1 Mose 31
31
Phutukulu yi Yakobi ku Kanana
1Yakobi wubawanga mambu mabakambanga bana ba babakala ba Labani ti: «Yakobi wubongidi mu bukhita bibio bibedi bi se dieto, mu biawu bi se dieto kamebakila kimvuama kikio.» 2Yakobi wutala mbulu Labani ayi wumona ti kithuadi kiawu yisiedi ko banga bukibela ku mbusa, 3Diawu Mfumu Nzambi wukamba Yakobi: «Vutuka mu tsi yi mase maku ayi yi dikanda diaku, mandi ba yaku.»
4Yakobi wutumisa Lakheli ayi Leya baba ku nsitu ayi bibulu. 5Wubakembi: «Mbueni ti zizi ki sieno kisiedi ko banga bu kimebela ku mbusa vayi Nzambi yi se diami wudi yami. 6Luzebi mbote ti mbetovuka ku wombo mu sadila se dieno mu ngolo ziami zizio. 7Se dieno wutsakinini, wupiakisidi mfutu ami kumi di zikhumbu. Vayi Nzambi kasi kunyambula ko kaphangila mambi. 8Mu thangu zizio kabakambanga banga buabu: “Bibulu bi matona-matona ma biba mfutu aku”, buna bulu bibio bibabutanga bana ba matona-matona. 9Bobo Nzambi kazionini bibulu bibio bi se dieno ayi wupheni biawu. 10Mu thangu bibulu bi bundana, ndivumbula meso ayi mbueni mu ndozi zikhombo zimbakala ziba zinzila nzila, zi matona manene ayi mafioti ayi matona masobakana mafuka bibulu. 11Mu ndozi yoyo mbasi yi Nzambi yithela: “Yakobi!” Navutula: “Minu yandu.” 12Buna wukamba: “Wumbula meso maku ayi tala, zikhombo zizio zimbakala zi fukidi bibulu, kadi mbueni malembo vangidi Labani. 13Ndidi Nzambi yimonikina ku Beteli, va fulu kiwukusa mafuta va tadi ayi va wundila ndefi#31.13 Tala 28.18-22.. Buabu, telama, totuka mu tsi yayi ayi vutuka mu tsi yi kanda diaku.”»
14Buna Lakheli ayi Leya bamvutudila: «Tubeki diaka mvuilu yitulenda vingila mu nzo yi se dieto? 15Kalembo tubanzileto ko banga banzenza, bila wututekidi ayi wudidi mu kedika mbongo zieto? 16Diawu kimvuama kikio Nzambi kazionini kudi se dieto kieka kieto ayi bana beto. Vanga buabu mamo makukembi Nzambi.»
17Landila dio, Yakobi wutelama ayi wukumisa bana bandi ayi baketo bandi va mbata zikamela. 18Wusengula bulu biandi bibio ayi bima bibio bikabaka, bibulu biba mvuilu wu kabaka mu tsi yi Padani-Alami mu diambu kavutuka kudi se diandi Isaki ku tsi kanana. 19Labani bukayenda mu vuka mika mi bibulu, yawu thangu Lakheli kayiba biteki bi se diandi.
20Landila dio Yakobi wumanga tuba kedika ki ntima andi kudi Labani muisi Alami bu kakambu kunkamba ti lembo tini mu kedika. 21Buna wutina niandi ayi bibio biba yandi, wutelama, wusabuka nzadi Efalata, ayi wutadisa ku miongo mi Ngiladi.
Labani wulandakana yakobi
22Lumbu kintatu, bakamba Labani ti Yakobi tinini. 23Buna Labani wubonga zikhomba ziandi ayi wunlandakana tsambodi bilumbu ayi wumbakidila mu miongo mi Ngiladi.
24Vayi Nzambi wuyiza bata Labani muisi Alami mu ndozi mu builu ayi wunkamba: «Keba vanga diambu diambi kudi Yakobi.»
25Buna Labani wubakidila Yakobi, va fulu kikatunga nzo zingoto, va mongo Ngiladi vakatunga zinzo zingoto, Labani ayi batu bandi bavanga bo buawu. 26Buna Labani wukamba Yakobi: «Mbi wuvengi! Wusakinini pheve ami ayi wuneti bana bami ba baketo banga batu bavengo zikhole zi mvita. 27Bila mbi wutinini mu nsueki ayi wukadi kukhamba, muingi ndikusindika mu kiese ayi mu nkunga, mu zindungu ayi tsambi. 28Wusi kuphana ko thangu mu bumba bana bami ba baketo ayi batekolo bami. Tala, wuvengi diawu banga nkua buzengi! 29Mbeki lulendo lulo mu kuvangila mbimbi vayi Nzambi yi se diaku wukhembi mu builu bu kibedi zono mu kamba: “Keba tubisa Yakobi diambu kani dimbote kani dimbi.” 30Buabu ti wuyele bila wubedi phuila ziphuele zi nzo se diaku, bila mbi wuyibidi biteki biami?» 31Landila dio, Yakobi wuvutula kudi Labani: «Ndimueni wonga bila ndikikamba ti lenda kunziona bana baku ba baketo. 32Yakobi wubuela kamba, woso wumawumonina biteki biaku kabika zinga.» Va ntuala bakhomba zieto, tsiata nge veka bio bidi kudi minu ayi bonga biawu biba biaku. Vayi Yakobi kasizaba ko ti Lakheli wuyiba biteki beni.
