1 Mose 47
47
Yakobi va ntuala Falao
1Buna Yosefi wuyenda mu lubula Falao ayi wunkamba: «Se diami ayi bakhomba ziami zi babakala ayi bibulu biawu bifioti ayi bibulu biawu bineni ayi bibio biawu bi bavuidi, babedi mu tsi yi Kanana, ayi bawu baba mu tsi Ngoseni.» 2Ayi mu dikabu di bakhomba ziandi zi babakala, wubonga ba babakala ba tanu mu kubamonisa kudi Falao. 3Buna Falao wukamba bakhomba ziandi zi babakala: «Bisalu mbi lunsalanga?» Buna bakamba Falao: «Bisielo biaku mamemi bansunganga, beto banga bakulu beto. 4Tuizi kadi kuaku banga banzenza mu tsi, bila kuisi ko bidia mu diambu di bibulu bifioti bi sielo biaku, bila malema madi mangolo mu tsi yi kanana. Ayi buabu, tukubombidila, bika bisadi biaku bakala mu tsi Ngoseni.»
5Buna Falao wukamba Yosefi : «Se diaku ayi bakhomba ziaku zi babakala bizidi kuaku kudi ngeyo. 6Tsi yi Ngipiti yisi kadi nkaku kudi ngeyo. Yenda tudi se diaku ayi ba khomba ziaku zi babakala bakala mu ndambu tsi yilutidi mboti. Bika bakala mutsi Ngoseni. Ayi tizebi ti mu khati bawu muidi babakala badi kibakala, fuiti kubatula banga zimfumu zi bibulu mu bibio biami.»
7Buna Yosefi wukotisa Yakobi se diandi ayi wumonisa kudi Falao, ayi Yakobi wutona sakumuna Falao. 8Falao wuyuvula Yakobi: «Mvu mikua midi yaku?» 9Yakobi wamvutudila : «Bilumbu bi mimvu bi kinzungani ayi nzietele ami bidi khama mosi makumi matatu ma mimvu. Bimonikini mifioti ayi minkuamusu, bilumbu bi mimvu bizingu kiami ayi misi dedakana ko ayi mimvu mi mase mami mu thangu baba nzungani ayi nzietele mu ntoto wu kinzenza.» 10Buna Yakobi wusakumuna Falao ayi wutotuka va zizi ki Falao.
11Yosefi wutudisa se diandi ayi bakhomba ziandi zi babakala ayi wubavana mvuilu mu tsi yi Ngipiti, mu ndambu yilutidi mboti yi tsi, mu tsi Lamasesi#47.11 Lamasesi:Tala 2 Mos 1.11., boso buntumina Falao. 12Ayi Yosafi waba fidisanga bidia kudi se diandi ayi kudi bakhomba ziandi zi babakala, ayi kudi dikanda didio di se diandi, boso buididi thalu bana.
Yosefi mu thangu malema
13Kadi bidia muisi ba ko mu tsi yiyo yi Ngipiti, bila malema maba ma ngolo, tsi yi Ngipiti ayi tsi yi Kanana bavonga mu diambu di malema. 14Yosefi wukupika mbongo zizio ziba mu tsi Ngipiti ayi mu tsi Kanana zibaba sumbilanga witi, ayi Yosefi waba kotisanga mbongo mu nzo Falao. 15Ku zimunina, mbongo zi tsi Ngipiti ayi zi tsi Kanana zimana sadulu, ayi basi Ngipiti babo batona kuiza kudi Yosefi mu kunkamba: «Wutuvani bidia! Bila mbi tufuiti fuila va ntuala aku, bila mbongo zikambulu?» 16Buna Yosefi wubavutudila: «Vaneno bibulu bieno ayi mandiluvana bidia va fulu ki bibulu bieno, ti mbongo zisiedi ko.»
