1 Mose 44
44
Yosefi wuthota zikhomba ziandi
1Ku landa, Yosefi wuvana thumunu kudi nkulutu nzo andi, wukamba: «Wesa bimvukila mu zitsaku zi babakala baba, kioso tezo kibalenda nata, ayi tula mbongo zi mutu mutu va ntu tsaku andi. 2Vayi mbungu ami, mbungu yi palata, fuiti tula yawu va ntu tsaku yi muana wu nleki, ayi zimbongo zi witi kiandi.» Wuvanga boso bunkambila Yosefi. 3Buisi bukia bu basindika babakala, bawu ayi ziphunda ziawu. 4Batotuka mu mbanza. Basi bawu thama ko mu thangu Yosefi kakamba nkulutu nzo andi: «Telama! Landakana babakala bobo, wubabakidila ayi wubakamba: “Bila mbi luvutudi mambi mu mambote? 5Lusi yiba ko mbungu yinuinanga mfumu ami ayi yinkabikudilanga#44.5 Yosefi weti tubila phila mbikudulu yibavangamanga mu nzila yi bangula buphila buididi dibeti di mafuta ditudulu va yilu nlangu widi mu kopo. mambu? Diambu dimbi luvengi.”»
6Ku zimunina, wubabakidila ayi wubakamba ziphova beni. 7Vayi bamvutudila: «Bila mbi mfumu ami kafuiti tubila phila yayi? Dilendi banzulu ko ti bi sielo biaku balenda vanga diphila yayi. 8Talanu, mbongo zitumona va ntu zi tsaku zeto, tukunatina zo tona ku Kanana. Bue tulenda yibila mbongo voti wola mu nzo mfumu aku? 9Woso mu bisielo biaku wumonokono kima, kafua ayi bika beto tukituka beto veka bavika ba mfumu ami.» 10Wuvutula: «Bika diba banga buididi phova zieno. Niowo kudi niandi kumonikina kima makaba mvika ami, vayi beno, malukondo bila.» 11Buna bakulula zi tsaku ziawu mu nsualu va ntoto mutu ayi tsaku andi ayi mutu mutu wuzibula tsaku andi. 12Wutoma tsiata mbote. Wutonina kudi lutidi bukulutu ayi wumanisina kudi lutidi buleki. Ku zimunina, mbungu yimonikina mu tsaku Benyamini. 13Buna Bakakuna biyunga biawu, babuela tula mimfuna mutu mutu va phunda andi ayi bavutuka ku mbanza.
Yuda wunuanina Benyamini
14Buna Yuda ayi zikhomba ziandi zi babakala bakota mu nzo Yosefi, Yosefi bu kakhidi muna, babua va ntoto va ntuala andi. 15Buna Yosefi wubakamba: «Diambu mbi luvengi? Lusizaba ko ti mutu banga minu nzebi bikula mambu bu mbote?» 16Vana Yuda wuyamikina : «Mbi tulenda tuba kudi mfumu eto? Bue tulenda tubila? Ayi bue tulenda monisa ti tuidi batu ba lunungu? Nzambi wumueni nzimbala yi bavika baku. Tala buabu tueka bavika ba mfumu ami, ayi beto, ayi niowo mu koko kuandi kumonokono mbungu.» 17Vayi wukamba: «Dilendi banzulu ko ti ndilenda vanga diambu diodio! Bakala niowo mu koko kuandi kumonokono mbungu, niandi ma kaba mvika ami. Vayi beno banka, kumeno mu yenge kudi se dieno.»
18Buna Yuda wufikama va kaba ayi wukamba: «Lemvuka, mfumu ami, ndikubombidila, bika mvika aku katuba diambu mu matu ma mfumu ami, mukambu lemisa nganzi zaku kudi sielo kiaku, bila kudi ngeyo yidi kuandi banga kudi Falao.» 19Mfumu ami wuyuvula kiuvu kudi beto bavika baku ti tubeki se ayi khomba yinleki. 20Tuvutula: «Tubeki se di nuna ayi muana wu bununu buandi, lutidi buleki. Vayi khomba andi yibakala wufua, wusala niandi veka mu ngudi andi, ayi se diandi wunkuzolanga.» 21Buna wutukamba: «Lunnata kudi minu, thidi kummona.» 22Vayi tukuvutudila ti ditoko kalendi bika se diandi ko; ti bikidi se diandi, buna se diandi kafuiti fua kaka. 23Buna wutukamba ti kulendi bue kutuyakula ko ti nleki eto kakadi kuiza neto. 24Ayi diyiza ba ti tukuma kudi sielo kiaku, se diami ayi tuntudisila ziphova zi mfumu ami. 25Se dieto wutukamba tuvutuka mu sumba bidia. 26Vayi tunkamba: «“Tulendi kuenda ko; ti nleki eto wele neto tulenda kuenda, vayi tulendi monika ko vantuala mutu wowo ti nleki eto kakadi kuenda neto.”» 27Buna sielo kiaku, se diami, wutukamba: «“Beno luzebi mboti ti nketo ami wumbutila kaka bana bole babakala. 28Wumosi mu bawu wuzimbala; ndibanza ti bulu kitsisi kinkakuna ayi ndisi buekumona ko nate buabu. 29Ti lubuedi nata yandu thama va meso mami ayi ti kisumbula ki mfuilu kizidi va yandi mu kedika, buna malukulumuna, mu kiadi tsuki ziami zi phembe mu tsi bafua.”»
30Buna buabu, mitula kudi sielo kiaku, se diami, ditoko mu kambu ba ayi beto, muela wu wumosi buwidi wukangama ayi muela wu wunkaka, 31Buna tala mafuiti kuiza bua kaka: niandi tumbu mona ti ditoko kasi ko vana, makafua, ayi sielo biaku mabakulumuna mu kedika, tsuki ziphembe zi sielo kiaku, se dieto mu kiadi mu tsi bafua . 32Bila mvika aku wuyikidi nkebi wu ditoko, yandi ba thama ayi se diandi, bu kakamba: «“Ti khembo kumvutula, mandivola nkanu kudi ngeyo thangu zizio.” 33Buabu ndikubombidila, bika sielo kiaku kasiala va fulu ki ditoko banga mvika, muingi ditoko kakuma ayi zikhomba ziandi zi babakala. 34Bue fuiti kumina kudi se diami ditoko mu kambu ba yami, mbengi mona phasi zilenda kuiza kudi se diami.»
Currently Selected:
1 Mose 44: YOM-CD
Highlight
Share
Copy
Want to have your highlights saved across all your devices? Sign up or sign in
©2024 Seed Company in coordination with Forum Communautaire des Traducteurs de la Bible et Alphabétisation
