Iwinna 9
9
A Fi Sọl Ekhọe Werriẹ
(Iwinna 22:6-16; 26:12-18)
1Vbe uwu ẹghẹ ne a kha na, e Sọl keghi wa gha yan dunmwu ẹgun vbe ne irẹn gha gbele avbe erhuanegbe Nọyaẹnmwa hẹ. Ọ keghi bu Ogie Ohẹn gha khian. 2Ọ na ya miẹn ẹre ebe ọghe rẹn ọna khin, ne ọ rhie mwẹ gha rrie Ọgua ediọn avbe Ju ni rre Damaskọs wẹ, rẹn gha miẹn emwa ni lele odẹ ọghe Nọyaẹnmwa vbe odọ, ne ọ sẹtin munọ ehia, ikpia kevbe ikhuo nọ viọ iran gha di e Jerusalẹm.
3Vbene ọ wa rrie Damaskọs nii, ugbẹn vbe ọ ghi sikẹ ore ẹvbo nẹ, uwanmwẹ ne ọ ke odukhunmwu re keghi wa wan lẹga ẹre vbe udomwurri. 4Rẹn keghi de gbe otọ, ọ keghi họn vbe urhu ọkpa tama rẹn wẹẹ, “Sọl, Sọl, vbọzẹ ne u na zọ mwẹ owẹ?”
5Rẹn keghi nọọn wẹ, “Gha nọ yi Nọyaẹnmwa?”
Urhu nii keghi wanniẹn wẹẹ, “Mẹ ne Jesu ne u zọ ẹre owẹ nọ. 6Sokpan kpaegbe ne u gha rrie adesẹ ore ẹvbo, a gha tama ruẹn emwi ne u gha ru.”
7Iran ni lele Sọl khian keghi mudia, iran ma guan, iran họn Urhu ne ọ guan sokpan iran ma bẹghe ọmwa rhọkpa. 8Sọl keghi kpaegbe vbe otọ, ọ na rhan aro a, sokpan ọ ma bẹghe emwi rhọkpa. Rhunmwuda ọnii, iran keghi rhie ẹre obọ, iran na rhie ẹre la Damaskọs. 9Vbe ikpedẹ eha vbọ ọ ma sẹtin bẹghe, vbe uwu ẹghẹ nii, ọ ma re ọ ma da.
10Ọrhuanegbe ọkpa ne a tie ẹre Ananaias keghi re Damaskọs ugbẹn vbe ọ ghi miẹn umian, Nọyaẹnmwa tama rẹ wẹẹ, “Ananaias!”
Rẹn keghi wanniẹn wẹẹ, “Ghe mwẹ Nọyaẹnmwa.”
11Nọyaẹnmwa keghi tama rẹn wẹẹ, “Mu egbe ne u gha rrie Idunmwu Nọdiae, u gha ghi sẹ owa Judas, u ghi nọ ẹmwẹ ovbi e Tasọs ọkpa ne a tie eni ẹnrẹn Sọl ọ gha na erhunmwu. 12Rẹn ghi rre aro umian, ọ keghi miẹn okpia ọkpa ne a tie eni ẹnrẹn Ananaias vbe ọ la owa do viọ obọ ẹre yan irẹn ne aro ẹre miẹn ehe na rhan, ne ọ dọlegbe gha bẹghe.”
13Ananaias keghi wanniẹn wẹẹ, “Ẹ i re avbiẹ ẹvbo ọ he ta ẹmwẹ ọmwa na ma mwẹ, uza ne ọ he zẹ vbe egbe emwa ruẹn ni rre Jerusalẹm. 14Ogie Ohẹn ọre ọ vbe gbẹn ebe ya rhie asẹ nẹẹn ne ọ gha die Damaskọs ne ọ do munọ emwa ne ọ ghi da tie eni ruẹn.”
