Iwinna 4
4
Pita Kevbe Jọn Vbe Odaro Iko
1Ehe ne Pita vbe Jọn na wa gu avbe emwa ni guan, avbe igie ohẹn, olotu iran ni khẹ odẹ vbe Ọgua Osa, kevbe avbe Sadusi keghi bu iran gha dee. 2Ohu mu iran rhunmwuda ne avbe ukọ na ma avbe emwa ni emwi wẹ Jesu rhiọkpaegbe vbe idin, ọna keghi re emwi ne a ya ta ẹe rhuan wẹ, a gha ye huẹn emwa ni wulo nẹ hin idin rre. 3Rhunmwuda ọnii, iran mu nọ iran, iran keghi khui iran ye ẹwẹdọ vbe ẹdẹ te ya gbe, rhunmwuda ẹdẹ khian nẹ. 4Sokpan iran ni họn ẹmwẹ nii keghi yayi, ikpia ni rrọọ sẹ omwa arriaisẹn isẹn.
5Ẹde ghi gbe, olotu avbe Ju, avbe ediọn, kevbe iran ni ma emwa Uhi, keghi si egbe koko vbe Jerusalẹm. 6Iran keghi ya vba Anas ne ogie ohẹn kevbe Kaiafas, Jọn kevbe Alẹkzanda deba emwa eso vbe ẹgbẹe ogie ohẹn. 7Iran viọ avbe ukọ ni mudia ye odaro iran, iran keghi nọ iran wẹẹ, “Vbe uwa ya ru emwi na hẹ? De ẹtin ne uwa mwẹ? de eni ọmwa ne uwa ya ruẹe?”
8Pita keghi vuọn ne Orhiọn Ne Ọ Huanrẹn, ọ wanniẹn iran ẹmwẹ wẹẹ, “Wa ne olotu emwa kevbe uwa ne ediọn. 9Deghẹ ẹmwẹ iwinna esi ne a winnaẹn vbe egbe uke ni, kevbe vbene a ya sinmwi ẹn hẹ, ọre uwa nọ ima ẹre na, 10I ho ne uwa rẹn nian, ke uwa kevbe ivbi Izrẹl hia wẹẹ, ẹtin eni Jesu ne ovbi Nazarẹt ọre ọ ya mudia vbe odaro uwa banbanna, vbe egbe ne ọ rran rẹn giẹnrẹn. Jesu ne uwa kan mu ugbugbe, ne Osanobua huẹn kpaegbe vbe idin. 11Jesu na ọre ebe ta ẹmwẹ ọnrẹn wẹẹ,
“ ‘Okuta ne uwa ni bọ owa wẹ, ẹ i maa
do khian okuta a ma miẹn a i ru.’
12Obọ ẹre ọkpa ọre a la miẹn imiẹnfan rhunmwuda eni ọvbehe i rrọọ, vbe agbọn na, ne Osanobua rhie ne emwa wẹ a gha lae miẹn imiẹnfan.”
13Unu keghi mobọ yan emwa ni rre Iko nii vbe iran miẹn vbene Pita kevbe Jọn din hẹ, sẹe hia vbe iran ghi vbe do rẹn wẹ emwa kẹkan ni ma ruẹ ebe ọre iran khin. Ẹkpo nii ọre iran na do yerre wẹ Jesu ọre iran ka gha lele khian. 14Iran ma miẹn ẹmwẹ ọkpa ta, rhunmwuda ọmwa ne a mu ẹre egbe rran nii, mudia ke Pita kevbe Jọn vbe evba. 15Rhunmwuda ọnii, iran na wẹ ne iran ladian vbe owa ne a na bu ohiẹn. Iran keghi suẹn gha gu egbe iran zẹ iro. 16Iran nọ egbe iran wẹẹ, “Vbe a ra ru emwi na hẹ yi? Emwa ni rre Jerusalẹm hia rẹnrẹn ighẹ iran ọre ọ winna iwinna ọyunnuan na, ẹ i gia muan hiehie. 17Sokpan ne a miẹn ehe na gbe ukhu ẹre ua, ne ọ ghẹ hin obarowa vbe uwu ẹbu emwa na, wa gie a yan ma iran ne iran ghẹ ghi ya eni Jesu gu ọmwa rhọkpa guan.”
