Luka 12

Gʊtǝm Lɔl Jǝbɔ Kʊʊtǝm Nǝl

(Mat 10:26,27)

1Kwama kanjǝl nɨ bwɨ lɛɨ, nǝbɔ fʊlkʊblǝnɔ a lada ja mʊrka. Jǝ falaka lɛ nǝn naa. Nǝngɔ a tǝl sʊwa bɛtɔ mɛlalɨ gǝnɔ kɛlɔ lɛ nǝn tɨkǝgaɨ gɔ, “Bɛ jǝ́ kɨla mɛlalɨ bwɨla nǝbɔ Farisaɨ, n kɛl fento. 2Mɨ jʊ nɨ wo ja sum sumi mɨsɔ jǝ wum lɛɨ. Mɨ jʊ nɨ wo ja yʊ yʊɨ mɨsɔ jǝ nyǝm lɛɨ. 3Jʊ nɨ mʊ sʊwa a kumtojilii, jel jel nyangnyang. Jʊ nɨ mʊ yʊʊla daddad a mʊgɔ kanɨ, ba jǝ sʊwa sʊwa nǝn diil a dul kan.

Jǝ́ Nyʊwa Taal Nʊ Nɨ Jʌ Bʊtɔ Jenɔ Lɛ Jǝbɔ Dʊʊmɨgɨɨ

(Mat 10:28-31)

4“Mǝ sʊwa jen nɛ fatǝlam mɨ, ka jǝ́ nyʊwa lɛ taal nǝb nɨ swɨ jʌtǝm jenɔ lɛɨ. Jǝ jʌ bʊtɔ kwaagɔ, mɨsɔ jǝ jʌ dʊʊmɨgɔ lɛ. 5Mǝ sʊwa jen sʊwa nʊ nɨ jǝ́ nyʊwa taal gǝnɔ lɛɨ. Jǝ́ nyʊwa taal nʊ nɨ na a jʌ bʊtɔgɨɨ, nǝn kwaan a mal dʊʊmɨgɔ a mʊgɔ lɔ kǝlaɨ. Bɨlǝngkɛl mǝ sʊwa jen nɛɨ, nǝn gɔ nʊ jǝ́ nyʊwa taal gǝnɔ lɛɨ. 6Nǝbɔ gǝ miyo bandwɨnɛ nʊ a kemʌn sǝlǝnɔ yo. Kwaama a twab bɔ kaa wo win a mʊgɔ jin. 7Yitʌn dul jenɔ Kwaama a nyǝm ladatǝm jinɔ. Ka jǝ́ nyʊwa lɛ taal, bwayǝlǝn jenɔ a laa a bandwɨnɛtɨnɨ.

Jǝ́ Sʊwa Nǝbɔ Kɛl Kiristii

(Mat 10:32,33)

8“N sʊwa jen, gwam nʊ nɨ a jǝla gɔ gǝ na a mɨɨ a kǝga nǝbɨɨ, Bʊla Nǝlɨ tǝgǝn jǝla jǝla gɔ gǝ na a gɔ a kǝga bɛtɔ twama Kwaamaɨ. 9Nʊ nɨ a kana nyǝmtǝm mǝndɨ a kǝga nǝfitʌmi, mǝ kana kana nyǝmtǝm gǝnɔ a kǝga bɛtɔ twama Kwaamaɨ. 10Nʊ nɨ a sʊwa kɛl bwɨla a dul Bʊla Nǝlɨ, Kwaama kǝlǝm gǝm kǝlǝm. Nʊ nɨ a kal dun Yʊwa Kwaamaɨ, mɨsɔ kǝlǝm gǝm lɛ.

11“Na ja yɔ nǝn jen a kǝga kantɨn mɛlalɨ jǝbɔ nǝb borangɔ jǝbɔ nǝb fɔlɔnɨ, ka jǝ́ kom lɛ dul jenɔ a jʊ nɨ jǝ́ gar jim lɛɨ, jǝbɔ jʊ nɨ jǝ́ sʊwa ji lɛɨ. 12Yʊwa Kwaamaɨ mɛla jem mɛla jʊ nɨ jǝ́ sʊwa ji lɛ a kwama gɨɨ.”

Mʊsǝn Kɛl A Dul Nǝ Shilo Nɨ A Fʌm Fʌmi

13Kaa nǝl a kʊm mʊrkalɨ jin a sʊwa gɔ, “Feyi, sʊwa kɨla mɨ a tǝga kʊlagɔ jǝbɔ mǝ.”

14Yesu a sʊwa gǝn gɔ, “Nuwo a ya ɨ nǝ biyotǝm borang jǝbɔ nǝ tɔɔ a kʊm jeni?” 15A sʊwa ji gɔ, “Bɛ jǝ́ nyǝm, ka jǝ́ maa lɛ wɛl kanjǝl. Kanjǝl nɨ nǝl a mʊr a lada nyɨɨ, mɨsɔ nǝ gǝn kʊlɨ lɛ.”

