Yohana 15

Yesu Nǝn Gɔ Tɨya Fogfogi Nyagɨɨ

1“Nǝmǝ mǝ tɨya fogfogi nyagɨɨ, Tɛtɛ mɨ nǝn gɔ nǝ jʊngtǝmɨ. 2Gwam kang tɨyang nɨ a mʊgɔ mɨ, mɨ tʊʊ tʊʊl lɛɨ, gǝ kam gǝn kam. Gwam kang tɨyang nɨ gǝ tʊʊ tʊʊl lɛɨ, gǝ mwatam mwatam sǝ a sʊtǝn tʊʊlɔ. 3Jʊ mǝ sʊwa jeni, nǝn gɔ a dǝg jen jǝ́ yǝlam nǝb sagsagɨ. 4Bɛ jǝ́ yɨ a mʊgɔ mɨ, mǝ tǝmɨ mǝ yɨ yɨ a mʊgɔ jen. Kanga kang tɨyang fogfogi mɨ dwal lɛ a tʊʊ tʊʊl nǝn kang gǝnɨ, na a yɨ bɔ a mʊgɔ tɨya fogfogi, a na nyɔ jen tʌjen mɨsɔ jǝ́ dwal lɛ jǝ́ tʊʊ tʊʊl, na jǝ́ yɨ bɔ mʊgɔ mɨɨ.

5“Nǝmǝ mǝ tɨya fogfogigɨɨ, nǝjen jǝ́ kang tɨyantɨnɨ. Nʊ nɨ a yɨ a mʊgɔ mɨɨ, mǝ tǝmɨ mǝ a mʊgɔ gǝnɨ, nǝn gɔ tʊʊ tʊʊl lɛ a ladaɨ. Na ke bɔ a mʊgɔ mɨɨ, mɨsɔ jǝ́ dwal lɛ jǝ́ maa kaa jǝl. 6Na nʊ nɨ a yɨ bɔ a mʊgɔ mɨɨ, gǝ na na kang tɨyang nɨ ja mam fʌlen sǝ a kʊshɨɨ. Nǝbɔ gɔ mʊr ji mʊr, sǝ a mal a mʊgɔ kǝla, sǝ a twɨm ji. 7Na jǝ́ yɨ a mʊgɔ mɨɨ, kɛl mǝndɨ yǝm a nǝl jeni, jǝ́ kela kela jʊ nɨ pʌd jǝ́ swɨ lɛɨ, Kwaama maa jem maa. 8Jǝ́ maa maajɨtɨn nɨ Kwaama swɨ lɛɨ, sǝ a nʊng jǝ́ bɛtɔ mɛlalɨ mɨ. Jʊ nɨ nǝn gɔ bɛ lɛ nǝn dʊʊlǝn Tɛtɛ mɨɨ.

9“Kanga Tɛ bwɛ swɨ ɨ lɛɨ, mǝ tǝmɨ mǝ swɨm jen nyɔ, bɛ jǝ́ yɨ a mʊgɔ swɨtǝm nɨ mǝ maa jem lɛɨ. 10Mǝ, n bwangtǝn diil Tɛtɛ mɨɨ. N yɨ a mʊgɔ swɨtǝm gǝn. Jen tʌjen, na jǝ́ bwangtǝn diil mǝndɨ, jǝ́ yɨ yɨ a mʊgɔ swɨtǝm mɨ.

11“Mǝ sʊwa jen nyɔ sǝ fulotǝm nǝl mǝndɨ a yɨ a mʊgɔ jen, sǝ fulotǝm nǝl jenɔ a yii dǝngdǝng. 12Diil mǝndɨ n wɔ, bɛ jǝ́ swɨka kanga mǝ swɨm jeni. 13Mɨ nǝn swɨtǝm nɨ a laa a wʊnɨ, na nǝl a nǝ kʊlɨ gǝnɔ a dul fatǝlam gǝnɨ. 14Na jǝ́ maa jʊ mǝ sʊwa jen mǝʊ jǝ́ maaɨ, jǝ́ fatǝlam mɨ. 15Mɨsɔ mǝ sʊwa jen nɛ tag mǝʊ jǝ́ bɛtɔ jwaalɛn, jʊ a bwɨɨ, bwɛ jwaalɛ a nyǝm bɔ jʊ tɛlalɔ gǝnɔ maa lɛɨ. Mǝ sʊwa jen mǝʊ jǝ́ fatǝm, jʊ a bwɨɨ n sʊwa jen kanjǝlɔ gwam mǝ nyʊwa a daagɔ Tɛtɛ mɨ woi.

