Maajɨ Bɛtɔ Twamagɨɨ 3
3
Bitrus A Gung Nʊ Nɨ Naagɔ A Swam Swamɨ
1Kaa di Bitrus jǝbɔ Yohana jǝ shu lɛ a Kan Kwaaman nǝn kwama maatǝm keli, kemʌnɔ taal na kwaamɨ. 2A nyanga Kan Kwaaman nɨ jǝ jo lɛ gɔ, Nyanga Bʊmɨ, kaa nǝl wo wʊnɨ jʊ a tǝl nǝn bʌtʌm gǝnɨ naatɨnɔ a swamam swamamɨ. Kwangkwang jǝ do gǝn sǝ ja yɔ nǝn a nyanga lɔng, sǝ ya kela keli lɛ a daagɔ nǝb nɨ dɔ Kan Kwaaman nɛɨ.
3A kuwo Bitrus jǝbɔ Yohana ba jǝ dɔ Kan Kwaamanɔ lɛɨ, nǝngɔ a kel ji kemʌni. 4Bitrus jǝbɔ Yohana ja tal gǝm nugɨɨ, nǝngɔ Bitrus gɔ, “Dʌng nǝn!” 5Nǝngɔ bʊʊlalɨ gǝnɔ a yǝla a daa ji woi, dʌng lɛ gɔ jǝ nǝ gǝn kaa jǝl.
6Nǝngɔ Bitrus gɔ, “Kemʌnɔ jǝbɔ mʊnɔ mɨ mǝ nǝn. Jʊ mǝ nǝnɨ, mǝ nǝ ń nǝ ń. A mʊgɔ dun Yesu Kiristii bwɛ Nazaratɨ, gun, yɔ yɔmɔ.” 7Nǝngɔ Bitrus a ta kang jajǝng gǝnɔ a gung gǝnɨ. Tʌgo a daa gɔ, naa gǝnɔ jǝbɔ kʊlǝn naatɨn gǝnɔ a kwama. 8Nǝngɔ a gun dǝbǝr a tɨ sɨnɨ, a tǝl yɔmɨ, a dɔ mʊgɔ Kan Kwaamanɔ jǝbɔ ji, yɔ lɛ, mɔba lɛ, bǝlá Kwaama lɛ.
9Nǝbɔ gwam ja kuwo gǝn yɔ lɛ bǝlá Kwaama lɛ. 10Ja nyǝm gɔ nǝn gɔ gǝ yɨ lɛ a nyanga lɔng Kan Kwaaman nɨ jǝ jo lɛ gɔ Bʊmɨ gǝ maam keli lɛɨ. Nǝngɔ ja ta kang a nyiyo nǝn jʊ nɨ a bwɨ jǝbɔ gɨɨ.
Kɛlɔ Bitrus A Sʊwa A Mʊgɔ Kan Kwaamanɨ
11Nǝn kwama nʊ nɨ naagɔ a swam swamɨ, nʊ nɨ ja gung a nyanga lɔng Kan Kwaaman nɨ jǝ jo lɛ gɔ Bʊmɨ, a ta Bitrus jǝbɔ Yohana tɨm jǝbɔ jii, nǝngɔ nǝbɔ gwam a bɛ nǝn sʊgɔl a daa ji woi, a daa nɨ jǝ jo lɛ gɔ lʌbo Sulemanui, ja ta kang a nyiyo. 12Nǝn kwama nɨ Bitrus a kuwo nyɨɨ, nǝngɔ a sʊwa nǝbɔ kɛlɨ gɔ, “Jǝ́ nǝbɔ Israilaɨ, n wɛ a bwɨ jǝ́ ta kang a nyiyoi? N wɛ a bwɨ tag jǝ́ dʌng nǝn nɛ, maamɔ jʊ nɨ nǝ maaɨ, nǝ maa nǝn kwaan dul nǝnɨ? N ke bɔ dǝgtǝm dul nǝn a bwangtǝm Kwaamaɨ a dǝg bwɛ nɨ yɔmɨ. 13Kwaama Ibrahimi, jǝbɔ Ishakui, jǝbɔ Yakubui, Kwaama tʊgalam bǝnɨ, nǝn gɔ a gung dun Bwɛ jwaalɛ gǝnɔ Yesui. Jǝ́ miyo gǝn sǝ ja jʌ gǝn, jǝ́ kɔ gǝn a kǝga Bilatusi, Bilatus nǝn tɨkǝga, a maa sǝ gǝ dem gǝm kang.