16Nǝngɔ a sʊwa ji mʊsǝn kɛlɔ gɔ, “Twam kaa nǝ shiloi, jǝjalǝn tɔtwamɔ a bʊm. 17Nǝngɔ a bʌ dul gǝnɔ gɔ, ‘Wɛ mǝ maa lɛɨ? Mɨ mǝ nǝn daa nɨ mǝ yam jǝjalǝn nɛɨ.’

18“Nǝngɔ a sʊwa gɔ, ‘Jʊ mǝ maa lɛɨ, mǝ kʌb kʌb bʌnitɨn mǝndɨ sǝ n mɔ a dʊʊlantɨn sǝ n tal jǝjalǝn mǝndɨ wo jǝbɔ kanjǝl nyan mǝndɨ gwam. 19Sǝ n sʊwa dul mǝndɨ mǝʊ, “Mʊ nǝn kanjǝl nyanɔ a lada, daam na joltɨn. Fǝb fǝbɨ, ya ń ja lɛ, ya ń nɔɔ lɛ, ya ń nyʊwa lǝma mʊnɔ lɛ.” ’

20“Nǝngɔ, Kwaama a sʊwa gǝn gɔ, ‘Mɔ nǝ swɛlatǝm! A mʊgɔ kum nɨ mǝ do do kʊlɨ mʊnɔ. Kanjǝl nɨ mʊ mʊrɨ yǝlam a woi?’

21“Nʊ nɨ a mʊr dul gǝnɔ gǝm shilo tǝm nɨ a twabǝm nǝn Kwaamaɨ, gǝ na na nʊ nɨ mǝ sʊwa kɛl gǝnɔ a mʊsǝn kɛl nɨ.”

Ka Jǝ́ Kom Lɛ Dul Jenɔ

(Mat 6:25-34)

22Nǝngɔ a sʊwa bɛtɔ mɛlalɨ gǝnɨ gɔ, “Mǝ sʊwa jen nɛ, ka jǝ́ kom lɛ dul jenɔ a jʊ nɨ jǝ́ ja lɛɨ, jǝbɔ jʊ nɨ jǝ́ dʊʊ lɛ a bʊtɔɨ. 23Jʊ a bwɨɨ kʊlɨgɔ a laa jǝjalǝn, bʊtɔgɔ a laa dwang dʊʊl. 24Jǝ́ dʌng kwannyatɨnɔ. Mɨ jǝ kwal kwala lɛ, mɨ jǝ kʌso lɛ, mɨ ji nǝn gam jaa, mɨ ji nǝn bʌni, Kwaama ja lɛ nǝn ji. Nǝfili a laa bɔ lǝbɨtɨnɔ a kǝga Kwaamaɨ ka? 25Nuwo a kʊm jen a mʊgɔ komtǝm sʊ dul gǝnɔ gǝm kum lɛɨ? 26Na jǝ́ nyǝm mɨsɔ jǝ́ dwal lɛ jǝ́ maa kǝtǝn kanjǝl nɨɨ, n wɛ a bwɨ jǝ́ kom dul jenɔ lɛ a tangǝnɔ gǝmɨ?

27“Jǝ́ dʌng fɨlǝntɨnɔ kanga jǝ dʊʊlam lɛɨ! Ja maa bɔ maajɨ nǝn kwaan. Ja fɛka bɔ dul jinɔ gǝm dʊʊl. Mǝ sʊwa jen nɛ, Sulemanu a mʊgɔ bʊmǝn dʊʊl gǝnɔ gǝm a la ji bɔ bʊmǝn. 28Na Kwaamagɔ a fɛ yǝlagɔ a bʊm nyɨɨ, wʊnɨ nǝn kʊlɨ, fʌng ja mal a gaakǝba, mɨsɔ nǝ jen dʊʊl nɨ lɛ a laa nyɨɨ ka? Jǝ́ nǝb nɨ nǝtǝm bɨlǝngkɛl jenɔ a lada bɨɨ!

29“Ka jǝ́ do lɛ bʊʊlalɨ a dul jʊ nɨ jǝ́ ja lɛɨ, jǝbɔ jʊ nɨ jǝ́ nɔɔ lɛɨ. Ka jǝ́ kom lɛ dul jenɔ a dul kanjǝl nɨ. 30Nǝb nɨ a yooli nɨ a nyǝm bɔ Kwaamaɨ, jǝ saa kanjǝl gɔ. Tɨya jen nɨ a kwamaɨ a nyǝm komʌn jenɔ. 31Jǝ́ saa fɔlɔn lɔ Kwaamaɨ, kanjǝl nɨ Kwaama nǝ jen nǝ.