17Buna banata bibulu biawu kudi Yosefi, ayi Yosefi wubavana bidia va fulu ki zikavalu, va fulu ki bibulu biawu bifioti ayi binene, ayi ziphunda zi mbakala, ayi wutatamana kubavana bidia va fulu ki bulu biawu mvu wuwo wuna. 18Mvu wuna wuvioka, buna bayiza kudi niandi mu mvu wulanda ayi bankamba: «Tulendi kudisueka kudi mfumu eto ko, vayi mbongo ayi dikamba di bibulu bibuala dimeni kuenda kudi mfumu eto. Kima kisiedi yeto buna zinitu zieto ayi mintoto mieto. 19Bila mbi tufuiti fua va meso maku, ayi beto ayi mintoto mieto? Wutusumba, beto ayi mintoto mieto, mu bidia, ayi matukituka beto ayi mintoto mieto, bavika ba Falao, wutuvana mbongo muingi tuzinga ayi tubika fua, ayi muingi mintoto mieto mibika kambu batu.»
20Yosefi wusumbila Falao mintoto mimio mi basi Ngipiti, bila basi Ngipiti basumbisa mutu mutu tsola andi, bila nzala yiba ngolo vadi bawu ayi tsi yiyiza ba mvuilu wu Falao. 21Mu diambu di batu, wubatula mu zimbanza mu tsi yimvimba yi Ngipiti. 22Mintoto kaka mi banganga kakambu sumba, bila bidia bi banganga kudi Falao bibabanga ayi babadianga bidia biawu biobio Falao kabakubavana. Diawu basisumbisa ko mintoto miawu.
23Ku landa, Yosefi wukamba batu: «Ndilusumbidi buabu, beno ayi ntoto mieno, mu diambu di Falao. Tala mbongo eno, ayi lufuiti kuna ntoto. 24Mu thangu mbutu mawutotuka, buna lufuiti vana buku kintanu kudi Falao, vayi kuku biya mabiba bieno, banga mbongo mu diambu zi tsola, banga bidia bieno ayi bobo badi mu zinzo zieno, ayi muingi bana beno badia.» 25Buna bamvutudila: «Wutuvesidi moyo. Bika tumonokono nlemvo mu meso ma mfumu ami ayi matuba bavika ba Falao.»
Zikhanu zi tsuka zi Yosefi
26Buna Yosefi wutotula muina wawu, wusiama nate lumbu kiaki, wutedi mvuilu ntoto wu Ngipiti, muingi Falao kabaka kuku ki ntanu ki mim'butu. Mintoto kaka mi banganga miba banga kuku kitulu va ndambu, mikambu ba mvuilu Falao.
Mabanza batsuka ma Yakobi
27Ayi Isaeli wukala mu tsi Ngipiti, mu tsi Ngoseni ayi batunga muna, babuta bana bawombo ayi bayiza ba bawombo. 28Yakobi wuzinga kumi tsambudi ki mimvu mu tsi Ngipiti, ayi lumbu bi Yakobi, mimvu mi zingu kiandi, miba khama mosi ayi makumi maya ayi tsambudi.
29Ku zimunina, bilumbu bi mfuilu bi Isaeli bifikama. Buna wutela muana andi wubakala Yosefi ayi wunkamba: «Ti mbonokono nlemvo mu meso maku, tula, ndikubombidila, koko kuaku ku tsi bunda bunda diami, ayi kuphangila mambote ma ntima ayi ma kikuikizi. Ndikubombidila, kadi kunzikila ku Ngipiti. 30Bu mandivunda ayi mase mami, fuiti kuthotula mu Ngipiti ayi kunzika mu kiziami kiawu.» Yosefi wuvutula: «Mandivanga diwukukhamba.» 31Buna Yakobi wukamba: «Wundila dio ndefi.» Buna wundila ndefi. Isaeli wubuongama va ntu mbuka andi.
Currently Selected:
1 Mose 47: YOM-CD
Highlight
Share
Copy
Want to have your highlights saved across all your devices? Sign up or sign in
©2024 Seed Company in coordination with Forum Communautaire des Traducteurs de la Bible et Alphabétisation
