Maajɨ Bɛtɔ Twamagɨɨ 12
12
Ja Sʊ Nǝb Bwangtǝmɔ Gǝm Gaalan
1Nǝn kwama gɔ, Hiridus Fɔlɔgɔ a tǝl nʊng kaam mʊrkalɨ nǝb bwangtǝm Kwaamaɨ gaalan nɛ. 2A dǝg ja jʌ Yakubu kɨla Yohanaɨ nǝn gulʌn. 3A kuwo jʊ nɨ gǝ maaɨ a bʊm Yahudawagɔ gǝmɨ, nǝngɔ a ta Bitrus tǝgǝnɨ. A bwɨ nǝn kumtɨn Dikulom Kʊkkʊm nɨ mɨ Yisti woi. 4Hirudus a ta Bitrus a kubʌl a lɔsomi, a kang sʊwajaamtɨnɔ kʊb jeli nukun jǝ tɔɔ gǝn nɛ. Saa lɛ sǝ gǝ bɛ nǝn gɔ a kǝga nǝbɨɨ, sǝ gǝ maa gǝm borang na dikulomɔ a shui.
5Nǝn kwama Bitrus a lɔsomii, mʊrkalɨ nǝb bwangtǝm Kwaamaɨ a dɔ maatǝm keli Kwaamaɨ nǝn kwaan jinɔ a kɛl dul gǝn.
Ja Jǝg Bitrus A Lɔsomi
6Nǝn kum gɨɨ, Hiridus maa bʊʊlalɨ lɛ sǝ gǝ jǝg Bitrus nǝn tǝmsɛlɨ gǝ yɔ nǝn gɔ a kan borang. Bitrus ja bwa bwaɨ nǝn golmantɨnɔ yo, daa dum lɛ a tɨbǝl sʊwajaamtɨn nɨ yoi. Nǝb tɔɔtǝm lɔsomigɔ yǝm a nyanga kan jǝ tɔɔ lɛ. 7Tʌgo a kang dangǝn, nǝngɔ kaa bwɛ twama Tɛlalɔɨ a nʊng dul gǝnɨ. Kaa nyalǝmɔ beta lɛ a mʊgɔ kan nɨɨ. Nǝngɔ la a ke Bitrus a daalɨ, a gung gǝnɨ a sʊwa gɔ, “Gun dǝbǝr.” Nǝngɔ la golmanɔ a tǝlam a kang Bitrusi.
8Bwɛ twama Kwaamaɨ a sʊwa gǝn gɔ, “Mal bɛllɛ mʊnɔ, ń dǝg twamtɨn mʊnɔ.” Nǝngɔ a maa nyɨɨ. Nǝngɔ la bwɛ twama Kwaamaɨ a sʊwa gǝn gɔ, “Kwab dwang kwabtǝm mʊnɔ, bwang mɨ.” 9Nǝngɔ a jel bwang gǝm lɛɨ. A nyǝm bɔ gɔ jʊ nɨ bwɛ twama Kwaamaɨ maa lɛɨ n bɨlǝngkɛl. Kuwo lɛ gɔ dʊgam nyangnyang gǝ maa lɛɨ. 10Ja shu nǝb tɔɔtǝm nyanga kan na winɔ jǝbɔ na yogɨɨ, ja la nyanga kan kemʌn dɔtǝmɔ a tuulɔ gɨɨ, nǝngɔ nyanga kanɔ a wumo nǝn kang gǝnɨ. Nǝngɔ ja jeli. Ja bɛ a daagɔ golagɔ ya dɨlǝm woi, tʌgo a kang nǝngɔ bwɛ twama Kwaamaɨ a wʊlaka jǝbɔ gɨɨ.
11Nǝngɔ la Bitrus a yǝla a bɛ a bʊʊlalɨ gǝnɔ gǝmɨ. A sʊwa gɔ, “Bɨlǝngǝn n nyǝm, nǝn Tɛlalɔ a twam bwɛ twama gǝnɔ sǝ a bʊʊ nǝn mǝ a kang Hiridusi, jǝbɔ bwɨlang kanjǝgan nɨ gwam Yahudawagɔ a fɛka a dul mɨɨ.”
