Luka 13
13
Twa etwa mo ebgen mbo eno e ra wa fǝ
1Ekǝnggwa, be ya ehwyà ya è no a zǝn ángá è jan fwa ngge Yeso a chu be ya a Galili, a Bilatu è du be e gu be nè ti ngǝ mo be nòtan ngge be mò etinom mo be a Àtá mo Ehwya ángá. 2Yeso è ká be eka jan, “Nye ka anga jan, be ya a Galili a bè gu ángá, è bwe ti ara mò esera a be chàshín be ya a Galili ya ehwyà, adia bè ngǝ ekan enó ángá? 3M jan nye anga na, ge fwa ye enò ra, ano nye twa nye etwa mo ebgen mo nye, nye twanga ken nye a zǝn Ehwya ra, nya tkò a gu abu be. 4Efwe, nye ka anga jan be nobǝ gwi chu chwen a ta, a àtá a kpe è bwi shwa nggwa gu be a Silowam ángá, è bwe ti ara mò esera chàshín binbin mo be nobǝ efki éè no a Urishelima ángá? 5M jan nye anga na, ge fwa ye enò ra, ano nye twa nye etwa mo ebgen mo nye ra, nya tkò a gu abu be.”
Hufwa a chu tu engǝtsǝn e gwa ye ga anga ra
6Ekǝnggwa, Yeso è jan be hufwa ena jan, “Nobǝ akan è shin tu engǝtsǝn no a wá enabi mbwe. Beti bishi, ge ken, evǝa ge e bga be ga mo nó, nè ben didi ye ga a ju mo tumo hon ra. 7Enona, gè jan nwen a mbwe ye éè dgon kpèn hon anga jan, ‘Di, bwe ara je ta, m̀ bwa no nda ga anga a ju tu engǝtsǝn ena, m ben m ga a ju ye ra. Sen twa ye, adi ano a je gwa ye, ge no a de sǝnsen anga kukwa.’
8“Kǝnggwa, nwen a mbwe ye hon è jan, ‘Yagwamo mu, gwa ye mo je akan efwe, ma gu zǝn ngàhwya ye, ma nggwa ye nga (taki) a chin. 9Ano ge gwa ga adi je efwe, se ara. Ano ge gwa ye ga ra, be e sen e twa ye.’ ”
Yeso matswa ndegwa etohoho Nò nya Etkem
10Nò nya Etkem akan, Yeso è tú mò anga a tswa àtá chuefǝnm akan mo ya a Yahuda, 11ndegwa akan è no a zǝn, gè no ngge engǝ́ esera nwone e du ye modwa a ju mo je gwi chu chwen a ta. Engǝ́ esera hon è vǝ toho ye nè bwe chashin mbwe no etutu, gè ywa ti ye eywaywaju etkyen efwe ra. 12Atan a Yeso è di ndegwa hon ángá, gè fǝ́ nó dwa nè jan, “Ndegwa, be matswa ara o modwa mbo.” 13Gè ti bu mbwe tu ye a ju, kè akan gè ywa tén etkyen, eywaywaju nè no tàn Ehwya anga.
14Chu mo àtá chuefǝnm hon è fku tsuruku àywá adia Yeso è matswa ya modwa hon Nò nya Etkem ángá. Gè jan be nobǝ, ya è no a zǝn ángá jan, “Je no ngge be tsǝnò chwen a ngǝ, a ba bwe mochi, nye e bwa a tswa mo be tsǝnò hon evǝa be e matswa nye, fwa ye Nò nya Etkem ra.” 15Ekǝnggwa Etsodwe è jan ye, “A bo ya ayibangǝ̀, a engga mo nye, ara hon a fken ye ndwa mbwe, eno e ra, jaki mbwe a zǝn a ge tè nó no Nò nya Etkem evǝa ge e ti nó e ken e ngǝ mbǝ ra ángá, a ara? 16Chú ge se ye ndegwa ena, nwen mo Ebrayi, nwene Shetan è fupe ye nyino mo je gwi chu chwen a ta, be e ma e tswa ye Nò nya Etkem, a bu mo mò e fupe ye ángá ra?”
17Atan a Yeso è jan be fwa ena, ebgenju è fu be ya eze mbwe, tea be ya ehwyà ya è no a zǝn ángá, binbin è fo etkwa mo be moeditanm a gè no bwe anga.
