Luka 14
14
Yesu A Gung Nǝl Nǝn Kum Fǝbtǝm
1Kaa Kum Fǝbtǝm, nǝngɔ Yesu a shu a lɔ kaa nǝ dʊʊ bwɛ Farisaɨ a daa jatǝm jǝjalǝnɨ. Jǝ tɔɔ gǝn nɛ dangǝn. 2Nǝngɔ Yesu a kuwo nʊ nɨ gʌ lɛ nǝn twɨla fʊtǝm naaɨ, daam a kǝga gǝnɨ. 3Nǝngɔ Yesu a bʌ nǝbɔ Farisaɨ jǝbɔ nǝb mɛlalɨ diilɔ gɔ, “Diil bǝnɔ a jǝla nyɔ gɔ ja gung nʊ nɨ mɨ kwamɨgǝnɨ nǝn Kum Fǝbtǝm ka? A jǝla bɔ nyɔ ka?” 4Ja gar gǝm bɔ kɛl. Nǝngɔ a ta kang nʊ nɨ mɨ kwamɨgǝnɨ, a gung gǝn a twɨla gǝnɔ gǝmɨ, a ywa gǝnɨ.
5Nǝngɔ a bʌ ji gɔ, “Nuwo nyɨ a kʊm jen na nǝngǝn nǝn lungsongi, na n nɛɛ balɨɨ, a yal a mʊgɔ laa mwɛ nǝn Kum Fǝbtǝm, mɨsɔ jǝg gǝn nɛɨ?” 6Nǝngɔ ja gar gǝm bɔ kɛlɨ.
Kanga Mʊ Maam Faabǝn Nɛɨ
7Yesu a sǝb nǝbɔ kanga na ja jo ji a lɔ kangwaalɨ jǝ jǝgǝm daa nyanɔ sǝ ja yɨ woi, nǝngɔ a sʊwa ji mʊsǝn kɛl nɨɨ gɔ, 8“Na ja jo ń a kangwaal, na ń yɔɨ, bɛ ka ń dʌng lɛ daa dʊʊn ya yɨ wo. Mʊ nyǝm bɔ kɛna ja yam nʊ nɨ a laa ń dʊʊnɨ. 9Kage nʊ nɨ a jo jeni ba sʊwa ń gɔ, ‘Gun nǝ nʊ nɨ daa yɨmɔ.’ Mʊ nyʊwa nyʊwa gunidul na a yǝla nǝn mɔ a kǝlɨ bɛ daaɨ. 10Na ja jo ń a kangwaalɨ, bɛ ya ń saa kǝlɨ bɛ daa yɨ wo. Na nʊ nɨ a jo ńi ba kuwo ńi, sʊwa ń sʊwa ń gɔ, ‘Fwalgɔ, gun ba ń yɨ fɔ a daa nyanɔ gǝm.’ Nǝb nɨ a bɛ kangwaalɨ kuwo ń kuwo ń nǝn dʊʊn. 11Nʊ nɨ a gung dul gǝnɨ, jǝ soga gǝn soga. Nʊ nɨ a shig dul gǝnɨ, jǝ nǝ gǝn nǝ dʊʊn.”
Maatǝm Lǝma
12Nǝngɔ Yesu a sʊwa nʊ nɨ a jo gǝnɨ gɔ, “Na ń jo nǝb jatǝm jǝjalǝn a lɔ mʊɨ, bɛ ka ń jo lɛ fatǝlam mʊnɔ, jǝbɔ kɛtǝlam mʊnɔ, jǝbɔ nanǝgam mʊnɔ, jǝbɔ nǝb shilogɔ jǝ́ yǝm dakini. Na ń jo jii, kaa di tʌji jǝ jo ń jo ń sǝ ja ywa naanɔ ja yɔm a lɔ mʊɨ. 13Kwama mʊ jo nǝb jatǝm jǝjalǝn nɛɨ, bɛ ń jo nǝbɔ mɨ nǝn jǝlɨ, bɛ ń jo nǝbɔ mɨ nǝn naaɨ, jǝbɔ nǝbɔ bʊtɔgɔ a swam swamɨ, jǝbɔ kululʌmɔ. 14Na ń maa nyɨɨ, mʊ nya nya bwili, jʊ a bwɨɨ nǝb nɨ mʊ joi mɨsɔ jǝ nya gola lɛ ja ywa ń naanɔ. Nǝn Kwaama ywa ń nɛ nǝn di guntǝm nǝb dǝngdǝngɔ a bwaagɔ gǝmɨ.”
Mʊsǝn Kɛl Nǝn Kaa Gʌleng Kangwaal
(Mat 22:1-10)
15Nyʊwatǝm kɛl nɨ nyɨɨ, nǝngɔ kaa win a mʊgɔ fatǝm jatǝm jǝjalǝnɔ jǝbɔ Yesui a sʊwa gǝn gɔ, “Bwiligɔ na a nʊ nɨ ja jǝjalǝn nɨ lɛ a fɔlɔn lɔ Kwaamaɨ.”
16Nǝngɔ a sʊwa ji gɔ, “Kaa nǝl a swɨ kangwaal. A jo nǝbɔ a lada. 17Nǝn kwamagɔ kangwaalɔ a bɨɨ, nǝngɔ a twam bwɛ jwaalɛ gǝnɔ gɔ ya sʊwa nǝbɔ ga twam jimi ja bɛ, kangwaalɔ a bɨɨ.
18“Nǝngɔ gwam jinɔ ja bɛ nǝn tabatǝm fɨɨ. Nʊ nɨ ga jo nǝn kǝgaɨ gɔ, ‘N ten twam fɨ ya mǝ dʌng dʌng. N kela ń, mɨsɔ mǝ ke kang lɛ.’
