Yohana 5

Yeso è matswa nobǝ è mbe anga embem ángá

1Chashin mo nó, Yeso è vǝ́ a Urishelima evǝa ge e de esǝ akan mo ya a Yahuda. 2A Urishelima, tenten ngge zǝn a be fǝ́ anga Fǝtsǝmo mo be Son. Ahwya mbǝ akan è no a zǝn, bè fǝ́ nó anga adi hwi mo ya a Ebru Betesada. Be nobǝ e tsa be afku chwen ngàhwya ahwya mbǝ hon no. 3A tswa be afku hon, be ya modwa embo è no a zǝn, be ya fǝzǝn ebwibwi, ya è mbe anga embem tangge be ya engǝfǝju, è dwano kpwà a zǝn. Bè no nobà ende e bwa a chì a tkon mbǝ hon anga. [ 4Engga ngge engga maleka mo Etsodwe shwa chìtkon bwi mbǝ a tswa ahwya mbǝ hon anga. Ya modwa e kwafya kwashi a tswa ahwya hon a ben ematswam, modwa hon e ma no engǝ ra.] 5Akan a tswa engga mo be ya modwa hon è bwe ara je gwi ta chu chwen a ta a tswa ju engǝfǝfǝ. 6Atan a Yeso è di ye gè dwano a zǝn, nè fo jan ge dgyen ara fon adi modwa hon ángá, gè ká ya modwa hon eka jan, “O nda anga we ben ematswam?”

7Ya modwa hon è janfwe ye, “Yagwamo mu, m fwa m ngge nwene e bwe a jwa m ángá ra, nwene a kan m a shi a tswa mbǝ hon atan a be chìtkon ara nó ángá fwa ye ra. Atan a m nda anga me e kwa e shi a tswa mbǝ hon, ende akan a tse a kwafya mam.”

8Kǝnggwa Yeso è jan ye, “Nyi etkyen. Ti sǝ mbo we kenkèn.” 9Kè akan nobǝ hon è ben tén ematswam, nè fǝ sǝ mbwe nè kwa ara kèn ekenm.

Gè bwe moeditanm ena Nò nya Etkem. 10No enona, be atkwen nobǝ mo ya a Yahuda è jan ende a bè matswa ángá jan, “Nòmo a Nò nya Etkem, Edon jangga ara, we ti sǝ mbo.”

11Tea gè janfwe be, “Ende e matswa m ángá jan m jan, ‘Ti sǝ mbo we kenkèn.’ ”

12Kǝnggwa bè ká ye eka jan, “Ende hon ena a ara, e jan o jan we ti sǝ mbo we kenkèn?”

13Nobǝ hon a bè matswa ángá è yi ye ende éè matswa ye ángá ra, adia Yeso è mbwida ara a tswa mo be nobǝ embo ya è no a zǝn ángá.

14Dgyen ye fon ra, Yeso è ben ye a tswa Àtá mo Ehwya nè jan ye jan, “Di, o ben ara ematswam. We bwe mbo ebgen efwe ra eno e ra mò esera e tkyan ena ángá a bwe o.” 15Nobǝ hon è nya nè ken jan be atkwen nobǝ mo ya a Yahuda jan ne nwene è matswa ye ángá a Yeso.

Yeso jan ga Nwen mo Ehwya hon

16Adia Yeso è bwe be mò ena Nò nya Etkem ángá, be atkwen nobǝ mo ya a Yahuda è kwa ara ye ezem. 17Yeso è jan be jan, “Àtà m chà no adi mochi mbwe ebwem ti bwa anga na, a me e chu m, m bwe anga gaten.” 18Adi be fwa a gè jan na, be atkwen nobǝ mo ya a Yahuda è tkyan tén etkyanm be e gu Yeso. Kpwà ye adia ge dan edon mo Nò nya Etkem anga ra, tea adia ge fǝ́ èé Ehwya, jan na Ate ye, tú anga ge ti chu ye kan esoso ngge Ehwya.

19Yeso è jan seshi be jan, “M jan nye anga ebi, Nwen hon a bwe a ti ye mò e chu ye ra. Ga bwe a kpwà mò a ge di Ate ye bwe anga. Adia egwa egwa mo be mò a Àtà hon bwe anga, Nwen hon bwe tén nó enò. 20Àtà hon dgyan Nwen hon n tú ye binbin mo be mò a ge bwe anga. Eshwen, Àtà hon a tú ye abu ga bwe be mò e tkyan be mò ena ángá, nya di, nya tàn ebwikpe. 21Abu Àtà hon fǝ́zǝ be ya e fǝ ara n no be nya anga, enò gaten Nwen hon no egwa egwa a ge dgyan anga nya. 22Ge no enò, Àtà hon kpèn ye nobǝ akan kǝ́n anga ra, tea ge ti echakpo mo kǝ́n ekpènm hon du gu ara Nwen hon a bu, 23evǝa egwa egwa e di e gǝ̀n Nwen hon abu be digǝ̀n Ate ye hon anga. Ende e digǝ̀n ye Nwen hon ra, digǝ̀n ye Ata hon nwene è tson ye bwa ángá ra gaten.

