Yohana 12

Bè kpwá Yeso byi yoben a Betani

(Matiyu 26:6-13; Marku 14:3-9)

1A tsǝnò è dan shi chwen a ngǝ a ba tse Esǝ mo Epenyim ángá, Yeso è bwangga a Betani, eten mo Leyazaro, ende a gè fǝ́zǝ gwa a je a dì ángá. 2Evǝa be e no Yeso egǝ̀n, be nobǝ a eten hon è bwe ye mode. Mata è no tankwa mode hon no be nobǝ anga a ge, Leyazaro è chuno de mode anga ngge Yeso a chu teboro. 3Kǝnggwa Meri è ti byi yoben lita akan éè no ngge tse àywá, a be bwe anga ngge tumo a be fǝ́ anga naadi ángá, ti nggwa Yeso a kpwafu nè fwe ngǝ́ nó ngge zan-a-chu mbwe. Yoben mo byi hon è mboshi tswa akan mu hon.

4Tea Yahuda Eskariyoti, akan a engga mo be etsonchi (nwene è bwa tsǝ du Yeso ángá) è dgyan ye mò a ndegwa hon è bwe anga ra. Gè jan, 5“Ano bwe a ge ba ti byi yoben ena, a tse mo nó ken a ngga tsenò mo nobǝ akan mo je akan na, jwa a de be evǝa be e ti tse mo nó e no be ya ekan ra?” 6Yahuda è jan ye fwa ena enò adia gè dwafǝ mo be ya ekan anga ra, tea adia gè no yaju. Gè kpwá bwi echo tse mo be etsonchi anga a ge, nè no zǝ́ bwi tse anga a tswa mo nó.

7Yeso è jan, “Gwa ye. Gè nyi ara nó, evǝ mo nò a ba di m ángá. 8Be ya ekan no kpwà anga ngge nye, m no a kpwà m ngge nye ra.”

9Atan enò, be ya a Yahuda embo è yi jan Yeso è bwa no a zǝn. Enona, bè bwa mboshi zǝn hon, fwa ye a be è ben Yeso kpwà ara ra, tea be e di Leyazaro, nobǝ a Yeso è fǝ́zǝ ye gwa a je a dì angǝ ángá gaten. 10Enona, be Ekǝ́n echa è té fuchin evǝa be e gu Leyazaro gaten. 11A chu Leyazaro a be ya a Yahuda embo, è twagwa be nè no tsǝ́ekǝ̀n anga a chu Yeso.

Yeso è kwashi a Urishelima abu tì

(Matiyu 21:1-11; Marku 11:1-11; Luka 19:28-40)

12Zǝngga re mo nó be nobǝ embo ya éè bwa adi Esǝ mo Epenyim ángá è fo jan Yeso è no a efǝ nyabwa a Urishelima. 13Kǝnggwa bè vǝ́ a je nè kpwá be akpan-hu dwa a bu mo be, evǝa be e cha ye. Bè no tandwa anga jan,

“Be e tàn Ehwya!”

“Esese a nwone e nyabwa adi ti mo

Etsodwe hon anga.”

“Esese a Tì hon mo be ya a Esǝrela.”

14Yeso è ben ezon-jaki akan nè chu a chu mo nó, abu ge no ebam adi Afketa mo Ehwya jan,

15“Nye e tsen nye etsentsen ra,

a nye be ya Siyona,

di Tì mo nye

chuno a chu ezon-jaki n nyabwa.”

16Ekwafya, be etsonchi mbwe e yi be engà mo be mò ena ra. Kpwà atan a bè ti Yeso nyi ara etkyen ángá sangǝ́, bè chà hwayi jan be mò ena è no ebam a chu ye, ngge eni a mò è bwe be nobǝ è bwe mò a bè bwe ángá.

17Adi ekpengga hon, be nobǝ ya è no ngge ge atan a gè fǝ́ Leyazaro dwa gwa a je a dì nè ti ye nyi etkyen angǝ ángá, è no jan be nobǝ fwa hon ken anga. 18Be nobǝ embo è vǝ́ a je evǝa be e ben ye adia bè fo jan gè bwe moeditanm ena a ge ángá. 19Enona, be Farisi embo è jan e sojube jan, “Nye di, je devǝ́ je anga ra, di abu binbin mo be nobǝ a zǝnchaje no ba ye anga na.”

Yeso è fijan abu ga fǝ ángá

20Engga mo be ya è bwa adi Esǝ hon evǝa be e fen efen ángá, a be Girka ya ehwyà. 21Be ken a zǝn Filibu ya Betseda mo Galili nè jan, “Yagwamo mu, je dgyan anga je e di Yeso.” 22Filibu è ken jan Andoro, kǝnggwa Andoro ngge Filibu è ken jan Yeso.

23Yeso è janfwe be, “Asuswana ekpengga a be bwe a gǝ̀n Nwen Nobǝ ángá bwangga ara. 24Ebi m jan nye anga, kpwà tén ano be ti fwento mo alkama tswa a sǝnsen, ge fǝ ara ra, ge no a kpwà emà mbwe, fwento akan hon. Tea ano ge fǝ ara, ga gwa be ga àywá. 25Ende e dgon nya mbwe a ben ye nó ra, ende e segwa nya mbwe a tswa zǝnchaje ena, ti nó nyi anga mo nya e no a fwa efwam ángá. 26Egwa egwa e dgyan ge e no etsonchi mam, ge no kenm ge e ba m. Ge no kenm ga no ya mochi mam na no adi zǝn a m no anga gaten. Àtà m hon a no nobǝ e bwe m mochi anga edgwa.

