Maajɨ Bɛtɔ Twamagɨɨ 11
11
Bitrus A Maa Nǝb Bwangtǝm Kwaamaɨ A Urushalimaɨ Gǝm Fɛtatǝm Kɛl
1Bɛtɔ twamagɔ jǝbɔ tangǝn nǝb bwangtǝmɔ a Yahudiyaɨ, ja nyʊwa gɔ Bʌtʌbɔ a yo kɛl Kwaamaɨ. 2Nǝn kwama Bitrus a gwi a yɔ a Urushalimaɨ, kaam dʊʊm Yahudawagɔ, nǝb bwangtǝmɔ, wʊnɨ ja tɨ a dul jǝfʊlǝn jin na biyotǝm mwɛnɨ, ja wɛla gǝm. 3Ja sʊwa gɔ, “N wɛ a bwɨ mʊ yɔ a daa nǝb nɨ ja biyo jim bɔ mwɛnɨ, mʊ ja jǝjalǝn jǝbɔ ji?”
4Nǝngɔ Bitrus a tǝl fɛta ji kɛlɔ lɛ nǝn jʊ a bwɨ nǝn gɨɨ, gɔ, 5“Mǝ na a mʊgɔ tuulɔ Yafa, mǝ maa keli lɛ. Nǝngɔ dʊgam nyangnyang a bɛ mɨɨ. Mǝ kuwo kaa jǝl gǝla lɛ maamɔ gʌleng dwang kwabtǝm, ja shig a dʌbʌl nǝn kanǝnɔ naal, a bɛ nǝn dɔɔm a daa mǝ woi. 6Mǝ sǝb lɛɨ, nǝngɔ mǝ kuwo namtɨnɔ naatɨnɔ naalɨ, jǝbɔ namɔ kuuli, jǝbɔ nǝbɔ wuul lɛ nǝn fʌl a tǝmɨ, jǝbɔ lǝbɨtɨnɔ. 7Nǝngɔ mǝ nyʊwa kaa diil a sʊwa ɨ gɔ, ‘Bitrus, gun, biyo, sǝ ń wo.’ 8Nǝngɔ mǝ sʊwa gǝn mǝʊ, ‘Mɨ nyɔ Tɛlalɔ! Mǝ wo bɔ kaa jǝl wo, wʊnɨ mɨ sagsagɨ, jǝbɔ a wʊnɨ nǝn dutoi.’ 9Nǝngɔ diilɔ a dʌbʌli a sʊwa kɛl na yogɨɨ gɔ, ‘Jʊ nɨ Kwaamagɔ a fɛ sagsagɨɨ, ka ń sʊwa lɛ mɔʊ mɨ sagsag.’ 10Ja maa jʊ nɨ naagɔ taal. Nǝngɔ ja gʊm jʊgɔ a dʌbʌli.
11“A dǝngdǝng kwama gɔ, nǝbɔ taal tɨm a nyanga kan nɨ mǝ woi, ja twam ji a daa mɨ woi a Kaisar. 12Nǝngɔ Yʊwa Kwaamaɨ a sʊwa ɨ gɔ, n bwang jim, bɛ ka n nʊng lɛ kɔkan a tɨbǝl mɨ nǝbɔ ji. Kɛtǝlam nɨ nukuni, ja gun ja ywa ɨ. Nǝn dɔ lɔ Karniliyasɨ nǝbɔ ji a Kaisar. 13Nǝngɔ a sʊwa nǝn kanga gǝ kuwo bwɛ twama Kwaamaɨ tɨm a lɔ gɨɨ, sʊwa lɛ gɔ, ‘Twam a Yafa, ja jo Saminu, wʊnɨ jǝ jo lɛ gɔ Bitrusi. 14Nǝn gɔ bɛ mʊn nɛ nǝn kɛl nɨ mʊ nya bʊʊlɨ lɛ a daa gǝ woi, mɔ jǝbɔ lɔ mʊnɔ pʌd.’
15“Mǝ tǝl jim sʊwatǝm kɛlɨ, nǝngɔ Yʊwa Kwaamaɨ a gǝla jim dǝngdǝng kanga a gǝlam bǝm nǝn tɨkǝgaɨ. 16Nǝngɔ mǝ bʊʊla kɛl Tɛlalɔɨ, kanga a sʊwaɨ gɔ, ‘Yohana a yʊ ji mwɛ sagsag nǝn mwɛ. A jenɔ n Yʊwa Kwaamaɨ jǝ yʊ jen nɛ nǝnɨ.’ 17Kanga Kwaama a nǝ ji nǝtǝm lǝmagɔ dǝngdǝng kanga a nǝ bǝnɨ, kwama nɨ bǝ nǝ bɨlǝngkɛl a daagɔ Tɛlalɔ Yesu Kiristi woi, mǝ nǝn nuwo mǝ kɔ jʊ lɛ Kwaama swɨ lɛɨ?”
