Iwinna 6
6
Iran Ihinrọn Ni Ru Iyobọ
1Ọ ghi kpẹe kherhe, vbe avbe erhuanegbe ghi bun yọ nẹ, imuaẹmwẹ keghi do gha rrọọ ne avbe Ju ni rre owa kevbe avbe Ju ni zẹ ẹvbo Grik. Avbe Ju ni zẹ Grik keghi kha wẹ iran gha ghae evbare, iran i ghae sẹ avbe ẹgbẹe ni re ọghe iran vbọ obọ. 2Rhunmwuda ọnii, iran ne ukọ iweva keghi tie iko ọghe avbe erhuanegbe hia, iran tama iran wẹẹ, “Ọ ma ke ne a bizu gbe ikporhu ẹmwẹ Osanobua ne a mu aro ye ẹmwẹ igho na dọlọ yi. 3Rhunmwuda ọnii, etẹn mwẹ, wa viọ arhin ihinrọn ladian vbe uwu uwa, emwa n a rẹnrẹn ighe iran vuọn ne Orhiọn Ne Ọ Huanrẹn kevbe ẹwaẹn, ne a mu iwinna na ye iran obọ. 4Ẹghẹ nii, ma tobọ ima ghi wa mu aro ye ẹmwẹ erhunmwu ne a ka ke ikporhu, vbe ne a i ghi na ru emwi ọvbehe ba ẹre.”
5Iro ne avbe ukọ zẹe na keghi yẹ iran hia, rhunmwuda ọnii, iran keghi zẹ Stivin, ọmwa ne ọ vuọn ne Iyayi ke Orhiọn Ne Ọ Huanrẹn, ke Filip, Prokorọs, Nikanọ, Timọn, Pamenas, Nikolas ne ovbi Antiọk, ne ẹ i te re Ju ne ọ ghi degbe la e Ju. 6Iran viọ iran gie avbe ukọ, iran keghi na erhunmwu ne iran, iran na viọ obọ yan iran uhunmwu.
7Rhunmwuda ọnii, ẹmwẹ Osanobua kegha vẹ khian. Avbe erhuanegbe ni rre Jerusalẹm kegha muan yọ, nibun vbe uwu avbe ohẹn keghi vbe do yayi.
Umumwẹ Stivin
8E Stivin keghi re ọmwa ne Osanobua fiangbe ẹsẹse kevbe ne ọ vbe mwẹ ẹtin, rẹn keghi winna iwinna ama, kevbe ọyunnuan ni bun vbe ẹbu emwa nii. 9Sokpan emwa eso kegha kpankan ẹre ẹmwẹ, iran na kegha re emwa Ọgua ediọn Eniyan Egbe iran (zẹ vbene emwa tie iran) uwu iran na ọre avbe Ju ni ke Sameria kevbe Alẹkzandria rre ye. Iran na kevbe avbe Ju eso ni ke Silisia kevbe Asia rre keghi suẹn gha muan Stivin ẹmwẹ. 10Sokpan Orhiọn keghi rhie ẹwaẹn nọkhua ne Stivin, sẹrriọ wẹ, a ma miẹn ọmwa ne ọ sẹtin mu aro da Stivin. 11Iran keghi rhunmwuda ọna ya viọ igho ne emwa eso, ne iran do kha wẹẹ, “Ma họn ẹn vbe ọ fi unu gie Mosis kevbe Osanobua.” 12Erriọ iran ya ruẹn ẹmwẹ ye avbe emwa kevbe avbe ediọn kevbe iran ni ma emwa Uhi ẹko. Iran na bu Stivin gha dee, iran mu ẹn, iran na rhie ẹre gha die odaro Iko. 13Iran keghi viọ emwa eso rre wẹ ne iran do sẹ osẹe ohoghe gbe ẹe. Iran wẹẹ, “Te okona wa fi unu gie Ọgua Osa mwa ne ọ huanrẹn kevbe uhi Mosis. 14Rhunmwuda, ma họn ẹn vbe ọ khare wẹẹ, Jesu ne Ovbi e Nazarẹt na, gha do guọghọ Ọgua Osa sẹ otọ, ọ ghi vbe fi iyi otọe mwa ne Mosis ma ima re werriẹ.” 15Emwa ni rre Iko ni hia ke wa tọn aro ye Stivin egbe, iran keghi miẹn wẹ, ugbaro ẹre wa yevbe ugbaro odibosa.
Currently Selected:
Iwinna 6: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
