Luc 11

Meekédu mosambô

(Bono na Matt. 6:9–13, 7:7–11)

1Nyovo Jésus amabaka gôévovo na Nzambé. Vamamanangô ésambéda, môneengi edi môvo amavovo n’edi mbe: Kumu, ikéda we gasambéduni, mônongovo gameekéda Jean aneengie wedi. 2Jésus amavovo n’ahngô mbe: Vasambéda anye Nzambé, nôvovo te mbe:

Téta,

Nanyôngéô mbe inoo éneegedu.

Nanyôngéô mbe ôkumue woo ôviga gôétôma.

3Itsa môyakô akuanakue n’asô pitsi yedi.

4Singéa we kokoo gô mabégô masô mabévani,

Mônongovo gasingéa we kokoo gôndé ane atôéndéa mabégô mabévani.

Vangakanégu we gôéénda mabégô mabévani, ômbiatsika we.

5Jésus amoomba évovo n’aneengie mbe: Tôkanéga te n’edué. Va gatse anyô, môvo andé na wee edi. Ongakea na gô ebedi va gatse apitsi gôémôduka mbe: Waé, sombeda me mipemba mitatô. 6Navigéyiô na môgenda, angô te wee ami. Gô ebami gôsaba môyakô gôémôétsa. 7Tôkanéga mbe môkedi, ône andé gô gatse eba, angamôkina mbe: Nôtôga vane. Tsika me. Ebami ôbandékiô. Wa n’anami tômani éyama. Me tsangoongôa étimôga gôégôétsa mipemba. 8Endé te nane. Kumu eba asangatimôga tsangô mbe te gôdukiô angô na wee edi. Ivô mavooe angatimôga te gôsatsika môkedi ébôkéda v’ombaa gôyungédu angô viovie, na angamôétsa éne édukangô. 9Na Jésus angô mbe: Gô miduké mioma na Nzambé éndé te nane. Dukani na môvinéné na nôngeetsô. Butani na môvinéné na nôngadenga. Bôkédani na môvinéné na nôngakukuéô. 10One adukani, angeetsô. One abutani, angatsutsua. Ombee ôkukuu gôndé ône abôkédani. 11Anye téteye ?ôkô muana anôduka môpemba nôngamôétsa étaé-a? ?Okô muana anôduka nyama yagô mbéyi nôngamôétsa nyoongoo-a?#11:11 G’ôgie waô Jésus amateta nyogo gôébégô asi Israël asaaka nyogo. 12?Okô muana anôduka ébôngô éatsôsô nôngamôétsa ngôtô-a? 13Buéyé gandé anye abévie, nôsabômu eetsa anee wanyô éômee éamisôba. ?Tambô na tétanyô, ône andé g’ôba asanganôétsa Gédidi sedi-a? Angeetsa sangô te gôndé ane amôdukani.

Jésus amaabéa atsundédi

(Bono na Matt. 12:22–30, Marc 3:20–27)

14Jésus amabaka gôékuséda gédidi gébévani gémakukéga môma ôbôbô. Vamakusa gédidige gébévani, gébôbôge gémabandôa évovo. Muetso amadenganôni amasôbasôbana. 15Ivô avo amadenganôni amavovo mbe: One eetsa angô ngudi yepatsa édidie ébévani te Béelzébul, môtômine édidie éne. 16Avo amanyôngéô étambéa Jésus pagô gôémôkubéda. Amamôévôa mbe: Tubéda we gémbégéa sangudiye yoo. Okô mbe diviga gôndé Nzambé we tôngeena. 17Ivô Jésus asibômu ébandôe émanyôngéô angô éena gémbégéage. Amanigôa ahngô mbe: Okô asi tsenge épo asaba n’evambevo, tsengene ésangadinga n’ebudangana. Na yebaye yatsenge nene dingeekamanéa anguene n’anguene. 18Okô Satan agenya gô mane maamuene, ôkumue wedi ?ôngadôôkanô nayee? Anye nôénda mbe: Jésus akuséda édidi ébévani gôndé oma te gômeetsô angô ngudi na Béelzébul. 19Tambô akanyô asi tsengepo n’anyô ?ngudiye dikusédahngô édidi ébévani gôndé oma yandaa? Akanyô anôétsi ôési ôvôni. 20Okô mbe te gô môsongosongoe aNzambé ôkuséda me édidi ébévani gôndé oma, tambô kôngédani mbe ôkumu aNzambé ômasuma na gôndé anye.

