Maajɨ Bɛtɔ Twamagɨɨ 8
8
1Shawulu a jǝla nǝn jʌtǝmɔ ja maa Istifanus gǝmɨ.
Gaalanɔ A Kwɨ Nǝb Bwangtǝmɔ Win Win
Nǝn kum gɔ, gʌleng gaalanɔ a gun a mʊrkalɨ nǝb bwangtǝm Kwaamaɨ nɨ gǝm a Urushalimaɨ. Nǝb bwangtǝmɔ a kwɨya nǝn kwan a Yahudiya jǝbɔ Samariya. A bǝlam ka bɛtɔ twama a Urushalima. 2Kaam nǝb bwangtǝm Kwaamaɨ ba fʌl Istifanus. Ja ji wi bwaa gǝnɔ dangǝn. 3Shawulu a kʊwa a yɨ mʊrkalɨ nǝb bwangtǝm Kwaamaɨ gǝm. Nǝ ji gaalan nɛ nǝn bɨlǝngǝn, bwangtǝn nɛ lɔ jǝbɔ tuulɔ, taba batǝmɔ lɛ jǝbɔ nɔɔtǝmɔ, dǝg ji lɛ a lɔsomi.
Filibus A Sʊwa Fulon Kɛl Lǝmɨgɔ A Samariya
4Nǝb nɨ a mwal a bǝla Urushalimagɨɨ, jǝ kɛla lɛ, jǝ sʊwa fulon kɛl lǝmɨgɔ lɛ. 5Filibus a shu a kaa tuulɔ a Samariya sʊwa ji fulon kɛl lǝmɨ Kiristii lɛ. 6Nǝn kwama nǝbɔ a nyʊwa Filibusi, ja kuwo kanjǝl laatǝm kang nɨ gǝ maa lɛɨ, nǝngɔ ja jǝla nǝn gǝ nǝlɔ win nǝn jʊ ga sʊwaɨ. 7Nǝblaamɔ jela lɛ nǝn wi a bʊtɔ nǝbɨɨ a lada. Nǝbɔ a lada a swam swamɨ, jǝbɔ nǝbɔ bʊtɔgɔ a gɨya gɨyaɨ, ja nya gungtǝm. 8Ja maa fulotǝm nǝl a lada a tuulɔ gɔ.
9Kaa nǝl wo dunɔ nǝn Saminu, n nǝ dʊwatǝm mwɛ a tuulɔ gɔ. Maa nǝbɔ Samariyaɨ gǝm jǝ laatǝm kang lɛ. Nʊng dul gǝnɔ lɛ gɔ gǝ kaa gʌleng dalɨ dʊʊ. 10Nǝbɔ gǝ dʌng gɔ, dʊʊm jǝbɔ bɛtɔ, jǝ sʊwa lɛ gɔ, “Balɨ nɨ, n kwaan Kwaamaɨ nǝnɨ, wʊnɨ jǝ jo lɛ gɔ, Gʌleng Kwaan Kwaamaɨ.” 11Jǝ nyʊwa gǝn nɛ dangǝn, jʊ a bwɨɨ a kʊta na maa jǝ laatǝm kang lɛ nǝn kanjǝl feyi gǝnɨ. 12Nǝn kwama ja nyʊwam fulon kɛl lǝmɨ nɨ Filibus a sʊwa ji a dul fɔlɔn lɔ Kwaamaɨ jǝbɔ dun Yesu Kiristii, nǝngɔ gwam jinɔ ja yʊ ji mwɛ sagsagɨɨ, batǝm jǝbɔ nɔɔtǝm. 13Saminu nǝn kang gǝn a nǝ bɨlǝngkɛl, ja yʊ gǝn mwɛ sagsagɔ. Nǝngɔ a mʊrka dul jǝbɔ Filibusi. A kuwo Filibus maa daltɔ kanjǝl laatǝm kang lɛɨ, nǝngɔ a ta kang a nyiyoi.
