Yohana 9
9
Yesu A Gung Balɨ Nɨ Ja Bʌ Gǝn N Kulii
1Yesu shu lɛɨ, nǝngɔ a kuwo kaa balɨ nɨ ja bʌ gǝn n kulii. 2Nǝngɔ bɛtɔ mɛlalɨ gǝnɔ a bʌ gǝn gɔ, “Feyi, n bwɨlangkɛl woi a dǝg ja bʌ balɨ nɨ n kulii? N bwɨlangkɛl gǝn ka? Na a tɛtǝlam gǝnɨ ka?”
3Nǝngɔ Yesu a jǝla ji gɔ, “Ke bɔ bwɨlangkɛl balɨ nɨɨ. Ke bɔ bwɨlangkɛl tɛtǝlam gǝnɨ. Ja bʌ gǝn n kuli sǝ ja nʊng kwaan Kwaamaɨ a dul gǝn. 4A yǝlam nyɔ, bǝ ja ja kǝga nǝn maajɨ nʊ nɨ a twam ɨ, nǝn tangǝn kɔkɔ gǝn. Kumɔ bɛ lɛ wo, a kwama gɔ mɨ nʊ nɨ dwal maatǝm maajɨ lɛɨ. 5Kwama mǝ fɔ a yooli nɨɨ, nǝmǝ mǝ nyalǝm yooligɨɨ.”
6A sʊwa ji nyɨɨ, nǝngɔ a tɛɛ tuumɔ a tǝmɨ, a lwa tǝmɔ nǝnɨ, nǝngɔ a wɔɔ tǝm nɨ ga lwaɨ, a waa nu balɨ nɨ gǝmɨ. 7Nǝngɔ a sʊwa balɨ nɨ gɔ, “Yɔ ya fʌl nu mʊnɔ a mwɛ gʌto Siluwam.” (Kɛl nɨ gǝ nʊng, “Twama.”) Nǝngɔ nʊ nɨ a yɔ ya fʌl nu gǝnɨ, a yǝla bɛɨ, nu gǝnɔ kuwo daagɔ lɛɨ.
8Nǝb nɨ jǝ daam dakinii jǝbɔ nǝb nɨ kwangkwang a kuwo gǝn kel keli lɛɨ, nǝngɔ jǝ sʊwa gɔ, “Balɨ nɨ nǝn gɔ gǝ yɨ lɛ fɔ ya kel keli lɛɨ, mɨ nyɔ ka?” 9Kaamɨ gɔ, “Nǝn gɔ.” Kaamɨ gɔ, “Ɔ ɔ, a jelka jelka nǝn kwan.” Nǝngɔ balɨ nɨ nǝn kang gǝn a sʊwa gɔ, “Nǝmǝ.” 10Nǝngɔ ja bʌ gǝn gɔ, “A laa maa nyǝn nu mʊnɔ a wumoi?” 11Nǝngɔ a jǝla ji gɔ, “Nʊ nɨ jǝ jo lɛ gɔ Yesui, nǝngɔ a lwa tǝmɔ a waa mɨ a nui, a sʊwa ɨ gɔ n yɔ ya n fʌl nu mǝndɨ a mʊgɔ mwɛ Siluwamɨ. Nǝngɔ mǝ yɔ ya mǝ fʌli. Nǝngɔ mǝ kuwo daagɔ lɛɨ.” 12Nǝngɔ ja bʌ gǝn gɔ, “Nʊ gɔ gǝ na a fee?” Nǝngɔ a sʊwa ji gɔ, “Mǝ nyǝm bɔ.”
Nǝbɔ Farisaɨ A Maa Fɨɨtǝm A Gungtǝm Kuli Nɨ
13Nǝngɔ nǝbɔ a yɔ nǝbɔ Farisaɨ gǝm nǝn balɨ nɨ n kulii galɨgǝnɨ. 14N Kum Fǝbtǝm Yahudawagɨɨ Yesu a lwa tǝmɔ a wum nu balɨ nɨ nǝnɨ. 15Gǝ na nyɔ, nǝbɔ Farisaɨ tʌji ja bʌ gǝn gɔ a maa nyǝn gǝ kuwo daagɔ lɛɨ. Nǝngɔ nʊ nɨ a sʊwa ji gɔ, “A lwa tǝmɔ, nǝngɔ a waa mɨ a nui. Nǝngɔ mǝ fʌl nu mǝndɨ, kǝngkɔ mǝ kuwo daagɔ lɛ.”
