Yohana 9

Yeso è matswa nobǝ akan a bè mbwa ye ngge fǝzǝn ebwibwi ángá

1Abu Yeso è twafǝ̀ nyaken ángá, gè di ende a bè mbwa ye ngge fǝzǝn ebwibwi. 2Be etsonchi mbwe è ká ye eka jan, “Etumo, nobǝ a bè mbwa ye ngge fǝzǝn ebwibwi na, a ebgen mbwe nè, a ḿ mo ate ye ngge ayi ye?”

3Yeso è jan be jan, “Fwa ye adi ebgen mo ende hon eno e ra be ebgen mo ate ye ngge ayi ye ra. Tea bè mbwa ye ngge fǝzǝn ebwibwi evǝa be e di echakpo mo Ehwya a chu ye. 4Adia zǝn chà no ènò ángá, ge no kenm ja bwe mochi mo ende e tson m bwa ángá. Zǝn etsǝ nyabwa atan a ende akan a bwe ye mochi efwe ra. 5Abu m chà no a tswa zǝnchaje ena na, m no enggasansan mo zǝnchaje hon.”

6Atan a gè jan fwa ara fwa ena ángá, gè tsǝ́ afǝtkwa a sǝnsen, nè chí ebgan ngge nó, ti kpwá ya fǝzǝn ebwibwi hon a fǝzǝn. 7Gè jan ye jan, “Shi fǝ fǝzǝn mbo adi edan mo Silowam” (Engà mo Silowam, a Tson ara.) Kǝnggwa ende hon è shi fǝ fǝzǝn mbwe nè twabǝ gwa a mu, nè no di zǝn anga.

8Be needwe mbwe ngge be ya è di ye gè bgó bwi mò ken anga, è kwa ara sojube eka ekam jan, “Ena fwa ye nobǝ è no chu bwi anga a sen nè no bgó mò anga ra?” 9Be ya ehwyà è jan a a ge.

Ya ehwyà jan, “É yé, fwa ye a ge ra, ge vǝ́ ye evǝ́m.”

Tea gè chungǝ́shi nè no jan anga jan, “A a me.”

10Bè ká ye eka jan, “Bwe engǝ fǝzǝn mbo no efkigwagwa?”

11Gè janfwe be jan, “Nobǝ hon a be fǝ́ ye Yeso anga è chí ebgan nè ti kpwa m a fǝzǝn, gè jan m jan ne, me e ken a edan a Silowam evǝa me e fǝ fǝzǝn mam. Enona, m̀ shi fǝ fǝzǝn mam, kǝnggwa m̀ kwa ara zǝn edim.”

12Bè ká ye eka jan, “Ende hon no a che?”

Gè jan be, “M yi m ra.”

Be Farisi è ká nobǝ a Yeso è matswa ángá eka

13Bè ti nobǝ a bè matswa ye fǝzǝn ebwibwi ángá bwa zǝn be Farisi. 14Nò nwone a Yeso è chi sǝnsen ebgan kpwa nobǝ hon a fǝzǝn nè fkigwa no fǝzǝn ángá, è no Nò nya Etkem. 15Enona, be Farisi è ká ye eka abu gè diben zǝn anga na.

Ende hon è janfwe be jan, “Gè chí ebgan ti kpwa m a fǝzǝn, m̀ shi fǝ fǝzǝn mam, m̀ chà di zǝn anga na.”

16Be Farisi ya ehwyà è jan, “Ende ena vǝ ye a zǝn Ehwya bwa ra, adia ge ba ye edon mo Nò nya Etkem anga ra.”

Tea be ya ehwyà è ká eka jan, “Bwe engǝ ya ebgen a bwe be echi mo moeditanm yishwa ena?” Enona, bè nggakwa ara adi fwa ekam mo be.

17Ekǝn-etkyen be twanga ká ende bè matswa ye fǝzǝn ebwibwi ángá eka jan, “Abu ge fkigwa ara fǝzǝn mbo na, mò a wa jan a chu ye anga a ano?”

Nobǝ hon è jan be jan, “A ge ga efojan.”

18Be atkwen nobǝ mo ya a Yahuda è cha be dwa jan ende hon è no ya fǝzǝn ebwibwi, asuswana ge ben ara ematswam ra, enona, bè tson be e fǝ́ ate ye ngge ayi ye dwa. 19Bè ká be eka jan, “Ena a nwen nye? A ge ga ende hon a nye jan nyè mbwa ye ngge fǝzǝn ebwibwi ángá? Bwe engǝ ge di zǝn anga asuswana?”

