Yohana 8

1Tea Yeso è vǝ́ a Hwì mo Zetu. 2Anofon tàtà enó, gè ken kwashi a chuukwa mo Àtá mo Ehwya efwe. Myan myan be nobǝ embo è bwa fǝn ngàhwya ye, gè chushi a sen nè kwa ara be moetum. 3Abu gè no tú be mò anga, be etumo mo edon ngge be Farisi è ti ndegwa a bè fu adi sen-eten ebwem bwa a zǝn. Bè ti ye bwa nè du ye ywa a engga mo Yeso ngge be nobǝ embo hon. 4Bè jan Yeso jan, “Etumo, be fu ndegwa ena no bwe sen-eten anga. 5Edon mo Mosa, jan je jan, je e twa e gu yishwa be ndegwa ena adi ten. Asuswana, a bo, o jan engǝ?” 6Bè ká ye eka ena, evǝa be e ben efwa a be ti a jan ge bwe ara edan. Tea Yeso è ngǝchu mbwe shi a sen nè kwa ara mò ebam a sǝnsen ngge sen-e-bu mbwe. 7Abu bè no fa ye anga adi eka ekam, ge e jan e fwe be ángá, gè ti re chu etkyen nè jan, “Egwa egwa a engga mo nye e chà bwe di ye ebgen ra, ge e kwafya e ti ten e twa ye.” 8Efwe gè ngǝshi chu a sen nè no bá mò anga a sǝnsen.

9Abu bè fo enò ángá, bè kwa ara enyam akan akan tke a chu nwenfi ti kengga atan a bè gwa Yeso ngge ndegwa hon jujuye chafya mbwe. 10Yeso è ti re chu etkyen nè ká ye eka jan, “Ndegwa, ya é tso o efya anga no a che? Ben ye ende akan mo be e kpèn o kǝ́nfǝ ra?”

11Ndegwa hon è jan ye jan, “É yé, ben ye ende akan ra, Etsodwe.” Kǝnggwa Yeso jan, “Èé me, ma kpèn mbo kǝ́nfǝ ra. Nya, we gwa zǝno ebgen ebwem mbo.”

Yeso a enggasansan mo zǝnchaje

12Atan a Yeso è jan be nobǝ fwa efwe ángá, gè jan, “A me ma enggasansan mo zǝnchaje. Egwa egwa e ba m anga a ken a didi ye kèn a tswafǝ ra, tea ga ben enggasansan e no nobǝ nya anga.”

13Be Farisi è janfwe ye, “O nga ara eyifwa mo chu o, enona, fwa mbo hon ben ye engà ra.”

14Yeso è janfwe be, “Bi adia m jan be fwa a chu m anga, be fwa hon no ngge engà, adia m yi zǝn a m̀ bwa ángá ngge zǝn a m nyaken ángá. Tea a nye, nye yi nye zǝn a m̀ bwa ngge zǝn a m nyaken ángá ra. 15Nye kpèn kǝ́n anga abu nobǝ ka shwa anga, tea a me m kpèn m ende akan kǝ́n ra. 16Tea ano m kpèn kǝ́n, kǝ́n mam no ebi. M kpèn m be nobǝ kǝ́n anga jujum ra, Àtà hon nwene è tson m bwa ángá no ngge me. 17Adi edon mo nye, bè ba jan ne, ano fwa a kpevǝ mo be eyifwa fà no mò akan, kenm ba cha fwa mo be hon. 18A me m jan fwa anga a chu m, eyifwa mam adi e fà hon, a Àtà m nwene è tson m bwa ángá.”

19Kǝnggwa bè ká ye eka jan, “Àtà mbo hon no a che?”

Yeso è janfwe be jan, “Nye yi m ra, nye yi nye Àtà m ra, be è jan nye yi ara m, nyà a yi ara Àtà m gaten.” 20Yeso è jan be fwa ena anga atan a gè tú mò anga a Àtá mo Ehwya tenten ngge zǝn a bè kpu be mò enom bwa no anga. Tea nwene è yi ye bu a ju ángá è fwa ye ra adia ekpengga mbwe è chà bwa ye ra.