19“A wini gɔ, ‘N ten nɛɛ jʊngtǝm twam kʊb. Mǝ yɔ sǝ n tɛl ji. N kela ń, mɨsɔ mǝ ke kang lɛ.’
20“A wini tǝgǝn gɔ, ‘N kumtɨn nɨ mǝ naa nɔɔlɨɨ, mɨsɔ mǝ ke kang lɛ n yɔ.’
21“Nǝngɔ bwɛ jwaalɛ nɨ a yǝla ya sʊwa tɛlalɔ gǝnɔ jʊ ja sʊwa gǝnɨ. Nǝngɔ a maa nabwɨlɨ, a sʊwa bwɛ jwaalɛ gǝnɔ gɔ, ‘Jel yagɨ yagɨ yɔ a golantɨn jǝbɔ sʊgɔlɔngtɨn, ya mʊr mɨ nǝb nɨ mɨ nǝn kaa jǝlɨ, jǝbɔ nǝbɔ mɨ nǝn naaɨ, jǝbɔ kululʌm, jǝbɔ nǝbɔ bʊtɔgɔ a swam swamɨ, ya bɛ nǝn ji.’
22“A ta bɔ bʊtɔ, nǝngɔ bwɛ jwaalɛ nɨ a yǝla a bɛ gɔ, ‘Tɛlalɔ, ya n maa jʊ mʊ sʊwaɨ, daagɔ a bǝla wo, nǝbɔ a yii bɔ.’
23“Nǝngɔ tɛlalɔngɔ a sʊwa bwɛ jwaalɛ gǝnɔ gɔ, ‘Yɔ a gola dʊʊntɨn, jǝbɔ bɛl golan, jo nǝbɔ mʊ nyaɨ, ń bɛ nǝn ji a lɔ mɨ, sǝ ba ja yii lɔngɔ. 24Mǝ sʊwa jen nɛ, nǝb nɨ mǝ jo nǝn tɨkǝgaɨ, mɨ kaa nǝl wo a kʊm jin twɨ jǝjalǝn nɨ lɛ mǝ fɛkaɨ.’ ”
Gaalanɔ A Yǝlamtǝm Bwɛ Mɛlalɨɨ
(Mat 10:37,38)
25Kaa di nǝbɔ bwang gǝm lɛ a lada nyɔ, nǝngɔ a yǝla a sʊwa ji gɔ, 26“Nʊ nɨ swɨ bwangtǝm mǝndɨ lɛɨ, bɛ ga swɨ ɨ a laa tɨya gɔ jǝbɔ nɛnɛ gɔ, jǝbɔ nwala gɔ, jǝbɔ bɛtɨ lɔ gɨɨ, jǝbɔ kɛtǝlam gǝnɔ batǝnɔ, jǝbɔ a nɔɔtǝnɔ, jǝbɔ kʊlɨ gǝnɔ. Na mɨ nyɨɨ, mɨsɔ dwal lɛ a yǝlam bwɛ mɛlalɨ mɨ. 27Na nʊ nɨ a do bɔ tɨya kʊʊtǝm gǝnɔ a bwang mɨɨ,#14:27 Do tɨya kʊʊtǝm gǝnɔ a bwang mɨ gǝ nʊng gaalanɔ mʊ nyʊwa lɛɨ na ń yǝlam bwɛ mɛlalɨ Yesui. mɨsɔ dwal lɛ a yǝlam bwɛ mɛlalɨ mɨ.
28“Mʊsǝn kɛlɔ nǝn gɔ, na kaa nǝl a kʊm jen, swɨ lɛ a mɔ kan dʌbʌli, yɨ yɨ dɨn a kiyo kanjǝlɔ gǝ ten nɛɨ, sǝ a kuwo kɛna kemʌnɔ gǝ nǝn a kangɨ la la mɔtǝm lɔngɨ. Mɨ nyɔ ka? 29Na ga swa fʌlʌmɔ ga dwal bɔ ga dɨ mɔtǝm gǝnɨ, nǝb nɨ a kuwo maajɨ nɨɨ, jǝ dǝg gǝn dǝg jǝ sʊwa lɛ gɔ, 30‘Nʊ nɨ a tǝl mɔtǝm lɔngɔ, wɔ a gaa nǝn, a dɨ bɔ.’
31“Na kaa fɔlɔ nǝn sʊwajaamɔ fʊlkʊblǝn kʊb gɔ gǝ ta kun jǝbɔ fɔlɔ nɨ nǝn sʊwajaamɔ fʊlkʊblǝn fʊltiyoi, mɨsɔ yɨ lɛ dɨn a dʌng kwaanɔ gǝ tam kun nɛ jǝbɔ fɔlɔ nɨ ka? 32Na mɨsɔ gǝ dwal lɛɨ, nǝn kwama lǝga bɔ ja labkaɨ, jʊ gǝ maa lɛɨ, ga twam kaam nǝb ya ja kela gǝm yɨm lǝma a daa fɔlɔ nɨ woi. 33Gǝ na nyɔ tʌjen, na nʊ nɨ a bǝla bɔ kanjǝl nɨ gǝ nǝn gwamɨ, mɨsɔ yǝlam bwɛ mɛlalɨ mɨ lɛ.
Mʊsǝn Kɛl A Dul Mam
(Mat 5:13; Mar 9:50)
34“Mamɔ n jǝ lǝmɨ, na denden gǝnɔ a jelʌmi, maa nyǝn lǝm lɛ tagɨ? 35Mɨ nǝn bʊmǝn wo tag a tɔtwam. Jǝ tǝlam gǝn fʌlen. Nʊ nɨ nǝn lɔl nyʊwatǝmɨ, bɛ ga nyʊwa.”
Currently Selected:
Luka 14: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