14Nǝn kwama bɛtɔ twama nɨ a Urushalimaɨ a nyʊwa nǝbɔ Samariyaɨ a yo kɛl Kwaamaɨ, nǝngɔ ja twam jim Bitrus jǝbɔ Yohanaɨ. 15Nǝngɔ ja yɔ ya ja maa jim keli sǝ ja yo Yʊwa Kwaamaɨ. 16Jʊ a bwɨɨ, Yʊwa Kwaamaɨ lǝga bɔ a gǝla kaa nǝl gǝm wo dɨn. Jʊ a bwɨɨ ja yʊ ji ka mwɛ sagsag a mʊgɔ dun Tɛlalɔ Yesui. 17Nǝngɔ Bitrus jǝbɔ Yohana ja ya jim kangɨ, nǝngɔ ja yo Yʊwa Kwaamaɨ.
18Saminu a kuwo n yatǝm kang bɛtɔ twamagɨɨ nǝbɔ a nya Yʊwa Kwaamaɨ, nǝngɔ a nǝ ji kemʌnɔ a sʊwa ji gɔ, 19“Mǝ tǝmɨ jǝ́ nɨ ɨ fɔlɔn nɨɨ, na nʊ mǝ ya gǝm kangɨ sǝ a nya Yʊwa Kwaamaɨ.”
20Nǝngɔ Bitrus a sʊwa gǝn gɔ, “Mɔ jǝbɔ kemʌn mʊnɔ bɛ jǝ́ bʊla, na mʊ kuwo lɛ n kemʌn mʊnɔ mʊ nya nǝtǝm lǝma Kwaamaɨ lɛɨ! 21Mɨ mwɛ mʊn wo a jʊ nɨ gǝm, jʊ a bwɨɨ, nǝl mʊnɔ mɨ dǝngdǝng a kǝga Kwaamaɨ. 22Bɛ ń yǝla ń bǝla bwɨlangkɛl mʊnɔ a maajɨ bwɨla nɨ gǝm. Bɛ ń kela Tɛlalɔ sǝ a kǝlǝm mʊn jʊ mʊ fɛka lɛ a mʊgɔ nǝl mʊnɨ. 23N kuwo nǝl mʊnɔ a yii nǝn nungon, ń yǝlam jwaalɛ bwɨlangkɛlɨ.”
24Nǝngɔ Saminu a jǝla ji gɔ, “Jǝ́ kela mɨ Tɛlalɔ, ka kaa jǝl win a mʊgɔ kanjǝl nɨ jǝ́ sʊwaɨ, a bwɨ nǝn mǝ.”
25Nǝn kwama Bitrus jǝbɔ Yohana ja nǝ nyiyo a dul Yesui, jǝbɔ kiyotǝm fulon kɛl lǝmɨ Tɛlalɔɨ, nǝngɔ ja yǝla a Urushalimaɨ. Nǝn kwama jǝ yǝlam lɛ a Urushalimaɨ, nǝngɔ jǝ sʊwa fulon kɛl lǝmɨgɔ lɛ a bɛl tuulɔtɨn nɨ a tǝm Samariya a lada nyɨɨ.
Filibus Jǝbɔ Bwɛ Itiyofiyagɔ (Habasha)
26Nǝngɔ kaa bwɛ twama Tɛlalɔɨ a sʊwa Filibus gɔ, “Gun yɔ a gwanga tǝbangɨ. Bɛ ń bwangtǝn gola nɨ a jel a Urushalimaɨ, a shu a Gazaɨ.” A gola kuul tǝm. 27Nǝngɔ a gun a shui. Nǝngɔ a tǝga kaa bwɛ tǝm Itiyofiyaɨ wɔ, wʊnɨ ja sʊ sʊɨ. N nǝ dʊʊ a fɔlɔn Kandakatu, nɔɔfɔlɔ Itiyofiyaɨ. Nǝn gǝ nǝ tatǝm kemʌn nɔɔfɔlɔ nɨɨ. A bɛ a Urushalima sǝ ba maa bǝlátǝm Kwaamaɨ. 28Nǝn kwama a yǝla shu lɛ a lɔ a mʊgɔ kʌntʌlʌn tʊwa gǝnɨ, nǝngɔ a wum langǝn bwangǝn nǝkuwotǝmkǝga Ishayaɨ kiyo lɛɨ. 29Nǝngɔ Yʊwa Kwaamaɨ a sʊwa Filibus gɔ, “Yɔ bɨtʌgo a kʌntʌlʌn tʊwa kemʌn nɨ gǝm.” 30Nǝngɔ Filibus a mwal a yɔ a daa gǝ woi, a nyʊwa gǝn kiyo langǝn bwangǝn nǝkuwotǝmkǝga Ishayaɨ lɛɨ. Nǝngɔ Filibus a bʌ gǝn gɔ, “Ń nyǝm jʊ nɨ mʊ kiyo lɛɨ ka?”