Mʊrtǝm Shilo A Dʌbʌl

(Mat 6:19-21)

32“Nǝbam mɨ, ka jǝ́ nyʊwa lɛ taal. Tɨya jen nyʊwa lǝma lɛ a nǝ jen fɔlɔn gǝnɔ. 33Jǝ́ miyo kanjǝl jenɔ, jǝ́ nǝ nǝb bʊnǝnɔ kemʌnɔ. Jǝ́ saa dul jenɔ gǝm bǝla kemʌn wʊnɨ mɨsɔ gʌlo lɛ woi, shilogɔ a dʌbʌli mɨsɔ dɨ lɛɨ. Nǝkuu mɨsɔ kuu lɛ wo. Bʊntangɔ mɨsɔ kʊm lɛɨ. 34Daa nɨ shilo jenɔ woi, n daagɔ nǝl jenɔ woi.

Bwɛ Jwaalɛ Nɨ A Fɛkaɨ

35“Jǝ́ fɛka bʊtɔ jenɔ. Fitila jenɔ ya ta lɛ. 36Bɛ jǝ́ yǝlam na nǝb nɨ yam tɛlalɔ jinɔ lɛɨ, wʊnɨ a shu a kangwaalɨ, yǝla ba nya ji jǝ yam gǝn nɛ. Na tɛlalɔ jinɔ ba ga nyanga kanɨ, sǝ ja gun dǝbǝr ja wum gǝm. 37Bwiligɔ na a bɛtɔ jwaalɛn nɨ tɛlalɔngɔ ba nya jǝ yam gǝn nɛɨ. N sʊwa jen bɨlǝngǝn, dʊʊ dʊʊ dwang dʊʊl gǝnɔ, sǝ a sʊwa ji gɔ ja yɨ a daa jatǝm jǝjalǝnɔ gǝm, sǝ a tǝga ji jǝjalǝnɔ. 38Na a bɛ nǝn sangdɨlangɨ, na a bɛ nǝn tǝm bɨtǝmɨ, bʊm jim bʊm na ba nya ji jǝ yǝm nǝn fɛkalɨ. 39Bɛ jǝ́ nyǝm na nǝ lɔngɔ a nyǝm kwama nɨ nǝkuugɔ bɛm lɛɨ, na a fɛka a kʌshi lɔ gǝnɔ ka nǝkuugɔ a dɔ gǝm lɔ. 40Jen tʌjen bɛ jǝ́ fɛka yɨm jenɔ, Bʊla Nǝlɨ bɛ lɛ nǝn kwama nɨ jǝ́ ya bɔ a nǝlɨ.”

Bwɛ Jwaalɛ Nya Jǝbɔ Bwɛ Jwaalɛ Bwɨla

(Mat 24:45-51)

41Nǝngɔ Bitrus a gar gǝm gɔ, “Tɛlalɔ, mʊ sʊwa mʊsǝn kɛl nɨ a dul nǝn ka? Mʊ sʊwa a dul nǝbɨɨ gwam ka?”

42Nǝngɔ Tɛlalɔ a jǝla gǝn gɔ, “Nuwo nyɨ n nǝ tatǝm swatǝm yaa jǝbɔ yʊlan tɔɔtǝm nǝbɨɨ? N nʊ nɨ tɛlalɔ gǝnɔ a ya gǝn dʌngtǝm kɛtǝlam gǝnɔ jwaalɛbɨɨ, ya nǝ ji jǝjalǝnɔ lɛ dǝngdǝng na kwama nǝtǝmɔ a laɨ. 43Bwiligɔ na a bwɛ jwaalɛ nɨɨ, na tɛlalɔ gǝnɔ a yǝla a bɛ ba nya gǝn maa lɛ nyɨɨ. 44N bɨlǝngǝn mǝ sʊwa jen nɛɨ, nǝ gǝn nǝ tɔɔtǝm kanjǝl gǝnɔ gwam. 45Na bwɛ jwaalɛ nɨ a yǝla a bʊʊla a nǝl gɔ, ‘Tɛlalɔ mɨ a tɨla’ nǝngɔ a tǝl bʊgtǝm tangǝn bɛtɔ jwaalɛn nɨ jǝ dakinii, batǝmɔ jǝbɔ nɔɔtǝmɔ, nǝngɔ ja lɛ, nɔɔ lɛ, a nɔɔ maa gǝn nɛɨ. 46Tɛlalɔ bwɛ jwaalɛ nɨɨ bɛ nǝn kum nɨ ga ya bɔ a nǝlɨ, kwama nɨ ga nyǝm bɨɨ. Ba bashɨ gǝn, sǝ a ya gǝn jǝbɔ nǝb nɨ a ta bɔ swatǝm yaaɨ.

