Yohana 6

Yeso è fi be nobǝ echo chwen

(Matiyu 14:13-21; Marku 6:30-44; Luka 9:10-17)

1Chashin mo be mò ena, Yeso è penyi edan a Galili (a be fǝ́ anga sǝn a Tiberiya gaten ángá) ken vǝ́ jengǝ̀ chá akan mo nó. 2Be nobǝ embo è no ba ye anga a chagwa chagwa a gè ken anga, adia bè di be echi moeditanm mo be ya modwa ematswam a gè no bwe anga. 3Kǝnggwa Yeso è tonvǝ́ a hwì akan nè chu a zǝn ngge be etsonchi mbwe è chu ngàhwya ye. 4(Esǝ mo Epenyim mo be ya a Yahuda è bwa tén ara.)

5Abu Yeso ti re chu mbwe etkyen, gè di be nobǝ embo nyabwa chá zǝn ye, gè bi Filibu, “Zǝn a ja jwa borodi a je kpu a no be nobǝ ena be e de ángá, no a che?” 6Gè ká eka ena abu ge e mbwà e di Filibu kpwà ara, adia gè yi ara a tsuruku mbwe mò a ga bwe ángá.

7Filibu è janfwe ye, “Tse dinari gwé fà, a kǝn ye be e ti jwa borodi nwone egwa egwa e ben ti e de nwofyan ángá ra.”

8Kǝnggwa etsonchi mbwe efki, Andoro, nwenjin Sima Bitru, è jan ye jan, 9“Nwen ndedon akan no ana, ngge bi mo borodi chwen a bè bwe ngge be fwen mowa a be fǝ́ anga bali ángá, ngge gwejo fà. Tea mò ena, a ano, a zǝn be nobǝ embo e dwana?”

10Yeso è jan, “Nye jan egwa egwa e chu a sen.” (Be vǝmo embo è no a zǝn.) Enona, bè chu gu a sen a chu be vǝmo hon, be ndedon tete è no a zǝn ángá è kengga echo chwen. 11Yeso è kpu be borodi hon nè chwano Ehwya, nè kpu kwa be nobǝ ya è chudwa a sen ángá. Gè bwe enò ngge gwejo hon. Binbin mo be nobǝ è de kan tén abu bè dgyan ángá.

12Atan a egwa egwa è de mbwà ara ángá, Yeso è jan be etsonchi mbwe, “Nye tefǝn gu be ya ebwibwi mo nó ya e dan ángá, afwa mò akan a dì.” 13Enona, bè tefǝn gu be ebwibwi mo borodi bi chwen hon è dan ángá, è mbo esha gwi chu fà.

14Atan a be nobǝ hon è di moeditanm a Yeso bwe ángá, bè kwa ara fwa ejanm e sojube jan, “Eshwen, ena a efojan hon a bè jan nyabwa a zǝnchaje ángá.” 15Atan enò, adia Yeso è yi ara jan be nobǝ hon nda anga be e dwa ye Ti adi echafǝju ángá, gè ngǝ̀ nya m̀ mbwe jujuye, ken vǝ́ no a hwì efwe.

Yeso kenkèn a chu mbǝ

(Matiyu 14:22-33; Marku 6:45-52)

16Atan a nò è kpo ara ángá, be etsonchi mbwe shi a tón edan, 17a zǝn, bè kwashi a tswa ngga evǝa be e pe e nyi edan hon vǝ́ ken a Kapanahum. Atan enò zǝn è no twafǝ bwa anga, tea Yeso è chà bwa ye a zǝn be ra. 18Fyo echakpokpo è no kpo bwa anga, mbǝ hon e no fǝ́ anga àywá. 19Atan a bè nyi ngga hon kengga lamba ta ti ken ndwe ángá, bè di Yeso nyabwa a zǝn be, gè no kenkèn anga a chu mbǝ, bè tsen gu etsentsen. 20Tea gè jan be jan, “A a me, nye e tsen nye etsentsen ra.” 21Kǝnggwa bè shánju nè dgyan anga jan ge e kwa e shi a tswa ngga hon. Atan a gè kwa ara adi ngga ángá, kè akan ngga hon è kengga a tón etu, chá a bè nyaken ángá.

Be nobǝ è tkunda Yeso

22Zǝngga re mo nó, be nobǝ embo ya á no jengǝ̀ mo edan hon ángá, è yi jan kpwà ngga akan á no a zǝn a be etsonchi hon á ti nya ángá, ngge Yeso á kwa ye a tswa ngga hon ngge be ra. 23Be ngga ya ehwyà è vǝ chá Tiberiya è bwa ndnyano tenten zǝn a be nobǝ è de borodi atan a Etsodwe è bgó ara Ehwya ángá. 24Atan a be nobǝ embo hon è di jan Yeso è fwa ye a zǝn ra tangge be etsonchi mbwe e fwa be a zǝn ra gaten ángá, bè kwa a tswa be ngga hon nè ken a Kapanahum evǝa be e tku e nda Yeso.

