Marku 13
13
Be echi mo ekpengga ekǝn-etkyen ngge ekǝnbwim mo Àtá mo Ehwya
(Matiyu 24:1-2; Luka 21:5-6)
1Abu Yeso è nyagwa Àtá mo Ehwya anga, etsonchi akan è jan ye, “Etumo, di be ten ekeke ngge be moebwem esese endà ngge editanm ena.”
2Yeso è janfwe ye jan, “O di be moembwem echa ena? Akan mo be ten hon a tu ye a chu mo be ten efki ra, ba kǝnbwi a gu be a nggwa a sen.”
3Beti bishi, abu Yeso è chu a sen a Hwì mo Zetu e no chá notà mo Àtá mo Ehwya ángá, Bitru, Yakubo, Yohana ngge Andoro è ká ye eka engǝ̀tonton jan, 4“Jan je, ekpengga a be mò ena a bwe ángá, ngge be mò ya a tú echi jan ekpengga tén ara a be mò hon a bwa de a fǝ ángá.”
5Yeso è jan be jan, “Nye bgeshi fǝzǝn a fwa ende akan a ngga a de nye. 6Be nobǝ embo a bwa a di ti mam, n no a jan anga jan, ‘A me ma Kristi, nobǝ etsǝpepe mo Ehwya.’ 7Atan a nye fo fwa mo kàn ngge asha mo kàn, nye e tsen nye etsentsen ra. Ge no ara kenm a be mò ena a bwe, tea ekǝn-etkyen mo zǝnchaje chà dan shi. 8Eyasǝnsen a nyo kàn ngge eyasǝnsen, zǝnotì a nyo kàn ngge zǝnotì. Sǝnsen a chìju ngge mbe a fu be nobǝ adi be zǝn efki efki. Be mò ena a etkem mo edwadwa mo mba hon, kpwà ara.
9“Nye e dgon chu nye. Ba kpu nye a du abu mo be ekpenkǝ́n, ba bu nye akpan a tswa be àtá chuefǝnm. A chu m, nya ywa chafya mo be gomna ngge be Tì abu be eyifwa mam. Ena a no efwa a nye ben ti a jan be Fwa Esese a chu m ángá. 10Ge no kenm, ba ti edgon mo Fwa Esese a jan be egwa egwa mo efi sangǝ́ ekǝn-etkyen mo zǝnchaje chà a bwa. 11Atan a be fu nye ken ara a zǝn kǝ́n ekpènm ángá, nye e ka nye fwa a nya jan ángá ra. Nye e jan e kpwà mò a be jan nye anga atan enò ángá, adia fwa ye a nye e jan fwa hon anga ra tea a Engǝ́ Echanwenwen.
12“Nwenjwa a ti nwenjin ye a no be e gu ye, àtà a tsǝ a du nwen ye. Be mbǝgya a cha chu ngge be ate be èé ngge be ayi be na du be e gu be. 13Binbin mo be nobǝ a ze nye a chu m, tea ende e bon-ekǝ̀n kengga ara ekǝn-etkyen, a ben ega.
14“Atan a nye di ‘be mò ezǝzǝju e bwe mbǝgo zǝn anga’ ywano adi zǝn a ge é ywa ye ángá ra, (ende e ká mò anga e yi e seshi), kǝnggwa be ya e no a Yahudiya anga be e tse e vǝ́ a chu hwì. 15Ende e no a chu àtá mbwe e shwa ye a sen ra èé ge e shi ye a àtá evǝa ge e ti mò akan ra. 16Ende e no a kpèn anga e twabǝ ken ye a mu evǝa ge e ti mò bwi a ju mbwe ra. 17Atan enò, ga no mò ekǝnkǝn nya a zǝn be ndegwa jufà ngge be ya e mmo mbǝgya anga a bu ángá. 18Nye bgó ebgo evǝa ekan hon e bwe ye adi engga mo viejwa ra, 19adia be ekan mo be tsǝnò hon a no mò ekǝnkǝn nya àywá, yishwa éè chà bwe didi ye ra tke atan a Ehwya è mmò zǝnchaje ti bwa asuswana ngge ga bwe a didi ye enò efwa ra. 20Ano Etsodwe éè chà senvǝ́ ye be tsǝnò hon ra, nobǝ akan àa ga ye ra. Tea adi efka mo be eswavǝ, a gè swavǝ ara ángá, gè senvǝ́ ara be tsǝnò hon. 21Atan enò, ano ende akan jan o, ‘Di, ena a Kristi hon’ eno e ra, ‘Di ge nokǝ̀n,’ nye e tsǝ́ nye ekǝ̀n ra. 22Adia be Kristi fwafe ngge efojan fwafe a mbwi a bwa, na bwe be echi ngge moeditanm evǝa be e ngga e de be nobǝ, èé be eswavǝ ano ge no ebwetim. 23Enona, nye dgon chu nye, m̀ kwafya twa ara nye echa a chu be mò ena binbin, a ekpengga hon chà bwa ye ra ángá.