21Okô môma oongaa andé na ékeeyi gôékenea ebee wedi, ékôtee yedi ésangabandô. 22Ivô ôkô muene avigi ootéa n’ongaa na amôdiia, angawata ékeeyie éakumu eba. Ekeeyie éne te éne émeetsa kumu ebee ngudi. Mômôgôône angadiiani angakaba éetso émawata angô kumu ebee.

23One asaba évambevo n’ami, te môvingi ami. Na ône asayanza n’ami gôékôkéga, andé gôépanza.

Gédidi gébévani génikani

(Bono na Matt. 12:43–45)

24Vakusédu gédidi gébévani gôndé môma, gékea gékénga sagôsagô gô tungu disadigaa môma gôébuta tungu éngayôngéô sangô édunda. Okô gésiene tungu éedigaa géngagiangana gô matasa medi mbe, nanganika na gô ebee ômakusédu me. 25Na sangô génika. Gédenga ebee ômagoomboo na ômanyepedu. 26Vane gédidige géne gékea gôéwanyéda évo édidi tsambué éôtéa ébéva na amuene géné samapanga. Eviga muetso géômbé na éengéa gôédigaa wangô. Vane ébévee éamôma nône éôtéa n’ebévee éedi éamapanga.

Gényônga sapie

27Vamabaka Jésus gôévovo nane, môgeto môvo va gatse agéômbége amavovo n’edi mbe: Ti gô gényônga géndé na môgetone amakenea éwe ôndé gô ébuyi éedi, na amanyuéséda éwe na ébene éedi. 28Ivô Jésus amanikéda mbe: Eébéyée nane, me nanôbeenda mbe, ti gô gényônga géndé na anye nôôkô ôgi aNzambé na nôgobeda angô.

Oma ahbuta éena ngudi yaNzambé

(Bono na Matt. 12:38–42)

29Gômakôvana géômbé soma na gô kôbangô aJésus amanigôa ahngô mbe: Oma abévani asi pitsi yedi abuta étubédu gémbégéa sangudi yaNzambé gô mayanza mamisôba masoongôa môma ésupua. Ivô ahsangeena gémbégéage gésoongôa môma ésupua, buétsé te géne gémeenanô gôndé Jonas, môpandôédi amatasa maNzambé. 30Jonas amabaka gémbégéa gémeena asi Ninive. Te mônongovo ga me Muana Amôma, nangaba gémbégéa géngeena anye asi pitsi yedi. 31Gô nyaa amôtsundu môgetone, môtômi atsengene édongu angasemba oma apitsi yedi na angatubéda ahngô misongosongo mbe: Me namatimôga gô tsenge éami éagôdagôda gôébuéa na gôndé Salomon gôéôkô éodo émabaka n’edi. Géé ti anye nomabaka tungu épo na muene môékédi ootéa Salomon. 32Gô nyaa amôtsundu asi Ninive angasemba oma apitsi yedi na angatubéda ahngô misongosongo mbe: Buéyé we asi Ninive tômeeséda wéene na tômakoa mitémamie vameevédu we na Jonas. Géé ti anye, nômabaka na muene ameevéda anye ootéa Jonas.

Otô ôtômu na miso

(Bono na Matt. 5:15, 6:22–23)

33Môma asatumba dambi na tsué gôésuéga yangô vo gôégudéga yangô na môdômbô. Ivô amivumba te va gévumbéô sambe éngatanéda eba wetso, n’oma eengéani angeena na vede. 34Miso mamôma te ga dambi étômbéda ôtôe wedi wetso. Okô miso moo meenéa, na ôtôe wetso ôngaba na vede. Ivô ôkô miso moo mabeea, na ôtôe wetso ôngaba gô évitsi. 35Tambô ôwema, kabaga gévede géndéké n’ewe gékoga sevitsi. 36Okô ôtôe woo wetso ôndé ômayôa na gévede gôsangaba ta na vitungu vivo vingasanéa évitsi. Vane ôtôe ôdigaa na vede, ti eembe ôndé na dambine éobébayi gô gatse oo.