16“Ke bɔ jen jǝ́ jǝg ɨɨ. Nǝmǝ mǝ jǝgǝm jeni. Mǝ dǝg jen mǝʊ jǝ́ yɔ ya jǝ́ tʊʊ tʊʊl, tʊʊl nɨ mɨsɔ dɨ lɛ woi, sǝ Tɛtɛ a nɨ jen jʊ nɨ gwam jǝ́ kelaɨ a mʊgɔ dun mɨ. 17Diilɔ mǝ nǝ jen nɛɨ, bɛ jǝ́ swɨka.

Kɔtǝm Yooligɔ

18“Na yooligɔ a kɔ jeni, bɛ jǝ́ nyǝm a tǝl kɔtǝm mǝndɨ nǝngɔ a la jeni. 19Na na jǝ́ na a yooli nɨɨ, na yooli nɨ a swɨ jen kanga a swɨm nǝbam gǝnɨ. Jǝ́ ke bɔ na yooli nɨ, n kwɛl n jǝgǝm jen sǝ jǝ́ bǝla yooli nɨ, n jʊ a bwɨ yooligɔ a kɔ jeni. 20Jǝ́ bʊʊla nǝn jʊ mǝ sʊwa jeni mǝʊ, ‘Bwɛ jwaalɛ mɨ gǝ laa tɛlalɔ gǝnɔ lɛ.’ Na ja nɨ ɨ gaalanɨ, jen tʌjen jǝ nǝ jen nǝ gaalan. Na ja bwangtǝn kɛl mǝndɨ, jǝ bwangtǝn bwang a jenɔ. 21Jǝ maa jem maa kanjǝl nɨ gwam a kɛl dun mɨ, jʊ a bwɨɨ ja nyǝm bɔ nʊ nɨ a twam ɨɨ. 22Na na mǝ bɛ bɔ ba n sʊwa ji kɛlɨ, na mɨsɔ jǝ nyǝm lɛ gɔ ji nǝn bwɨlangkɛl. Kǝngkɔ mɨ ji nǝn tatǝm fɨɨ a bwɨlangkɛl jinɔ gǝm. 23Nʊ nɨ a kɔ ɨɨ, a kɔ Tɛtɛ mɨ tǝgǝn. 24N maa kanjǝl nɨ mɨ nʊ nɨ wo a maaɨ. Na na mǝ maa bɔ kanjǝl nɨɨ, na ja nyǝm bɔ gɔ jʊ jǝ maaɨ, n bwɨlangkɛl. N wɔ kǝngkɔ ja kuwo kanjǝl nɨ mǝ maaɨ, kǝngkɔ ja kɔ ɨ, ja kɔ Tɛtɛ mɨ tag. 25Jʊ nɨ a bwɨ sǝ ja yii kɛl nɨ ja mʊla a diil jinɔ gǝmɨ gɔ, ‘Ja kɔ ɨ mɨ nǝn kǝga kɛl.’

26“Mǝ twam twam Nǝ tɨkalɨgɔ a bɛ daa jen woi a daagɔ Tɛtɛ woi. Nǝn gɔ n Yʊwa bɨlǝngkɛlɨ, nʊ nɨ jel lɛ a daagɔ Tɛtɛ woi. Nǝn gɔ nǝ nyiyo lɛ a dul mɨɨ. 27Jen tʌjen jǝ́ nǝb nǝtǝm nyiyo, jʊ a bwɨɨ, jǝ́ dakini jǝbɔ mǝ a tǝltǝmɔ gǝm.

Currently Selected:

Yohana 15: DBD

Highlight

Copy