Yohana 11

Fǝ mo Leyazaro

1Nobǝ akan è no a eten a Betani, gè fo ye etkwa ra. Bè fǝ́ ye anga Leyazaro. Gè no ngge be nwenjwa ye be ndegwa fà, Meri ngge Mata. 2Meri hon ena, a nwenjin ye Leyazaro éè dwano adi modwa na, a ende è nggwa Yeso byi yoben a fu nè fwe ngǝ́ nó ngge zan-a-chu mbwe ángá. 3Enona, be nwenjwa Leyazaro hon è tson chí ken a zǝn Yeso jan, “Etsodwe, ende a o edgyan anga, fo ye etkwa ra.”

4Atan a Yeso è fo chí ena ángá gè jan, “Modwa a Leyazaro dwana, a du ye ye adi fǝ ra, a modwa nwone a tú egǝ̀n mo Ehwya. Ga tú egǝ̀n mo Nwen mo Ehwya gaten.” 5Yeso è dgyan Mata ngge nwenjin ye ndegwa tangge Leyazaro anga, 6bi adi enò, abu gè fo jan Leyazaro fo ye etkwa ra ángá, gè beti bishi mo tsǝnò fà a zǝn a gè no ángá. 7Kǝnggwa gè jan be etsonchi mbwe jan, “Je e twabǝ e ken a sǝnsen mo Yahudiya.”

8Tea bè ká ye eka jan, “Etumo, chà dgyen ye fon ra bè ya a Yahuda è nda anga be e twa o ten. Bi adi enò, o dgyan anga we twabǝ e ken a zǝn?”

9Yeso è janfwe be, “Atan a nò gwa a je, ge no ye anga mo awa gwi chu fà sangǝ́ ge chà kpo anga ra? Ende e kenkèn anga ènò a tswa ye kpwafu ra, adia mò e no zǝnchaje enggasansan anga nggazǝ anga. 10Tea atan a ge kenkèn anga etsǝ, ga tswa kpwafu adia ge ben ye mò nwone a ngga ye zǝn anga ra.”

11A gè jan fwa ara fwa ena ángá, kǝnggwa gè jan, “Shushwa je Leyazaro dwa ara dan, tea m nya ken a zǝn evǝa me e fǝ́ e zǝ ye.”

12Be etsonchi mbwe è janfwe ye, “Etsodwe, ano ge dwa anga dan ga zǝ ezǝm.” 13Yeso è jan be anga jan Leyazaro fǝ ara, tea be etsonchi mbwe è ka jan Yeso jan anga jan, Leyazaro dwa anga dan, kpwà ara.

14Enona, ge jan be enggasansan mo nó jan, “Leyazaro fǝ ara, 15je e ken a zǝn a ge no ángá, a chu nye, m fo etkwa adia m̀ fwa m a zǝn ra, adia nye e tsǝ́ekǝ̀n asuswana. Nye bwa, je e ken e di ye.”

16Kǝnggwa Toma a bè fǝ́ anga Ngǝfen ángá è jan be etsonchi ya e dan ángá jan, “Binbin mo je, je e ken ngge Etsodwe evǝa je e fǝ ngge ge.”

Yeso a ende e ti nobǝ nyi etkyen a dì anga

17Atan a Yeso è bwangga ángá, Leyazaro è bwe ara tsǝ ndwe a dì. 18Edgyenm mo efǝ e ti a Betani ken a Urishelima è kengga ye kilomita ta ra, 19enona, be ya a Yahuda embo è bwa janbon Mata ngge Meri nwenjin ye ndegwa, ekǝ̀n anga a chu fǝ mo nwenjin be. 20Atan a Mata è fo bè jan Yeso nyabwa ángá gè vǝ́ a je evǝa ge e ben ye, tea Meri è no ḿ mbwe a mu.

21Mata è jan Yeso jan, “Etsodwe, be è jan o no ana nwenjin m à fǝ ye ra. 22Tea m yi jan èé asuswana Ehwya a no o mò e no engǝ ra a o bgó ye.”

23Yeso è jan Mata jan, “Nwenjin o a nyi etkyen efwe.”

24Mata è janfwe ye, “M yi jan ga nyi etkyen nò a ba ti nobǝ a nyi etkyen a dì ángá.”

25Yeso è jan ye, “A me m no ezǝbwam hon ngge nya hon. Ende e tsǝ́ekǝ̀n a chu m ge e ma fǝ efǝm, ga no angǝ. 26Egwa egwa e no angǝ n tsǝ́ekǝ̀n anga a chu m gaten, a fǝ a didi ye ra. Mata, o tsǝ́ ara ekǝ̀n a chu fwa ena?”

27Gè janfwe ye, “Ee, Etsodwe, m tsǝ́ ara ekǝ̀n jan a bo wa Kristi hon, Nwen mo Ehwya hon, nwene a bè jan ga bwa a tswa zǝnchaje ángá.”

28Atan a Mata è jan fwa ara fwa ena ángá, gè twabǝ ken fǝ́ Meri nwenjin ye dwa ken a buetkwa nè jan, “Etumo hon no ana, ge ká eka mbo anga.” 29Atan a Meri è fo enò ángá, gè nyi etkyen myan myan nè ken a zǝn ye. 30Atan enò, Yeso è chà no chá je mo eten nwofyan hon, gè ndnyano adi zǝn a Mata è ben ye ángá. 31Atan a be ya a Yahuda ya è no ngge Meri a tswa akanmu nè no janbon ye ekǝ̀n anga è di abu gè pwì etkyen nè vǝ́ a je ángá, bè ka jan ge nyaken a zǝn dì evǝa ge e kǝndwafǝ a zǝn. Enona, bè ba ye.