Etwabǝbwam mo Nwen Nobǝ
(Matiyu 24:29-31; Luka 21:25-28)
24“Atan a be ekan ekǝnkǝn nya ena, nya ara ángá,
“ ‘Nò a twafǝ
ngge fka a tú ye enggasanm mbwe ra,
25be ngǝkpe hon a vǝ a zǝkpe
nggwa a shwa sen,
ngge ba chì be mò e no a kpe ángá ju.’
26“Atan enò, be nobǝ a di Nwen Nobǝ nyabwa a tswa mo edwe, ngge echakpo àywá ngge egǝ̀n. 27Ga tson be maleka mbwe be e te e fǝn be eswavǝ mbwe a tswa buetkwa ndwe mo zǝnchaje, ti chá binbin be ekǝn-etkyen mo zǝn a sǝnsen, ti a ken chá binbin be ekǝn-etkyen mo zǝn a kpe.
Mò etum a chu tu engǝtsǝn
(Matiyu 24:32-35; Luka 21:29-33)
28“Asuswana, hwà mò a tu engǝtsǝn tú je anga. Adi ekpengga a nye di be bu mbwe no bgyè bwa anga, be ekpezǝmo mbwe no to anga, nye yi jan chu nywen bwa tén ara. 29Enò gaten, atan a nye di be mò ena bwe anga, nye e yi jan ekpengga mo etwabǝbwam mbwe tén ara, ge no a tafǝmo. 30M jan nye ebi anga, be nobǝ mo ekǝn ena a fǝ be ra, kpwà tén ano be binbin mo be mò ena bwe ara. 31Kpe ngge sǝnsen a kǝn-etkyen, tea be fwa m a kǝn be etkyen ra, be bwe a kǝ̀n a tén ebwekǝ̀nm.
Nobǝ akan yi ye nò hon ra, efki ra, ekpengga hon
(Matiyu 24:36-44)
32“A chu nò hon, eno e ra ekpengga hon, nobǝ akan yi ye ra, èé be maleka a kpe ngge Nwen hon, tea kpwà tén Àtà hon. 33Nye e no ezǝngga, nye e bgeshi fǝzǝn. Adia nye yi nye atan a ekpengga hon a bwa ángá ra. 34Etwabǝbwam mo Nwen Nobǝ no abu nobǝ akan éè nya echan anga. Atan a gè nyagwa mbwe ye ángá, gè du be ya mochi mbwe egwa egwa mochi a ge no a bwe anga. Gè jan edgonzǝn mo fǝtsǝmo, ge e di e seshi zǝn.
35“Enona, nye e dgon e seshi zǝn adia nye yi nye ekpengga a yagwamo mu hon twabǝ a bwa ángá ra: ehwyà ga no edgó eno e ra tswa-tsǝ eno e ra akǝndon eno e ra anofon. 36Ano ge bwa kè akan; we cha mbo dwa ge e ben o, o dwa dan anga ra. 37Mò a m jan nye anga na, m jan ye anga ngge egwa egwa. Nye bgeshi fǝzǝn.”
Currently Selected:
Marku 13: ICH
Highlight
Share
Copy
Want to have your highlights saved across all your devices? Sign up or sign in
© 2024 Luke Initiative for Scripture Translation