18Yahudawa nǝb bwangtǝmɔ a nyʊwa nyɨɨ, ja nyǝm bɔ jʊ jǝ sʊwa lɛɨ. Nǝngɔ ja bǝlá Kwaamagɔ jǝ sʊwa lɛ gɔ, “Kwaama a jǝla Bʌtʌbɔ gǝm tʌji ja yǝla ja bǝla bwɨlangkɛl jinɔ sǝ ja nya kʊlɨ.”
Nǝb Bwangtǝmɔ A Antakiya Nɨ A Suriyaɨ
19Nǝb bwangtǝmɔ a kwɨya tǝmɔ nǝn kwan a dul gaalan nɨ a gun a dul jʌtǝm Istifanusi. Kaamɨ a shu a tǝm Finikiya, jǝbɔ Sayifurus tǝmɔ a tɨbǝl wɨmaɨ, jǝbɔ tuulɔ Antakiya. Jǝ sʊwa kɛl Kwaamaɨ lɛ, jǝ sʊwam ka Yahudawa kwaaji. 20Kaam nǝb bwangtǝmɔ wo a Sayifurus jǝbɔ Kurane, tǝmtɨn nɨ a tɨbǝl wɨmaɨ, ja shu a Antakiyaɨ. Jǝ sʊwa nǝbɔ Girikaɨ kɛlɔ lɛ tʌji, jǝ sʊwa ji fulon kɛl lǝmɨ a dul Tɛlalɔ Yesui. 21Kwaan Tɛlalɔɨ dakini jǝbɔ ji. Nǝbɔ a lada a nǝ bɨlǝngkɛlɨ, ja yǝla a daa Tɛlalɔ woi. 22Nǝngɔ fulon kɛl nɨ a bwɨ a Antakiyaɨ, a dɔ lɔl mʊrkalɨ nǝb bwangtǝm Kwaamaɨ nɨ a Urushalimaɨ. Nǝngɔ nǝb bwangtǝmɔ a twam Barnaba a Antakiyaɨ.
23Bɛtǝm gǝnɔ, nǝngɔ a kuwo lǝma Kwaamaɨ a maa jimi, a maa fulotǝm nǝl. Nǝngɔ a kʊʊ jim nǝl gɔ ja tɨ nǝn bɨlǝngkɛl a bwangtǝm Tɛlalɔɨ nǝn nǝl jinɔ gwam. 24Barnaba n nǝ nya. A yii nǝn Yʊwa Kwaamaɨ jǝbɔ nǝtǝm bɨlǝngkɛl. Nǝbɔ a lada a yǝla a bɛ a daagɔ Tɛlalɔ woi. 25Nǝngɔ Barnaba a shu a Tarsus saatǝm Shawului. 26Nǝn kwama a nya gǝnɨ, nǝngɔ a yǝla a bɛ nǝn gɔ a Antakiyaɨ. Ja maa jolɔ win jǝ mʊrka lɛ jǝbɔ mʊrkalɨ nǝb bwangtǝm Kiristii. Jǝ mɛla nǝb bwangtǝmɔ gǝm lɛ a lada. Ja tǝl jotǝm nǝb bwangtǝmɔ nǝn dun gɔ, Kirista a Antakiya.
27N kumtɨn nɨ kaam nǝbkuwotǝmkǝgagɔ a jel a Urushalima ja bɛ a Antakiyaɨ. 28Win a kʊm jin wʊnɨ jǝ jo lɛ gɔ Agabusi, a gun a tɨ tɨɨ a sʊwa kɛlɔ nǝn kwaan Yʊwa Kwaamaɨ gɔ jǝ maa maa gʌleng jʊwan bwɨla a yooligɔ gǝm gwam. (Jʊ nɨ a bwɨ nǝn kwama fɔlɔn Kalaudiyasɨ). 29Nǝngɔ bɛtɔ mɛlalɨgɔ a nǝbka nyiyo a kʊm jin gɔ jǝ twam twam nǝbam jinɔ nɨ a mʊgɔ Yahudiyaɨ gǝm tɨkalɨ a kwaan nyatǝm jinɔ gǝm. 30Ja maa nyɔ. Ja twam tɨkalɨ nɨ a kang Barnabaɨ jǝbɔ Shawulu, sǝ ja nǝ nǝb dʊʊm nǝb bwangtǝm nɨ a Yahudiyaɨ.
Currently Selected:
Maajɨ Bɛtɔ Twamagɨɨ 11: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