15Nọyaẹnmwa tama rẹn wẹẹ, “Gha khian rhunmwuda mẹ zẹ ọe nẹ ne ọ gha re ọguọmwadia mwẹ, ne ọ ya eni mwẹ khian ne a rẹnrẹn ne avbe iran ne ẹ i re Ju kevbe avbe ọba kevbe emwa Izrẹl. 16Mẹ gha tobọ mwẹ rhie ma rẹn oya ne ọ gha re rhunmwuda mwẹ.”
17Rhunmwuda ọnii Ananaias kegha khian, ọ keghi la owa, ọ na viọ obọ yan rẹn, ọ keghi kha wẹẹ, “Sọl ne ọtẹn mwẹ, Nọyaẹnmwa Jesu Kristi ọmwa ne u miẹn vbe odẹ vbe ẹghẹ ne u na gha dee ọre ọ tobọ ẹre gie mwẹ gha dee, ne u miẹn ehe na dọlegbe gha dẹghe, kevbe ne u vbe vuọn ne Orhiọn Ne Ọ Huanrẹn.” 18Vbe ọwarọkpa nii, emwi eso ne Ọ yevbe erhuan ehẹn keghi dele hiẹn aro e Sọl rre, ọ keghi dọlegbe gha dẹghe. Ọ keghi kpaegbe, a na sa amẹ nẹẹn. 19Ọ ghi rri evbare nẹ, orhiọn keghi do la ẹre iwu.
Sọl Kpe Orhu Vbe Damaskọs
Sọl keghi gu avbe erhuanegbe tota vbe evba la ikpẹdẹ eso vbe Damaskọs. 20Ọ keghi wa gha lele Ọgua ediọn iran khian, ọ na gha kpe orhu Jesu, ọ wẹẹ, “Rẹn ọrọre Ovbi Osanobua.”
21Unu keghi yan emwa ni họn ẹn hia, iran kegha nọ wẹẹ, “Ọ na i re oko nii ne ọ gbele emwa ni ya eni na yi vbe Jerusalẹm? Ẹ i re ne ọ do munọ iran, ne ọ vbe viọ iran bu avbe igie ohẹn ọre ọ yae gha die edinran?”
22Sokpan orhu ne Sọl kpe keghi wa dọlegbe gha mu otọ sẹ ayọ. Ẹmwẹ ne ọ ta ya rhan otọ ẹre ighẹ Jesu ọrọre nene Mẹzaia keghi la ehọ sẹrriọ wẹẹ a ma miẹn Ju ọkpa ne ọ sẹtin guee muan ẹnrẹn vbe Damaskọs.
23Ikpẹdẹ ni bun ghi gberra nẹ, avbe Ju keghi do iko si uma wẹ ne iran gbe Sọl rua. 24Sokpan emwa eso keghi do ya ẹmwẹ ha ẹre ehọ we ghe uma ne iran si. Iran kegha khẹ odẹ ne a la la ẹvbo ni asọn kevbe avan ne iran miẹn ehe na gbe ẹe rua. 25Sokpan ọ ghi sẹ asọn ọkpa, iran ni lele Sọl khian keghi muẹn ye okhuae, iran na muẹn la uvun ekẹn ladian.
Sọl Vbe Jerusalẹm
26Sọl kegha rrie Jerusalẹm, ọ keghi te gha ho ne ọ ya egbe ba avbe erhuanegbe. Sokpan iran ma yayi wẹ ọrhuanegbe nọ, ohan rẹn kegha mu iran hia. 27Ẹghẹ nii ọre Banabas na rre ọ keghi rhie ẹre bu avbe ukọ ọ keghi rhan otọ vbene Sọl miẹn Nọyaẹnmwa hẹ vbe odẹ kevbe wẹ Nọyaẹnmwa gu ẹe guan. Ọ keghi vbe tama iran vbe ne Sọl wa gha kpe orhu eni Jesu hẹ vbe Damaskọs vbe ne a i na fian afianma. 28Sọl keghi gu iran tota, ọ na gha kpe orhu Nọyaẹnmwa lele Jerusalẹm hia vbe ne a i na fian afianma. 29Ọ keghi vbe gu emwa Ju ne a biẹ ye ẹvbo Grik guan, ọ keghi vbe gu iran gha muan ẹmwẹ, sokpan iran te ra gbe ẹe rua. 30Ugbẹn vbe emwi na ghi vẹ ne avbe etẹn rẹn, iran keghi rhie Sọl gha rrie Sisaria, iran na ke evba rhie ẹre gha rrie Tasọs.
