Iwinna 10
10
Pita Kevbe Kọniliọs
1Okpia ọkpa kegha rre Sisaria, a keghi tie eni ẹnrẹn Kọniliọs. Ọ kegha re ọkaokuo vbe oka ivbiyokuo e Rom ọkpa ne a tie ẹre “Ọka ọghe Itali.” 2Rẹn keghi re ọmwa ne ọ mwẹ ekhọe iyayi. Osanobua ọre irẹn kevbe ẹgbẹe ọre hia wa gaa. Ọ wa vbe hia vbe odẹ hia ne ọ gha ru iyobọ ne avbe Ju ni re ivbiogue. 3Ẹdẹ ọkpa, vbe odẹ ihe ẹgogo eha vbe avan, rẹn keghi miẹn umian ne ọ na wa bẹghe odibo Osanobua ọkpa vbe ọ bu ẹre gha dee do tama rẹn wẹẹ, “Kọniliọs!”
4Rẹn keghi tọn aro ye odibosa ni egbe rhunmwuda ighẹ ohan mu ẹn, ọ wẹẹ, “Vbe ọ khin nọwanrẹn?”
Odibosa nii wanniẹn wẹẹ, “Osanobua rhan obọ miẹn erhunmwu kevbe iwinna itohan ruẹn nẹ, ọ kevbe ye ruẹ rre. 5Wanwanna nian, gie emwa gha rrie Jopa ne u ya tie ọmwa ọkpa ne a tie ẹre Saimọn Pita. 6Owa Ọsohian Saimọn ne ọ rre ọkpẹn ẹzẹ ọre ọ ye.” 7Odibosa ne ọ gu ẹe guan nii ghi kpao nẹ, Kọniliọs keghi tie eva vbe uwu avbe eguọmwadia ẹre deba ovbiyokuo ọkpa, ọmwa, ne ọ mwẹ ekhọe iyayi, ọkpa vbe uwu iran ne ọ hẹ gaga egbe. 8Ọ keghi ta emwi ne ọ sunu ma iran, ọ na gie iran gha rrie Jopa.
9Vbe ikpẹdẹ ne ọ lele ẹe vbe iran ghi khian sẹ Jopa, Pita keghi hin odukhunmwu ihie owa ne ọ ya na erhunmwu vbe ẹghẹ ogiavan. 10Ohanmwẹ kegha gbe ẹe, ọ kegha ho ne ọ rri evbare. Ẹghẹ ne iran na gha le evbare nii, rẹn keghi miẹn umian. 11Rẹn keghi bẹghe vbe ẹrinmwi kie ye otọ, emwi ọkpa ne ọ ye vbe igbu ukpọn kegha tuorre dee, ehọ ẹre enenẹ ọre iran da ẹre yi gha mu ẹn tuorre dee. 12Avbe aranmwẹ otọ kevbe aranmwẹ amẹ kevbe avbe ahianmwẹ keghi vuọn uwu ẹre. 13Urhu ọkpa keghi tama rẹn wẹẹ, “Pita kpaegbe, gbe ne u gha re.”
14Sokpan Pita wanniẹn wẹẹ, “Hiehiere Nọyaẹnmwa, unu mwẹ ma he dekan emwi awua ra nọ ma huan ẹdẹ.”
15Urhu ni dọlegbe tama rẹn wẹẹ, “Emwi ne Osanobua kha nẹ wẹ ọ huanrẹn, ghẹ ghi kae ba ne ọ ma huan.” 16Emwi na keghi sunu igba eha, a keghi dọlegbe tọn emwi ni mu gha rrie odukhunmwu.
17Ọ keghi yan Pita unu uan wẹ de emwi ne a ya umian ne irẹn miẹn kha. Ẹghẹ na ne a kha na, emwa ne Kọniliọs gie miẹn ehe ne owa Saimọn ye nẹ, iran keghi mudia ye onurho. 18Iran keghi nien urhu kha wẹẹ, “Orhunmwuyẹn ne a tie ẹre Saimọn Pita rre uwu owa ra?”
