Luka 12

Echa etwam ngge ekǝ̀n ejanbonm

(Matiyu 10:26-27)

1Atan enò, be nobǝ embo è fǝnno a zǝn, nè no chafin sojube kpwafu anga. Yeso è kwa ara fwa ejanm ngge be etsonchi mbwe jan, “Nye bgeshi fǝzǝn adi yisti mo be Farisi, nwone e no mò ayibangǝ̀ ángá. 2Mò nwone e no ebwipem a ba fki a gwa be nó ra, fwa ye ra. Mò nwone e no engǝ̀tonton a ba ti a gwa be a je ra, fwa ye ra. 3No enona, mò a nye jan binbin a tswafǝ, ba fo nó a tswa enggasansan; èé ngge mò a nye twa eshwa mo nó a tswa be àtá, ba du edgon mo nó a chu bá mo be àtá.

4“M jan nye anga na, shushwa m ya, nye e tsen nye etsentsen mo be ya a gu ekǝnjuju, kǝnggwa a chashin be bwe a ti be mò efki ra, ra. 5Tea me e tú nye ende a nya tsen ángá. Nye e tsen Ehwya nwene ano ge gu ara ekǝnjuju, n no ngge emwentì a ge ti nó twa a shi a sen-ehwa gaten. Ebi, m jan nye anga, a a ge a nya tsen. 6Nye yi nye jan be kpu atakpachu chwen kpu jwade anga adi kobo fà kpwà ara ra? Èé enò Ehwya mngoda ye akan mo be anga ra. 7Adi ebi, be zan-a-chu mo nye binbin, no ekam, a zǝn ye. Nye e tsen nye etsentsen ra, nye gǝ̀n ti ara chashin be atakpachu embo.

8“Nye bu tón, ende e jan be nobǝ jan ge yi m, Nwen Nobǝ a jan ge yi ye èé ge, a chafya mo be maleka mo Ehwya. 9Tea, ende e jan be nobǝ jan ge yi m ra, ma jan èé me jan m yi m ye ra, chafya mo be maleka mo Ehwya. 10Ende e janpin Nwen Nobǝ, be gwa a no ye nó, tea ende nwene e janpin Engǝ́ Echanwenwen be gwa a nó be ye ra.

11“Ano be kpu nye bwa a tswa be àtá chuefǝnm, a chafya mo be ekpenkǝ́n ngge be atkwen nobǝ mo eten, nye e tsen nye tsuruku abu nye ti a vǝ́ chu nye eno e ra mò a nya jan ángá ra, 12adia Engǝ́ Echanwenwen a tú nye mò e se nye e jan, atan enò.”

Hufwa a chu hwen yamo

13Ekǝnggwa, ende akan a tswa mo be nobǝ embo hon è jan Yeso jan, “Etumo, jan nwenjin m ge e kwa mofǝ́n mo je, ge e no m cha m.”

14Yeso è janfwe ye, “Shushwa, nwene e vǝ m, me e no ekpenkǝ́n, eno e ra efuekǝ́ndgò a chu nye ángá a ara?” 15Kǝnggwa gè jan bishi be nobǝ ya è no a zǝn ángá, “Nye bgeshi fǝzǝn, nye e dgyen zǝn ngge moedgyanfim, adia nya mo nobǝ no ye a chu efim mo mobenben mbwe ra.”

16Yeso è tso be hufwa jan, “Yamo akan è ben mowa àywá a kpèn mbwe. 17Enona, gè jan chu ye, ‘Mò a ma bwe ángá a ano? M fwa m ngge zǝn àywá a ma fǝn mowa mam àywá ena ra.’

18“Kǝnggwa, gè ka jan, ‘M̀hǝ̀m! M yi ara mò a ma bwe ángá. Ma kǝn a bwí be eben mam, ma mbwe be ya e ke tkyan be ángá, ma kpu a gu mowa mam àywá hon kpu a nggwa a tswa mo be. 19Ma jan chu m jan, “O no ngge mowa àywá a o ti a de mo be je embo. We ka mbo fwa a chu nya mbo ra. Fo etkwa, de, ngǝ, we shánju.” ’

20“Tea Ehwya è jan ye, ‘A bo hwen, etsǝ nòmo be nda nya mbo anga a zǝn o. Be atkimo binbin a o tefǝn nyi na, a no ḿ mò ara?’

21“Ena abu ga no a chu mo ende e tefǝn mò àywá nyi chu ye, tea n fwa ye ngge mobenben chafya mo Ehwya ra.”