27“Asuswana m no a tswa tsuruku ekǝnkǝn nya àywá. Mò a ma jan ángá a ano? ‘Àtà, me e jan we ti e vǝ́ m adi ekan ena’? É yé, ge no a chu mo mò ena, a m̀ bwa. 28Àtà, bwegǝ̀n ti mbo!”

Kǝnggwa aken è shwa chá kpe nè no jan anga jan, “M̀ bwegǝ̀n ara ye, ngge m bwe a gǝ̀n ye efwe.” 29Be nobǝ embo ya éè no a zǝn ángá è fo aken hon, nè jan na chukpondgyen, be ya ehwyà è jan ne maleka jan ara fwa ngge ge.

30Yeso è jan, “Aken a nye fo na, a efka mo nye, fwa ye efka mam ra. 31Engga mo kǝ́n ekpènm a chu mo zǝnchaje ena, bwangga ara, atan a ba nyo Shetan, tì mo zǝnchaje hon, a vǝ́ a je mo nó ángá. 32Tea a me, atan a be ti m vǝ́ ara etkyen mo sǝnsen hon ángá, ma vǝ egwa egwa a bwa a zǝn m.” 33Gè jan enò evǝa ge e tú yishwa fǝ a ga fǝ ángá.

34Be nobǝ hon è jan, “Ge no ebam adi afketa mo Edon jan, Kristi hon a no a fwa efwam, ano bwe a ge wa jan, ‘Ge no kenm Nwen Nobǝ a fǝ’? Chìchì mo nó, ‘Nwen Nobǝ’ hon ena a ara?”

35Kǝnggwa Yeso è jan be, “Enggasansan mam a no ngge nye mo ekpengga nwofyan kpwà ara. Nye e kenkèn atan a enggasansan hon chà no ngge nye, afwa etwafǝfǝ a ben nye. Ende e kenkèn anga a tswa etwafǝfǝ ángá, yi ye zǝn a ge nyaken ángá ra. 36Nye nyishwa a chu enggasansan hon atan a ge chà no ngge nye ángá, evǝa nye e nga mbǝgya mo enggasansan.” Atan a Yeso è jan fwa ara be fwa ena ángá, ge nyagwa be nè ken ngǝ̀ton chu ye abu be di a ben be ye ra.

Be ya a Yahuda è no kpwà adi esegwam mo Yeso

37Bi adi binbin mo be moeditanm a Yeso è bwe a fǝzǝn mo be ángá, bè tsǝ́ be ekǝ̀n a chu ye ra. 38Mò hon ena è bwe tén abu Efojan Eshaya è jan ángá. Gè jan, “Etsodwe, a ara e tsǝ́ ara ekǝ̀n a chu fwa mo je a jè jan ángá, a ge? A zǝn ara a Etsodwe tú ara echakpo mbwe a ge ti tivǝ́ nobǝ anga?”

39A chu mò ena, bè tsǝ́ be ekǝ̀n ra adia efojan Eshaya è jan chá efki jan,

40“Ge twape ara fǝzǝn mo be,

ge du tsuruku mo be cha ara kpo,

evǝa be e di e ben be zǝn

ngge fǝzǝn mo be ra,

efki ra, ba hwa a yi be fwa a be fo

a tswa tsuruku mo be,

na twabǝ a bwa a zǝn m,

evǝa me e ma e tswa be.”

41Eshaya è jan fwa ena adia gè di ara egǝ̀n mo Yeso nè jan fwa a chu ye.

42Be nobǝ echa echa mo ya a Yahuda è tsǝ́ekǝ̀n no a chu Yeso, tea be gwa be a je, be e tú nó ra. Bè bwe enò adia bè tsen be Farisi anga afwa ba nyo be a vǝ́ a je mo àtá chuefǝnm hon. 43Bè bwe enò adia be dgyan etànm mo be nobǝ tkyan etànm mo Ehwya ángá.

44Kǝnggwa Yeso è tandwa jan, “Atan a nobǝ tsǝ́ekǝ̀n no a chu m ángá, ge tsǝ́ ye ekǝ̀n hon a chu m tete ra, tea a chu ende e tson m bwa ángá gaten. 45Egwa egwa e di m, di anga ende e tson m bwa anga. 46M̀ bwa a tswa zǝnchaje ena abu enggasansan evǝa egwa egwa e tsǝ́ekǝ̀n a chu m, a no a kpwà ye a tswafǝ ra.

47“Egwa egwa e fo be fwa mam, tea ge tse ye be ra, ma kpèn m ye kǝ́n ra adia m bwa m a di zǝnchaje evǝa me e kpèn be nobǝ kǝ́n ra, tea me e no be nya. 48Egwa egwa e segwa m, n cha ye be fwa mam ra, nobǝ akan no nwene a kpèn ye kǝ́n. Be fwa mam hon a m̀ jan ángá, a kpèn ye kǝ́n nò ekǝn-etkyen. 49Adia m̀ jan m fwa hon a chu m ra, tea Àtà hon nwene è tson m bwa ángá, è du m mò a ma jan ngge abu ma jan be anga a ge. 50M yi jan mò a Àtà hon jan anga a no be nya, e no a fwa efwam ángá. Enona, egwa egwa mo be mò a m jan anga, a mò a Àtà hon jan m me e jan ángá kpwà ara.”

Currently Selected:

Yohana 12: ICH

Highlight

Copy