19Te Pita he ye ro ẹmwẹ emwi ne a ya umian nii kha vbe Orhiọn tama rẹn wẹ “Gha họn vbe arhin eha gualọ uẹ dee. 20Rhunmwuda ọnii mu egbe ne u tuorre, ghẹ vbe gbe ọkhọnmwẹ ẹ i khọnmwẹ lele iran ighẹ mẹ ọre ọ gie iran gha dee.” 21Rhunmwuda ọnii Pita tuorre, ọ keghi tama iran, “Mẹ ọrọre ọmwa ne uwa gualọ khian. Vbe ọ ya uwa gha dee?”
22Iran wanniẹn wẹẹ, “Kọniliọs ne ọka okuo ọre ọ gie ima gha dee. ọmwa esi ne ọ ga Osanobua ọre nọ, emwa Ju hia wa ya ọghọ nẹẹn ẹsẹse. Odibo Osanobua ọkpa ọre ọ tama rẹn ne ọ gie ne a tie ruẹ gha die owa ẹre, ne ọ miẹn ehe na họn ẹmwẹ ne u mwẹ ne u gha ta ma rẹn.” 23Pita keghi viọ emwa ni la owa iran na gbe asọn nii vbe evba.
Ẹdẹ ghi gbe, rẹn keghi mu egbe, ọ na lele iran, eso vbe uwu avbe etẹn ni rre Jopa kevbe lele ẹe gha khian. 24Vbe ikpẹdẹ ne ọ lele ẹe rẹn keghi do sẹ Sisaria, ehe ne Kọniliọs na gha mudia khẹ ọre ke ẹe kevbe etiọnrẹn kevbe avbe ọse ni sikẹ ọre, ne irẹn gie ne a tie rre. 25Ugbẹn vbe Pita ghi ra la owa, Kọniliọs keghi bu ẹre rre, ọ de fi ọre akharha, ọ keghi mu ẹko rhu otọ vbe odaro ẹre. 26Sokpan Pita keghi wẹ ne ọ kpaegbe, ọ wẹẹ, “Kpaegbe ighẹ ọmwa kẹkan mẹ tobọ mwẹ vbe khin.” 27Vbene iran rrie uwu owa nii, Pita kegha gu Kọniliọs guan khian rhinrin ya sẹ ehe ne iran na do vba emwa ni bun ni si egbe koko. 28Ọ keghi tama iran wẹ, “Wa tobọ uwa rẹnrẹn ẹsẹse wẹ, zẹ vbe ne ẹmwẹ ugamwẹ khare, a i gie Ju ya gha tuẹ, ra ne ọ ya gha gu avbe emwa ne ẹ i re Ju mu obọ. sokpan Osanobua rhie ma mwẹ nẹ wẹ ne I ghẹ tie ọmwaikọmwa emwi awua ra ne ọ ma huan. 29Ọre a na miẹn wẹ ugbẹn vbe u gie ne a tie mwẹ, I ma vbe fieghe uhunmwu, I keghi wa gha dee. Rhunmwuda ọnii te I ghi nọ ruẹn nian, vbe u a tie mwẹ baa?”
30Kọniliọs keghi kha wẹẹ, “Odẹ ẹghẹ vbe nian vbe nẹghẹdia, I kegha na erhunmwu vbe uwu owa mwẹ, vbe ẹghẹ ẹgogo eha ọghe avan. Vbe udomwurri, orhiọnkpa ne ọ ya ukpọn nọ fi wain wain mu egbe, keghi mudia ye odaro mwẹ, 31ọ wẹẹ, ‘Kọniliọs, Osanobua họn erhunmwu ruẹn nẹ, ọ vbe ye iwinna itohan ruẹn rre. 32Gie emwa gha rrie Jopa ne u ya tie ọmwa ọkpa ne a tie eni ẹnrẹn Saimọn Pita. Owa Saimọn ne Ọsohian ne ọ rre ọkpẹn ẹzẹ ọre ọ dia.’ 33Ọre I na gie ne a tie ruẹ rre ọwarọkpa, wẹ ne ọ maa na wa vbe gha dee. Banbanna nian, odaro Osanobua ma ghi ye na, ma mu egbe ne a ya họn ẹmwẹ ne Nọyaẹnmwa wẹ ne u ta.”