Jésus ameeséda Apharisien n’anigôi amige miaNzambé

(Bono na Matt. 23:1–36, Marc 12:38–40)

37Vamamana Jésus évovo, Môpharisien amamôbambéa gôéaa môyakô gô ebedi. Jésus amakea na amadigaa va tabudé. 38Apharisien amatsapéô vameenahngô Jésus adigaa gôéaa môyakô, angô gépangé éôvôa mogome geendahngô gô ésôgee éaô. 39Kumu Jésus amanigôa angô mbe: Nôeni geendanye. Gô ébungue éanyô na gô épedee éanyô, nôsabômu éôvôa te gésa géngongo géenanôni. Géé va gatse nôndé nômayôa na manyima meesua, na ébévee éetso. 40Ti anye nômavétsa mikambô. Nzambé, ône amavanga ôtô amôma ôenanôni, te angô amavanga n’ene éagô gatse amôma éseenanôni. 41Ene ésuéga anye gô ébungue éanyô na gô épedee éanyô, kabakani éangô na misuga, na vane éetso éngaba te émagôgéani gôndé anye.

42Ti gô maguga mandé gôndé anye Apharisien. Gô éne égésu gô môyakô gôényepeda angô, te tôkôdô étetu mbe menthe na rue, buéyé na mavo mabunza, gô nzima atsangi nôétsa Nzambé tsangine éedi épo. Ivô nôsamenya égobeda Nzambé na mitéma mianyô mietso. Nôsamenya éneegeda Nzambé n’etsimama. Tambô buedi mbe nôgobeda mane mavôni na gétsiké mane magemage.

43Ti gô maguga mandé gôndé anye Apharisien. Nônyôngéô édigaa gô kuanga yokumaka mbe nôenanô gô eba agéwanyéô. Nônyôngéô mbe oma anôkômbôa kômbôye yanyô yagéneega gô étungue édenganô oma ayekani. 44Ti gô maguga mandé gôndé anye. Nôgono na ngii ésamenyanganô mbe édué te ngii, na môma ayeta gô yangô gémenye.

45Gévovi gémavovo na Jésus mbe: Môékédi, vavovi éwe vane ?ôsamenya mbe ôvovo te na we évovie-a? Na ôtubéda we tsoyi.

46Vane Jésus amamôeséda mbe: Ti gô maguga mandé gôndé anye évovie. Nôtsueéda na nôtsakéga oma magumba maditani masangoongôa ahngô étsua. Ivô gôéwedéa ahngô, anye nôsabono na n’eso. 47Ti gô maguga mandé gôndé anye. Anye nôsaa ngii yamisôba yapandôédi amatasa maNzambé ahmayôhu na tétee yanyô yambeego. 48Gô éne nôtubéda ganyôngéô anye gamayôhu ahngô na tétee yanyô. Ene émabaka na tétee yanyô te gôéyôha ahngô. Anye dôta éne éndé n’anye te gôényepeda ngiiye dimagunyu ahngô. 49T’ebandô Nzambé gô éodo éedi amavovo mbe: Nangatôma na gôndé oma apandôédi amatasa mami. Nangatôma dôta ane amasevôa me gôétsua tsangône éami. Avo angayôhu. Avo dôta angakuanô. 50Jésus amoomba mbe: T’ebandô anye asi pitsi yedi nôngasisédu gô diôwaye yetso yapabdôédi amatasa maNzambé bandôa vamakanô tsina n’oba. 51Bandôa n’Abel ône amapanga éyôhuni ngu na Zacharie ône amayôhu gô gatse eba aNzambé va kaba agévumbéô sadigondoku na tsongo éadisambô édigaa Nzambé. Na gô pie, me Jésus nanôbeenda mbe: Oésie adiôwaye yedi yetso, ôndé te gôndé anye asi pitsi yedi.

52Ti gô maguga mandé gôndé anye évovie. Nôsumbéda môsapi ôkukua ôkukée atsongone éndé éodo éetso. Gôbongi anye môsapi, anyene nôseengéa gô tsongo nene, na nôdékéda dôta akanyô, ane anyôngéô éengéa wangô.

53Vamanôtôga Jésus gô tungune émeekédangô éne, évovie n’Apharisien amakambôga pepe. G’ôpisa ômookô ahngô ameevôa Jésus nyivôye gô mabégô metso. 54Nyivôye te pagô dimakanégahngô émôtambéa mbe mavooe Jésus angakuba gô mavoviame masangaba kuanakue.

Currently Selected:

Luc 11: TSV

Highlight

Copy