Iwinna 5
5
Ananaias Kevbe Safira
1Sokpan, okpia ọkpa kegha rrọọ ne a tie ẹre Ananaias, a keghi vbe tie amwẹ ọnrẹn Safira. Rẹn keghi vbe khiẹn eso vbe emwi ne ọ mwẹ. 2Sokpan rẹn keghi fian rhie ye otọ vbe igho ẹre, zẹ vbe ọghe obọ ẹre, aro ọvbokhan rẹn kevbe sẹ ọe, ọ keghi mu ne ọ dekẹe gie avbe ukọ. 3Pita keghi tama rẹn wẹẹ, “Ananaias, vbe u a rhie otọ ne Setan ya hin yan orhiọn ruẹn hẹ yi, ne ọ na wẹ ne u do ta ohoghe ma Orhiọn Ne Ọ Huanrẹn, ne u na fian obọkpa rhie hin rre Vbe igho ne u khiẹn emwi ne u mwẹ re? 4Ẹghẹ ne u ma na he khiẹn emwi ni, wẹ ọre ọ yan rẹn. Ugbẹn vbe u vbe khiẹn ọẹn nẹ, wẹ ọ ye vbe yan rẹn. Vbe ekhọe ruẹ ghi na gue zẹ iro hẹ yi ne u ru egbe emwi vbe nian? Ẹre ọmwa ne agbọn ọre u ta ohoghe ma, Osanobua ọre u ta ohoghe ma.” 5Ananaias ghi wa họn ẹmwẹ na, ọ degbe otọ, ọ keghi wu. Ikponi keghi rhọ ku emwa hia ni họn ẹmwẹ na. 6Avbe igbama keghi la owa, iran keghi gbalọ ikun ẹnrẹn, iran mu ẹn ladian, iran na ya tọn ẹn ye otọ.
7Ọ ghi rre omwa ẹgogo eha ne emwi na sunu, ọvbokhan rẹn keghi vbe la owa, sokpan ọ ma rẹn emwi ne ọ sunu. 8Pita keghi khama rẹn wẹẹ, “Tama mwẹ, erriọ ọ sẹe ra ighe igho ne uwẹ vbe ọdafọn khiẹn emwi uwa re?”
Rẹn keghi wanniẹn wẹẹ, “Ẹn, erriọ ọ sẹe.”
9Rhunmwuda ọnii, Pita tama rẹn wẹẹ, “Vbọzẹ ne uwẹ vbe ọdafọn na gha si uma wẹ, ne uwa do danmwẹ Orhiọn Nọyaẹnmwa ghee? Iran ni ya tọn ọdafọn ye otọ wa rre onurho nian, iran gha vbe mu uwẹ ladian ba ẹre.” 10Vbe ọwarọkpa nii, ọ keghi de gbe otọ vbe akharha ẹre, ọ na wu. Avbe igbama nii ghi la owa, iran do vba ighe ọ wu nẹ, iran keghi mu ẹn ladian, iran na ya tọn ẹn ye otọ diake ọdafọn ọnrẹn. 11Orrirri keghi gbe ku emwa esọsi hia kevbe emwa ọvbehe hia ni họn ẹmwẹ na.
Iwinna Ama Kevbe Ọyunnuan
12Avbe Apọsol kegha winna iwinna ama kevbe ọyunnuan ni bun vbe adesẹ avbe emwa. Iran ni yayi hia kegha miẹn egbe vbe Ugha Solomọn. 13Vbene emwa hia ta ẹmwẹ iran ne ọ maa sẹ, a ma miẹn orhiọnkpa ne ẹ i rre otu ni, ne ohan gie ẹe ye egbe ba iran. 14Sokpan, emwa ni bun ni ya Nọyaẹnmwa yi, ke ikpia kevbe ikhuo, kegha ya egbe ba iran. 15Otiti emwi ne avbe ukọ ru keghi sẹrriọ wẹ, te emwa ghi viọ avbe ọkhọnmwọ ladian, iran ghi viọ iran lovbiẹ ye ukpo ra ewa vbe odẹ wẹ, a deghẹ pita ghi gberra, ne aghọnghọn rẹn de kan eso vbe uwu iran. 16Emwa kegha vẹ ke ẹvbo ni rre ọkpẹn Jerusalẹm rre, iran viọ emwa iran ni khuọnmwi kevbe ni mwẹ orhiọn esu gha de, a keghi mu ehia egbe rran.