Yeso a Borodi e no nobǝ nya anga

25Atan a bè ben ye chá jengǝ̀ mo edan hon ángá, be ká ye eka jan, “Etumo, o bwa ana abu atan engǝ?”

26Yeso è janfwe be jan, “Me e jan nye ebi, nye nda m anga, fwa ye a adia nye di be moeditanm a m bwe anga ra, tea nye nda m anga adia nyè de borodi mbo ara dgyèn mo nye anga. 27Nye e no e ngǝ nye ekan anga a chu mode nwone a bgen ángá ra, tea nye ti engga mo nye e tku e nda ega e no a fwa efwam ángá, nwone a Nwen Nobǝ a no nye ángá. Adia ga ende a Ehwya è tú ara jan, ge no ara ye echakpo ge ti e no nya ángá.”

28Kǝnggwa be ká ye eka jan, “Mò nwone a ja bwe a ano, evǝa je e bwe be mò ya Ehwya dgyan anga?”

29Yeso è janfwe be jan, “Mochi hon tete a Ehwya dgyan anga nye e bwe ángá a ena: nye e tsǝ́ekǝ̀n a chu ende hon a gè tson bwa ángá.”

30Bè ká ye eka efwe, “Tú je moeditanm akan, moeditanm a wa bwe ano o dgyan je e tsǝ́ekǝ̀n a chu o. Mò hon a o bwe a ti ángá a ano? 31Be ebǝ ata mo je è de mode a bè fǝ́ anga mana a tswavǝ́n. Abu be bá nó no a tswa Afketa mo Ehwya jan, ‘Mosa è no be borodi éè shwa chá kpe, evǝa be e de.’ ”

32Yeso è jan be jan, “Me e jan nye ebi, Mosa fwa ye ende è no nye borodi è shwa chá kpe ángá ra, tea Àtà m è no nye nó a ge. Asuswana ge no nye borodi ebi e shwa anga chá kpe ángá. 33Adia borodi mo Ehwya a nwene e shwa anga chá kpe n no be nobǝ a tswa zǝnchaje nya anga.”

34Bè jan ye jan, “Yagwamo mu, we no je borodi hon eni nogwa nogwa.”

35Kǝnggwa Yeso è jan be jan, “A me ma borodi hon nwene e no be nobǝ nya anga, ende e bwa a zǝn m, a fo ye mbe efwe ra ngge ende e tsǝ́ekǝ̀n a chu m, a fo ye jwangǝ̀ efwe ra. 36Tea nye chà tsǝ́ nye ekǝ̀n a chu m ra, bi adia nye di ara m ángá. 37Binbin mo be nobǝ a Àtà hon no m anga, a bwa a zǝn m, egwa egwa e bwa ara a zǝn m ángá, ma nyon a didi m ye ra. 38Adia m shwa m chá kpe evǝa me e bwe mò a m dgyan anga ra, tea me e bwe mò a Ehwya è tson m bwa ángá, dgyan anga. 39Ena a mò a Ehwya è tson m dgyan anga, jan me e cha m dwa akan a tswa mo be ya ge kpu du ara m a bu ángá e da ra, tea ma kpu be a nyi etkyen nò nwone a zǝnchaje a kǝn-etkyen ángá. 40Moedgyan mo Àtà m a, binbin mo ya e tsǝ́ ara ekǝ̀n a chu m, a me Nwen hon ángá, a ben nya e no a fwa efwam. Ma kpu be a nyi etkyen, ma no be nya nò ekǝn-etkyen.”

41Adi fwa ena be ya a Yahuda è kwa ara dwawi etom a chu Yeso adia gè jan, “A me ma borodi nwone è shwa chá kpe ángá.” 42Bè jan, “Ena fwa ye Yeso nwen Esufu ra? Je yi ate ye ngge ayi ye. Bwe engǝ ge jan anga asuswana jan, ‘M shwa chá kpe?’ ”

