Luka 8

Be ndegwa ya éè ken anga ngge Yeso ángá

1Dgyen ye fon ra, Yeso è tkukwa gu be eten efifi ngge be eten nwofyan, gè no jan Fwa Esese a chu zǝnotì mo Ehwya anga. Be etsonchi mbwe gwi chu fà è no ngge ge, 2tangge be ndegwa ya ehwyà ya a gè matswa be modwa nè nyonvǝ́ be engǝ́ esera a ju be ángá. Be ya hon a, Meri (a bè fǝ́ ye anga, Magadala), a Yeso è nyonvǝ́ ye engǝ́ esera chwen a fà ju ángá. 3Be ya ehwyà, a Yuwana nwene a don ye Kuza, è dgon atkimo mo Hiridu anga, ngge Suzana; ngge be ndegwa embo efki. Binbin mo be ndegwa ena è bwe Yeso ngge be etsonchi mbwe mochi anga, ngge be atkimo mo be.

Hufwa a chu fwento etwam

(Matiyu 13:1-9; Marku 4:1-9)

4Atan a be nobǝ embo ya è vǝ chá be eten efki efki, bwa fǝnno a zǝn Yeso ángá, gè tso be hufwa ena, 5“Yawa akan è vǝ́ a je evǝa ge e twa fwento mbwe. Abu gè no twa fwento anga, be fwento ehwyà è nggwa kpo efǝku, be nobǝ è cha fù ken a chu be ngge be nwendnye è bwa kpe de gu be. 6Ya ehwyà è nggwa a chu sǝnsen ago, atan a bè vǝ́ gwa ara a je ángá, dgyen ye fon ra, bè ngǝ́ fǝ ara, adia bè ben be mbǝ ra. 7Ya ehwyà è nggwa a tswa mo be evi, abu bè cha nyavǝ́ ángá, be evi hon è kpafu be, nè fupe be. 8Efwe, be ya ehwyà è nggwa adi sǝnsen esese, bè vǝ́ gwa a je, chambo nè gwa be ga àywá, gwé kè akan (100) mo fwento a gè twa ángá.”

A gè jan fwa ara fwa ena ángá, gè jan ngge echafǝju jan, “Ende e no ngge tón mo fwa efom, ge e fo.”

9Be ya è ba Yeso anga è ká ye eka mo engà mo hufwa hon. 10Yeso è janfwe be jan, “Be no ara nye efwa, mo eyim mo mò engǝ̀tonton a tswa zǝnotì mo Ehwya, tea be ya ehwyà m jan kpwà be nó adi hufwa, evǝa,

“ ‘Ba didi, n diyi a se be nó ra;

ba bu tón bu bu,

n fo a yi be nó ra.’

11“Ena engà mo hufwa hon: Fwento hon a fwa mo Ehwya. 12Be fwento éè nggwa efǝku ángá no abu be nobǝ ya e fo fwa mo Ehwya, Shetan bwa kpu ara fwa hon a tsuruku mo be, afwa ba tsǝ́ekǝ̀n abu Ehwya e ti e vǝ́ be. 13Be fwento è nggwa a chu sǝnsen ago ángá, no abu be nobǝ ya e fo fwa mo Ehwya hon n cha nó ngge vǝtsen. Tea adia be fwa be ngge kpwà evǝnvǝn a tsuruku mo be ra ángá, be tsǝ́ekǝ̀n mo ekpengga nwofyan. Atan a be kwa ara a tswa embwadi, be vǝ́ eshin myan myan. 14Be fwento ya è nggwa a tswa evi ángá, no abu be nobǝ ya e fo fwa mo Ehwya, tea abu be no zǝno mo be anga, ju emam ngge edgyan mo tse ngge etkwa efom mo zǝnchaje ena bwe be, be chambo be ra. 15Tea be fwento ya è nggwa adi sǝnsen esese ángá, no abu be nobǝ ya e fo fwa mo Ehwya hon, n fungǝ́shi nó ngge tsuruku mo be, be bon-ekǝ̀n n gwa be ga.

Hufwa a chu mo petila

(Marku 4:21-25)

16“Nobǝ a ton ye petila ti a nyi ye a ta mo hwa ra, ga ti nó a nyi ye a ta mo zǝndwa ra gaten. Ga ti nó a tu adi echizǝno mo nó evǝa be ya e kwa a shi a mu hon, a di zǝn no enggasansan. 17Mò e no engǝ̀tonton asuswana ángá, nwone a ba jan nó a gwa be a je ara, fwa ye ra, mò e no etwapepe asuswana nwone a ba yi be nó ra, eno e ra a be ti a gwa be a je ra, fwa ye ra. 18Adi enò, nye e bu e seshi tón. Ende e no ngge mò, be tu a bi ye, ende e fwa ye ngge mò ra, èé nwofyan a ge no ngge nó ángá ba cha ti ara nó.”

