Luka 14
14
Yeso è matswa modwa Nò nya Etkem
1Nò nya Etkem akan mo be ya a Yahuda, Yeso è ken mu nobǝ echa, Farisi akan evǝa ge e de mode. Be ya è no a zǝn ángá è nggwa ye fǝzǝn no a ju. 2Ende akan a fù ngge bu mbwe è no enyonyo ángá, è no a zǝn. 3Atan a Yeso è di ye ángá, gè ká be Farisi ngge be etumo mo edon hon eka jan, “Edon mo je chadwa je e ma e tswa ya modwa Nò nya Etkem nè, je e ma e tswa je be ra?” 4Bè jan be ye a vǝ ra. Enona, Yeso è fu ende hon bu a ju nè matswa ye, nè du nobǝ hon nya m̀ mbwe. 5Ekǝnggwa gè ká be eka jan, “Ende akan mo nye e no ngge nwen eno e ra, ndwa, e kposhi a tswa ahwya mbǝ Nò nya Etkem a vǝ nó a gwa ye a je kè akan nò eni ra ángá, a ara?” 6Bè janfwe yi be ye fwa akan a chu be mo ena ra.
Yeso è tú mò a chu mo chu engǝm a sen
7Atan a Yeso è di abu be nobǝ, ya bè bò be bwa adi esǝ, è no swa be bò esese anga, gè tso be hufwa ena jan, 8“Ano be fǝ́ o dwa ken adi esǝ-ben, we chu mbo a chu bò egǝ̀ngǝ̀n ra, adia ehwyà nobǝ akan e twafǝ̀ o a be bo ye èé ge, a bwa a zǝn. 9Yagwamo esǝ hon e bo nye ángá, a bwa jan o, ‘No ende ena bò mbo.’ Atan a enò, a tswa ebgenju, o ken a chu a chu bò e gǝ̀n ye ra. 10No enona, ano be bo o ken adi esǝ, we swa bò e gǝ̀n ye ra abu we chu a chu mo nó, evǝa atan a yagwamo esǝ hon bwa di o, ga jan, ‘Shushwa, nyi etkyen vǝ́ chu a chu bò egǝ̀ngǝ̀n.’ Kǝnggwa, wa no ngge egǝ̀n a fǝzǝn mo be ya nyé chuno abibi ángá. 11Ende e tigǝ̀n chu ye, ba ti ye a shwa a sen. Ende e ti chu mbwe ngǝ a sen, ba ti a gǝ̀n ye.”
12Ekǝnggwa, Yeso è jan ngge ende e fǝ́ ye dwa mode edem a mbwe ye ángá jan, “Atan a o fǝ́ be nobǝ dwa mode edem, eno e ra dwa esǝ, we fǝ́ e kpwà mbo be shushwa o, be ya mbwe o, ba nwenjwa o ngge be needwe mbo ya e no ngge mò a bu ángá ra. Adia ba fǝ́ o dwa a kpwakpo chu nwone a ò fǝ́ be ángá. 13Ano o fǝ́dwa esǝ anga, fǝ́ be ya ekan, be ya e ken a ti be kèn ra, be ya e mbe anga embem ángá ngge be ya fǝzǝn ebwibwi. 14Adi ebwem enò, wa ben esese adia be ya ena, kpwa no a ti mbo ra. Ehwya kpwa a no o a ge atan a be ya ebitete a nyi etkyen a ndikpǝ ángá.”
Hufwa a chu mo esǝ echa hon
(Matiyu 22:1-10)
15Atan a be ya è de mode anga ngge Yeso è fo gu ara fwa ena ángá, ende akan mo be è jan ye jan, “Esese no ḿ mo ende nwene a de adi esǝ a tswa zǝnotì mo Ehwya.”
16Yeso è janfwe ye adi hufwa jan, “Ende akan è shi esǝ echa, nè bo be nobǝ embo. 17A nò è kan ara a ba de esǝ hon ángá, gè tson ya mochi mbwe akan jan ge e vǝ́ e jan be ya gè bo ara be, be e bwa adi esǝ hon ángá jan, ‘Nye bwa, mode esǝ hon bge defǝ ara.’
