Jean 21

Jésus amatsutsuga na gôndé aneengie tsambué

1Vamoota pesu andéô, Jésus amatsutsuga na gôndé aneengi edi avo, va mubu mbe Tibériade. Ebégôe émabaka te nane. 2Simon Pierre na Thomas, (ône amabaka évasa) na Nathanaël (môsi Cana gô tsenge éaGalilée) na ane abaé aZébédéé, n’avo aneengi abaé amabaka muetso vavo. 3Simon Pierre amavovo n’akedi mbe: Me nakeyi. Nakegunya mbusane. Akedi amasinga mbe: Ii, ôkani muetso. Amakea na amapeka gô mbôngône. Amagunya pitsine nyetso, ivô asiyôhe ta na viôma. 4Vamaba nyee ôka gôgiiakaga, Jésus amatsutsuga va tsényé. Aneengie asimenye mbe te angô. 5Jésus ameevôa ahngô mbe: ?Anye anami, nôyôhi nyama-a? Aneengie amamônikéda mbe: We tôsiyôha. 6Jésus amatéva ahngô mbe: Gunyani mbusane yanyô va kôbangô ambôngône na géeyo gémôgôô. Nôngayôha. Amagunya mbusane na asiôngôé éminôôa gô mbéyi gômadita yangô na pingône anyama gakaka yagétabé. 7Môneengine, ône amootéa Jésus ényôngéô, amavovo na Pierre mbe: One te Kumu Jésus.

Vamookô Simon Pierre mbe: One te Kumu Jésus, amaata ngoyine yedi (gôébégô amabaka mônyenge gôégunya mbusane). Amakuyaméa gô mbéyi. 8Akedi muetso amatsega na gô tsényé na mbôngône te ahngô aviga aduta mbusane émayôa na pingôye yanyama. Tungune émaduta ahngô nyamaye na va tsényé vasitongonéké vamabaka ôkana amikama mitayi miamatambé. 9Vamasutuméa ahngô gô mbôngône ahmadenga soto gémadumuu va tsényé. Ameena na mivo mipemba na dipo nyama yagô mbéyi dindé gôébéku miganga. 10Jésus amavovo n’ahngô mbe: Bakani na dipo nyama divigi n’anye. 11Simon Pierre amapeka gô mbôngône na amaduta mbusane émayôa na nyama dipôni, amagôgôa yangô na v’ehbôngô. Amatanga yangô te môkama na nzima ditayi na nyama yagô mbéyi ditatô. Buéyé gamayekegea yangô nane, mbusane ésikakégé. 12Jésus amabambéa ahngô mbe: Vigani nôviaa. Gôsibé ta na môneengi môvo ameevôa mbe: ?Ewe indaa? Gôébégô muetso asibômuku mbe te Kumu Jésus. 13Jésus amawesea gôékabéa ahngô môpemba na nyamaye dimabékuni.

14G’ekundugéa Jésus, éne te kukane éamôtatô ématsutsugangô na gôndé aneengi edi.

Jésus na Pierre

15Vamamanahngô éaa, Jésus amavovo na Simon Pierre mbe: ?Simon, éwe muana aJean ôôtéa akoo muetso adua gôényôngéô me-a? Pierre amaabéa mbe: Ii, Kumu. Osabômu mbe me nagônyôngéô. Jésus angô mbe: Bôngôa anee wami agono na anee amandombo. 16Vane Jésus amamôévôa éne éamôbaé mbe: Simon, muana aJean ?ônyôngéô me ti na gô pie? Simon amaabéa angô mbe: Ii, Kumu. Osabômu mbe me nagônyôngéô. Jésus amavovo n’edi mbe: Kenea mandombo mami. 17Vane Jésus amamôévôa éne éamôtatô mbe: ?Simon, muana aJean ônyôngéô me-a? Pierre ameena panda gômeevôa Jésus angô kuka ditatô mbe: ?ônyôngéô me-a? Na amaabéa mbe: Kumu, gôsaba ébégô ésamenya éwe, ôsabômu mbe nagônyôngéô. Jésus angô mbe: Kenea mandombo mami. 18Jésus ameevéda Pierre mbe: Vamabakewe ôgébaka mônzambu ômakata ômuene édata éoo v’oningé gôékea pati tungu émanyôngéô éwe ékea. Ivô vangadombéa éwe, ôngatômba mogome moo gôéaatédu na muene môma. Ongakedu gô tunguye disangatékewe ékea. 19Gô mavoviame mane Jésus ameevéda Pierre mônongoe owa ôngawaangô gô géneega saNzambé. Vane Jésus amatôma angô mbe: Oka n’ami nzéepo.

Jésus na môneengine amootéa angô ényôngéô

20Pierre amagéngôga miso medi na ameena môvo môneengi awesea va ngimaô. Te ône amootéa Jésus ényôngéô. Te ône amatengama andé va tabudé gôéévôa Jésus mbe: ?Kumu ône angagôkabani indaa? 21Vameena Pierre mbe te angô avigani ôdôô, ameevôa Jésus mbe: ?Ka-vo, ôdôô Kumu gô mbene angaba nayee? 22Jésus amavovo mbe: Okô me nanyôngéô mbe abé na monyo ngu na vanganika me, éne kaka ébégôe éoo. Ebégôe éoo te mbe, ômuene, kea nzéepo n’ami. 23Bandôa nyoone ébégôe émookanô va gatse aneengie mbe: Môkasô ône asangawa. Tambô Jésus asivove na Pierre mbe: Môma nône asangawa. Amavovo na Pierre mbe: Okô me nanyôngéô mbe abé na monyo ngu na vanganika me, éne ésaba gôndé éwe.

24One anôkitséa ômbanzee aJésus te môneengine ône na tôsabômu mbe mane matendangô mandé mapie.

Ebégô éamôyusumédu

25Mane mamayanza Jésus masakôdéa na mane manigôa miganda miemi. Okô môma akanéga ématenda metso bandôa v’ebandô ngu na v’ekôdéô, namenya mbe buéyé tsinane nyetso mbe ésangadugu gôékenea migandamie mingatenduni mine.

Currently Selected:

Jean 21: TSV

Highlight

Copy