Marku 11
11
Yeso è Kwashi a Urishelima abu tì
(Matiyu 21:1-11; Luka 19:28-40; Yohana 12:12-19)
1Abu bè bwa tén ara a Urishelima ángá, be bwangga a zǝn be eten nwofyan a bè fǝ́ anga Betafaji ngge Betani, e no a fù mo Hwì mo Zetu ángá. Yeso è tson be etsonchi mbwe fà chi, 2jan ne, “Nye kwashi a tswa eten nwofyan e no chafya mo nye nokǝ̀n, abu nye nyashi a tswa mo nó ángá, nya a di nwen jaki a be chà tón didi be nó ra, tè no a zǝn. Nye fken ti ye bwa ana. 3Ano nobǝ akan ká nye eka, ‘Ano bwe a ge nye fken ye anga?’ Nye e jan ye, ‘Etsodwe nda nó anga, be ti twabǝ a bwa asuswana.’ ”
4Bè shi nè di nwen jaki hon tè no a buetkwa mo fǝehwen akan a tón efǝ. Abu bè fken nó anga, 5be ya è ywano a zǝn ángá è ká be eka jan, “Ano a nye bwe anga? Nye fken nwen jaki hon ángá?” 6Bè jan be nobǝ hon mò a Yeso è jan be ángá, enona, be nobǝ hon è gwa be bè nya. 7Atan a bè ti nwen jaki hon ti bwa Yeso ángá, bè kpu mo bwi a ju mo be kpu twà a chu nwen jaki hon kǝnggwa Yeso è chu a chu mo nó. 8Be nobǝ embo è kpu mo bwi a ju mo be kpu twà a efǝ, be ya ehwyà è vǝngga be bu ebgyebgye mo be tumo etswa a tswavǝ́n kpu twà a efǝ gaten. 9Be ya è no chafya ngge ya è ba ye anga è tandwa no jan anga,
“Etanm no ḿ mo Ehwya!”
“Esese no ḿ mo ende e nyabwa
adi ti mo Etsodwe ángá!”
10“Esese a zǝnotì mo ebǝ je
Dawuda e nyabwa ángá!”
“Etanm a ḿ mo Ehwya e
no anga a kpe!”
11Yeso è bwangga a Urishelima nè kwashi a chuukwa mo Àtá mo Ehwya. Gè di ngàhwya gu be mò è no a zǝn ángá, tea adia nò e kpo ara ángá, bè gwa eten hon nè twabǝ ken a Betani ngge gwi chu fà hon.
Yeso è tso tu engǝtsǝn dwavǝ esera
(Matiyu 21:18-19)
12Zǝngga re, abu bè nyagwa Betani anga, mbe è fu Yeso anga. 13A gè di chàkǝn tu engǝtsǝn akan ngge be ekpezǝmo a ju nó ángá, gè ken a chin mo tumo hon evǝa ge e di ti ara ano ga ben ga a ju nó. Atan a gè kengga a zǝn tumo hon ángá, gè ben ye ga a ju nó ra, adia engga hon, è fwa ye engga ga egwam mo tu engǝtsǝn ra. 14Kǝnggwa, gè jan tú engǝtsǝn hon jan, “Nobǝ akan e de e didi be ga mbo efwe ra.” Be etsonchi mbwe è fo mò a ge jan ángá.
Yeso è nyonvǝ́ be yajwa a Àtá mo Ehwya
(Matiyu 21:12-17; Luka 19:45-48; Yohana 2:13-22)
15A bè kengga a Urishelima ángá, Yeso è kwashi a chuukwa mo Àtá mo Ehwya nè kwa ara be ya è jwade be mò anga ngge be ya è jwa be mò anga a zǝn ángá, enyom. Gè tsǝ fka nggwa be teboro mo ya è fwe tse anga, ngge be bò mo be ya è jwade be eba anga. 16Gè cha ye dwa jan ende akan e tso mò jwa akan e kwashi a chuukwa mo Àtá mo Ehwya nè ken e vǝ́ a je chá akan mo nó ra. 17Atan a gè tú be mò anga, gè jan be jan, “Be Fwaebam jan, ‘Ba fǝ Àtá mam, àtá mo ebgo mo be efi binbin.’ Tea nye bwe ye twanga no ara zǝn engǝ̀tonm mo be ya moebufkwam.”