Moetum a chu tsuruku etsenm àywá

(Matiyu 6:25-34)

22Ekǝnggwa, Yeso è jan be ya è ba ye anga jan, “No enona, m jan nye anga, nye e ka nye tashwa a chu nya mo nye, a chu mò a nya de, a chu ju nye ngge a chu mò a mokàn mo enggwam ra. 23Adia nya twafǝ̀ mode, ekǝnjuju gaten twafǝ̀ mokàn a ju nye. 24Nye e di be enggwà: Be da be ra n bǝ be ra, be ben be etwa mo mode ngge eben ra, èé enò, Ehwya fi be anga. Nye twafǝ̀ nye be nwendnye hon a zǝn Ehwya ra? 25A tswa engga mo nye, ende nwene adi tsuruku etsenm mbwe àywá, tubi a ti chu ye engga nwofyan a chu be tsǝnò mbwe ángá a ara? 26Ano, nye bwe a ti nye mò nwofyan yishwa ena ra, ano bwe a ge nye no ka shwa àywá anga a chu be mò edan ángá?

27“Nye e di abu be kpwimo esese no chambo anga a tswavǝ́n ángá. Be wa be wá n twa be eti mo mokàn anga ra, m jan nye anga, èé Sulemano ngge edgwa mbwe binbin è tsàn ju ye twafǝ̀ ti ye akan a engga mo be kpwimo ena ra. 28Ano ena abu Ehwya tsàn a se be vǝmo a tswavǝ́n ju, e no nòmo, kpe be kpu be nggwa a fǝ̀, Ehwya hon a no ye nye mokàn a nye nda anga ra? Gbegbe! A nye ya chaebi nwofyan.

29“Nye e nyi e gu nye shwa mo nye a chu mò a nya de, nya ngǝ ángá ra. Nye e tsen nye tsuruku a chu be ra. 30Be nobǝ mo zǝnchaje ena ya e yi be Ehwya ra, tkon etkon a chu be mò ya ena anga a be. Ate nye yi jan nye dgyan be anga. 31Adi ḿ mo nye, nye e nda zǝnotì mo Ehwya, kǝnggwa ga no nye be mò ya e dwana gaten.

32“A nye be etsonchi mam, etso nwofyan, nye e tsen nye etsentsen ra, adia ate nye cha ara nye dwa nye e no ngge ge adi zǝnotì mbwe. 33Nye e jwade gu atkimo mo nye, nye e ti tse a nye ben ángá ti e no be ya ekan. Bwe nyi chu nye be eshu a kpe, nwone a kpo be ehwe ra, mobenben a kpe nwone a nya ye ra. Be yaju ken a ti be a zǝn ra, be awijwen bwe a dì be nó ra. 34Adia, zǝn a mobenben mbo no anga, a zǝn a tsuruku mbo no anga gaten.

Be fí ya e nobà yagwamo mu mo be anga

35“Nye e té fuchin mo mochi ngge be petila mo nye, be e no etonm. 36Nye e no abu be nobǝ ya e nobà yagwamo mu be, ge e twabǝ e bwa adi esǝ mo ben etem, evǝa atan a ge twabǝ bwa n kǝn bu, ba fki ye tafǝmo kè akan. 37Ga no mo vǝtsen a zǝn be mbǝgya mochi a yagwamo mu mo be bwa ben be, be nobà ye anga. M jan nye ebi anga, ga tsàn ju ye, evǝa ga bwe be mochi, na jan be, be e chu a sen ga kwa be mode a ge. 38Ga no be mbǝgya mochi hon mo etkwa efom àywá, ano yagwamo mu be bwa ben be be no nobà ye anga, ge e ma bwa a tswa-tsǝ, eno e ra akǝndon.

39“Nye e yi jan, ano yagwamo mu akan è yi ara atan a yaju a ngga ye a ju, ga no ezǝngga. Ga gwa ye yaju, e kwa e shi a àtá mbwe ra. 40No enona, a nye gaten nye e no ezǝngga adia Nwen Nobǝ hon a bwa atan a nye ka nye ra ángá.”

Ya mochi ebi eno e ra ya mochi amme

(Matiyu 24:45-51)

41Ekǝnggwa, Bitru è ká ye eka jan, “Yagwamo mu, o tso hufwa ena anga ngge je kpwà ara ne, a èé ngge be nobǝ binbin?”