Iran Zẹ Avbe Ukọ Owẹ
17Ẹghẹ ni ọre ogie ohẹn kevbe ivbi otu ẹre, deba otu emotọ ọghe avbe Sadusi, na wa kakabọ gha gbe ọvo avbe ukọ, iran na ghi wẹ, iran gha gualọ odẹ ne iran gha la iran re. 18Iran keghi munọ avbe ukọ, iran keghi khui iran ye ẹwẹdọ. 19Sokpan vbe asọn nii, odibo e Nọyaẹnmwa keghi kie urho ẹwẹdọ nii, ọ viọ avbe ukọ ladian, ọ keghi tama iran wẹẹ, 20“Wa gha rrie uwu Ọgua Osa ne uwa ya gu emwa hia guan vbe kpa arrọọ ọghe ọgbọn na.” 21Avbe ukọ keghi wa ru vbene ọ tama iran. Ẹdẹ ghi gbe, iran keghi la uwu Ọgua Osa, iran kegha ma emwa emwi.
Ogie Ohẹn kevbe ivbi otu ẹre keghi tie ediọn avbe Ju gha die iko ọgbakha, rẹn keghi gie gha rrie ẹwẹdọ ne a ya viọ avbe ukọ nii do mudia ye iran odaro. 22Sokpan ugbẹn vbe emwa ne a gie sẹ ẹwẹdọ, iran ma ghi miẹn avbe ukọ vbe evba, iran keghi bu Iko ni gha dee, iran tama iran wẹẹ, 23“Ma sẹ ẹwẹdọ ni, ma do vba ighẹ a khui urho ẹre hia, iran ni khẹ odẹ keghi vbe mudia ye dọmwadẹ onurho, sokpan ma ghi kie urho nian, ma ma miẹn ọmwarhọkpa vbe uwu ẹre!” 24Ugbẹn vbe ọkaolotu iran ni gbe aro ghe Ọgua Osa kevbe avbe igie ohẹn họn ẹmwẹ na, iro keghi han iran wẹ, vbe iran ghi ru hẹ ighẹ avbe ukọ na? 25Ẹghẹ ni ọre okpia ọkpa na do tama iran wẹẹ, “Ghe avbe emwa ne uwa viọ khui ye ẹwẹdọ wa rre uwu Ọgua Osa nian, iran gha ma emwa emwi.” 26Olotu iran ni khẹ odẹ keghi viọ emwa rẹn ba egbe, ọ keghi ya viọ avbe ukọ werriegbe rre. Sokpan iran ma ghi zaro mu iran, rhunmwuda ohan emwa mu iran ne iran ghẹ ya filo okuta gbele iran an.
27Iran keghi viọ avbe ukọ la owa, iran na viọ iran mudia vbe odaro Iko, Ogie Ohẹn keghi nọ iran ọta: 28“Te ima wa mobọ yan ma uwa wẹ ne uwa ghẹ ghi ya eni ọmwa na ma ọmwarhọkpa emwi. Wa ma miẹn emwi ne uwa ru nian. Wa ya iruẹmwi uwa gba Jerusalẹm hia, te uwa ghi ra gie a lẹ ẹmwẹ uwu ẹre ginna ima obọ.”