18Be Ekǝ́n echa ngge be etumo mo edon è fo fwa ena, nè kwa ara efwa endam abu be e gu ye, tea bè tsen ye anga adia binbin mo be nobǝ è no tàn moetum mbwe anga.
19Edgó nò eni, Yeso ngge be etsonchi mbwe è nyagwa tswa eten efifi hon.
Tu engǝtsǝn hon ngǝfǝ ara
(Matiyu 21:20-22)
20Zǝn ngga re anofon tàtà, abu bè twabǝ nyaken Urishelima ángá, bè di tu engǝtsǝn hon è ngǝfǝ ara shingga a sen. 21Bitru è kaben ara fwa a Yeso è jan tumo hon ángá, gè jan Yeso jan, “Etumo, di tu engǝtsǝn a wá tso ye dwavǝ esera ángá ngǝfǝ ara.”
22Yeso è jan be etsonchi hon jan, “Nye e no ngge chaebi a chu Ehwya. 23M jan nye ebi anga, ano ende akan e tsen ye tsuruku ra, n no ngge chaebi, n tsǝ́ekǝ̀n jan mò a ge jan adi ebgo ángá a bwe, ga jan hwì ena, ‘Vǝ ana ken shin a kǝn. Mò hon a bwe a tén abu ge jan anga.’ 24Enona, m jan nye, mò hon é ma engǝ ra a nye nda adi ebgo, nye tsǝ́ekǝ̀n jan nye ben fwa ara ye, mò hon a no ḿ mo nye. 25Atan a nye ywa etkyen evǝa nye e bgó ebgo, nye e gwa e no ende a nye no ngge fwa e so ángá, evǝa ate nye e no a kpe ángá gwa a no nye be ebgen mo nye gaten.” [ 26Ano nye gwano nye be nobǝ be ebgen a be bwe ra, ate nye e no a kpe ángá gwa a no ye nye ra gaten.]
Bè ká Yeso eka a chu emwentì mbwe
(Matiyu 21:23-27; Luka 20:1-8)
27Efwe bè kwashi a Urishelima, atan a Yeso è no tku anga a tswa chuukwa mo Àtá mo Ehwya ángá, be Ekǝ́n echa, be etumo mo edon ngge be atkwen nobǝ è bwa a zǝn ye. 28Be ká ye eka jan, “Ngge emwentì ani a o bwe be mò a o bwe anga na? Ende e no o emwentì we ti e bwe be mò a o bwe anga na, a ara?”
29Yeso è jan, “Me e ká nye eka akan. Nye ma janfwe m, ma jan nye fwa a chu emwentì hon nwone a m ti bwe be mò ena anga. 30Ende éè no Yohana ya Batisǝma emwentì gè ti bwe be nobǝ batisǝma anga a ara, nye jan m, a Ehwya nè, a nobǝ?”
31Bè pa nó e sojube nè jan, “Ano je jan, Yohana è ben nó a kpe, ga ká eka jan, ‘Ano bwe a ge nyè tsǝ nye ekǝ̀n a chu ye ra?’ 32Ja jan a yi ḿ mo je jan, gè ben nó a zǝn nobǝ?” (Bè tsen be nobǝ anga, adia egwa egwa è cha ara dwa jan Yohana è no efojan.)
33Enona, bè janfwe Yeso jan, “Je yi je ra.”
Yeso è janfwe be jan, “Èé me, ma jan m nye abu m ben emwentì a m ti bwe be mò a m bwe anga na ra.”
Currently Selected:
Marku 11: ICH
Highlight
Share
Copy
Want to have your highlights saved across all your devices? Sign up or sign in
© 2024 Luke Initiative for Scripture Translation
