Luka 16
16
Mʊsǝn Kɛl Nǝn Nǝ Dʌngtǝm Nɨ Maa Fanyal Lɛɨ
1Yesu a sʊwa bɛtɔ mɛlalɨ gǝnɔ kaa mʊsǝn kɛl. A sʊwa gɔ, “Kaa nǝ shilo wʊnɨ nǝbɔ tuwo nǝ dʌngtǝm gǝnɔ lɛ nǝn maatǝm fanyal nǝn kanjǝl gǝnɨ. 2Nǝngɔ a jo nǝ dʌngtǝm gǝnɨ, a bʌ gǝn gɔ, ‘N wɛ mǝ nyʊwala lɛ a dul mʊnɨ? Sʊwa ɨ jʊ mʊ maa gwam nǝn kanjǝl mɨ a kang mʊnɨ! Mǝ swɨ bɔ ń maa dʌngtǝm kanjǝl mɨɨ tag.’
3“Nǝngɔ nǝ dʌngtǝm nɨ a sʊwa a nǝl gǝn gɔ, ‘N wɛ mǝ maa lɛ kǝngkɨɨ? Tɛlalɔ mɨ wɔ kaa ɨ lɛ a maajɨ mǝndɨ gǝm. Mɨ mǝ nǝn kwaan jʊngtǝm twam. Mǝ nyʊwa gunidul keltǝm keli lɛ tag. 4N nyǝm jʊ mǝ maa lɛɨ, sǝ na a kaa ɨ a maajɨ mǝndɨ gǝmɨ, n nya lǝma yɨm jǝbɔ nǝbɔ, sǝ ja yo i a lɔ ji mɨ komtǝm wo.’
5“Nǝngɔ a jo nǝb nɨ gwam tɛlalɔ gǝnɔ bwang jim naan nɛɨ. Nǝngɔ a bʌ nǝ tɨkǝgagɨɨ gɔ, ‘Tɛlalɔ mɨ gǝ bwang mʊn nyǝn?’
6“Nǝngɔ gɔ, ‘Kwal nwangɔ fʊlkʊb naalǝb.’
“Nǝngɔ a sʊwa gɔ, ‘Kǝngkǝnɨ ya mʊla kwal nwangɔ fʊlkʊb naal.’
7“Nǝngɔ a bʌ a yogɨɨ gɔ, ‘Tɛlalɔ mɨ gǝ bwang mʊn nyǝn?’
“Nǝngɔ a jǝla gǝn gɔ, ‘Gǝ bwang mɨ tun jaamɔ fʊlkʊblǝn.’
“Nǝngɔ a sʊwa gǝn gɔ, ‘Ya ń mʊla fʊlkʊb naalǝb.’
8“Tɛlalɔ a bǝlá nǝ dʌngtǝm nɨ mɨ nǝn bɨlǝngkɛlɨ a dul yʊlan nɨ ga maaɨ. Nǝbɔ a kal nɨ a mʊgɔ yooli nɨɨ, jǝ nǝn yʊlan a mʊgɔ maajɨ jinɔ gǝm, ja laa nǝb nɨ a mʊgɔ nyalǝmɨ. 9Mǝ sʊwa jen nɛ, bɛ jǝ́ maa maajɨ nǝn shilo yooli nɨ sǝ jǝ́ nya fatǝm nǝn, sǝ na kanjǝl jenɔ a dɨɨ, jǝ yo jen yo a daa yɨm nɨ mɨ dɨtǝm woi.
10“Nʊ nɨ ja jǝla nǝn gɔ a jʊ nɨ dǝmɨ, jǝ jǝla jǝla nǝn gɔ a jʊ nɨ a ladaɨ. Nʊ nɨ a nʊng bɔ bɨlǝngkɛl a jʊ nɨ dǝmɨ, mɨsɔ nʊng bɨlǝngkɛl lɛ a jʊ nɨ a ladaɨ. 11Na ja jǝla bɔ nǝn jen a tatǝm kanjǝl shilo yooli nɨɨ, nuwo jǝla lɛ nǝn jen a tatǝm shilo bɨlǝngǝnɨ? 12Na jǝ́ kɨla bɔ kanjǝl kaa nǝlɨ, nuwo nǝ jen kanjǝl nɨ lɛ na a jeni?
13“Mɨ bwɛ jwaalɛ nɨ wo maa jwaalɛn nɛ a tɛlalɔtɨnɔ yoi. Gǝ kɔ kɔ win, ga swɨ a wini, gǝ jǝla jǝla nǝn win, mɨsɔ gǝ jǝla lɛ nǝn a wini. Mɨsɔ jǝ́ mʊrka bwangtǝm Kwaamaɨ lɛ jǝbɔ bwangtǝm kemʌn.”
Diilɔ Jǝbɔ Fɔlɔn Lɔ Kwaamaɨ
(Mat 11:12,13; 5:31,32)
14Nǝbɔ Farisaɨ n nǝb swɨtǝm kemʌn. Kwama ja nyʊwam kɛl nɨɨ, nǝngɔ ja tǝl mogtǝm Yesui. 15Yesu a sʊwa ji gɔ, “Nǝjen jǝ́ nʊng nya jenɔ lɛ a nu nǝbɨɨ, Kwaama a kwɛl a nyǝm nyǝmɨ nǝl jenɔ. Jʊ nɨ a bʊm a nu nǝbɨɨ, n kanjǝlɔ Kwaama kɔ lɛɨ.