29Pita kevbe avbe ukọ nekpa wanniẹn wẹẹ, “Ne Osa khare ọre ima ra ya ru emwi ighẹ ẹ i re ne emwi ne agbọn khare. 30Osanobua ọ ghe avbe erha mwa ọre ọ huẹn Jesu kpaegbe vbe idin iyeke vbe uwa kan rẹn mu ugbugbe nẹ, ne uwa na gbe ẹe rua. 31Osanobua keghi tọn ẹn mu gha rrie obọ erha ọmwa ẹnrẹn zẹ vbe ọkaolotu kevbe Ọmiọnmwafan, ne ọ miẹn ehe na rhie ẹghẹ ne ivbi Izrẹl ya ro iro fi uyinmwẹ werriẹ, ne a miẹn ehe na ya orukhọ iran bọ iran. 32Ma ọrọre osẹe emwi na hia, ma kevbe Orhiọn Ne Ọ Huanrẹn ne Osanobua ya ru emwa hia ni họn ẹmwẹ ọnrẹn ẹse.”
33Emwa ni rre Iko ghi wa họn ẹmwẹ na, okuosu keghi wa rri iran, sẹrriọ ne iran na wa ta ẹe ighẹ te iran gbele avbe ukọ rua. 34Sokpan, ọkpa vbe uwu iran, e Farisi ne a tie eni ẹnrẹn Gamaliẹl, ọmwa ne ọma emwa uhi, ne emwa hia wa ya ọghọ na keghi guakpao vbe Iko ni, ọ na wẹ ne iran viọ avbe ukọ ghe ore. 35Rẹn keghi tama Iko wẹẹ, “Wa ne ivbi Izrẹl, wa mwẹ ẹwaẹn vbe emwi ne uwa ho ne uwa ru iran na re. 36Vbe nẹdẹ eso, Tiudas ladian ọ wẹ a ma he miẹn egbe irẹn ẹdẹ, emwa ni sẹ uri eva keghi ye egbe ba ẹre. Sokpan, a ghi gbe ẹe rua nẹ, emwa ni te lele ẹe khian keghi zagha, otu ne ọ mu gbọọ keghi wiẹghẹ ua. 37Iyeke ọnii, Judas ne ovbi e Galili keghi vbe ladian vbe ẹghẹ ne a na gha ka ẹvbo, ọ keghi vbe silo emwa ni bun ba egbe, sokpan ugbẹn vbe a ghi vbe gbe ẹe rua nẹ, iran ni lele ẹe khian kevbe zagha kua. 38Vbe ọghe ne a ye na nian, I gha tama uwa wẹ ne uwa ghẹ ru iran na emwi rhọkpa. Wa sẹ iran rae rhunmwuda, deghẹ emwamwa kevbe iwinna iran na ighẹ ọtọn otọ rre ọghe ọmwa ne agbọn nọ, te ọ ra vbe wiẹghẹ ua. 39Sokpan, ọ gha re emwi ne ọ ke obọ Osanobua rre nọ, obọ uwa i sẹtin ke okhunmwu ne iran. Ne a ghẹ miẹn wẹ, te uwa ghi mu aro igbinna da Osanobua.”
Iko ni keghi wa rhie ude ne Gamaliẹl buru. 40Iran keghi tie avbe ukọ la owa, iran ghi gbe iran asan nẹ, iran keghi dọlegbe yan ma iran ne iran ghẹ ghi ta ẹmwẹ rhọkpa vbe eni Jesu, iran na zẹ iran obọ. 41Avbe ukọ keghi ladian vbe iko, ẹko iran keghi vuọn ne oghọghọ wẹ Osanobua vbe ka iran ye emwa ni sẹe ni gha rri oya efaa ba ẹmwẹ eni Jesu. 42Iran kegha yo Ọgua Osa ugbugbẹhia. iran keghi vbe gha ya dọmwadẹ owa ya gha ma emwa emwi kevbe ne iran gha kpe orhu Iyẹn Ne ọ maa ọghe Jesu ne Mẹzaia.
Currently Selected:
Iwinna 5: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