Ayi Yeso ngge be nwenjwa ye è bwa abu be e di ye

(Matiyu 12:46-50; Marku 3:31-35)

19Nò kè akan, ayi Yeso ngge be nwenjwa ye è bwa evǝa be e di ye, nè diben be ye ra, adia be nobǝ e mbo shi zǝn hon no ángá. 20Ende akan è jan ye jan, “Ya mbo ngge be nwenjwa o ywano a je, be nda anga be e di o.” 21Yeso è janfwe be jan, “Ya m ngge be nwenjwa m, a be ya e fo fwa mo Ehwya n bwe mochi anga ngge nó ángá.”

Yeso è kpón fyochu dgyén jan ne kpo nya

(Matiyu 8:23-27; Marku 4:35-41)

22Nò kè akan, Yeso è jan be etsonchi mbwe jan, “Je e vǝ́ jengǝ̀ mo edan ena.” Kǝnggwa bè kwa a tswa ngga nè kwa ara enyam. 23Abu bè no nyi ngga hon anga, gè kwa ara dan edwam. Fyochu echakpokpo è no kpo bwa anga chafya mo be, nè du mbǝ è no fǝ́ nggwashi anga a tswa ngga hon, nè du be a tswa etí echa. 24Be etsonchi mo Yeso è ken fǝ́zǝ ye nè jan, “Yagwamo mu, Yagwamo mu, ja fǝ.”

Enona, gè nyi etkyen nè kpón fyochu ngge mbǝ hon éè fǝ́ anga dgyén. Fyochu hon è ngǝ ju, zǝn hon binbin è tswa gushi dgye enó 25Ekǝnggwa gè ká be etsonchi mbwe eka jan, “Chaebi mo nye no a che?”

A tswa mo etsentsen a chu moeditanm ena, bè kwa ara sojube eka ekam jan, “Ende hon ena a ara? Gè kpón èé fyochu ngge mbǝ dgyén, be tse ye.”

Yeso è matswa ndedon akan éè no ngge engǝ́ esera a ju ángá

(Matiyu 8:28-34; Marku 5:10)

26Yeso ngge be etsonchi mbwe è kwa ngga ken a efa mo Garisana nwone e no jengǝ̀ chá akan mo Edan a Galili ángá. 27Abu Yeso è tón vǝ́ re a etu a tón mbǝ hon ángá, ndedon akan, è no ngge engǝ́ esera a ju a eten hon, è bwa ben ye. Ende hon è dgyen ara fon nè nggwa ye adanmo anga a ju ra, nè dwa ye a àtá anga ra, Gè no kpwà a afku dì. 28Atan a gè di Yeso ángá gè tandwa nè kposhi a sen chafya mbwe, nè tandwa ngge echakpo jan, “Mò a o nda anga a zǝn m ángá a ano, Yeso, Nwen mo Ehwya e Gǝ̀n ti ara? M bgó o anga we tswa m ekan ra.” 29Gè jan enò adia Yeso è du ara engǝ́ esera hon ge e vǝ́ a je a ju ye. Adia kè embo engǝ́ esera hon è twafǝ̀ chu ye. Bè hwya ye ehwyatu nè hwyafu ye bu ngge fù tan ngge be awya evǝa be e dgon ye. Bi adi enò engǝ́ esera hon è no du ye gè kǝnten be awya hon nè ken no anga a tswavǝ́n jujuye.

30Yeso è ká ye eka jan, “Ti mbo a ara?” Gè janfwe Yeso jan, “Etso”, adia be engǝ́ esera hon è kwa no ye a ju ángá è no embo. 31Kǝnggwa, be engǝ́ esera hon è no bgó Yeso anga jan ge e nggwa be, e shi ye a tswa zǝn evǝnvǝn ra. 32Be etso mo efika embo, è tku de mò ken anga a buetkwa mo hwì a zǝn. Be engǝ́ esera hon è bgó Yeso jan ge e gwa be, be e kwa e shi a tswa mo be efika hon. No enona, gè cha be dwa. 33Atan a be engǝ́ esera hon è vǝ́ ara a je a ju ndedon hon ángá, bè kwashi a ju be efika hon, enona, be etso mo efika hon, è tse ken kposhi a tón evuru evǝnvǝn mo edan hon nè fǝ gu a zǝn.