16“Nǝbɔ a bwangtǝn diil Musaɨ jǝbɔ a nǝbkuwotǝmkǝgagɨɨ, ba la nǝn a kwama Yohanaɨ, nǝ yʊtǝm mwɛ sagsag. Kǝngkɔ bǝ kiyo fulon kɛl lǝmɨ fɔlɔn lɔ Kwaamaɨ lɛ, kwama gɔ, nǝbɔ maa kwaan nɛ jǝ dɔ mʊgɔ gǝnɔ. 17Tǝmɔ jǝbɔ dʌbʌlɔ shu shu, mʊlalɨ dǝm a mʊgɔ mʊlalɨ diilɔ gǝm mɨsɔ shu lɛ.”
Mɛlalɨ Yesui A Dul Jʌtǝm Naakan
(Mat 19:1-12; Mar 10:1-12)
18“Nʊ nɨ gwam a dem kang a nwala gɔ gǝm a naa kaaɨ, gǝ maa bulon. Nʊ nɨ tǝgǝn a naa nɔɔlɨ nɨ ja dem gǝm kangɨ, gǝ maa bulon.”
Nǝ Shilogɔ Jǝbɔ Liazaru
(Mat 19:1-12; Mar 10:1-12)
19Yesu a sʊwa ji gɔ, “Kaa nǝ shilo wo, gǝ dʊʊ dwang nyantɨn kwangkwang, gǝ ja jǝjalǝn nyan kwangkwang. 20A nyanga lɔng gǝn kaa nǝ keli gǝ daa wo. Dun gǝnɔ nǝn Liazaru. Dɛbǝlɔ a sɔm bʊtɔ gǝnɔ. 21Swɨ lɛ a ja fʌtʌlogi mwan nɨ tǝla lɛ a tǝm a kang nǝ shilo nɨɨ. N sǝgantɨn ba gǝ debla dɛɛbǝl gǝnɔ lɛɨ.
22“Nǝngɔ nǝ keli nɨ ba bʊlaɨ. Nǝngɔ bɛtɔ twama Kwaamaɨ a do gǝn a yɔ nǝn gɔ a daa Ibrahim woi a Lɔ Kwaamaɨ. Nǝ shilo nɨ a bʊla tǝgǝnɨ, nǝngɔ ja fʌl gǝnɨ. 23Nǝngɔ nǝ shilo nɨ a dɔ mʊgɔ lɔ kǝlagɨɨ, a tǝl gʌtǝmɨ, a gung nu gǝnɨ, nǝngɔ a kuwo Ibrahim a kʊta nyɨɨ, jǝbɔ Liazaru a daalɨ gǝn. 24Nǝngɔ a jo jangajǝl gɔ, ‘Ibrahim, n kela ń, ji bʊnǝn mɨɨ, tʊng Liazaru ba dǝg bawuli kang gǝnɔ a mwɛ sǝ a mal mɨ a ben mǝndɨ gǝm. Ya mǝ bʊla lɛ a mʊgɔ kǝla nɨ gǝm.’
25“Nǝngɔ Ibrahim a jǝla gǝn gɔ, ‘Bʊla mɨ, bʊʊla nǝn kwama nɨ mʊ nyʊwam lǝma lɛ, Liazaru gaala lɛɨ. Kwama nɨ kǝngkɨɨ, n kwama nyʊwatǝm lǝma Liazarui, mʊ tǝmʊn n kwama gʌtǝm mʊn. 26A na nyɔ, daagɔ mʊ woi jǝbɔ daa nɨ nǝn woi, gʌleng bʊwa wo a kʊm bǝn. Mɨsɔ bǝ labka lɛ.’
27“Nǝngɔ nǝ shilo nɨ a kela gǝn gɔ, ‘Twam Liazaru a lɔ tɛtɛ mɨɨ. 28Mǝ nǝngǝn nǝn kɛtǝlam batǝnɔ nʊ sǝ a gʊ jim lɔl a kɛl bwangtǝn Kwaamaɨ, kage ba ja dɔ daa gaalan nɨ.’
29“Nǝngɔ Ibrahim a jǝla gǝn gɔ, ‘Ji nǝn langǝn bwangǝn Musaɨ jǝbɔ a nǝbkuwotǝmkǝgagɔ. Bɛ ja nyʊwa jʊ nǝb nɨ a sʊwa jii.’
30“Nǝngɔ gɔ, ‘Ɔ ɔ, tɛtɛ Ibrahim. Na nʊ nɨ a kwɛl a bʊla bʊlaɨ a yɔ nǝn kɛlɨ, jǝ yǝla yǝla ja bǝla bwɨlangkɛlɔ.’
31“Nǝngɔ Ibrahim a sʊwa gǝn gɔ, ‘Na ja nyʊwa bɔ kɛl Musaɨ jǝbɔ a nǝbkuwotǝmkǝgagɨɨ, mɨsɔ jǝ jǝla lɛ, na nǝl a gun a bwaa a yɔ a daa ji woi.’ ”
Currently Selected:
Luka 16: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