Ẹmwẹ Pita
34Pita keghi suẹn gha guan ọ wẹẹ, “Mẹ miẹn wẹ vbe ẹmwata, aro ọkpa ọre Osanobua ya ghe emwa hia. 35Ọmwaikọmwa ne ọ mu ohan rẹn, ọ na vbe gha yin ẹse, te irẹn gha rhan obọ miẹn rẹn, ovbi ẹvbo ne ọ rhirhi gha khin. 36Wa rẹn uhunmwu ne ọ gie gie emwa Izrẹl ne ọ na gha wewe Iyẹn Ne ọ maa ọghe ọfumwegbe la ekpa Jesu Kristi ne ọre Nọyan emwa hia. 37Wa rẹn emwi nọkhua ọkpa ne ọ sunu gba otọ Judia hia, ne ọ suẹn vbe Galili, iyeke ẹmwẹ e na sa amẹ ne Jọn gha kpe orhu ẹre. 38Wa vbe rẹn vbekpa ọghe Jesu Kristi ne ovbi e Nazarẹt vbene Osanobua hihiẹ Orhiọn Ne Ọ Huanrẹn kevbe ẹtin yan rẹn hẹẹ. Ọ kegha lele ehe hia khian, ọ na winna iwinna esi, ọ na gha sinmwi emwa hia ne Esu mu gba, rhunmwuda Osanobua yaba ẹre. 39Ma ọrọre osẹe emwi hia ne ọ ru vbe ẹvbo avbe Ju kevbe Jerusalẹm. Iran keghi gbe ẹe rua vbe ne iran na ya ise kan rẹn mu ugbugbe. 40Sokpan vbe ikpẹdẹ ne ogieha, Osanobua keghi huẹn ọnrẹn kpao vbe idin, ọ keghi ruẹe ne ọ ye egbe ne emwa miẹn. 41Ẹ i re emwa hia ọre ọ miẹn ọẹn, sokpan ma ni ne Osanobua zẹ nẹ ne ọ gha re osẹe, ọre ọ miẹn ọẹn. Ma keghi guẹe re a guẹe da vbe Osanobua huẹn ọnrẹn kpaegbe nẹ vbe orinmwi. 42Rẹn keghi yi iyi ne ima ne a ya kpe orhu Iyẹn Ne ọ maa ma emwa hia, ne a vbe sẹ osẹe ọre wẹ rẹn ọrọre ọmwa ne Osanobua zẹe ne ọ gha re ne ọbuohiẹn emwa ni rre agbọn kevbe ni wulo nẹ. 43Avbe akhasẹ hia ta ẹmwẹ ọnrẹn wẹ ọmwaikọmwa ne ọ rhirhi a yae yi, a gha ya orukhọ ẹre hia bọ ẹe la ekpa ẹtin eni ẹnrẹn.”
Iran Ni I Re Ju Miẹn Orhiọn Ne Ọ Huanrẹn
44Vbene Pita wa guan vbe obọ nii, Orhiọn Ne Ọ Huanrẹn keghi tuorre yan iran ni danmwehọ ẹmwẹ ọnrẹn. 45Unu keghi wa yan avbe Ju ne ivbi iyayi ni ke Jopa gha dee wẹ Osanobua vbe tue ọhẹ Orhiọn Ne Ọ Huanrẹn yan avbe iran ne ẹ i re Ju. 46Rhunmwuda, iran keghi họn vbe iran ya ẹvbo ne a i họn guan, iran kegha rho ukpọlọmwẹ Osanobua. Pita keghi kha wẹẹ, 47“Iran na miẹn Orhiọn Ne Ọ Huanrẹn zẹ vbene ima vbe miẹn. Ọmwa ọkpa rrọọ ne ọ gha wẹ ne a ghẹ ye amẹ sa amẹ ne iran ra?” 48Rẹn keghi yi iyi wẹ ne a ya eni Jesu Kristi sa amẹ ne iran. Iran keghi wẹ ne ọ gbe ikpẹdẹ eso vbe ehe ne iran ye.
Currently Selected:
Iwinna 10: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
