1 Mose 43
43
Ngiendolo yi nzole ku Ngipiti
Yakobi wuyekula Benyamini kenda ku Ngipiti
1Nzala yiba yingolo mu tsi yi kanana. 2Bu bamana dia witi yibanata tona ku Ngipiti, Se diawu wubakamba: «Vutukeno, lutusumbila ndambu bimvukila.» 3Vayi Yuda wunkamba: «Mutu beni wutoma kutusikimisa ti kalendi kutu yakula ko enati ti khomba eto kakadi ba yeto. 4Ti fidisi khomba eto ayi beto, buna matukulumuka mu kusumbila bimvukila. 5Ti mengi kumfidisa, tulendi kuenda ko, bila mutu beni wutoma kutukamba: “Ti khomba eno kasi neno ko!”» 6Isaeli wuvutula: «Bila mbi lufuiti kuphangila mbi bu lukembi kudi mutu beni ti lubeki khomba yinkaka yi bakala?» 7Bavutula: «Yandi wutuyuvudi biuvu biwombo mu diambu dieto ayi kanda dieto, bila wutukembi: “Ti khomba eno kasi neno, kilendi kuluyakula ko!”»
8Yuda wukamba Isaeli, se diandi: «Tata, yekula Benyamini kenda nami. Matuenda ayi matuba bamoyo ayi lulendi fua ko, beto ayi makanda meto. 9Minu mandiba nkebi mu diambu diandi. Mu koko kuami lenda tomba maphasi va yandi. Ti ndikadi kunata ayi kumvutula va meso maku, buna phodidi masumu kudi ngeyo mu thangu zioso. 10Ti tusiviokisa ko thangu, nginu tuyele ayi tuvutukidi khumbu zole zazi.» 11Buna Isaeli se diawu wukamba: «Bu diekila bobo, vangeno diadi: Bongeno mu zitsaku zeno mim'butu mimio mikitoko mi tsi ayi nateno miawu kudi bakala diodio: mua ndambu malasi, mua ndambu niosi, ladanumi ayi mila mi nti, pisitasi ayi zi khumunu. 12Bongeno phe mu moko meno kuku biole bi mbongo, mbongo zivutulu mu tsaku zieno, nateno ziawu mu koko kueno. Bulendakana yiba nzimbala. 13Bongeno khomba yi bakala eno ayi telameno. Vutukeno kudi mutu beni. 14Ayi bika Nzambi Phungu-Tulendo kaluvana lufuilu kiadi va ntuala mutu beni muingi kaluyekudila mu kedika khomba eno yinkaka ayi Benyamini. Vayi minu, ti khondolo bana, bika ndikondo bana.»
Mbonana yinzole yi zikhomba ayi Yosefi
15Buna babakala babonga nkayilu, babonga mu koko kuawu kuku biole bi mbongo, ayi Benyamini. Ayi batelama, bakulumuka ku Ngipiti ayi batelama va ntuala Yosefi. 16Yosefi bukamona Benyamini ayi bawu, mu nsualu wukamba kudi bakala diba nkulutu mu nzo andi: «Nata batu baba ku nzo, vonda bibulu ayi kubika, bila batu baba mabadia nami mu thangu mbata.» 17Mu nsualu bakala wuvanga boso bukambila Yosefi. Bakala wunata batu beni ku nzo Yosefi. 18Vayi babakala bamona tsisi, bila babanata ku nzo Yosefi ayi bakamba: «Mu diambu di mbongo zivutuka ayi beto mu tsaku zeto, va thonono, bame kutunatina vava, muingi ba kiloza va tuidi, batubeta ayi kututula mimvika ayi ziphunda zeto.» 19Bafikama vadi mutu wuba mfumu mu nzo Yosefi ayi bamokisa va muelo nzo, 20bakamba: «Wutulemvukila, mfumu eto! Tukulumuka mbote, va thonono, mu sumba bimvukila. 21Vayi tala mambu mabua: Bu tutula va nkelo ayi butuzibula tsaku zeto, tala mbongo zi mutu mutu ziba va muelo ntu tsaku andi, mbongo zeto ayi luvalu luandi lulo. Tutidi kuzivutula mu moko meto. 22Ayi tukulumuni mu moko meto mbongo zinkaka muingi tusumba bimvukila. Tukadi zaba mu kedika nani wutula mbongo zeto mu tsaku zeto.» 23Buna bakala wuvutula: «Beno nasui, kadi moneno tsisi. Nzambi eno ayi Nzambi yi se dieno wutudidi mu diambu dieno kimvuama mu tsaku zeno. Mbongo zeno zitudidi kudi minu.» Buna nyadi wutotula Simeoni va bawu. 24Buna mutu beni wukotisa babakala baba mu nzo Yosefi, wuvana nlangu muingi basukula malu ayi wuvana bidia mu diambu di bibulu. 25Bakubika nkayilu tekila Yosefi kiza, ku mbata thangu , bila bawa ti vavana bandila bidia. 26Mu thangu Yosefi kakota mu nzo, banatina, mu nzo, nkayilu wuba mu mioko miawu ayi bafukama va ntoto va ntuala andi. 27Landila dio, wuyuvula ti badi mbote ayi wubuela: «Se dieno, nio wulutubila widi mbote? Wukhidi moyo?» 28Mu diawu bavutula: «Sielo kiaku, se dieto, widi mbote. Wukhidi moyo.» Buna babuongama ayi bafukama. 29Bu kavumbula meso, ayi mueni Benyamini khomba andi wubakala, muana bakala wu ngudi andi, wukamba: «Niandi nionio khomba eno wunleki wulukhembi?» Ayi wubuela: «Bika Nzambi kakumonisa nlemvo andi, muana ami.»
30Yosefi wusa nsualu, bila mabanza ma ntima malema mu diambu di khomba andi yi bakala, nate katomba fulu mu dila, wukota mu vinga ki khati ayi vana kadidila. 31Landila dio, wusukula zizi kiandi, wututuka. Wukiyala ayi wutuma bakubika bidia. 32Bavana bidia, yandi va ndambu, ayi bawu va ndambu, ayi va ndambu basi Ngipiti babedianga yandi, bila basi Ngipiti balendi dia va kimosi ayi ba Ebeleo ko, bila diambu diambi beni kudi basi Ngipiti. 33Ayi bakala va ntuala andi, wuthtete mu butuka boso bubela minsua miandi ayi lutidi kileki ayi batalasana bawu na bawu. 34Ayi Yosefi wubakubabuelanga bidia, vayi wulutisila Benyamini khumbu tanu viokila bankaka. Badia ayi banua ayi yandi nate bamana yukuta.
Currently Selected:
1 Mose 43: YOM-CD
Highlight
Share
Copy
Want to have your highlights saved across all your devices? Sign up or sign in
©2024 Seed Company in coordination with Forum Communautaire des Traducteurs de la Bible et Alphabétisation