14“A jenɔ jǝ́ kɔ Nǝ Sagsag nɨ, Nǝ Dǝngdǝngɔ. Jǝ́ bʌ gola jengɔ ja dem jem kang a nǝ jʌtǝm dulɔ gǝm. 15Nǝngɔ jǝ́ jʌ nʊ nɨ nǝn gɔ jʌng kʊlɨgɨɨ. Kwaama a gung gǝn a bwaagɔ gǝm. Nǝn nǝ yǝlam nǝb nɨ a kuwo kanjǝl nɨɨ.
16“Nʊ nɨ jǝ́ kuwo lɛ, jǝ́ nyǝmɨ, n gola nǝtǝm bɨlǝngkɛl a dun Yesui a nya kwaan yɔmɨ. Bɨlǝngǝn, n nǝtǝm bɨlǝngkɛl nɨ a daagɔ Yesu woi, nǝn gɔ a nǝ gǝn kwaan bʊtɔ a kuwotǝm jenɔ gǝm gwamɨ.
17“Kǝngkɔ, kambɔ, n nyǝm jǝ́ maa jʊ nɨ ke bɔ a mʊgɔ nyǝmtǝm jeni, kanga nǝb dʊʊm jenɔ a maam tʌjii. 18Kwaama a yii jʊ nɨ a sʊwa a nyiyo nǝbkuwotǝmkǝgagɔ gwamɨ gɔ, Kiristi gǝnɔ nyʊwa nyʊwa gaalan. 19A dul kɛl nɨɨ, jǝ́ yǝla jǝ́ bǝla bwɨlangkɛl jenɔ, jǝ́ yǝla a daa Kwaama woi, sǝ a saal jem bwɨlangkɛl jenɔ, a nǝ jen fǝbtǝm. 20Twam jem twam Kiristi, wʊnɨ nǝn gɔ nǝn Yesui, nʊ nɨ a jǝgǝm n kɛl dul jeni. 21Yesu yɨ yɨ a mʊgɔ dʌbʌl kwama, a yɔ nǝn a kwama nɨ jǝ fɛ kanjǝlɔ lɛ gwam a yǝlam a fɨɨ, kanga Kwaama a sʊwa galɨgǝn a nyiyo nǝbkuwotǝmkǝga gǝnɔ gǝmɨ, nǝb sagsagɔ.
22“Musa a sʊwa gɔ, ‘Tɛlalɔ jen Kwaama jǝg jem jǝg kaa nǝkuwotǝmkǝgagɔ a kʊm nǝbam jeni, kanga a jǝg ɨ. Bɛ jǝ́ kaa lɔl, jǝ́ nyʊwa jʊ sʊwa jen nɛɨ. 23Yǝlam nyɔ, nʊ nɨ a kaa bɔ lɔl a nyʊwa nǝkuwotǝmkǝga nɨɨ, jǝ kaa gǝn kaa a kʊm nǝbɨɨ.’
24“N bɨlǝngǝn, nǝbkuwotǝmkǝga nɨ gwam a maa kuwotǝmkǝgaɨ, jʊ a ta a dul Samailaɨ, a ba la nǝn a nǝb nɨ a bɛ a gul gǝnɨ, ja sʊwa kɛl a dul kumtɨn nɨ gǝm. 25Nǝjen jǝ́ bɛtɔ lɔ nǝbkuwotǝmkǝga nɨɨ. Nǝjen tag jǝ́ yo swatǝm yaa nɨ lɛ Kwaama a maa tʊgalam jenɔ gǝmɨ. Nǝngɔ a sʊwa Ibrahim gɔ, ‘A mʊgɔ dʊʊm mʊn jǝ maa nyiyotɨn tǝm nɨ gǝm gwam bwili lɛɨ.’ 26Nǝn kwama nɨ Kwaama a jǝgǝm bwɛ jwaalɛ gǝnɨ, a tǝl a twam gǝn a daa jen woi, sǝ a dǝg jem bwili a gola yǝlamtǝm nǝn jen gwam a bwɨlan.”
Currently Selected:
Maajɨ Bɛtɔ Twamagɨɨ 3: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
