Iwinna 8
8
1Ọ keghi wa yẹ Sọl wẹ a gbe ẹe rua.
E Sọl Kegha Kpokpo Esọsi
Ẹdẹ ne ẹdẹrriọ zẹẹ ọre esọsi ne ọ rre Jerusalẹm suẹn gha miẹn ukpokpo. Emwa ni yayi hia keghi zagha lele iwewe Judia kevbe Sameria hia, avbe ukọ ọre ọ ghi de kẹe. 2Emwa ni ya ekhọe ga eso keghi ya re Stivin, iran na keghi kakabọ viẹ ọe ẹsẹse.
3Sokpan e Sọl kegha hia ne ọ wa fuẹn esọsi rua fẹẹrẹ, ọ na gha ke owa ọkpa la ọvbehe, ọ na gha munọ emwa ni yayi hia ikpia kevbe ikhuo, ọ na gha hẹ iran ku ẹwẹdọ.
A Kporhu Iyẹn Ne Ọ Maa Vbe Sameria
4Avbe emwa ni yayi ni zagha lele ehe hia nii kegha kpe orhu ẹmwẹ nii. 5Filip kegha rrie adesẹ ore ẹvbo Sameria, ọ ya kpe orhu ẹmwẹ Mẹzaia ma emwa ni rre evba. 6Emwa ni bun ni rre evba keghi wa kakabọ gha danmwehọ ẹmwẹ ne Filip ta vbe iran họn ẹmwẹ ọnrẹn, kevbe iran miẹn avbe iwinna ọyunnuan ne ọ winnaẹn. 7Avbe orhiọn dan kegha so ladian vbe uwu emwa ni bun, a kevbe mu arọe kevbe uke ni bun egbe rra. 8Oghọghọ nọkhua keghi wa gha rre Sameria.
9Okpia ọkpa ne a tie ẹre Saimọn keghi rre ẹvbo ni, ọ keghi kpẹe kherhe ne ọ kegha zẹ ọbo edunna ya runran emwa Sameria. Ọ kegha kha ighẹ ọmwa nọkhua rẹn khin. 10Emwa hia ni rre ore ẹvbo ni, ke egbe ibiẹka ya sẹ egbe eniwanrẹn, keghi wa gha danmwehọ ẹre ẹsẹse. Iran kegha kha wẹẹ, “Rẹn ọrọre ẹtin ọghe Osanobua ọkpa ne a tie ẹre ‘Ẹtin Nọkhua.’ ” 11Ọ kpẹe sẹrriọ ne ọ kegha ya obọ edunna rẹn runran iran wẹ te emwa hia ghi danmwehọ ẹre ẹsẹse. 12Sokpan iran ghi ya ikporhu e Filip yi, ikporhu ọghe Iyẹn Ne ọ maa ọghe Arriọba Osanobua kevbe eni Jesu Kristi, a kegha sa amẹ ne iran, ke ikpia kevbe ikhuo. 13Saimọn tobọ ẹre keghi vbe yayi, a ghi sa amẹ nẹẹn nẹ, ọ keghi wa ya egbe ba e Filip, unu keghi yaẹn ẹsẹse vbe ọ miẹn iwinna ama kevbe ọyunnuan ne Filip gha winna.
14Avbe ukọ ni rre Jerusalẹm keghi họn wẹ emwa ni rre Sameria rhan obọ miẹn ẹmwẹ Osanobua, iran na gie Pita vbe Jọn bu iran yo. 15Ugbẹn vbe iran ghi rre, iran keghi na erhunmwu ne iran ni yayi ne iran miẹn Orhiọn Ne Ọ Huanrẹn rhie. 16Rhunmwuda Orhiọn Ne Ọ Huanrẹn ma he tuorre yan iran rhọkpa, te a he ya eni Nọyaẹnmwa Jesu sa amẹ ne iran kẹkan. 17Pita kevbe Jọn keghi viọ obọ yan iran, iran keghi miẹn Orhiọn Ne ọ huanrẹn rhie.
18Saimọn ghi miẹn wẹ a rhie Orhiọn ne iran vbe avbe ukọ viọ obọ yan iran, rẹn rhie igho ne Pita vbe Jọn, 19ọ wẹẹ, “Wa rhie ẹtin na ne imẹ wẹ ọmwa ne imẹ a rhirhi vbe viọ obọ mwẹ yan, ne ọ vbe gha miẹn Orhiọn Ne Ọ Huanrẹn rhie.”
20Sokpan Pita wanniẹn tama rẹn wẹẹ, “Te uwẹ vbe igho ruẹ ra gba la ọrhiae rrie, ne u na gha ro ighẹ u gha sẹtin ya igho dẹ emwi ne Osanobua ya ru ọmwa ẹse. 21Iwinna mwa ma kan ruẹn, u i vbe mwẹ oghae vbọ, rhunmwuda ekhọe ruẹ ma mudia ẹse vbẹ odaro Osanobua. 22Rhunmwuda ọnii, ro iro fi uyinmwẹ werriẹ vbe emwi dan ne u mwamwaẹn na, ne u vbe na erhunmwu ghe Nọyaẹnmwa, ne ọ miẹn ehe na ya ẹe bọ ọ ighẹ ne u na gha zẹ egbe iro vbe nian vbe ekhọe ruẹ. 23Rhunmwuda mẹ miẹn nian wẹ okuosu oyọmwadọmwa wa vuọn ekhọe ruẹ, orukhọ vbe mu ẹn izẹghede.”
