Luc 13
13
Koani mitémamie kabaga nôwa
1Ndéô nene avo ahmaviga gôébeenda Jésus éne émabuéani mbe: Asi Galilée ahmabaka gôédeekeda digondoku yaô. Pilate amayôéda ahngô. Na nzina yaô dimagésangana na dine yadigondoku dimayôhuni. 2Jésus amabika mbe: Gômayôhu ahngô ôwa ôdagani ?anye nômenya mbe ahngô amootéa ébéva na oma muetso-a? 3Ti me, nanôbeenda mbe, kaka nane. Okô anye nôsikoa mitéma mianyô nôngawa te mônongovo. 4Aanakani. Avo nzima na omo génana ahmawa gô Jérusalem vamapikô ahngô n’eba aSiloé agô ngongo ngongo ômakitségani. ?Nômenya mbe ahngô te amootéa ébévani na asi Jérusalem muetso-ma? 5Ti me nanôbeenda mbe kaka nane. Okô anye nôsikoa mitéma mianyô nôngawa te mônongovo.
Tsava éagéétété samiônda gésibôtékéni
6Jésus amagunya ahngô tsavane mbe: Mômôgôô amagaaba gô tsagedi géétété samiônda gétetu mbe ôfiguier. Amakea gôéseta sangô gôébono miôndamie. Asidenge. 7Vane amavovo na môyanzi edi atsaga mbe: Eenaka éma étatô éviga me gôéseta géétété gegé. Me tsidenga mônda ta n’ovo. Wanga sangô. ?Ebégô ndé ôkenea sangô sagébôtéké? Sangô géebakanéda tungune te bobo. 8Môyanzine angô mbe: Ovénga vita kumu ami. Tôtsiké sangô géma gegé. Nangasiga gô kôbangô asangô. Nangavumba toto anzué. 9Mavooe gô géma gévigani géngabôta. Okô gésibôta, géngawangô.
Jésus amadôngéda môgeto amabeeani gô nyee edunda
10Nyee edunda Jésus ameekéda gô eba agéwanyéô. 11Gômadenganô môgeto amabeeani. Gédidi gébévani gémabaka gôndé angô môsingi nzima n’ema génana. Gédidige géne sokonzo gémamôkotoméda na asiôngôé ébôgôa môkongoe. 12Vameena Jésus angô amavovo n’edi mbe: Môgeto noo, éwe ôdôngédiô gô ébeea ékatiôkô éwe. 13Jésus amamôtsakéga mogome. Tsina na tsina môgeto amakonyogo môkongoe. Amakuméda Nzambé. 14Tsesu eba agéwanyéô asinyôngéô gamayanza Jésus gô nyee edunda gôédôngéda môma. Tsesu amavovo na géômbége mbe: Môma ayanza te pitsi môtôba. Tambô vigani nôvidôngédu gô miôsaamie mine, kaka gô nyee edunda. 15Kumu Jésus amabika mbe: Ewe, môsi enyepa amônya. Kumu ebodu akati tabane yedi. Amitsôbôa nyaa edunda mbe éaa môyakô na ényua meba ?kaka nane-a? 16Na môgetone ôdôô te muana aAbraham amadinga gô gésengoge gémakatô angô na Satan môsingi nzima n’ema génana. ?Tambô gôétsôbôa angô gésengoge gô nyee edunda, ébévi-a? 17Ene émasiia Jésus ématubéda adudeoe wedi tsoyi. Ivô géômbége amatsôkéa na gényônga gô metso mamayanza Jésus mamatubéda ényangee éondômbedi.
Tsava éagéétété gévôni
(Bono na Matt. 13:31–32, Marc 4:30–32)
18Jésus amavovo mbe: ?Okumu aNzambé ôgono na ndé? ?Nagoneda angô na sôma ndé? 19Okumu aNzambé ôgono na vibie vigevige vitetu mbe moutarde vimamuaka môgabi gô tsagedi. Vibievie vimakanda. Na vimakoga te géétététété. Nyoeye dimasaa mebu maô gô mitabémie.