42Yeso è janfwe ye jan, “Ende nwene e no chu mo ya mochi ebi ngge enggaton, nwene a yagwamo mu mbwe kpu be mbǝgya mochi du ye a bu evǝa ge e no be tse mode, adi ekpengga edefǝfǝ ángá a ara? 43Esese no ḿ mo nwen mochi hon nwene a yagwamo mu mbwe bwa a ben ye ge bwe anga enò. 44Ebi m jan nye anga, yagwamo mu mbwe hon a du ye ga no chu a chu be atkimo mbwe binbin. 45Tea, ano nwen mochi (amme) hon jan chu ye jan, ‘Yagwamo mu mam bwa a myan ye ra.’ Enona, ge kwa ara be mbǝgya mochi hon ndedon ngge ndegwa mò ebum èé mo edem ngge tson engǝfǝ́m. 46Yagwamo mu mbwe a twabǝ a bwa nò nwone a ge ka ye anga ra, ngge adi tsǝnò nwone a ge yi ye ra. Yagwamo mu hon, a bu ye mò e twafǝ̀ chu ángá, na du ye ken a no a zǝn a be ya ebgen no anga.

47“Nwen mochi hon nwene e yi mò a yagwamo mu mbwe dgyan anga, tea ge te ye fuchin mo nó ra, eno e ra bwe ye nó ra, ba bu ye mofǝ. 48Tea nwen mochi nwene e yi ye mò a yagwamo mu mbwe dgyan ra, n bwe ara mò e kǝn ara be e bu ye mò ángá, ba bu ye mò nwofyan. Ende nwene a be no ye mò àywá, ba nda mò àywá a zǝn ye, a zǝn ende a be du ye mò edgonm embo, a mò embo a ba ká ye eka mo nó.”

Yeso è ti enggakwam bwa

(Matiyu 10:34-36)

49Efwe Yeso è jan, “M bwa ara evǝa me e bà fǝ̀ a tswa zǝnchaje, m dgyan fí àa, be e jan fǝ̀ hon kpo fwa ara. 50Tea m no ngge batisǝma a ba bwe m, ma ben m nya enggwam a sen ra, kpwà tén ano be bwe ara m nó. 51Nye ka anga jan m̀ bwa evǝa me e ti adgye e bwa a tswa zǝnchaje? É yé, me e jan nye, m̀ bwa evǝa me e ngga e kwa be nobǝ. 52Ti asuswana ken chafya, a mu a nobǝ chwen no anga a zǝn, be ngga a kwa etso fà, ta a cha be dwa ngge fà ra, eno e ra fà a cha be dwa ngge ta ra. 53Àtà a twa ese ngge nwen ye ndedon ngge nwen ndedon a twa ese ngge ate ye. Bayi nobǝ a twa ese ngge nwen ye ndegwa, nwen ndegwa twa ese ngge bayi ye. Nwen engǝ̀ ndegwa a twa ese ngge gwa nwen ye, gwa nwen a twa ese ngge nwen engǝ̀ ndegwa.”

Ediyim mo ekpengga

(Matiyu 16:2-3)

54Ekǝnggwa, Yeso è twanga nè jan be nobǝ embo hon jan, “Atan a nye di edwe kan anga chá nodgó, kè akan nye jan, ‘Chù nyabwa,’ ngge chù hon bwa tén ebwam. 55Atan a fyo kpo bwa anga chá mo Kpàn, nye jan, ‘Zǝn a fken,’ ngge zǝn hon fken tén efkenm. 56A nye be ya ayibangǝ̀, nye yi abu nya jan engà mo be echi a sǝnsen ngge a zǝkpe. Ano bwe a ge nye yi nye abu nya a jan engà mo be mò e kenkèn anga adi ekpengga ena ra?

57“Ano bwe a ge nye jan yi nye, chu nye mò e no esese ángá ra? 58Ano a bo ngge ya eze mbo no a efǝ nyaken a zǝn a be ekpenkǝ́n, chungǝ́shi ngge ge evǝa nye e kpèn e tswa fwa mo nye efǝ, eno e ra, ge vǝ o a du a bu mo ekpenkǝ́n, a ge ekpenkǝ́n a tsǝ o a du a bu mo chu mo àtá ewhyatu nwene a twa a gwa o a tswa àtá ewhyatu ángá. 59M jan o anga, egwam mbo a je, a kpwà tén atan a o kpwa gu ara tse a bè ká o ángá sangǝ́.”

Currently Selected:

Luka 12: ICH

Highlight

Copy