20Ate ye ngge ayi ye è jan be jan, “Je yi jan ga nwen je, jè mbwa ye ngge fǝzǝn ebwibwi. 21Tea abu bè matswa ye fǝzǝn ebwibwi mbwe hon eno e ra ende éè matswa ye ángá, je yi je ra. Ge kengga ara nobǝ èé ge, ge e jan nye nó e chu ye.”

22Ate ye ngge ayi ye è jan enò ángá, adia bè tsen etsentsen anga, adia be atkwen nobǝ mo be ya a Yahuda è du ara edgon jan, ende akan e chadwa ngge Yeso jan na Kristi ba nyo ye a vǝ́ a je mo àtá chuefǝnm. 23Ena a mò éè bwe ate ye ngge ayi ye è jan, “Ge kengga ara nobǝ, nye bi ye,” ángá.

24Bè fǝ́ nobǝ a bè fkigwa ye fǝzǝn ángá dwa efwe nè jan, “We no Ehwya egǝ̀n a chu mò ena, adia je yi ara jan Yeso ena a ya ebgen.”

25Gè janfwe be jan, “Ge e ma no ya ebgen, eno e ra ge fwa ye ya ebgen ra, a me m yi m ra. Mò akan a m yi ángá, a ekpe m̀ no ya fǝzǝn ebwibwi asuswana m di zǝn anga.”

26Kǝnggwa bè ká ye eka jan, “Mò hon a gè bwe o ángá a ano? Ge bwe engǝ n fkigwa o fǝzǝn?”

27Gè janfwe be jan, “M̀ jan fwa ara nye ekwafya, nyè cha nye dwa ra. Ano bwe a ge nye nda anga nye e fo nó efwe? Nye nda anga a nye e no be ya e ba ye anga èé nye?”

28Kǝnggwa be no tso nobǝ hon dwa efan anga, jan, “O ba ende hon ena anga a bo. A je je ba anga Mosa. 29Je yi jan Ehwya è jan fwa ngge Mosa, tea adi ḿ mo ende ena je yi je èé zǝn a ge bwa ángá ra.”

30Nobǝ hon è jan be jan, “Ena a fwa ekǝnkǝn nya, nye yi nye zǝn a gè bwa ángá ra, tea ge fkigwa m fǝzǝn. 31Je yi jan Ehwya fo ye ebgo mo be ya ebgen anga ra. Ge fo kpwà ende e tsen ye n bwe be mò ya ge dgyan anga. 32Abu bè tke zǝnchaje ángá, nwene akan chà fo didi ye efkigwam mo fǝzǝn mo nobǝ a bè mbwa ye ebwibwi fǝzǝn ángá ra. 33Be è jan ende ena vǝ ye a zǝn Ehwya bwa ra, ge e bwe e ti ye mò akan ra.”

34Bè janfwe ye jan, “A bo ende a bè mbwa o a tswa ahwya mo ebgen ángá, o nda anga wa tú je mò?” Be nyo ye vǝ́ a je mo àtá chuefǝnm mo be hon.

Mò a ende a bè fki ye fǝzǝn è jan Yeso ángá

35Yeso è fo jan be nyo ende a gè fkigwa nó fǝzǝn ángá, vǝ́ ara a je mo àtá chuefǝnm. Kǝnggwa gè tkunda nobǝ hon, a gè ben nobǝ hon ángá, gè ká nó eka jan, “O tsǝ́ekǝ̀n no a chu Nwen Nobǝ?”

36Nobǝ hon è ká Yeso eka jan, “Ende hon a ara? Jan m, Etumo, evǝa me e tsǝ́ekǝ̀n a chu ye.”

37Yeso è jan ye jan, “O di ara ye asuswana, adi ebi, a ge hon e jan fwa anga ngge bo na.”

38Kǝnggwa nobǝ hon è jan ye jan, “Etsodwe m tsǝ́ ara ekǝ̀n,” Kǝnggwa gè fen Yeso.

39Yeso è jan, “M bwa a tswa zǝnchaje ena evǝa me e kpèn be nobǝ kǝ́n, evǝa ya fǝzǝn ebwibwi (ya e tsǝ́ be ekǝ̀n ra) be e di zǝn, ya e ka jan be di zǝn anga be nga ya fǝzǝn ebwibwi.”

40Be Farisi ya ehwyà ya è ywano tenten ngge ge ángá è fo fwa Yeso è jan ángá, nè ká eka jan, “Ano ré! A je ja ya fǝzǝn ebwibwi gaten?”

41Yeso è janfwe be, “Ano nye è ma no be ya fǝzǝn ebwibwi, bà a jan be jan nye bwe ara ebgen ra. Tea abu nye tú anga jan nye di zǝn anga na, efya mo ebgen hon chà no enom a chu nye.

Currently Selected:

Yohana 9: ICH

Highlight

Copy