34Atan a be ya è dgon be efika hon è di mò e bwe na, bè tse ken jan be nobǝ a tswa eten efifi ngge nwofyan a buetkwa. 35Be nobǝ embo è vǝ́ a je evǝa be e di mò è bwe ángá. Atan a bè bwa a zǝn a Yeso ángá, bè di ende a bè nyonvǝ́ engǝ́ esera a ju ye ángá, è chuno a ta fù mo Yeso a tswa adanmo a ju ye a tswa tsuruku adgye, bè tsen etsentsen. 36Be ya è di ara mò è bwe ángá, è jan be nobǝ abu ndedon hon è ben e ematswam mbwe ángá. 37Echukǝnggwa, binbin mo be nobǝ a sǝnsen mo Garisana è bgó Yeso jan ge e nya e gwa be, adia etsentsen è bwipe ara be ángá. No enona, gè nyi etkyen nè kwa ngga a mbǝ nè nya m̀ mbwe.

38Ende hon a bè nyonvǝ́ engǝ́ esera hon a ju ye ángá, è bgó Yeso jan ga ba ye. Tea Yeso è cha ye ye dwa ra, nè jan ye jan, 39“Twabǝ ken a mu, we jan be, binbin mo be mò a Ehwya bwe o ángá.” Enona, ndedon hon è nya nè ken jantu gu be a tswa eten hon, mò a Yeso è bwe ye ángá.

Yeso è fǝ́zǝ nwen ndegwa bwa angǝ nè matswa ndegwa akan

(Matiyu 9:18-26; Marku 5:21-43)

40Ekǝnggwa atan a, Yeso è twabǝ gwa ara jengǝ̀ mo edan hon ángá, be nobǝ embo ya è nobà ye anga, è sha ye. 41Ndedon akan, bè fǝ́ ye anga Jayiru, éè no chu mo àtá chuefǝnm akan ángá, è bwa nggwa ekpanvǝ mbwe a sen a chafya mo Yeso. Gè bgó nó ngge vǝ edonm jan, nè ken a mbwe ye, 42adia nwen ye akan tete, ndegwa, je mbwe è no gwi chu fà, è no adi modwa abu ga fǝ.

Abu Yeso è nyaken ngge ge ángá, be nobǝ embo è no fa ye anga àywá. 43Ndegwa akan è no a tswa be nobǝ embo hon, nwene a ngǝ è no vǝ́ ye anga mo je gwi chu fà, nobǝ akan è matswa ti ye ye ra. 44Gè bwa chashin mo Yeso nè bwa yi bu a tón mo mokàn mbwe, kè akan, ngǝ evǝ́m mbwe hon è kǝ̀n ti ara.

45Yeso è ká eka jan, “Ende e yi m a ju ángá a ara?” Atan a bè twa gu efyan mo nó ángá, Bitru è jan, “Etsodwe, be nobǝ embo ngàhwya o chagwa chagwa, n no fa o anga.” 46Tea Yeso è jan, “Eshwen, ende akan yi m a ju. M yi adia echakpo vǝ́ a je a ju m.”

47Kǝnggwa, ndegwa hon è yi ara jan ge ngǝ̀ton a ti ye ra, a tswa emme ebum, gè bwa nggwa ekpanvǝ mbwe chafya mo Yeso. Gè jan a chafya mo be nobǝ binbin ya è no a zǝn ángá, mò è bwe gè yi Yeso a ju ngge abu gè ben ematswam kè akan ángá. 48Yeso è jan ye, “Nwen m ndegwa, chaebi mbo matswa ara o, ken a tswa adgye.”

49Yeso è chà jan fwa anga, ende akan è vǝ a mbwe Jayiru, chu mo àtá chuefǝnm hon, bwangga re. Gè jan Jayiru jan, “Nwen o ndegwa hon fwa ye ara. We fa mbo etumo efwe ra.”

50A gè fo enò ángá, Yeso è jan Jayiru jan, “We tsen mbo etsentsen ra, tsǝ́ekǝ̀n kpwà ara, ga ben ematswam.”

51Atan a Yeso è bwangga ara a mu Jayiru ángá, gè cha ye dwa ende akan e kwa e shi ngge ge a tswa àtá ra, kpwà Bitru, Yohana, Yakubo ngge ate mo nwen hon ngge ayi ye. 52Atan enò, be nobǝ ya è no a zǝn ángá, è no tandwa nè kǝndwafǝ anga a chu nwen ndegwa hon. Yeso è jan be jan, “Nye e kpo nya dwafǝ ekǝnm, ge chà fǝ ye ra, ge dwa anga dan.”

53Bè tson ye tsen, adia bè yi jan gè fǝ ara ángá. 54Yeso è fu nwen hon bu nè jan, “Nwen m, nyi etkyen.” 55Engǝ́ mo nwen hon è twabǝ bwa, gè nyi etkyen kè akan. Kǝnggwa Yeso è jan be jan be e no nwen hon mò, ge e de. 56Ate ye ngge ayi ye è tàn ebwikpe àywá a chu moeditanm hon. Tea Yeso twa be echa jan ne, be e jan e tú be ende akan mò e bwe na ra.

Currently Selected:

Luka 8: ICH

Highlight

Copy