24“M jan nye ebi anga, egwa egwa e fo fwa mam a m jan anga, n tsǝ́ekǝ̀n anga a chu ende e tson m bwa ángá, a ben nya e no a fwa efwam ángá. Ehwya a kpèn a didi ye ye kǝ́n ra gaten. Ge tsega ara adi fǝ n kwashi ara adi nya. 25M jan nye ebi anga, ekpengga nyabwa, eshwen ge bwangga ara asuswana, atan a be ya è fǝ ara a fo aken mo Nwen mo Ehwya hon. Be ya e fo nó, a no angǝ. 26Adia abu Àtà hon no ngge nya a tswa ju ye ángá, enò gaten gè no ara Nwen hon echakpo ge e no ngge nya a tswa ju ye. 27Ge no ara Nwen ye emwentì ge e ti e kpèn egwa egwa kǝ́n, adia ga Nwen Nobǝ hon ángá.

28“Fwa ena e no ye nye mò ezǝzǝju ra, adia ekpengga nyabwa a binbin be engǝfǝ e dwa a tswa dì mo be ángá a fo aken mo Nwen mo Ehwya hon, 29na gwa a je efwe. Be ya è bwe mò esese ángá a nyi etkyen na no ngge nya e no a fwa efwam ángá, tea ya è bwe bwi mofǝ̀ anga a nyi etkyen ba kpèn be kǝ́nfǝ. 30Adi ḿ mam, m bwe a ti m mò akan mo chu m ra. M kpèn kpwà kǝ́n anga abu Àtà hon jan m anga. Enona, kǝ́n mam no ebi, adia m bwe kpwà mò nwone a ende è tson m bwa ángá dgyan anga, fwa ye ḿ mo edgyan mam ra.

Be fwa ejantum a chu Yeso

31“Ano me è ma janfwa a chu m, be nobǝ àa cha be dwa jan na ebi ra. 32Tea ende akan no a zǝn nwene e jan be nobǝ fwa anga a chu m, m yi jan mò a ge jan anga a chu m ángá no ebi.

33“Nyè tson be nobǝ ken ara a zǝn Yohana ya Batisǝma, ngge mò a gè jan nye a chu m ángá, a ebi. 34Adi ebi, m nda m nwen nobǝ e no eyifwa a chu m ra, m jan be fwa ena anga evǝa nye e ben ega. 35Yohana è no abu petila éè de nè nggasan zǝn anga, nyè fo ara etkwa mo fwa mbwe mo ekpengga nwofyan.

36“Tea be mò a m bwe anga, be moetum ngge be moeditanm mam, jan fwa anga a chu m, twafǝ̀ fwa mo Yohana è jan a chu m ángá. Àtà hon du m be mochi ena me bwe e gu be, ngge be tú jan gè tson m bwa a ge. 37Àtà hon è tson m ángá, e chu ye, è jan ara fwa a chu m. Nye chà fo didi nye aken mbwe ra eno e ra nye di ye fǝzǝn ngge fǝzǝn. 38Efwe, nye fwa nye ngge fwa mo Ehwya a tsuruku mo nye ra, adia nye tsǝ́ nye ekǝ̀n a chu m, ende a gè tson bwa a zǝn nye ángá ra. 39Nye no ká se Fwaebam anga, adia nye ka anga jan, ba no nye nya e no a fwa efwam ángá. Tea be Fwaebam hon jan fwa anga a chu m. 40Bi adi enò, nye se nye e bwa a zǝn m evǝa nye e cha nya hon ena.

41“M ká m etànm mo be nobǝ ra, 42adia m yi ara jan nye fwa nye ngge edgyan mo Ehwya a tsuruku mo nye ra. 43M bwa a zǝn nye adi ti mo Àtà m, nye cha m ra, tea ano be ya ehwyà bwa adi be ti mo be, nya cha be ngge vǝtsen. 44Eni a mò e bwe nya tsǝ́ nye ekǝ̀n ra ángá, adia nye chà cha etàn mo so anga ngge vǝtsen. Tea nye ká nye egǝ̀n nwone e vǝ a zǝn ende a, a ge tete no Ehwya akan, n chà bwa anga ra.

45“Tea m fwa m ende a jan Àtà hon be mò esera, a nye bwe anga ra. Ende a jan Àtà hon be mò esera a nyè bwe ángá, a Mosa. Ee Mosa, ende a nye ti tsuruku mo nye nyino a chu ye echakpokpo, a nwene a bwe nó ángá. 46Ano nye è ma tsǝ́ ara ekǝ̀n a chu Mosa eshwen, nyà tsǝ́ ara ekǝ̀n a chu m, adia gè bá mò a chu m. 47Tea adia nye tsǝ́ nye ekǝ̀n a chu mò a gè bá ángá ra, bwe engǝ nya tsǝ́ekǝ̀n a chu be fwa a m jan anga?”

Currently Selected:

Yohana 5: ICH

Highlight

Copy