Tsava éamibie miaahndéda mipemba
(Bono na Matt. 13:33)
20Jésus amoomba évovo mbe: ?Nagoneda ôkumu aNzambé na sôma ndé? 21Okumu aNzambé ôgono na mibie migemige miindô mbe levure miaahndéda mipemba. Môgeto agésa mibiemie mine gô gébémbége setso safarine gôéaahndéda mbômbé éamipemba.
Meekédu mokuké ôgeôge
(Bono na Matt. 7:13–14,21–23)
22Jésus ameekéda amakitsangana misengemie na mbôkaye amakea môtôô edi na gô Jérusalem. 23Môma môvo amamôévôa mbe: Kumu beenda me, ane angoobouni ?asangaba te vipesu-a? Jésus amamônigôa mbe: 24Gényôgani gôéengéa g’ômbee ôgeôge. Menyani na gô pie mbe ayekani anganyôngéô éengéa gô angô ivô asangoongôa.
25Okô kumu eba andé gô ebedi na amamana ébandéka na môsapi, n’anye nôndé gô môkii, buéyé mbe nôbôkéda na nômôbambéa mbe: Kumu eba kukuéa we, asanganôkukuéa. Anganôénda mbe: Me tsamenya gôviganye. 26Vane mavooe nônganigôa kumu eba mbe: Wa n’oo tômaaka vavo na tômanyua vavo. Na we tômeena éwe ômeekéda gô mbôkasô. 27Kumu eba angoomba énôtôna mbe: Me tsamenya gôviganye. Nôtôgani na gôdagôda n’ami. Anye eendi amabégô mabévani. 28Vane te vangadéa anye na te vangagéa anye ngeko gô pievia. Nôngeena Abraham na Isaac na Jacob n’apandôédie muetso amatasa maNzambé ahndé digaa gô tsenge éaNzambé. Géé anye, nôngapatsô na gô môkii. 29Oma angaviga gôtsiga kômbéne na gô pénda yangô na gésa na gésa gôédigaa va tabudé émakônzuni g’ôkumu aNzambé. 30Ayekani andé gô mbene angaba gô ngima. Na vane gémbene amootu na géngima.
Jésus amavovo ébégô éaJérusalem
(Bono na Matt. 23:37–39)
31Gô ndéô nene avo Apharisien amaviga na gôndé Jésus gôémôevéda mbe: Ewe nôtôga éva, kiaka na gô nyene tungu. Hérode abuta éyôha éwe. 32Jésus amatôma ahngô mbe: Mômôgôô nône agono na nzego. Kiakani nôkenigôa angô mbe: Me Jésus deo noo na mene nakuséda édidi ébévani éndé gôndé oma, nadôngéda ane abeeani. Pitsine éamôtatô te éne éngadugéda me éyanzee yami. 33Ivô me deo noo na mene na ngima amene nandé gôémangôa môtôôe ôkea me ôdôô. Môpandôédi amatasa maNzambé asayôhu gô nyene tungu, ayôhu te gô Jérusalem.
34Ah anye asi Jérusalem. Ah anye asi Jérusalem. Nômayôha apandôédi amatasa maNzambé. Nômatuma na mataé ane amatôma Nzambé na gôndé anye. Kuka yetso me namanyôngéô énôweseda gôénôgudaméa gagudaméa tsôsô anedi. Ivô anye nômakina. 35Tambô, menyani mbe gô ebanyô gôsangadôba môma. Endé te nane. Me nanôevéda mbe anye nôsangadôena me ngu na nyee ôngavovo anye mbe: Mbe mate maNzambé mabaké gôndé ône aviga gô ina aKumu asô.
Currently Selected:
Luc 13: TSV
Highlight
Share
Copy
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
