôndé ône andé Tétene yami, te ône andé tétene yanyô. Nakeyi na gôndé Nzambé ami, n’angô te Nzambéne éanyô. 18Vane Marie agô Magdala amakea gôénigôa aneengie mbe: Me neeni Kumu. Na amanigôa ahngô metso mamavovo Jésus n’edi.

Jésus amatsutsuga na gôndé aneengie

(Bono na Matt. 28:16–20, Marc 16:14–18, Luc 24:36–49)

19Gô pitsine éanyaa tsono éne, aneengie amaduga ebovo gômookô ahngô Ajuif gomo, amabandéka ebee na môsapi. Jésus amatsiga amatema va gatse aô. Amavovo mbe: Gétabé gébaké gôndé anye. 20Vamavovo angô nane, amatubéda ahngô magandakame medi na tsungune éedi. Aneengie amatsôkéa na gényônga gévôni vameenahngô Kumu aô. 21Jésus amoomba ékôndéga ahngô mate mbe: Gétabé gébaké gôndé anye. Vane amatôma ahngô mbe: Gamatômu me na Téta, me dôta nanôtôma mbe: Kiakani. 22N’emana évovo nane, Jésus amavumbéa modie wedi na gôndé ahngô. Angô mbe: Diiani Gédidi SaNzambé. 23Okô anye nôsingéa oma kokoo gô mabégô maô mabévani, asingéô na gô pie kokoo. Okô anye nôsasingéa oma kokoo, n’ahngô na gô pie asangasingéô kokoo.

Jésus na Thomas

24Ivô môvo va gatse aô nzima n’aneengi abaé, inedi te Thomas (éne éevasa) asidenganô vamatsiga Jésus vandé ahngô. 25Akedi, aneengi n’edi amanigôa angô mbe: We tôeni Kumu. Thomas angô mbe: Okô me tsiena évisôe gô magandakame medi, ôkô tsivumba môsavie va évisôe émapéndaka tseye, na ôkô tsivumba ôgogoe wami gô tsungune yedi, kaka me neetsa môtémami mbe amakunduga g’ôwa.

26Pitsi génana dimoota, aneengie aJésus amoomba éduga vavo gô eba, ahngô na Thomas muetso. Ebee ômabaka ômabandéku na môsapi. Ivô tsina na tsina Jésus amatsiga amatema va gatse aô na amavovo mbe: Gétabé gébaké gôndé anye. 27Vane Jésus amavovo na Thomas mbe: Weseda môsavie woo n’eva. Bonoko magandakame mami. Weseda ôgogoe woo. Bandaka tsungune yami. Tsika pagaye yoo. Itsa me môtémee woo. 28Thomas amamôneegeda mbe: Ewe Kumu ami. Ewe te Nzambé ami. 29Jésus ameevôa angô mbe: ?Ewe ôétsi me môtémee te gôeni éwe me-a? Ti gô gényônga géndé gôndé ane angeetsa me mitémamie, ahngô géene me na miso maô.

Ebandô ématendu miganda miemi

30Jésus amatubéda va miso maneengi edi émbégéa éyekani éangudi yaNzambé te mabégô mamanyônganéôni masoongôa môma ésupua, na mangô masitendu gô miganda miemi. 31Ivô mane mamatenduni éma, mamatendu gômbe anye nôngamenya na gô pie, mbe Jésus te Christ Muana ANzambé. Na veetsanye Jésus mitéma mianyô mietso, nôndé na monyo apie.

Currently Selected:

Jean 20: TSV

Highlight

Copy