32Atan a Meri è kengga a zǝn Yeso ángá, gè kposhi a sen chafya mbwe nè jan, “Etsodwe we no ana nwenjin m à fǝ ye ra.”

33Atan a Yeso è di ye gè kǝndwafǝ anga tangge be ya a Yahuda ya è ba ye anga ángá, mò hon è dwa ye a tsuruku, nya mbwe è bgen àywá. 34Gè ká be eka jan, “Zǝn a nye twà ye no anga no a che?” Bè janfwe ye, “Etsodwe, bwa we di.”

35Yeso è kǝndwafǝ.

36Kǝnggwa be ya a Yahuda jan, “Di abu gè dgyan ye ángá.”

37Tea be ya a Yahuda ya ehwyà jan, “Ende ena è fkigwa ya fǝzǝn ebwibwi fǝzǝn, chú gà a bwe a ti ye mò akan nwone à dòn fǝ mo Leyazaro ra?”

38Yeso e chà no adi nya ebgenm atan a gè bwangga a zǝn dì hon ángá. Dì hon, bè gu nó no a ju mo hwì nè bwipe nó no ngge ten. 39Yeso è jan, “Dgyén vǝ ti ara ten hon.”

Tea Mata nwenjin engǝfǝ hon è jan, “Etsodwe, asuswana abu ge bwe ara tsǝ ndwe na, ga yo yò anga.”

40Kǝnggwa Yeso jan, “M̀ chà jan m mbo jan, ano o tsǝ́ekǝ̀n wa di egǝ̀n mo Ehwya ra?”

41Enona, bè dgyén vǝ ti ara ten è no a kpevǝ dì hon ken a buetkwa. Kǝnggwa Yeso è takpa vǝ́ chá kpe nè jan, “Àtà, m chwano o adia o fo ara m ángá. 42M yi jan o fo m anga nogwa nogwa, tea m jan fwa ena evǝ mo be nobǝ ya e ywano ana evǝa be e tsǝ́ekǝ̀n jan ò tson m a bo.”

43Atan a gè jan fwa ara fwa ena ángá, Yeso è fǝ́dwa ngge aken echakpo jan, “Leyazaro, gwa a je.” 44Kǝnggwa engǝfǝ hon è gwa a je, be bu mbwe ngge be fu mbwe è dwa etefum ngge eta adanmo a be ti tè be kǝn nobǝ anga, tangge adanmo a bè ti bwipe ye fǝzǝn embǝgya mbwe no ángá. Yeso è jan be, “Nye fken vǝ́ kpu ara be adanmo hon, nye e gwa ye ge e nya.”

Be Atkwentì mo be ya a Yahuda è té fuchin be e gu Yeso

(Matiyu 26:1-5; Marku 14:1-2; Luka 22:1-2)

45Adi mò ena, be ya a Yahuda embo ya è bwa bandi Meri ángá, è tsǝ́ekǝ̀n a chu Yeso. 46Tea be ya ehwyà è ken a zǝn be Farisi nè jan be mò a Yeso è bwe na. 47Kǝnggwa be Ekǝ́n echa ngge be Farisi è fǝ́ be Atkwentì dwa evǝa be e fǝnchu. Bè ká sojube eka jan.

“Mò a je bwe anga a ano?” Nobǝ ena no bwe wi be moeditanm anga. 48Ano je gwa ye ge no bwe be mò ena ken anga, egwa egwa a tsǝ́ekǝ̀n a chu ye. Kǝnggwa be ya a Roma bwa a kpu be yamuje na tkò Àtá mo Ehwya mo je gaten.

49Kǝnggwa akan mo be a bè fǝ́ anga Kayafa nwene è no Chu mo ekǝ́n adi je hon ángá è jan, “Nye yi didi nye mò akan ra. 50Nye yi nye jan ge setkyan nye a ge a nobǝ akan e fǝ a chu be nobǝ, chàshín a binbin mo be nobǝ mo eyasǝnsen hon, be e tkò ra?”

51Ge jan ye fwa ena anga mo chu ye ra, tea adi echi enom mbwe abu Chu mo ekǝ́n mo je hon, gè fijan anga fwa mo Ehwya è jan ye jan ne, Yeso a fǝ fǝ a chu mo be ya a Yahuda ángá. 52Ngge e fwa ye a chu be ya a Yahuda tete ra, tea evǝ mo be nobǝ mo Ehwya ya è bushan no a tswa zǝnchaje evǝa ge e kpu be e bwa a zǝn akan, ngge ge e bwe be be e no mò akan. 53Ti nò eni, be Atkwentì mo be ya a Yahuda, è kwa ara fuchin etem abu ba gu Yeso ángá.

54Enona, Yeso è tkukwa ye anga a tswa engga mo be ya a Yahuda efwe ra. A ge ngge be etsonchi mbwe è ken adi efa akan tenten a zǝn tswavǝ́n nè ken no a eten nwofyan akan a bè fǝ anga Efremo.

55Atan a ekpengga mo Esǝ mo Epenyim è bwa tén ara ángá, be ya a Yahuda embo è vǝ a tswa be eten embo nè ken vǝ́ a Urishelima, evǝa be e nacha e se chu be sangǝ́ be e chà e de Esǝ mo Epenyim hon. 56Be nobǝ è no tkunda Yeso anga. A bè ywano a chuukwa mo Àtá mo Ehwya ángá, bè ká sojube eka jan, “Mò a nye ka anga a ano? Chú ga bwa adi esǝ hon ena m̀ mbwe?” 57Atan enò, be Ekǝ́n echa ngge Farisi è du ara edgon jan ne ano ende akan yi ara zǝn a Yeso no ángá, ge e bwa e jan be, evǝa be e fu ye.

Currently Selected:

Yohana 11: ICH

Highlight

Copy