18Rhunmwuda ọnii, iran keghi tie iran la owa, iran yan ma iran wẹ ne iran ghẹ gie a họn ẹn wẹ iran ye ya eni Jesu gu ọmwaikọmwa guan, a ghẹ i ghi ya ẹe ma emwa emwi. 19Sokpan Pita kevbe Jọn zẹ wanniẹn iran wẹ, “Wa tobọ uwa ta ne ọ maa sẹ vbọ vbe odaro Osanobua, ne a ru ne uwa khare ra ne a ru ne Osanobua khare? 20Rhunmwuda, ẹ i gie ima ru wẹ emwi ne aro ima sẹe nẹ, ehọ mwa vbe họn ẹn nẹ, ne a ghẹ ghi ta ẹe ladian.” 21Iko ni keghi dọlegbe tua unu muẹn ma iran, iran keghi fannọ iran kua. Iran ma miẹn emwi de obọ mu ya rri iran oya rhunmwuda, emwa hia keghi wa gha rho Osanobua ye emwi ne ọ sunu. 22Ọmwa ne iran winna ọyunnuan ya mu ẹre egbe rran na sẹ ọmọ ukpo iyeva.
Emwa Niyayi Na Erhunmwu Udinmwẹ
23Iran ghi fannọ iran kua nẹ, Pita kevbe Jọn keghi bu ihua iran, iran keghi na iyẹn ma iran vbene avbe igie ohẹn kevba avbe ediọn kha hẹ. 24Iran ghi họn ẹmwẹ na, iran keghi ku urhu gbe ya na erhunmwu ghe Osanobua wẹẹ, “Ayi ne Ọ yi, nọ yan ẹrinmwi kevbe agbọn, okun kevbe emwi hia ni re uwu iran. 25Vbekpa Orhiọn Ne Ọ Huanrẹn, wẹ la unu erha mwa odede ighẹ Devid ne ọguọmwadia ruẹ ta ẹe wẹẹ,
“ ‘Vbe ọ si okuosu ye avbe Ni ma yayi egbe yi?
Vbe ọ ye avbe emwa gha si uma ne ẹ i gba yi?
26Iran ne avbe ọba agbọn gha mu egbe,
iran ni khaemwisẹ gha si uma ẹkhokho,
ne iran mu aro da Nọyaẹnmwa kevbe Mẹzaia ẹre.’
27Vbe ẹmwata, Hẹrọd kevbe Pọntiọs Pailet deba iran Ni ma yayi kevbe emwa Izrẹl, ore ẹvbo na iran na ko iko Jesu ne Ọguọmwadia ruẹ Ne ọ huanrẹn ne uwẹ ya ru Mẹzaia. 28Iran si egbe koko, ne iran ru avbe emwi ni ne uwẹ ya ẹtin ruẹn kevbe iho ọwuẹ ta ye otọ nẹ wẹẹ, ọ gha sunu. 29Wanwan na nian Nọyaẹnmwa, ghe vbene iran yan hẹẹ, rhie ẹtin ne ima ne eguọmwadia ruẹ, ne ima sẹtin gha kpe orhu ẹmwẹ ruẹn vbe ne a i na fian afianma. 30Nien obọ ruẹ ladian ne u ya ẹe mu emwa egbe rran, vbe rhie ne ima ne a gha ye eni Jesu, Ọguọmwadia ruẹ ne ọ huanrẹn winna iwinna ama kevbe ọyunnuan.”
31Ugbẹn vbe iran ghi na erhunmwu nẹ, otọe keghi mu rueghe vbe ehe ne iran ye, iran hia keghi vuọn ne Orhiọn Ne Ọ Huanrẹn, iran keghi ya gha kpe orhu ẹmwẹ Osanobua vbe ne a i na fian afianma.
Okulugbe Emwi Hia
32Otu iran ni yayi keghi gha rrọọ vbe ekhọe ọkpa kevbe orhiọn ọkpa. Arhiọnkpa ne ọ vbe tie emwi ne ọ mwẹ ọghe obọ ẹre, ẹ i rrọọ. Iran hia ghi gha gba ghae emwi ne iran mwẹ, ọ gba obọ. 33Avbe ukọ keghi gha ya ẹtin nọkhua sẹ osẹe arhiọkpaegbe ọghe Nọyaẹnmwa Jesu. Osanobua keghi wa vbe gha tue afiangbe yan iran hia. 34A ma vbe miẹn arhiọnkpa ne ọ rre ivbabọ vbe uwu iran. Iran ni mwẹ owa kevbe ni mwẹ ugbo keghi ya gha viọ khiẹn. 35Iran na gha viọ igho ne iran miẹn vbọ gie avbe ukọ, iran ghi vbe gha igho ni gba emwa hia obọ, vbe ne ọ gha sẹ iran lo.
36Ẹghẹ ni ọre Josẹf, e Livai ọkpa ne a biẹe vbe Saiprọs, ne avbe ukọ he ẹre Banabas (emwi ne a ye ọnii kha ọre ọmwa ne ọ ye udu hu ọmwa,) 37na ya khiẹn otọ ẹre, ọ Keghi viọ igho ne ọ miẹn vbọ gha dee, ọ keghi viọ ehia ne avbe ukọ.
Currently Selected:
Iwinna 4: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
