Marku 12
12
Hufwa a chu be yawa ewakpwam
(Matiyu 21:33-46; Luka 20:9-19)
1Kǝnggwa Yeso è kwa ara be moetum adi hufwa. Gè jan, “Nobǝ akan è wa wá enabi no, gè fken mò ngàhwya kpèn hon, gè gu ahwya a be ti kon a vǝ́ mbǝ mo enabi hon, nè tsa etwà mo edgonzǝn no a tswa kpèn hon. Kǝnggwa gè ti kpèn hon no be yawa ewakpwam nè nya echan. 2Atan a ga enabi hon è ben ara ángá, gè tson ya mochi mbwe akan ken a zǝn be yawa ewakpwam hon, evǝa be e no ye mò a bè kwa nyi ye ángá. 3Tea be yawa ewakpwam hon è fu ya mochi mbwe hon nè bu ye mofǝ nè du ye nya bu kukwa. 4Kǝnggwa gè tson ya mochi efki ken a zǝn be, bè bu ye mò a chu nè no ye ebgenju, nè du ye nya gaten. 5Efwe, gè tson ya mochi efki ken a zǝn be, enogwà, be bugu ye. Gè tson be ya mochi ehwyà embo, bè bu be ya ehwyà mo, nè gu ya ehwyà.
6“Asuswana, è danshi nobǝ akan a ga tson ángá. Nobǝ hon eni a nwen ye ndedon, a gè dgyan àywá ángá. Gè tson nwen hon ken ekǝn-etkyen adia gè ka anga jan, ‘Be di a gǝ̀n ye.’
7“Tea be yawa ewakpwam hon è jan e sojube jan, ‘M̀hǝ̀nm! Ena a edefǝ́n hon, nye bwa je e gu ye evǝa mofǝ́n mbwe hon a nga ḿ mo je.’ 8Enona, bè fu ye nè gu ye nè ti kǝn mbwe ti twa vǝ́ chashin mo èkwà mo kpèn hon.”
9Yeso è ká eka jan, “Mo a yagwamo kpèn hon a bwe ángá a ano? Ga bwa a gu be yawa ewakpwam hon na ti kpèn hon a no be ya wá ewakpwam efki. 10Nye chà ká di nye fwa a Ehwya è jan adi Afketa ángá ra? Fwa e jan,
“ ‘Ten hon a be ya moembwem è
segwa ara ángá
twanga no ti ara ten chìchì e
twacha àtá hon no ángá.
11Mò hon ena a Etsodwe bwe na,
nga ara moeditanm a fǝzǝn
mo je’?”
12Ekǝnggwa be Ekǝ́n echa, be etumo mo edon ngge be atkwen nobǝ mo be ya a Yahuda, è no nda efwa anga evǝa be e fu ye, adia bè yi jan gè tso hufwa ena a chu be. Tea adia bè tsen be nobǝ anga, bè gwa ye nè nya m̀ mo be.
Fwa a chu tse-eten a be kpwa no Kaisa anga
(Matiyu 22:15-22; Luka 20:20-26)
13Beti bishi, be atkwen nobǝ mo ya a Yahuda ena è tson be Farisi ya ehwyà ngge ya e ba Hiridu anga ken a zǝn Yeso evǝa be e ngà e fu ye a chu be fwa mbwe. 14Bè bwa a zǝn ye nè jan, “Etumo, je yi jan o jan ebi anga. Nobǝ binbin no gu mò akan a zǝn o, o cha ebgan sǝ́ mbo nobǝ akan anga ra. O tu fwa mo Ehwya anga adi ebi. Jan je, ge se je e kpwa tse-eten e no Kaisa nè, eno e ra je e kpwa e no je ye ra? 15Je e kpwa nè, je e kpwa je ra?”
Tea Yeso è yi ara shwa mofǝ̀ ekam mo be, gè ká be eka jan, “Bwe engǝ nye tkyan anga nye e ngà e fu m? Nye ti fwentse dinari akan bwa m, me e di.” 16Bè ti fwentse hon bwa no ye, gè bi jan, “A engǝ́ mo ara ngge ti mo ara e no a ju mo nó?”
Be janfwe ye, “A ḿ mo Kaisa.”
17Kǝnggwa, gè jan, “Nye ti mò e no ḿ mo Kaisa no Kaisa, mò e no ḿ mo Ehwya anga no Ehwya.”
Fwa a Yeso è jan anga è kǝn be nya àywá.
Eka ekam a chu ezǝbwam angǝ
(Matiyu 22:23-33; Luka 20:27-40)
18Kǝnggwa be Sadosi ya e jan ezǝbwam angǝ ne fwa mo nó ra ángá, è bwa a zǝn Yeso nè jan, 19“Etumo,” Mosa è ba no je jan, ano nwenjin ndedon akan fǝgwa ara ndegwa nè ben ye mbǝgya ra, ge no kenm ndedon nwenjin don ye, a fǝ́ gwafǝ́n hon evǝa ga mbwa mbǝgya a no ḿ mo nwenjin ye engǝfǝ. 20Be nobǝ chwen a fà è no be nwenjwa so, nwenfi mo be è fǝgwa ndegwa, nè gwa ye nó ngge mbǝgya ra. 21Nwen edgwa mo engǝfǝ hon è fǝ́ gwafǝ́n hon nè fǝgwa ye nó ngge nwen ra gaten. Adi e ta hon è fǝ́ ye gaten nè ben ye nwen ngge gwafǝ́n hon ra. 22Be chwen a fà hon binbin è fǝgwa ndegwa hon nè ben be mbǝgya ngge ge ra. Ekǝn-etkyen ndegwa hon fǝ èé ge. 23Adi ezǝbwam a dì, ndegwa ena a no gwa ara? Adia binbin mo be è fǝ́ di ara ye ángá.
