Luka 17
17
Kanjǝlɔ Gǝ Dǝg Nǝl Maatǝm Bwɨlangkɛl Lɛɨ
(Mat 18:6,7,21,22; Mar 9:42-50)
1Yesu a sʊwa bɛtɔ mɛlalɨ gǝnɔ gɔ, “Kanjǝl nɨ dǝg nǝbɔ maatǝm bwɨlangkɛl lɛɨ bɛ bɛ. N mwɛ nʊ nɨ gʊba kanjǝl nɨ lɛ a bɛ nǝnɨ. 2A laa jǝl ja kwa gǝm nɛl kʊwalɨ a kwɨl, ja mal gǝn a mʊgɔ wɨma, na gǝ dǝg dǝg kaa win a kʊm bɛtɔ dwalǝn nɨ a maa bwɨlangkɛlɨ. 3Bɛ jǝ́ kɨla dul jenɔ! Na kɨla mɔ a maa mʊn bwɨlangkɛlɨ, bɛ ń ga gǝn. Na a saa kǝlǝmtǝmɨ, bɛ ń kǝlǝm gǝm. 4Na a maa mʊn bwɨlangkɛl naagɔ nʌbʌl a kɔkɔɨ, nǝngɔ a yǝla bɛ naagɔ nʌbʌl a daa mʊ woi gɔ ń kǝlǝm gǝmɨ, bɛ ń kǝlǝm gǝm.”
Sʊ Nǝm Nǝtǝm Bɨlǝngkɛlɔ
5Bɛtɔ twamagɔ a sʊwa Tɛlalɔ gɔ, “Sʊ nǝm nǝtǝm bɨlǝngkɛlɔ.”
6Tɛlalɔ a sʊwa ji gɔ, “Na jen nǝn nǝtǝm bɨlǝngkɛl nǝn dǝm nyɔ na nu mastadɨ, jǝ́ sʊwa sʊwa tɨya kʊmalo nɨ jengɔ ku fɔ a daa nɨ ya ń ywɔ a wɨma, bwangtǝn bwang jʊ jǝ́ sʊwa gǝn gɔ a maaɨ.”
Bwɛ Jwaalɛ Nya
7Yesu a ja kǝga nǝn mɛlalɨ gǝnɔ gɔ, “Nuwo a kʊm jen na nǝngǝn nǝn bwɛ jwaalɛ wʊnɨ jʊng gǝm twam lɛɨ, tɔɔ gǝm kwamɨ lɛɨ, na a yǝla a bɛ a lɔɨ, sʊwa gǝn nɛ gɔ, ‘Ba yɨ fɔ ja jǝjalǝnɨ’? 8Mɔ tǝmʊn mɨsɔ mʊ sʊwa gǝn nɛ mɔʊ, ‘Fɛka mɨ jǝjalǝn kwaamɨgɔ dɨn, fɛka bʊtɔ mʊnɔ, ń bɛ mɨ nǝn. Na n ja, n nɔɔɨ, sǝla ń ja a mʊnɔ’ ka? 9Gǝ buu buu bwɛ jwaalɛgɔ gǝm kang na a maa jʊ nɨ ga dǝg gǝn gɔ a maaɨ ka? 10Gǝ na nyɔ tʌjen, na jǝ́ bwangtǝn jʊ nɨ gwam Kwaama a sʊwa jen gɔ jǝ́ maaɨ, bɛ jǝ́ sʊwa gɔ, ‘Nǝn jwaalɛb nǝn kwan. Nǝn maa jʊ nɨ a bʊm nǝn maa lɛɨ.’ ”
Yesu A Gung Nǝb Nɨ Bʊtɔgɔ A Mwata Mwataɨ Kʊb
11Kwama nɨ Yesu a shum a Urushalimaɨ, a bwangtǝn a yǝga tǝm Samariya jǝbɔ Galili. 12Ya dɔ kaa tuulɔ lɛɨ, batǝmɔ kʊb nǝn twɨla mwatatǝmɨ ja bɛ a daa gǝ woi. Ja tɨ a kʊta nyɔ. 13Nǝngɔ ja jo jangajǝl nǝn diil gɔ, “Yesu, Nǝ dʊʊ, ji bʊnǝn nǝnɔ.”
14Yesu a kuwo jii, nǝngɔ a sʊwa ji gɔ, “Ya jǝ́ nʊng dul jenɔ a daa nǝbkǝlamɔ woi.” Kwama ja ja kǝga nǝn yɔm jini, nǝngɔ ja kuwo bʊtɔ jinɔ kwamɨgǝnɨ.
15Nǝngɔ win a kʊm jin a kuwo Yesu a gung gǝnɨ, a yǝla a bɛ a daa Yesu woi, bǝlá Kwaama lɛ nǝn diil. 16Nǝngɔ ba jʊng a kǝga Yesui, a buu gǝm kangɨ. Balɨ nɨ ke bɔ bwɛ Yahudaɨ. Gǝ na a tǝm Samariya.