12Bitrus a nyǝm nyɨɨ, nǝngɔ a shu a lɔ Maryamui nɛnɛ Yohanaɨ wʊnɨ jǝ jo gǝn nɛ gɔ Markusi, a daa gɔ, nǝbɔ a mʊrka wo a lada nyɔ maa keli lɛ. 13A ga nyanga kan dʊʊn yooligɨɨ, nǝngɔ kaa bwɛnɔɔlɨ nɨ maa maajɨ lɛ a lɔ nʊ gɨɨ, dunɔ nǝn Roda, a bɛ sǝ ba kuwo kɛna nuwoi. 14A nyʊwa n diil Bitrusi, a wum bɔ nyanga kanɔ dɨn a kɛl fulotǝm nǝl. Nǝngɔ a yǝla nǝn sʊgɔl a sʊwa ji gɔ, Bitrus tɨm a nyanga kan.
15Nǝngɔ ja sʊwa gǝn gɔ, “Mʊ nǝ wabɨ ka?” A tɨtǝn sʊwa lɛ. Nǝngɔ ja sʊwa gɔ, “N bwɛ twama Kwaamaɨ nɨ tɔɔ gǝn nɛɨ.”
16Bitrus a tɨtǝn ga lɛ. Ja wum ja kuwo nǝn gɨɨ, ja ta kang a nyiyo. 17Nǝngɔ a nʊng nǝn kang gɔ ja yɨ shigi, a sʊwa ji kanga Tɛlalɔ a jǝg gǝn a mʊgɔ lɔsomii. A sʊwa tag gɔ, “Jǝ́ sʊwa Yakubu jǝbɔ tangǝn kɛtǝlamɔ jʊ nɨɨ.” Nǝngɔ a gun a shu a kaa daaɨ.
18Tǝmɔ a sɛlɨ, ke bɔ bɛ komtǝm a gun a kʊm sʊwajaamtɨn nɨɨ, a dul jʊ nɨ a nya Bitrusi. 19Hiridus a saa gǝn a nya gǝn bɔ. Nǝngɔ a tɨtǝn fɨɨtǝm nǝb tɔɔtǝmɨ, a dǝg gɔ ja jʌbo jii. A gulɔ gǝm nǝngɔ Hirudus a gun a Yahudiyaɨ, a shu a Kaisar ya yɨɨ wo kumtɨnɔ a gǝlala.
Bwaa Hiridusi
20Nǝn kwama gɔ, Hirudus a maa nabwɨl nyangǝn jǝbɔ nǝbɔ Tayaɨ, jǝbɔ nǝbɔ Sidoni. Nǝngɔ ja bɛ a daagɔ Hirudus woi nǝn bʊʊlalɨgɔ wini. Jǝ swɨ lɛ Bilastasa fɔlɔ lɔ fɔlɔnɔ a dɔ kʊm jinɔ jǝbɔ Hirudus. Nǝngɔ Bilastasa a jǝla gɔ gǝ tɨka ji tɨka. Ja ya nǝl jinɔ a fɔlɔ tǝm gɔ a kɛl dul jǝjalǝn jinɔ gǝm. N kɛl dul jʊ nɨ, jǝ swɨ lɛ ja fɛka yɨm jini.
21Nǝn kwama ja mʊrkamɨ, nǝngɔ Hiridus a dʊʊ dwang malǝng fɔlɔn gǝnɔ a yɨ a kotere fɔlɔn gǝnɨ, a sʊwa ji kɛlɨ. 22Nǝbɔ a mʊrka a nyʊwa gǝn. Nǝngɔ ja gung nǝn diil jǝ sʊwa lɛ gɔ, “Diil nɨ n diil kaa kwaama, ke bɔ a nǝfilii!” 23Tʌgo a kang nǝngɔ kaa bwɛ twama Tɛlalɔɨ a jǝga gǝnɨ, jʊ a bwɨɨ a bǝlá bɔ Kwaamagɔ. Nǝngɔ ywɛtɨnɔ a tɨtǝn jatǝm gǝnɨ a yɔ nǝn a bwaaɨ.
24Kɛl Kwaamaɨ a sʊtǝn jatǝm kǝga. Nǝb bwangtǝmɔ sʊtǝn nɛ. 25Nǝn kwama Barnaba jǝbɔ Shawulu ja dɨm maajɨ nɨ ja nǝ jii, nǝngɔ ja yǝla ja bɛ a Urushalimaɨ. Ja bɛ dakini jǝbɔ Yohana wʊnɨ jǝ jo gǝn nɛ gɔ Markusi.
Currently Selected:
Maajɨ Bɛtɔ Twamagɨɨ 12: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
