Luka 13
13
Yǝla Bǝla Bwɨlangkɛl Mʊnɔ Na Mɨ Nyɨɨ Mʊ Kala Kala
1A kwama gɔ, kaam nǝb nɨ wo a daa gɨɨ a sʊwa Yesu gɔ Bilatus a jʌbo kaam nǝbɔ Galilii nɨ a bɛ twɨtǝm yulʌn a Kan Kwaamanɨ. 2Nǝngɔ Yesu a sʊwa ji gɔ, “A kuwotǝm jenɔ gǝmɨ, nǝbɔ Galilii nɨ ja jʌboi n nǝbɔ a laa tangǝn nǝbɔ a mʊgɔ Galilii bwɨlangkɛlɨ ka? Nǝn gɔ jʊ a bwɨ ja nɔɔ gaalanɨ ka? 3N sʊwa jen, na jǝ́ yǝla bɔ jǝ́ bǝla bwɨlangkɛl jeni, mɨsɔ jǝ́ bʊʊ lɛ. 4Jǝ́ kuwo lɛ jengɔ nǝb nɨ kʊb jeli naalǝb kan dʌbʌlɔ a kʌbo tʌgo a ji gǝm a jʌbo ji a Siluwamɨ, ja laa nǝbɔ yǝm a mʊgɔ Urushalimaɨ bwɨlangkɛl ka? 5N sʊwa jen mɨ nyɔ, na jǝ́ yǝla bɔ jǝ́ bǝla bwɨlangkɛl jeni, mɨsɔ jǝ́ bʊʊ lɛ.”
Nʊngtǝm Nǝn Tɨya Jolʌm Dʌfeng
6Nǝngɔ a sʊwa ji mʊsǝn kɛl nɨɨ gɔ, “Kaa nǝl a ywɔ tɨya dʌfeng a tɔtwam gǝn. Nǝngɔ a bɛ ba dʌng gɔ kɛna a tʊʊɨ, ba nya a tʊʊ bɔ. 7Nǝngɔ a sʊwa nʊ nɨ jʊng twamɔ lɛɨ gɔ, ‘Jolɔ taal na mǝ bɛ saatǝm tʊʊl tɨya dʌfeng nɨ lɛɨ. Na n bɛɨ, mǝ nya a tʊʊ bɔ. Mwatɨm gǝn! Kal tǝmɔ lɛ nǝn kwan.’
8“Nǝngɔ nǝ jʊngtǝm twamɔ a kela gǝn gɔ, ‘Tɛlalɔ mɨ, bǝla gǝn a maa kaa jolɔ win. Mǝ jʊng jʊng sǝ n yatǝn bun nɛɛgɔ tʌgo. 9Na a tʊʊ tʊʊlɔ dikaɨ, a bʊm! Na a tʊʊ bɨɨ, sǝ n mwatɨm gǝn.’ ”
Yesu A Gung Nɔɔlɨ Nǝn Kum Fǝbtǝm
10Kaa di Yesu maa mɛlalɨ lɛ a mʊgɔ kan mɛlalɨ nǝn Kum Fǝbtǝm. 11Kaa nɔɔlɨ wo wʊnɨ mɨ kwamɨgǝnɨ, nǝn twɨla yʊwa bwɨla nɨ a maa jolɔ kʊb jeli naalǝb a bʊtɔ gǝnɨ. Mɨ dwal lɛ a tɨ sɨn, bʊtɔgɔ a kol koli. 12Kwama nɨ Yesu a kuwo gǝnɨ, nǝngɔ a jo gǝn a sʊwa gǝn gɔ, “Nɔɔlɨ, n wʊlaka ń jǝbɔ twɨla litǝm mʊnɔ.” 13Nǝngɔ a ya gǝm kangɔ a dul gǝnɔ gǝmɨ. Nǝngɔ nɔɔlɨ nɨ a gun a tɨ sɨn, bǝlá Kwaama lɛɨ.
14Nǝl nǝ dʊʊ kan mɛlalɨ nɨ a kala a dul Yesui a kɛl gungtǝm nǝ bɔɔla nɨ nǝn Kum Fǝbtǝmɨ. “A sʊwa nǝbɔ gɔ kumɔ nukun na maatǝm maajɨ. Jǝ́ bɛ ja gung jen a kumtɨn gɔ. Ke bɔ a Kum Fǝbtǝm.”
15Nǝngɔ Tɛlalɔ a jǝla gǝn gɔ, “Nǝb fento nǝn kwan! Nuwo a kʊm jen mɨsɔ kwɨ nɛɛ gǝnɔ lɛ, mɨsɔ kwɨ lungsong gǝnɔ lɛ a daa kwatǝm, a yɔ nǝn ya nǝ gǝn mwɛ nǝn Kum Fǝbtǝmɨ? 16Nɔɔlɨ nɨ nǝn bʊla Ibrahimi, a wʊnɨ Mammɔ a bwa jolɔ kʊb jeli naalǝbɨ. A bʊm bɔ ja kwɨ gǝn a Kum Fǝbtǝm ka?”
17Nǝb nɨ gwam kɔ gǝn nɛɨ ja nyʊwa jʊ nɨ Yesu a sʊwaɨ, ja nyʊwa gunidul. Tangǝn nǝbɔ a maa bǝlátǝm nǝn kanjǝl laatǝm kang nɨ gǝ maa lɛɨ.
Mʊsǝn Kɛl A Dul Nu Tɨya Mastad
(Mat 13:31,32; Mar 4:30-32)
18Nǝngɔ a sʊwa gɔ, “Fɔlɔn lɔ Kwaamaɨ a jelka wɛ? Mǝ mʊrka gǝn jǝbɔ wɛ nyɨɨ? 19A maa na nu mastad wʊnɨ nǝn kǝlwʊn nyɨɨ, kaa nǝl a do a kwal a twam gǝnɨ, nǝngɔ a dʊʊl a yǝlam tɨyaɨ. Lǝbɨgɔ gǝ tii lɔngɔ wo a kangtɨn gǝnɔ gǝm.”