43Tea Yeso è janfwe be jan, “Nye e kpo nya dwawi etom e sojunye. 44Ende akan a bwa a ti ye a zǝn m ra, kpwà tén a no Àtà hon nwene è tson m ángá, vǝ ye bwa a ge. Ma kpu be a nyi etkyen nò a zǝnchaje a kǝn-etkyen ángá. 45Bè bá no adi be afketa mo be efojan jan, ‘A Ehwya nwene a tú be, binbin mo be mò.’ Egwa egwa e fo ara Àtà hon n kǝ́n-ekǝnkǝ́n mo be mò hon a zǝn ye gaten, bwa anga a zǝn m. 46M jan anga jan ende akan e didi ara Ehwya, Ate je ngge fǝzǝn mbwe ángá fwa ye ra. Kpwà ende è vǝ a zǝn Ehwya hon bwa ángá, di ara ye a ge. 47M jan nye ebi anga, egwa egwa e tsǝ́ekǝ̀n no, no ngge nya e no a fwa efwa m ángá. 48A me ma borodi e no nya anga. 49Be ebǝ ata mo nye è de mana a tswavǝ́n èé no bè fǝ ara. 50Tea ena a borodi nwone e shwa chá kpe, nwone a ende e de nó, a fǝ ye ra. 51A me ma borodi e no nya anga, nwone è shwa chá kpe. Ano nobǝ akan de borodi ena, ga no a fwa efwam. Borodi hon ena a gwe a ju m, nwone a m ti a no evǝ mo nya mo be nobǝ a tswa zǝnchaje.”

52Kǝnggwa be ya a Yahuda, è kwa ara efyan etwam e sojube adi echafǝju nè ká sojube eka jan, “Bwe ngǝ nobǝ ena a no je gwe a ju ye je ti a kǝ́n?”

53Enona, Yeso è jan be efwe jan, “Eshwen, m jan nye anga ebi, ano nye kǝ̀n nye gwe mam, a me Nwen Nobǝ ngge nye ngǝ nye ngǝ mam ra, nye fwa nye ngge nya e no a fwa efwam ángá a ju nye ra. 54Tea ende e kǝ́n gwe a ju m, n ngǝ ngǝ mam, a ben nya e no a fwa efwam ángá. Ma ti ye a nyi etkyen nò a zǝnchaje a kǝn-etkyen ángá. 55Adia gwe a ju m no tén mode ebi, ngǝ mam no tén mò engǝm ebi. 56Ende e kǝ́n amngo a ju m, n ngǝ ngǝ mam anga, no anga a ju m, m no anga a ju ye gaten. 57Abu Àtà hon e no angǝ, tson m bwa, n du m, m no angǝ ángá, egwa egwa e kǝ́n amngo mam, ma bwe ye ga no angǝ. 58A me ma borodi ebi nwone e shwa chá kpe ángá. Be ebǝ ata mo nye è de mana nè fǝ, tea nwene e de borodi ena a no a fwa efwam.” 59Gè jan fwa ena atan a gè tú mò anga a tswa àtá chuefǝnm a Kapanahum ángá.

Be ya è ba Yeso anga embo è twagwa ye

60Abu be ya è ba Yeso embo è fo fwa ena ángá, bè jan, “Ena a moetum ekǝnkǝn nya, nwene a chadwa mo nó ángá a ara?”

61Adia gè yi ara jan be ya è ba ye anga è to dwawi anga a chu moetum mbwe ángá, Yeso è ká be etsonchi mbwe eka jan, “Fwa hon ena bgen nye nya? 62Ga no nye engǝ, ano nye di m, Nwen Nobǝ, twabǝ nyavǝ́ adi echizǝn a m̀ no ángá? 63A Engǝ́ Echanwenwen kpwà ara e no nya anga. Ekǝnjuju mo nobǝ bwe ti ye mò akan anga ra. Be fwa a m jan nye na, a be fwa a chu engǝ́ e no nya anga. 64Tea be ya ehwyà a engga mo nye chà tsǝ́ be ekǝ̀n a chu m ra.” (Adia Yeso è yi ara, ekwafya ende è tsǝ́ ye ekǝ̀n ra, nwene e tsǝ a du ye ángá.) 65Kǝnggwa gè jan bishi fwa efwe jan, “Ena a mò e bwe m̀ jan nye jan ende akan a bwa ye a zǝn m ra, kpwà ende a Ata hon no ara ye echakpo ge e bwa a zǝn m ángá.”

66Ti nò hon eni, be ya e ba bwi ye anga embo è tsegwa ye nè ba be ye efwe ra.

67Enona, Yeso twanga bi be gwi chu fà hon jan, “Nye nda anga nya gwa m èé nye?”

68Sima Bitru è janfwe ye jan, “Etsodwe a bo o no ngge be fwa e no nobǝ nya e no efwa efwam anga. Ja ken a zǝn ara? 69Je tsǝ́ ara ekǝ̀n, je yi ara gaten jan a bo wa Echanwenwen Akan hon, è vǝ a zǝn Ehwya bwa ángá.”

70Kǝnggwa Yeso è janfwe be jan, “M̀ swa m nye gwi chu fà a me ra? Tea akan a engga mo nye a Shetan.” 71Fwa ena è no a chu Yahuda nwen Sima Eskariyoti, bi adia gè no akan mo be gwi chu fà hon ángá, gè no ende éè bwa tsǝ Yeso du a bu mo ya è ze ye anga.

Currently Selected:

Yohana 6: ICH

Highlight

Copy