16Kaam nǝbɔ Farisaɨ gɔ, “Nʊ nɨ a jel bɔ a daagɔ Kwaamaɨ woi, jʊ a bwɨɨ a kɨla bɔ Kum Fǝbtǝmɔ.”
Kaamɨ a maa bʌtʌm gɔ, “La maa nyǝn nǝ bwɨlangkɛl dwal maa kanjǝl laatǝm kang nɨ lɛɨ?” Nǝngɔ bʊʊlalɨ jinɔ a beli.
17Nǝngɔ ja yǝla jǝ bʌ balɨ nɨ gɔ, “N wɛ bʊʊlalɨ mʊnɔ a kuwo a dul nʊ nɨ gǝmɨ, nǝmɔ a wum mʊ nui?”
Nǝngɔ balɨ nɨ a jǝla ji gɔ, “Nʊ nɨ n nǝkuwotǝmkǝga.”
18Nǝb dʊʊm Yahudawagɔ a jǝla bɔ gɔ balɨ nɨ n kuli galɨgǝn, n kǝngkǝnɨ kuwo daagɔ lɛɨ, nǝngɔ ja twam gɔ ya ja jo tɛtǝlam gǝnɨ. 19Nǝngɔ ja bʌ ji gɔ, “Wʊnɨ nǝn bʊla jen ka? Jǝ́ sʊwa jengɔ jǝ́ bʌ gǝn n kuli nɔɔ? A maa nyǝn la kuwo daagɔ lɛ kǝngkɨɨ?”
20Nǝngɔ tɛtǝlam gǝnɔ gar jim gɔ, “Nǝn nyǝm bwɛ nɨ nǝn bʊla nǝn, nǝn bʌ gǝn n kuli. 21Nǝn nyǝm bɔ kanga ja maa kuwo daagɔ lɛ kǝngkɨɨ. Nǝ nyǝm bɔ nʊ nɨ a wum gǝm nui. Jǝ́ bʌ gǝn, n ke bɔ bwɛsǝn. Sʊwa sʊwa nǝn nyiyo gǝn.” 22Tɛtǝlam gǝnɔ a sʊwa nyɔ, jʊ a bwɨɨ jǝ nyʊwa taal nǝb dʊʊm Yahudawagɨɨ lɛ. Yahudawagɔ a kwɛl a kiyo kiyoi gɔ pʌd nʊ nɨ a sʊwa gɔ Yesu nǝn Kiristii, jǝ kaa gǝn kaa a kan mɛlalɨ jin. 23N jʊ a bwɨ tɛtǝlam gǝnɔ a sʊwa ji gɔ, “N ke bɔ bwɛsǝn. Jǝ́ bʌ gǝn.”
24Nǝngɔ nǝbɔ Farisaɨ a yǝla a jo bwɛ nɨ kuli galɨgǝnɨ, ja sʊwa gǝn gɔ, “Sʊwa bɨlǝngkɛl sǝ ń dʊʊl Kwaamagɔ. Nǝn nǝ nyǝm balɨ nɨ a gung ńi n nǝ bwɨlangkɛl.” 25Nǝngɔ a jǝla ji gɔ, “Na n nǝ bwɨlangkɛlɨ, a mǝndɨ mǝ nyǝm bɔ. Jʊ win mǝ nyǝmɨ, galɨgǝn mǝ kuli, kǝngkɔ mǝ kuwo daagɔ lɛ.”
26Nǝngɔ ja bʌ gǝn gɔ, “N wɛ a maa mʊnɨ? A maa nyǝn a wum nu mʊnɨ?”