24Saimọn tama Pita kevbe Jọn wẹẹ, “Lahọ wa rinmwian Nọyaẹnmwa mẹ ne emwi ne uwa tae na rhọkpa ghẹ sunu vbe egbe mwẹ.”
25Iran ghi na iyẹn ọma ne iran miẹn nẹ, iran na vbe kpe orhu e Nọyaẹnmwa. Iyeke ọnii Pita kevbe Jọn keghi werriegbe gha rrie Jerusalẹm. Vbe iran vbe khian vbe odẹ, iran kegha vbe kpe orhu Iyẹn Ne ọ maa vbe igue Sameria ni bun.
Filip Kevbe Ọka Iwinna Etiopia
26Odibo Nọyaẹnmwa ọkpa keghi tama Filip wẹẹ, “Mu egbe ne u la odẹ ne ọ laghe odẹ okuọ, odẹ ne ọ ke Jerusalẹm rrie Gaza.” (Uwu ato ọre odẹ na la gberra.) 27Rhunmwuda ọnii, Filip mu egbe, ọ na gha khian. Ọghẹrriẹnoguan ọkpa, ọmwa Etiopia keghi ke ehe di owa. Okona keghi wa re ọmwa kpataki, rẹn ọrọre ọmwa ne ọ gbe aro ghe aza ọba nokhuo ra Kandes ọghe Etiopia. Te irẹn yo Jerusalẹm ya ga Osanobua. 28Owa ọre ọ ghi de vbe ẹghẹ na, ọ keghi tota ye uwu ikẹkẹ okhuae, ọ kegha tie ebe akhasẹ Aizaia. 29Orhiọn Ne Ọ Huanrẹn keghi tama Filip wẹẹ, “Tua okhian ne u sikẹ ikẹkẹ okhuae na.” 30Filip rhulẹ sikẹ ọre, ọ keghi họn vbe ọ tie ebe akhasẹ Aizaia ọ keghi nọ rẹn wẹẹ, “U rẹn emwi ne a yae kha nian ighẹ ebe e u tie na?”
31Ọka iwinna ni wanniẹn tama rẹn wẹẹ, “Vbe I a ghi ra na rẹn ọnrẹn hẹ vbe ẹ i re te I miẹn ne ọ rhan otọ ẹre ma mwẹ.” Rẹn keghi tama Filip ne ọ la uwu ikẹkẹ okhuae nii do gu irẹn tota. 32Ehe ne ọ gha tie vbe ebe ọre ọna khin:
“Rẹn yevbe ohuan ne a mu ne a ra ya gbe ua,
rẹn yevbe ovbiohuan ne ọ ma tu vbe a giagia re eto.
Ọ ma ta ẹmwẹ ọkpa.
33Iran fa ẹre rua, iran bu eku gbe ẹe.
A i miẹn ne ọ gha ghi sẹtin kha nian wẹ ghe uniẹn ivbi ẹre.
Rhunmwuda, ẹdẹ ọre vbe agbọn na fo nẹ.”
34Ọka iwinna ni tama Filip wẹẹ, “Tama mwẹ, de ọmwa ne akhasẹ na kha yi? Egbe ẹre ra ọmwa ọvbehe?” 35Filip keghi suẹn gha guan, ọ ke ehe ne ọ tie re vbe ebe na la rọ, ọ na kpe orhu Iyẹn Ne ọ maa ọghe Jesu ma rẹn. 36Vbene iran khian vbe odẹ nii, iran keghi do sẹ ihe ọkpa ne amẹ ye, ọka iwinna ni keghi kha wẹẹ, “Ghe amẹ vbe emwa na, de emwi ne ọ gha zẹ ne a i ra na sa amẹ mẹ nian?” [ 37Filip khama rẹn wẹẹ, “A sẹtin sa amẹ nuẹ a deghẹ u ya ekhọe ruẹ hia yayi?” Rẹn wanniẹn wẹ, “I yayi, I yayi ghe Ovbi Osanobua ọre Jesu Kristi khin.”]
38Ọka iwinna nii keghi wẹ ne ikẹkẹ okhuae ni mudia. Iran eva, Filip kevbe ọka iwinna nii keghi gba la uwu amẹ, Filip ke sa amẹ nẹ ẹn. 39Ugbẹn vbe iran ghi ke uwu amẹ ladian, Orhiọn Nọyaẹnmwa keghi mu Filip kpao. Ọka iwinna nii ma ghi miẹn ọẹn sokpan ọ keghi si okhian, ẹko ẹre keghi vuọn ne oghọghọ. 40Filip ghi ghe Asdọd rẹn ghi ye, ọ keghi wa la ẹvbo ni rre eni hia gba, ọ na gha kpe orhu Iyẹn Ne ọ maa ọ te ya sẹ Sisaria.
Currently Selected:
Iwinna 8: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