Hufwa a chu fwento musta ngge mò a be fǝ yisti ángá
(Matiyu 13:31-32; Marku 4:30-32)
18Yeso è ká be eka jan, “Zǝnotì mo Ehwya no abu ano? Ma mbwà a di ye ngge ano? 19Ge no abu fwento musta a ende akan ti tswa no a wa ehwyazǝmo mbwe. Gè vǝ́ nè chambo nga tumo, a be nwendnye è bwa no tsa afku mo be adi be bu mo nó ángá.” 20Efwe, gè ká eka jan, “Mò a ma mbwà a di zǝnotì mo Ehwya ngge ge anga a no? 21Ge no abu yisti a ndegwa ti nòtan ngge fen-em̀ àywá a tswa mbǝ, ge nga moebgwam, yisti hon è kwa mngo gu moebgwam hon n du mò hon vi tubi ángá.”
Fǝtsǝmo efifafa
(Matiyu 7:13-14; 21:23)
22Yeso è kwa gu be eten nwofyan ngge efifi nè no tú nobǝ mò anga atan a gè nyashi a Urishelima ángá. 23Ende akan è ká ye eka jan, “Etsodwe, be nobǝ ya a ben ega ángá fwa be embo ra?”
Yeso è jan be jan, 24“Nye e nne tén ennem evǝa nye e kwa e shi chá fǝtsǝmo efifafa, adia be nobǝ embo a nne tén ennem evǝa be e kwa e shi chá zǝn, be kwa a ben be ra. 25Ano yagwamo mu hon, nyi etkyen n fǝpe ara fǝtsǝmo, nya a ywa chá je, nye no a kǝn bu anga ngge vǝ edonm jan, ‘Yagwamo mu, fki je fǝtsǝmo.’
“Tea ga jan a fwe nye jan, ‘M yi m nye ra, éè ngge zǝn a nye vǝ bwa ángá.’ ”
26“Kǝnggwa, nya jan, ‘Jè de, jè ngǝ ngge bo. Efwe ò tú mò a tswa be efǝku a tswa eten mo je.’
27“Tea ga jan nye, ‘M yi m nye ra, éè ngge zǝn a nye vǝ bwa ángá. Nye e kwaju ngge me, binbin mo nye be ya mofǝ̀.’ 28A zǝn, nya di Ebrayi, Eshaku, Yakubu, ngge be efojan mo Ehwya, a tswa zǝnotì mbwe, tea a nye, ba nyon nye nggwavǝ́ a je, zǝn a nya kpedwa ngge san ekǝ́nm. 29Be nobǝ a bwa chá notà, chá nodgó, chá mo Etkyen, chá mo Kpàn, ngge, ba chu a chu bò mo be na de adi esǝ a tswa zǝnotì mo Ehwya. 30Kǝnggwa, be ya e no ekǝn-etkyen ángá a bwa a fwe ekwafya, be ya e no ekwafya ángá a bwa no a fwe ekǝn-etkyen.”
Nya ebgenm mo Yeso a chu Urishelima
(Matiyu 23:37-39)
31Dgyen ye fon ra, be Farisi ya ehwyà è bwa jan Yeso jan, “Gwa zǝn ena, we ken chá efki, adia Hiridu nda anga ga gu o.”
32Yeso è jan be, “Nye ken jan Hiridu, kwàkpan hon, jan, ‘Nòmo ngge kpe a ma ti a vǝ́ be engǝ́ esera a ju be nobǝ, m ma a tswa be, tsǝnò adi e ta, m bwe a kǝ̀n mochi mam.’ 33Bi adi enò, nòmo, kpe ngge tsǝnò adi e ta, ge no ara kenm me e ken chafya adi mochi, adia ge no ara kenm jan a efojan akan a fǝ ye a je mo Urishelima ra.
34“Woo! Urishelima, Urishelima, a bo ende éè gu be efojan mo Ehwya, ò twa be ya a bè tson bwa a zǝn o ángá ten. Kè mbwe, m nda anga, me e té e fǝn o abu aywa kǝ́n té fǝn mbǝgya mbwe anga a ta bwaakǝ́n mbwe, ò se mbo? 35Di, be twagwa ara nye, mu nye nga ara shinmu. M jan nye anga, nya di m efwe ra, kpwà Nò nwone a nya a jan, ‘Esese a nwene nyabwa a di ti mo Ehwya ángá.’ ”
Currently Selected:
Luka 13: ICH
Highlight
Share
Copy
Want to have your highlights saved across all your devices? Sign up or sign in
© 2024 Luke Initiative for Scripture Translation