18“Ekǝnggwa, egwa egwa mo be è no jan mò nwone e bwe ge ken a ben ye adi esǝ hon ra ángá. Ekwafya mo be è jan, ‘M jwa kpèn adi tsǝnò fà ena, ge no ara kenm, me e ken a di ti ara kpèn hon. M dònvǝ, ken jan ye, m bwa a ben m ra.’
19“Efki è jan, ‘M jwa be ndwa chwen mo wá ewam, m nyaken mbwà a di be a kpèn. M dònvǝ, ken jan ye, m bwa a ben m ra.’
20“Efki efwe è jan, ‘M̀ fǝ́ ndegwa adi tsǝnò fà ena, no enona, m dònvǝ, ken jan ye, m bwa a ben m ra.’
21“Echukǝnggwa, ya mochi hon, è twabǝ bwa jantu gu yagwamo mu mbwe mò a bè jan ye ángá. Yagwamo mu hon, adi engo è du ya mochi mbwe hon jan, ‘Vǝ́ a je myan myan, tkukwa gu be efǝ echa ngge be efǝku a tswa eten, we fǝ́ be ya ekan, be ya embe anga embem, be ya fǝzǝn e ebwibwi ngge be ya e ken a ti be kèn ra dwa, jan be e bwa.’
22“Atan a ya mochi mbwe hon è bwe ara mò a bè jan ye ángá, gè twabǝ bwa jan, ‘Yagwamo mu, m bwe ara abu ó jan m ángá, bi adia enò zǝn echum chà danno a afku hon.’
23“Kǝnggwa, Yagwamo mu hon è jan nwen a mbwe ye, ‘Kpo be efǝ echa ngge be efǝku e ken chá be eten nwofyan, we tsa be nobǝ be e bwa evǝa àtá mam ge e mbo. 24M jan nye anga, ma gwa a didi m akan mo ya a m̀ kwafya bo be ángá, be e mbwà e di mode esǝ ena ra.’ ”
Ekan mo be ya e ba Yeso anga
(Matiyu 10:37-38)
25Be nobǝ embo è nyaken ngge Yeso, kǝnggwa, gè twanga nè jan be jan, 26“Ano ende akan nda anga ge e ba m, n dgyan fí ti ara m, chàshín: ate ye, ayi ye, gwa ye, mbǝgya mbwe, be nwenjwa ye tan èé ngge nya mbwe ra, ge chà kǝn ye ge e ba m ra. 27Ende e se ge e tso eswafǝ mbwe ge e ba m, chà kǝn ye ge e ba m ra.
28“Be è jan, ende akan mo nye dgyan anga ge e mbwe àtá a kpe, ge kwafya a chu ye a sen, ge e ka e se tashwa ano ge no ngge tse e kǝn ara a ge e ti mbwe a fǝ àtá hon sangǝ́ ra? 29Efki ra, ano ge tke fù mo àtá hon, n mbwe fǝ ti ye nó ra. Binbin mo be ya di abu mochi hon ndnyano ángá, a tson ye tsen. 30Ba jan, ‘Ende ena tke fù mo àtá, n mbwe fǝ ti ye nó ra.’
31“Efwe, ano tì akan té fuchin mo kàn enyom anga ngge tì efki, ga kwafya a chu ye a sen na pa pyoro ngge be atkwen nobǝ mbwe abu ge e yi jan yakàn mbwe echo gwi, nyo a ti kàn ngge yakàn echo gwi fà mo tì e nokǝ̀n e nyabwa ángá ra? 32Ano ge di jan ge nyo a ti ye kàn ngge tì efki hon ra, ga a tson be nobǝ mbwe a ken a zǝn tì hon e nokǝ̀n atan a be chà no a dabonbon, abu be e kpèn e tswa fwa hon. 33Ba anona, egwa egwa mo nye, e twagwa gu ye be atkimo mbwe ra, chà kǝn ye a ge e ba m ra.”
34Yeso è tso bishi be hufwa efki jan, “Nga a mò esese, tea ano ge nyo ye efwe ra, ba bwe nó engǝ ge e twafwe bwa enyonyo efwe? 35Ga se ye mo sǝnsen ra, ga se ye mo edimò ra gaten. Be ti nó nggwa a fwa. Ende e no ngge tón mo fwa efom, ge e fo e yi nó.”
Currently Selected:
Luka 14: ICH
Highlight
Share
Copy
Want to have your highlights saved across all your devices? Sign up or sign in
© 2024 Luke Initiative for Scripture Translation