17Yesu a bʌ gɔ, “Ke bɔ nǝbɔ kʊb ja nya gungtǝmɨ ka? Tangǝnɔ tʊlkʊbɨ jǝ fee? 18Mɨ kaa nʊ nɨ wo a yǝla ba bǝlá Kwaamaɨ na ke bɔ bwɛ bʌl nɨɨ?” 19Nǝngɔ Yesu a sʊwa gǝn gɔ, “Gun yilo, nǝtǝm bɨlǝngkɛl mʊnɔ nǝn gɔ a gung ńi.”
Yesu A Maa Mɛlalɨ A Dul Kum Bɛtǝm Fɔlɔn Lɔ Kwaamaɨ
(Mat 24:23-28,36-41)
20Kaamɨ a kʊm nǝbɔ Farisaɨ ja bʌ Yesu gɔ, “Fɨyang fɔlɔn lɔ Kwaamaɨ bɛ lɛɨ?” Yesu a jǝla ji gɔ, “Bɛtǝm fɔlɔn lɔ Kwaamaɨ ke bɔ jʊ nɨ jǝ kuwo lɛ nǝn nui. 21Ke bɔ jʊ nɨ kaa nǝl sʊwa lɛ gɔ, ‘Wɔ a daa nɨ. Wulen fʌleni,’ jʊ a bwɨɨ fɔlɔn Lɔ Kwaamaɨ gǝ na a kʊm jen.”
22Nǝngɔ a sʊwa bɛtɔ mɛlalɨ gǝnɨ gɔ, “Kɔkɔgɔ bɛ lɛ wo wʊnɨ jǝ́ swɨ lɛ jǝ́ kuwo Bʊla Nǝlɨ maa fɔlɔn nɛɨ, mɨsɔ jǝ́ kuwo lɛ. 23Nǝbɔ sʊwa jen sʊwa gɔ, ‘N wɔ fɔ! Wulen fʌlen!’ Bɛ ka jǝ́ jǝla lɛ nǝn ji. 24Kanga kwama gǝ biyom lɛ a gwanga twalɨ a shu nǝn a gwanga diyengi, bɛtǝm Bʊla Nǝlɨ yǝlam nyɔ. 25Nǝn tɨkǝga Bʊla Nǝlɨ nɔɔ nɔɔ gaalan a lada. Kal nɨ kɔ gǝn kɔ.
26“Kanga a bwɨm nǝn jol Nuhui, yǝlam nyɔ tag nǝn jolɔ Bʊla Nǝlɨ yǝla bɛm lɛɨ. 27Nǝbɔ ja lɛ, nɔɔ lɛ, jǝ naa nɔɔtǝmɔ lɛ, jǝ nǝbka naakanɔ lɛ, a ba la nǝn kumɔ Nuhu a dɔm mʊgɔ tɨyamwɛngɨ. Nǝngɔ mwɛmɔ a swiyo a yii tǝmɔ gwamɨ, a jʌbo nǝb nɨ mɨ a mʊgɔ tɨyamwɛngɨ.
28“Gǝ na nyɔ tag nǝn kwama Lutui, nǝbɔ ja lɛ, nɔɔ lɛ, jǝ ten nɛ, jǝ miyo lɛ, jǝ kwal kwalagɔ lɛ, jǝ mɔba lɔngɔ lɛ. 29A kumɔ Lutu a bǝlam Sadumagɨɨ, kǝlagɔ jǝbɔ tɛl nɨ a fo, a shii, a gǝla a dʌbʌl kwama ba jʌbom ji gwam.
30“Yǝlam nyɔ nǝn kwama Bʊla Nǝlɨ yǝla ba nʊngǝm dul gǝnɔ lɛɨ. 31A kum gɔ, nʊ nɨ a dul kanɨ, ka ga gǝla lɛ ga wɔɔ kanjǝl gǝnɔ a mʊgɔ lɔng. Nʊ nɨ a shu a kuuli, ka ga yǝla lɛ ga bɛ a lɔ. 32Bʊʊla nǝn jʊ a bwɨ nǝn nwala Lutui. 33Nʊ nɨ swɨ nyatǝm kʊlɨ gǝnɔ lɛɨ, jʊ jʊ. Nʊ nɨ a lɛ kʊlɨ gǝnɨ, bʊʊ bʊʊ nǝn. 34N sʊwa jen, a kum gɔ gǝm, nǝbɔ yo daam wɨlǝnɔ win. Kwaama dem dem win, sǝ a bǝla win. 35Nɔɔtǝmɔ yo kʊwa nɛl lɛ dakini. Kwaama dem win, sǝ a bǝla win. 36Batǝmɔ yo dakini jwiyo twam lɛ. Kwaama dem win, sǝ a bǝla win.”
37Nǝngɔ bɛtɔ mɛlalɨ gǝnɔ a bʌ gǝn gɔ, “A fee nyɨɨ, Tɛlalɔ?” Yesu a sʊwa ji gɔ, “Daa nɨ bʌlʌnɔ woi, n daagɔ jɛtɨnɔ gǝ mʊrkam lɛɨ.”
Currently Selected:
Luka 17: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