21Beti bishi, Yeso è jan be nobǝ embo fwa efwe jan, “M nya anga. Nya nda nye e di m, tea nya fǝ a tswa ebgen mo nye. Zǝn a m nya anga, nya bwa a ti nye a zǝn hon ra.”

22Fwa a gè jan ángá, è du be ya a Yahuda è ká eka jan, “Ga gu chu ye? Chú ena a mò e bwe ge jan, ‘Zǝn a ma ken ángá, nye bwa a ti nye ra’?”

23Tea gè jan bishi be jan, “A nye nya be nobǝ mo zǝnchaje ena, tea a me, m̀ shwa chá kpe. A nye nya ḿ mo zǝnchaje ena, tea a me m fwa m ḿ mo zǝnchaje ena ra. 24Ena a mò e bwe m̀ jan nye jan ne, nya fǝ a tswa be ebgen mo nye ángá. Adia ano nye tsǝ́ nye ekǝ̀n jan m no ende a m jan m no anga ra, nye fǝ a tén efǝm a tswa be ebgen mo nye.”

25Bè ká Yeso eka jan, “A bo wa ara?”

Yeso è jan be jan, “A me ma ende a m̀ jan bwi anga jan m no ángá.” 26“M no ngge be fwa embo a ma jan a chu kǝ́n ekpènm a ma kpèn nye ángá, tea ma jan m ra. Adia nwene è tson m bwa ángá no ya ebi, mò a m̀ fo a zǝn ye ángá a mò m ti jan be nobǝ mo zǝnchaje anga.”

27Bè foyi be jan, gè jan be fwa anga a chu Ate ye Ehwya e no a kpe ángá ra. 28Kǝnggwa Yeso è jan, “Atan a nye kan ara Nwen Nobǝ etkyen a chu eswafǝ ángá, nye chà a yi jan a me ma ende a m jan m no ángá, ngge m bwe m mò akan mo chu m ra, tea m jan kpwà fwa nwone Àtà hon è tú m ángá. 29Ende e tson m bwa ángá no ngge me, ge chà twagwa didi m jujum ra, adia m bwe kpwà be mò ya ge fo etkwa mo be anga.” 30Abu Yeso è jan be mò hon ena anga, nobǝ embo ya è fo fwa hon anga è tsǝ́ekǝ̀n a chu ye.

Ebi fken a gwa nye

31Yeso è jan be ya a Yahuda ya è tsǝ́ekǝ̀n no a chu ye ángá jan, “Ano nye no kpwà adi moetum mam efusem, nye no a tén be etsonchi mam adi ebi. 32Kǝnggwa nya yi ebi hon, ebi hon a fken a gwa nye.”

33Bè jan ye jan, “Tea a je ja be ebi abonbon mo Ebrayi, je chà no didi je be fí mo ende akan ra. Bwe engǝ wa jan ja ben efken-gwam?”

34Yeso è janfwe be jan, “Me e jan nye ebi, egwa egwa e bwe bwi be ebgen anga a no fí mo ebgen. 35Fí fwa ye ngge zǝn a ge no a fwa efwam a tswa kpenmu ra, tea no a fwa efwam, nwen hon no ḿ mo kpenmu hon. 36Enona, ano Nwen hon fken-gwa ara nye, nya no efken-gwagwa adi ebi. 37Eshwen, m yi ara nye no be ebi mo Ebrayi. Tea nye notsa ara nye e gu m, adia fwa m ben ye zǝn enom a tsuruku mo nye ra. 38M jan nye anga be mò ya m̀ di atan a m̀ no ngge Àtà m ángá, adi ḿ mo nye, nye bwe anga be mò a nye fo a zǝn ate nye ángá.”

39Bè jan Yeso jan, “Ebrayi no ate je.”