24Yeso è janfwe be, “Ena fwa ye mò e bwe nye jan shwa ara fwa mo nye ra? Adia nye yi nye be fwa mo Ehwya eno e ra echakpo a ge no ngge nó ángá ra. 25Atan a Ehwya a kpu be engǝfǝ a nyi a etkyen a dì ángá, be ndedon a fǝ́ be ndegwa ra ngge be ndegwa a nya be don ra. Binbin mo be a no abu be maleka hon a kpe. 26A chu fwa mo ezǝbwam a dì, nye chà ká didi nye adi Afketa mo Mosa, hu a chu fǝtu a fǝ̀ è de anga a tswavǝ́n, atan a Ehwya e jan Mosa jan, ‘A me ma Ehwya hon mo Ebrayi, Ehwya hon mo Eshaku ngge Ehwya hon mo Yakubu’, ángá ra? 27Ge fwa ye Ehwya mo engǝfǝ ra, tea ga Ehwya mo be nobǝ e no angǝ ángá. Nye shwa ara àywá.”
Edon nwone e dgwa ti ara a Ehwya è twa ángá
(Matiyu 22:34-40; Luka 10:25-28)
28Ende akan a engga mo be etumo mo be edon è bwa ben be atan a bè twa efyan anga. A gè di jan, Yeso è janfwe ara be fwa hon esese ángá, gè ká ye eka jan, “A tswa binbin mo be edon a Ehwya è twa ángá, nwone e dgwa ti ara ángá, a ani?”
29Yeso è janfwe ye jan, “Edon e dgwa ti ara ángá a ena: ‘Nye fo, a nye be ya a Esǝrela, Ehwya Etsodwe mo je, Etsodwe hon no akan. 30Dgyan Ehwya Etsodwe mbo ngge tsuruku mbo binbin ngge nya mbo binbin ngge engà mbo binbin tangge echafǝju mbo binbin.’ 31Edon e dgwa ti ara adi e fà ángá a: ‘Dgyan needwe mbo abu o dgyan chu o anga.’ Edon efki e dgwa twafǝ̀ be ya ena ángá fwa ye ra.”
32Nobǝ hon è jan Yeso jan, “Etumo, o jan eshwen, adia o jan Ehwya no akan ngge Ehwya efki fwa ye ra, kpwà tén a ge. 33We dgyan ye ngge tsuruku mbo binbin ngge eyim mbo binbin tangge echafǝju mbo binbin ngge we dgyan needwe mbo abu o dgyan chu o anga. Ena twafǝ̀ a ge a chu be binbin mo be mò etkonom ngge be mò etinom.”
34Atan a Yeso è di jan gè janfwe nó ngge enggaton ángá, gè jan ye jan, “O dgyen mbo zǝn ngge zǝnotì mo Ehwya ra.” Ti nò eni ken chafya, nobǝ akan è ka ye ye eka efwe ra.
Kristi hon a nwen ara?
(Matiyu 22:41-46; Luka 20:41-44)
35Atan a Yeso è tú mò anga a tswa chuukwa mo Àtá mo Ehwya, gè ká eka jan, “Ano bwe a ge be etumo mo edon jan ne Kristi a nwen mo Dawuda? 36Dawuda hon e chu ye, atan a gè jan fwa anga a tswa Engǝ́ mo Ehwya ángá, gè jan,
“ ‘Ehwya hon jan
Etsodwe mam.
“Chu chá budgo mam
ken engga atan a ma
du be ya eze mbo
a nga mochafu
mbo ángá.” ’
37Dawuda e chu ye fǝ́ Kristi, ‘Etsodwe.’ Bwe engǝ ekǝnggwa Kristi a no nwen ye? Be nobǝ embo hon ya è fǝnno a zǝn ángá, è buton fo ye a tswa tsuruku etenten àywá.”
38Abu Yeso è tú be mò anga, gè jan, “Nye bgeshi fǝzǝn a chu be etumo mo edon. Be dgyan be e no e tku anga a tswa mokàn efifi n dgyan be nobǝ, be e no e bi be fwa anga adi egǝ̀n a tswa afyan jwa, 39ngge echum a chu be bò egǝ̀n a tswa àtá chuefǝnm ngge be e chu a chu be zǝn edgwa edgwa a tswa be esǝ. 40Be bwede be gwafǝ́n n fkwacha gu be atkimo mo be anga, be tú chu jan, ba be ya ebitete adi ebgo ebgonbgon ebgom a tswa afyan. Ba tswa be ya ena ekan àywá.”
Mò enom a gwafǝ́n è no ángá
(Luka 21:1-4)
41Yeso è chuno tenten a zǝn akpati mo mò enom a Àtá mo Ehwya, nè no di gu abu be nobǝ è bwa twa tse shi anga a tswa akpati hon. Be yamo embo è twa tse àywá. 42Tea gwafǝ́n ya ekan akan è bwa twa fwen anini mbwe fà e kengga ye kobo fà ra.
43Yeso è fǝ́ be etsonchi mbwe dwa bwa tenten a zǝn ye, nè jan, “M jan nye ebi anga, gwafǝ́n ya ekan ena twa fí ti ara mò a ge a tswa akpati hon chàshín binbin mo be nobǝ. 44Adia binbin mo be nobǝ ti a tswa be mobenben àywá mo be ti bwa no, tea gwafǝ́n ya ekan ena, ti gu mò a gè no ngge nó èé ḿ mo zǝno enom mbwe ti no.”
Currently Selected:
Marku 12: ICH
Highlight
Share
Copy
Want to have your highlights saved across all your devices? Sign up or sign in
© 2024 Luke Initiative for Scripture Translation