31Ẹghẹ nii ọre egbe ghi na do rọkhọ esọsi ni rre Judia hia, kevbe Galili kevbe ni rre Sameria. Ọ kegha de igiẹ, ọ na gha muan yọ vbe ekpa iyobọ Orhiọn Ne Ọ Huanrẹn, ọ kegha rrọọ vbene ọ na ye uyinmwẹ ọnrẹn ya ọghọ ne Nọyaẹnmwa.
Pita Vbe Lida Kevbe Jopa
32Pita keghi wa gha khian lele ehe hia, ẹghẹ ọkpa, ọ keghi ya tuẹ emwa Nọyaẹnmwa ni rre Lida. 33Evba ọre ọ na do vba okpia ọkpa ne a tie ẹre Aeneas ne arọ kinmwi, ne ọ ma he sẹtin kpaegbe vbe ukpo erẹnrẹn gha dee. 34Pita keghi khama rẹn wẹẹ, “Aeneas, Jesu Kristi muẹn egbe rran. Kpaegbe ne u dọlọ ukpo ruẹ yi.” Ọwarọkpa nii, Aeneas keghi guakpao. 35Emwa hia ni rre Lida kevbe Siarọn ghi miẹn ọẹn, iran keghi do ya Nọyaẹnmwa yi.
36Okhuo ọkpa ne a tie ẹre Tabita keghi rre Jopa, ọmwa iyayi nọ. (Dọkas ọre a tie ẹre vbe Grik, emwi ne a ya ọnii kha ọrọre ẹrhuẹ.) Ọ lo ẹghẹ ẹre ye iwinna ne ọ maa kevbe ne ọ gha ye avbe ivbiogue obọ. 37Ẹghẹ nii, uhunmwu ova keghi dekun ẹnrẹn, ọ na wu. Iran ghi khuẹ ikun ẹnrẹn nẹ, iran keghi muẹn ye ughugha ọkpa vbe egedege. 38Jopa ma rrei gbe vbe Lida. Avbe erhuanegbe ni rre Jopa ghi họn ighẹ Pita rre Lida, iran keghi gie arhunmwu eva bu ẹre wẹẹ, “Zẹgiẹ bu ima gha dee.” 39Rhunmwuda ọnii, Pita mu egbe ọ keghi lele iran gha khian. Ọ ghi sẹ evba, iran keghi rhie ẹre gha rrie nene ughugha vbe egedege. Avbe ẹgbẹe hia keghi mama rhuẹe, iran gha viẹ, iran kegha viọ ẹwu ọkotọ kevbe ọkodukhunmwu ne a sele vbe ẹghẹ ne ọ na rre agbọn ma emwa. 40Pita keghi viọ iran hia ladian vbe ughugha nii, ọ keghi diguẹ, ọ na na erhunmwu, ọ mu aro da ikun ẹnrẹn nii, ọ wẹẹ, “Tabita, kpaegbe!” Rẹn keghi rhan aro ua, ọ ghi bẹghe Pita, ọ keghi kpaegbe tota. 41Pita keghi nien obọ ya ru iyobọ nẹ ne ọ kpaegbe, ọ keghi tie emwa iyayi nii, kevbe avbe ẹgbẹe, ọ keghi rhie ẹre ne iran ke ẹe kevbe ẹmwẹ ne unu. 42Emwi na keghi wa gbigbi la Jopa hia, emwa ni bun keghi ya Nọyaẹnmwa yi. 43Pita keghi gbe ikpẹdẹ ni bun vbe Jopa vbe owa ọsohian ọkpa ne a tie ẹre Saimọn.
Currently Selected:
Iwinna 9: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