Yeso è jan be jan, “É yé, nye e no mbǝgya mo Ebrayi adi ebi, nyà a bwe yishwa mo nwone a Ebrayi è bwe ángá. 40Tea nye notsa ara nye e gu m, a me ende e jan ara nye ebi nwone a m̀ fo a zǝn Ehwya ángá. Ebrayi è bwe ye yishwa be mò e dwa ni ra. 41Nye bwe anga be mò nwone ate nye bwe anga.”

Bè twa efyan jan, “Je fwa je mbǝgya atwa ra, Ehwya e chu ye no Ate je adi ebi.”

42Kǝnggwa Yeso è jan be jan, “Ano Ehwya è no Ate nye, nyà a no ngge edgyan mam, adia m vǝ a zǝn Ehwya bwa, asuswana m no ana. M̀ bwa m mo chu m ra, tea gè tson m a ge. 43Ano bwe a ge nye foyi nye fwa m ra? Ge no adia nye dgyan nye, nye e cha fwa mam a m jan nye anga ra. 44Nye no ḿ mo ate nye, Shetan. Nye dgyan nye e bwe be mò a ate nye dgyan anga. Tke ekwafya gè no ya nobǝ egum, ge bwe ye ebi anga ra, adia ge fwa ye ngge ebi a tswa mbwe ra. Atan a ge fe fwafe anga, ge jan tén nó anga abu fukèn mbwe, adia ga ya fwafe ngge ate mo be fwafe ángá. 45Èé enò, atan a m jan nye ebi anga, nye tsǝ́ nye ekǝ̀n a chu m ra. 46A tswa engga mo nye nwene a tú jan m no ngge ebgen ángá a ara? Ngge ano m jan anga ebi, ano bwe a ge nye tsǝ́ nye ekǝ̀n a chu m ra? 47Ende e no ḿ mo Ehwya, fo be mò Ehwya jan anga. Mò e bwe nye fo nye fwa m ra anga, a adia nye fwa nye ḿ mo Ehwya ra.”

Yeso tkyan Ebrayi

48A chu fwa ena, be ya a Yahuda è janfwe ye adi nya ebgenm jan, “Jè jan ebi atan a je jan wa ya a Samariya, ngge engǝ́ esera no a ju o ángá.”

49Yeso è janfwe be jan, “É yé, m fwa m ngge engǝ́ esera ra.” M no Àtà m egǝ̀n anga, a nye, nye no m egǝ́n ra. 50M nda m egǝ̀n mo chu m anga ra, Ehwya a di a gǝ̀n m a ge. Ga ekpenkǝ́n hon a ge. 51M jan nye ebi, egwa egwa e ba moetum mam anga, ga fǝ ye ra.

52Atan a be ya a Yahuda è fo fwa ena ángá, bè jan, “Asuswana, je yi ara, o no ngge engǝ́ esera. Ebrayi è fǝ, be efojan hon fǝ èé be, tea o jan, egwa egwa e ba moetum mbo, ga fǝ a didi ye ra. 53O tkyan ate je Ebrayi? Gè fǝ, be efojan hon è fǝ èé be. O ka anga jan a bo wa ara?”

54Yeso è janfwe be, “Ano m tigǝ̀n chu m, egǝ̀n hon fwa ye ngge engà ra. Tea Àtà m a nye jan ge no Ehwya mo nye, a ende e no m egǝ̀n ángá. 55Bi adia nye yi nye ye ra, m yi ye. Ano m jan m̀ yi m ye ra, mà nga ya fwafe abu nye, tea m yi ye, m tse be fwa mbwe anga. 56Ate nye Ebrayi è dgyan fí àa, ge e di ebwam mam, gè di nó nè shánju.”

57Be ya a Yahuda è jan ye jan, “A bo o chà kengga mbo je gwi chwen ra, bwe engǝ wa jan o di Ebrayi?”

58Yeso è janfwe be jan, “M jan nye ebi, a bè chà mbwa be Ebrayi ra ángá, m̀ no enom.” 59A chu fwa ena, bè kpu tén be e kpu a twa ye, tea Yeso ngǝ̀ton chu ye, nè nyagwa zǝn Àtá mo Ehwya hon.

Currently Selected:

Yohana 8: ICH

Highlight

Copy