31Nǝngɔ a jǝla gǝn gɔ, “A fee jo, na kaa nǝl a nʊng ɨ bɨɨ!” Nǝngɔ a jo Filibus gɔ a gwi kʌntʌlʌn tʊwa kemʌn gǝnɔ a yɨ jǝbɔ gɨɨ.
32Jʊ nɨ nǝn gǝ mʊlalɨ kɛl Kwaamaɨ nʊ nɨ ja sʊ sʊɨ kiyo lɛɨ gɔ,
“Na kwamɨ ja yɔ nǝn gɔ
a daa biyotǝmɨ,
na bɛ gal yɨm shig a daa
nǝ bʊtɨtǝm yitʌn gǝnɔ woi,
a na nyɔ,
a wum bɔ nyiyo gǝnɔ.
33Ja nǝ gǝn gunidul.
Ja gar gǝm bɔ borang nyan.
Nuwo dwal kiyo kɛl dʊʊm gǝnɔ lɛɨ?
Jʊ a bwɨɨ ja dem kʊlɨ gǝnɔ
a yooli nɨ.”
34Nǝngɔ nʊ nɨ ja sʊ sʊɨ a bʌ Filibus gɔ, “Nǝkuwotǝmkǝga nɨ gǝ sʊwa kɛl nɨ a dul woi? Gǝ sʊwa a dul gǝn ka? Gǝ sʊwa a dul kaa nǝlɨ ka?” 35Nǝngɔ Filibus a tǝl kiyo gǝm mʊlalɨgɔ lɛ a mʊgɔ langǝn bwangǝn Kwaamaɨ, a sʊwa gǝn fulon kɛl lǝmɨgɔ a dul Yesui.
36Ji a mʊgɔ yɔmɨ, nǝngɔ ya ja la kaa daa mwɛɨ. Nǝngɔ nʊ nɨ ja sʊ sʊɨ gɔ, “Dʌng mwɛmɔ wɔ. N wɛ a bwɨ mɨsɔ mʊ yʊ ɨ mwɛ sagsagɔ lɛɨ?”
[37Filibus a sʊwa gɔ, “Na ń nǝ bɨlǝngkɛl nǝlɔ wini, jǝ maa mʊn maa.” Nʊ nɨ ja sʊ sʊɨ a jǝla gɔ, “N nǝ bɨlǝngkɛl mǝʊ Yesu Kiristi nǝn bʊla Kwaamaɨ.”]#8:37 Kaam bɛl mʊlalɨ galɨgɔ mɨ nǝn bɛ gola nɨ. 38Nǝngɔ a sʊwa nǝbam gǝnɔ gɔ ja tɨ nǝn tʊwatɨn nɨ gʊ kʌntʌlʌn tʊwa kemʌnɔ lɛɨ. Nǝngɔ ja gǝla ja yɔ ya ja dɔ mʊgɔ mwɛ nɨɨ. Nǝngɔ Filibus a yʊ nʊ nɨ ja sʊ sʊɨ mwɛ sagsagɨɨ.
39Nǝn kwama ja jelʌm a mʊgɔ mwɛɨ, nǝngɔ Yʊwa Tɛlalɔɨ a dem Filibusi. Nʊ nɨ ja sʊ sʊɨ a kuwo gǝn bɔ tag. Nǝngɔ nʊ nɨ a yɔ yɔm gǝnɔ a mʊgɔ fulotǝm nǝlɨ. 40Filibus a nya dul gǝnɔ a tuulɔ Azotus. Nǝngɔ a kɛla tuulɔtɨnɔ gwamɨ, sʊwa ji fulon kɛl lǝmɨ nɨ lɛ, ba la nǝn a tuulɔ Kaisarɨ.
Currently Selected:
Maajɨ Bɛtɔ Twamagɨɨ 8: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