33Labani wutsiata zinzo zingoto zi Yakobi ayi zi Leya, ayi zi bisadi biole bi baketo, vayi kasi ku bimona ko. Ku zimunina, wutotuka mu nzo yingoto yi Leya ayi wukota mu yoyo yi Lakheli. 34Lakheli niandi wubonga biteki ayi wusueka biawu ku tsi kiandu ki kamela. Wubivuandila ayi Labani wutsiata nzo yi ngoto yiyo vayi kasi bimona ko. 35Buna wukamba se diandi: «Bika mfumu ami ka bika kufuemina bukhembo telama va ntuala andi bila ndidi banga bumbelanga baketo ngonda ka ngonda.»
Landila dio Labani wutatamana siata vayi kasimona ko biteki beni. 36Buna Yakobi wufuema ayi wuzonzisa Labani. Yandi wubuela vutudila Labani mu phova yi ngolo: «Mbimbi ami kue yidi, disumu mbi ndikuvangidi muingi wundandakana mu nganzi zizio? 37Buabu bume tsiata bima biami bibio, mbi mueni bi nzo aku? Kambisa biawu va ntuala khomba ziami zi babakala ayi bakhomba ziaku zi babakala muingi batuzengila nkanu. 38Tala, mbekala yaku makumole ma mimvu. Mameme maku ayi zikhombo ziaku zikadi sulula ayi ka khumbu ko ndidia mameme ma phaka aku. 39Kadi khumbu ndinatina bulu kivondo kudi bulu bi nsitu, minu veka ndiabafutanga bulu kinkaka. Wuba tombanga ti ndifuta bulu kiyibulu kani va muini voti va builu. 40Minu veka ndieba yumanga muini ayi tita kiozi va builu ayi kadi bubakila tulu. 41Makumole ma mvu ndidi ku nzo aku, ndisadidi kumi mvu ya mu diambudi bana baku bole ba baketo ayi mvu misambanu mu diambu di bibulu biaku ayi wusekudi kumi dikhumbu mfutu ami. 42Ti Nzambi yi khaya ami Abalahami, Nzambi yiba titisanga se diami Isaki kasi ba yami ko nganu wumbikidi ndienda mioko na mioko. Vayi Nzambi wumueni mvuezolo ami ayi salu kingolo kindisedi, diawu mu builu bu mazono, kandungisini.»
43Labani wuvutula kudi Yakobi: «Bana baba babakheto, bami ayi bana bawu, bami, mameme mama mami, bibio bilembo moni minu puidi biawu ayi bana bami ba baketo. Diambu mbi diphasi ndilenda vanga kudi bana bami babakheto ayi kudi bana ba babutidi? 44Buabu yiza tuvanga nguizani ngeyo ayi minu, ayi nguizani yoyo yiba banga mbangi va khati ka minu ayi ngeyo.»
45Yakobi wubonga ditadi, wutedimisa diawu banga dikunzi. 46Landila dio Yakobi wukamba bakhomba ziandi zi babakala batota matadi. Ayi babonga matadi. Batota mawu ayi ba makupika va fulu kimosi. Babo badia va mbata kuka di matadi. 47Labani wutedila fulu beni Yengali-Sahaduta vayi Yakobi wutedila kio Ngaledi.
48Labani wukamba: «Dikuka diadi di matadi dieka buabu mbangi va khati minu ayi ngeyo.» Kiokio bila batedila fulu beni: «“Ngaledi”», dibangudulu: «“Kuka di mbangi.”» 49Batedila kio diaka Misipa, dibangudulu: «“Fulu ki kengila”», bila Labani wukamba: «Bika Yave katusunga bu matuvambana. 50Nge monisa bana bami babakheto phasi, ti kuedidi bakheto bankaka, keba kuaku! Zaba ti kuisi ko mutu widi mbangi va khati ka beto vayi Nzambi widi mbangi va kati ka minu ayi ngeyo.»
51Labani wubuela kamba Yakobi: «Tala dikuka di matadi mama ayi dikunzi dithedimisi va khati minu ayi ngeyo. 52Mabiba zimbangi ti ndilendi sabuka ko kuka di matadi didi ku ndambu aku, ayi ngeyo phe ku ndambu aku, kulendi sabuka ko kuka diadi ayi dimbu bidi ku ndambu ami mu makani mambi. 53Bika Nzambi yi Abalami ayi Nzambi yi Naholi, baba bazuzi va khatika beto#31.53 Naholi. Khomba yi Abalahami (1 Mos 11.16) ayi khaya bakala yi Labani (24.24, 29). -Va khatika beto: tueti landakana masonama mu minkanda minkaka mi Ebeleo ayi minkaka minkhulu mi Ngeleke mikambu buela vava mambu mama Nzambi yi nkulu awu..»
Yakobi wuleva ndefi mu zina di Nzambi nio wutitisa se diandi Isaki. 54Landila mo, Yakobi wuyoka nkayilu va mbata mongo ayi wutumisa bakhomba ziandi ku ndambisa. Bu bamana dia, baleka va mbata mongo.
Currently Selected:
1 Mose 31: YOM-CD
Highlight
Share
Copy
Want to have your highlights saved across all your devices? Sign up or sign in
©2024 Seed Company in coordination with Forum Communautaire des Traducteurs de la Bible et Alphabétisation