Mʊsǝn Kɛl A Dul Yisti
(Mat 13:33)
20Nǝngɔ a bʌ ji tag gɔ, “Fɔlɔn lɔ Kwaamaɨ jǝ mʊrka gǝn jǝbɔ wɛ? 21Gǝ na na yisti wʊnɨ kaa nɔɔlɨ a dǝg tʌgo a mim nuyila taasa taalɨ, a fi gǝn gwamɨ.”
Nyanga Kan Nɨ A Gwag Gwagɨ
(Mat 7:13,14)
22A ta yɔm gǝnɔ bwangtǝn tuulɔtɨnɔ lɛ jǝbɔ bɛlɨ tuulɔtɨnɔ. Nǝngɔ maa jim mɛlalɨgɔ lɛ a gola Urushalimaɨ. 23Nǝngɔ kaa nǝl a sʊwa gǝn gɔ, “Tɛlalɔ, nǝbɔ bʊʊ lɛɨ a lada bɔ ka?”
Nǝngɔ a sʊwa ji gɔ, 24“Jǝ́ maa kwaan bʊtɔ jǝ́ dɔ a nyanga kan nɨ a gwag gwagɨ. Mǝ sʊwa jen nɛ nǝbɔ a lada swɨ dɔtǝm lɛ. Mɨsɔ jǝ dwal lɛ. 25Na tɛlalɔngɔ a gun a nʊng nyanga kanɨ, jǝ́ tɨ a yooli, jǝ́ ga nyanga kanɔ lɛ. Jǝ́ sʊwa lɛ jengɔ, ‘Tɛlalɔ, wum nǝm nyanga kanɔ!’ Jǝla jen gɔ, ‘Mǝ nyǝm jen bɔ. Mǝ nyǝm bɔ daagɔ jǝ́ jelʌmi.’
26“Jǝ́ sʊwa sʊwa jengɔ, ‘Bǝ ja, bǝ nɔɔ bǝnɔ mɔ. Mʊ mɛla nǝbɔ gǝm fɔ a gola nǝnɔ gǝm!’
27“Jǝla jen gɔ, ‘Mǝ nyǝm jen bɔ! Mǝ nyǝm bɔ daagɔ jǝ́ jelʌmi! Jǝ́ kʌlʌm mɨ, jǝ́ nǝb maajɨ bwɨlan gwam!’
28“Na jǝ́ kuwo Ibrahim, jǝbɔ Ishaku, jǝbɔ Yakubu jǝbɔ nǝbkuwotǝmkǝgagɔ gwam a fɔlɔn lɔ Kwaamaɨ, nǝngɔ a jenɔ ja bǝla jen a yoolii, jitǝm wigɔ wo jǝbɔ kʊʊtǝm nungʌn. 29Nǝbɔ jel a twal jǝbɔ diyeng, a gwilʌng jǝbɔ gǝlalǝng ba ja yɨ jatǝm dikulom a fɔlɔn lɔ Kwaamaɨ. 30Nǝbɔ a ga guli, n nǝbɔ yǝlam nǝb kǝgam lɛɨ. Nǝb kǝgamɔ, n nǝbɔ yǝlam nǝb gul lɛɨ.”
Yesu A Ji Bʊnǝn Urushalimagɔ
(Mat 23:37-39)
31Nǝn kwama gɔ kaam nǝbɔ Farisaɨ ba nya Yesui, nǝngɔ ja sʊwa gǝn gɔ, “Hiridus saa jʌtǝm mʊnɔ lɛ. Bǝla daa nɨ ń shu a kaa daa.”
32Nǝngɔ a jǝla ji gɔ, “Ya jǝ́ sʊwa fʌlʌmɔ jengɔ, ‘Mǝ ja ja kǝga nǝn jǝgtǝm nǝblaamɔ a bʊtɔ nǝbɨɨ. Mǝ gung gung nǝb bɔɔlamɔ dwiyen, jǝbɔ fʌng, a kum na taalɔ gǝm n dɨ maajɨ mǝndɨ.’ 33A yǝlam nyɔ n ja kǝga nǝn yɔmɔ dwiyen, fʌng jǝbɔ jil. A bʊm bɔ ja jʌ nǝkuwotǝmkǝga a yooli na ke bɔ a mʊgɔ Urushalimaɨ.
34“A laa dɨsɔ jǝ́ nǝbɔ Urushalimaɨ, jǝ́ nǝbɔ Urushalimaɨ nɨ jǝ́ jʌbo nǝbkuwotǝmkǝgagɨɨ, jǝ́ mala nǝb nɨ ja twam ji a daa jen woi nǝn tɛl ja bʊlalaɨ! Naa nyǝn mǝ swɨ lɛ n dǝg jen a mʊgɔ gaamɨ mǝndɨ gǝmɨ, kanga jangagɔ gǝ dǝgam bɛlɨ gǝnɔ lɛ a mʊgɔ bɨlǝn gǝnɨ, jǝ́ kɔɨ! 35N wɔ kǝngkɔ ja bǝla jem lɔ jenɔ. Mǝ sʊwa jen nɛ, mɨsɔ jǝ́ kuwo i lɛ wo tag, na ke bɔ kwama jǝ́ sʊwa lɛ jengɔ, ‘Bwiligɔ na a nʊ nɨ bɛ lɛ a mʊgɔ dun Tɛlalɔɨ.’ ”
Currently Selected:
Luka 13: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