47“Bwɛ jwaalɛ nɨ a nyǝm jʊ nɨ tɛlalɔ gǝnɔ swɨ lɛɨ, a kɔ a fɛka bɨɨ, a bwangtǝn bɨɨ, jǝ maa gǝm maa bʊgǝn dangǝn. 48Nʊ nɨ a nyǝm bɔ jʊ tɛlalɔ gǝnɔ swɨ lɛɨ, a maa jʊ nɨ a la na bʊgǝnɨ, jǝ bʊg gǝn dǝm. Nʊ nɨ ja nǝ gǝn jǝl a ladaɨ, jǝ saa jʊ a lada a daa gǝ woi. Nʊ nɨ ja ya gǝn tʌgo a jʊ nɨ a ladaɨ, jǝ bʌ jʊ nɨ a ladaɨ a kang gǝn.

Yesu A Bɛ Nǝn Wʊlakatǝm

(Mat 10:34-36)

49“Mǝ bɛ sǝ ba n kul kǝla a tǝm nɨ. N swɨtǝm mɨ na kǝlagɔ a ta twɨ lɛɨ. 50Mǝ nǝn mwɛ sagsag nɨ jǝ yʊ ɨ lɛɨ. Mɨ mǝ nǝn fǝbtǝm na a dɨ bɨɨ.#12:50 Mwɛ nɨ jǝ yʊ ɨ lɛ gǝ nʊng gaalan jǝbɔ bwaa Yesui. 51Jǝ́ sʊwa jengɔ mǝ bɛ nǝn yɨm kwamɨgǝn a yooli nɨ ka? Mǝ bɛ bɔ nǝn yɨm kwamɨgǝn. Mǝ bɛ nǝn wʊlakatǝm. 52A kǝga nɨ nǝbɔ nʊ a fʌl ji jǝ bel bel yo. Taal kɔ kɔ nǝb nɨ yoi. Yo kɔ kɔ nǝb nɨ taalɨ. 53Jǝ wʊlaka wʊlaka. Tɛ bwɛ kɔ kɔ bʊla gɔ, bwɛ kɔ kɔ tɛtɛ gɔ. Nɛ bwɛ kɔ kɔ bʊla gɔ nɔɔlɨgɔ, bwɛnɔɔlɨ kɔ kɔ nɛnɛ gɔ. Yuli nɔɔlɨgɔ kɔ kɔ nwala bʊla gɨɨ, nɔɔlɨgɔ kɔ kɔ yul gɔ nɔɔlɨgɔ.”

Nyǝmtǝm Yǝlatǝm Kumtɨnɔ

(Mat 16:2,3)

54Nǝngɔ a sʊwa nǝbɔ gɔ, “Na jǝ́ kuwo lulɔ a gun a diyeng, shu lɛ a twalɨ, jen gɔ jǝ swiyo swiyo mwɛ. Gǝ bwɨ bwɨ nyɔ mwɛmɔ gǝ swiyo swiyo. 55Na jǝ́ kuwo yʊwagɔ a gun shu lɛ a gwilʌngi, jǝ́ sʊwa jengɔ tǝmɔ shilo shilo. Gǝ bwɨ bwɨ nyɔ. 56Nǝb fento nǝn kwan! Jǝ́ nyǝm kanga jǝ́ sʊwam yǝlatǝm tǝmɔ lɛɨ jǝbɔ dʌbʌli. N wɛ a bwɨ jǝ́ nyǝm bɔ jǝ́ sʊwa jʊtǝb nɨ bwɨ lɛ a yooli nɨ kǝngkɨɨ?

Jǝ́ Fɛka Jǝbɔ Nʊ Nɨ A Yɔ Nǝn Jen A Kan Borangɨɨ

(Mat 5:25,26)

57“N wɛ a bwɨ mɨsɔ jǝ́ mwɛ dul jenɔ lɛ a jʊ nɨ dǝngdǝngɨ? 58Na mʊ shu lɛ a kan borang jǝbɔ nʊ nɨ a yɔ nǝn kɛl mʊnɔ a kan borangɨ, bɛ ń fɛka jǝbɔ gɔ a gola, kage a yɔ nǝn mɔ a daagɔ nǝ biyotǝm borangɔ woi. Nǝ biyotǝm borangɔ a tʊng ń a daagɔ bwɛ dwangkʊngɔ woi, bwɛ dwangkʊngɔ a mal ń a lɔsomi. 59N sʊwa ń, mɨsɔ mʊ jel lɛ na mʊ ywa bɔ kemʌn sǝlǝn nɨ gwamɨ.”

Currently Selected:

Luka 12: DBD

Highlight

Copy