27Nǝngɔ a jǝla ji gɔ, “N kwɛl n sʊwa jen sʊwaɨ, jǝ́ nyʊwa ɨ bɔ. N wɛ a bwɨ jǝ́ swɨ lɛ jǝ́ yǝla jǝ́ nyʊwa tagɨ? Jen tʌjen jǝ́ swɨ lɛ jǝ́ yǝlam bɛtɔ mɛlalɨ gǝn ka?”
28Nǝngɔ jǝ tuwo balɨ nɨ gɔ, “Nǝmɔ mʊ bwɛ mɛlalɨ gǝnɨ, ke bɔ nǝn. A nǝnɔ nǝ bɛtɔ mɛlalɨ Musaɨ. 29Nǝn, nǝn nyǝm Kwaama a sʊwa kɛl jǝbɔ Musa. A balɨ nɨɨ, nǝ nyǝm bɔ daagɔ a jelʌmi.”
30Nǝngɔ balɨ nɨ a jǝla ji gɔ, “Jǝ laatǝm kanga n wo dwiyen! Jǝ́ nyǝm bɔ daagɔ a jelʌmi. N wo a wum mɨ nu! 31Bǝ nyǝm Kwaama mɨ gǝ nyʊwa nǝb bwɨlangkɛlɔ lɛ. Gǝ nyʊwa nyʊwa nʊ nɨ gwam bǝlá gǝn nɛɨ, maa jʊ nɨ lɛ Kwaama swɨ lɛɨ. 32A tǝltǝm yooli nɨ a bɛ nǝn a dwiyeni, bǝ nyʊwa bɔ kaa nǝl wo a wum nu nʊ nɨ ja bʌ gǝn n kulii. 33Na nʊ nɨ a jel bɔ a daagɔ Kwaama woi, na mɨsɔ dwal lɛ a maa kaa jǝl.”
34Nǝngɔ ja jǝla gǝn gɔ, “Mɔ nɨ ja bʌ ń a mʊgɔ bwɨlangkɛlɨ, n wɛ mʊ swɨ lɛ ń mɛla nǝmɨ?” Nǝngɔ ja kaa gǝn bɛtǝmɔ a kan mɛlalɨɨ.
Kultǝm A Bʊʊlalɨ
35Nǝn kwama Yesu a nyʊwa fulonɔ gɔ ja kaa balɨ nɨ bɛtǝmɔ a kan mɛlalɨɨ, nǝngɔ a nya gǝn a bʌ gǝn gɔ, “Ń nǝ bɨlǝngkɛl a daagɔ Bʊla Nǝlɨ woi ka?”
36Nǝngɔ balɨ nɨ a jǝla gǝn gɔ, “Nǝ dʊʊ, nuwo nyɨɨ? Sʊwa ɨ, sǝ n nǝ bɨlǝngkɛl a daa gɔ woi.”
37Yesu a jǝla gǝn gɔ, “Ń kuwo gǝn. Nǝn gɔ sʊwa kɛl lɛ jǝbɔ mʊɨ.”
38Nǝngɔ balɨ nɨ gɔ, “Tɛlalɔ, n nǝ bɨlǝngkɛl.” Nǝngɔ a bǝlá gǝnɨ.
39Nǝngɔ Yesu a sʊwa gɔ, “Mǝ dɔ yooli nɨ sǝ n maa borang, sǝ nǝb nɨ mɨ kuwo daa lɛɨ, ja nya kuwotǝm daa, sǝ nǝb nɨ kuwo daa lɛɨ, a yǝlam kululʌm.”
40Nǝbɔ Farisaɨ nɨ a kɔtʌgo a daa gǝ woi, ja nyʊwa nyɨɨ, nǝngɔ ja bʌ gǝn gɔ, “Mɔ sʊwa nǝn mɔʊ nǝn tǝnǝn nǝn kululʌm ka?”
41Nǝngɔ Yesu a sʊwa ji gɔ, “Na na jǝ́ jǝla jǝ́ kululʌmi, na mɨ jen nǝn bwɨlangkɛl. A sʊwatǝm jenɔ jengɔ jǝ́ kuwo daagɔ lɛɨ, bwɨlangkɛl jenɔ a dul jen.”
Currently Selected:
Yohana 9: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
